Ogamuroromela Yehova Onele Okalawo!

1. Iyo ninfunela nni nipangarhazo?

NOTENE ninofuna nipangarhazo. Ninofwanyiwa makatamiho ottiyana–ttiyana mwigumini mwehu. Ninga motagiha, wuluvala, oredda na okweliwa. Attu ena anotabutxiwa vaddiddi. Elabo enodhowavi bigadhala otimbwini. Ebaribari wila ‘masaka abano orutxa’ enotonyihedha wila nili “masaka omariha” vina ninowaddamela elabo eswa. (2 Timóteo 3:1) Attu enjene anojedhela wakwanihedheya wa dhopikirela dha Yehova, vina anowona dhilobo dhittabwaga mwilaboni ejino. Txini enanipangarhaze?

2, 3. (a) Txini enziwihu mwaha wa Habakuk? (b) Ninfwanyelela nni osunza nivuru na Habakuk?

² Ndoweni none yowakulaya va nivuru ntti na Habakuk. Bibilia kanlogetxa mwaha wa egumi ya Habakuk, mbwenye nivuru nilebiliye ninopangarhaza. Nzina ntti Habakuk ninoneya ninga ‘okubatta.’ Enkala ninga enlogiwana okubatta onddimuwa onakubattana Yehova emeleli aye. Obe enowaganyedhiwana ekalelo enttiddeliwa Yehova na alabeli aye. Habakuk wahimukosa nivuzo Yehova. Yehova wahimwakula namavuhulela oddu vina bampanga wila alebe yowakula yaye munivuruni wi enikamihedhe.​—Habakuk 2:2.

³ Mbibiliani kamuli dhologa dhina dha Habakuk na Yehova ottiya esile dhilebiwe mu nivuruni na Habakuk. Dhili munivuruni ntti dhinotaganyiheya na “dhetene dhilebiwe wale” mu Nzuni na Mulugu, “dhilebeliwé onisunziha, olibiha nroromelo nehu na guru, na ntidi dhindhamo.” (Roma 15:4) Nivuru na Habakuk ninimukamihedha dhavi muttu-muttu wa iyo? Ninonikamihedha oziwa entapulela ebaribari ya Yehova. Namavuhulela Habakuk ohiloga wila enowodheya okana murenddele muyubuweloni masiki nifwanyiwaga makattamiho.

OMULOBELELA YEHOVA

4. Habakuk azuzumele nni?

⁴ Kengesa Habakuk 1:2, 3. Nsaka na Habakuk okalawo wanrutxa vaddiddi. Attu owinjivaya ali awali vina abure nona iyene wankubanya vaddiddi. Mudhidhi wotene wanawona ana Izrayel aweddihaga akwiwa mubureni vina anatabutxa. Habakuk onvuza Yehova: ‘Makatamiho aba anagome mudhidhi gani? Munkoddela nni okosa elobo-txilobo wila agome?’ Iyene wali yeka. Na makattamiho agumanana iyene wahimulobelela Yehova. Iyene wahiroma wubuwela wila Yehova kantanaala nlogo Naye obe Iyene kanakose elobo-txilobo. Wahiromaga opadduweliwa dhahene?

5. Txini enasunze iyo mu nivuruni na Habakuk? (Koona foto eli omaromo.)

⁵ Mavuzo aba akosile Habakuk antapulela wila wahittiya omuroromela Yehova? Nne, kahiyo mwenemo! Habakuk wamukosile Yehova mavuzo wila amukamihedhe sabwani makattamiho el’omusegedha, iyene kattiyile omuroromela. Habakuk wali wodhugudheyene. Iyene kanonelamo yamukosiha Yehova ohikosa elobo-txilobo wila agomihe makattamihoya. Sabwa ya Yehova omuruma Habakuk oleba mazuzumo aye enonisunziha elobo. Kanove ologa na Yehova esile dhinaganyedhihu. Masaka abano iyene ononiwoba wila nimulobelele vina nimpange dhinnidhugudha. (Masalmo 50:15; 62:8) Gano 3:5 ononilibiha: “Omuroromele Nabuya na murima wawo wotene, kunyinddele malago.” Habakuk wahilabihedha mazu aba mwigumini mwaye.

6. Ekaleli nni yamakamaka omulobelela Yehova?

⁶ Habakuk animuroromela Yehova oli Mukwaye, Babe vina iyene wanimwaddela dhotene dhamudhugudha. Vina kavikuluvela mwinya. Habakuk wanimwaddela Yehova makattamiho aye. Eji yotagiha yaderetu wa iyo. Yehova Namewa malobelo, iyene ononiwoba wila nitonyihedhe wi ninomuroromela modhela omulobelela na ompanga dhinidhugudha. (Masalmo 65:2) Iyo nigamulobelela iyene onowakula malobeloya. Iyene onele onipangarhaza vina onilibiha okalaga ninga onikubattile. (Masalmo 73:23, 24) Masiki nifwanyiwe makattamiho ottabwa Mulugu ononikamihedha wona mazuzumo ehu ninga munonela iyene. Kamulobelelege Yehova wila omutonyihedhe wi onomwiwelela.

ONVURUWANE YEHOVA

7. Yehova wonile dhavi mavuzo akosile Habakuk?

⁷ Kengesa Habakuk 1:5-7. Habakuk mulogeliye makattamiho amugwela, enkala ninga wanivivuza esile dhonamo Yehova sabwa ya mazu aye. Yehova Babi wokwela, iyene wahinonelamo. Wanziwa wi Habakuk wantabuwa vina wanfuna nikamihedho. Dhawene Yehova ompanga Habakuk wi Ayuda ahinimwiwelela anele otolotxiwa. Enkala ninga iyene wali muttu woroma opangiwe na Yehova mwaha wa otolotxiwa wa attu abale abure.

8. Yowakula ya Yehova emuzuzumihile dhavi Habakuk?

⁸ Yehova ompanga Habakuk wi wali omala nawale wila atolotxe attu abure. Iyene agahatolotxa Ayuda abure vina abale ali awali. Mwa ologa mazu awi “masiku abano aliwo nyuwo,” Yehova wela woniha wi ottonga waye onafiye masake-ene abale aliwo Habakuk vamodha na ana Izrayeliya. Wakula wa Yehova ohimuzuzumiha Habakuk. Sabwani akadda Babilónia ali atabala. Obure wawa ahapittana Ana Izrayel vowi awene ahiziwa malamulo a Yehova. Yehova walabihedhileni attu abure wila asottotte nlogo naye? Eji egahenjedhedha makattamiho Ayuda.a (Koona yowenjedhedha.) Kobuwela weyo kokala vamburoni va Habakuk, ogakosile nni?

9. Mavuzo mena akosile Habakuk bavi?

⁹ Kengesa Habakuk 1:12-14, 17. Habakuk wahinonelamo wi Yehova agahilabihedha akadda Babilónia wi atolotxe attu abure ali Ayuda mbwenye iyene wahizuzumavi. Masiki dhawene iyene wahitonyihedha oviyeviya vina wahidhowavi bagamukuluvela Yehova. Iyene ohiloga Yehova ‘Mwango waga.’ (Olibiha 32:4; Izaiya 26:4) Habakuk wanziwa wi Yehova ddokwela vina ddwaderetu, eji ehimulibiha bafiyedha okosa mavuzo meena ninga: Nabuya munttiyela nni makattamiho wawijivela Ayuda? Munkoddela nni okosa elobo-txilobo? Munkalelani ‘omalene’ makattamiho enjivagavi? Yehova nyuwo muli ‘okoddela,’ vina “mento enyu athabwa othorhorha; kamunwodha wañgana dhotakala.”

10. Masaka mena iyo ninkalela nni ninga Habakuk?

¹⁰ Masaka mena ninokalaga ninga Habakuk. Iyo ninonvuruwana Yehova. Ninomuroromela, ninowengesa vina ninosunza Mazu aye, wila nilibihe njedhelo nehu. Iyo ninowiwa mwaha wa njedhelo nehu na musogorho nigasunzihiwaga mmulogoni. Mbwenye ninodha ovivuza, ‘Goyi yehu enagome labo gani?’ Ninere osunza ekosile Habakuk musogorho.

OMUJEDHELE YEHOVA OKOSA ELOBO-TXILOBO

11. Habakuk waganile okosa eni?

¹¹ Kengesa Habakuk 2:1. Mumalile Habakuk ologa na Yehova wahifwanya murenddele muyubuweloni mwaye. Iyene wahigana omukuluvela vina omujedha Yehova, okosa elobo-txilobo. Musogorhomwa Habakuk wahiloga: “ddinojyedha n’ofwasa wona siku n’otolotxiwa.” (Habakuk 3:16) Alabeli a Yehova amundduni animujedhela Iyene okosa elobo-txilobo. Yotagiha eji enonilibiha omukuluvela Yehova ovanene.​—Mikeya 7:7; Tiago 5:7, 8.

12. Ninsunzavo eni na ekosile Habakuk?

¹² Ninsunza eni mwaha wa yogana ya Habakuk? Yoroma, kanithiye omulobelela Yehova; nimulobege nikamihedho mwari mwa makattamiho-makattamihovi. Yanawili ninvuruwanege Yehova, iyene onologa na iyo modhela Bibilia vina nikuru naye. Yaneraru, nimujedhele na nroromelo, mudhidhi waye ogafiya onele okosa elobo-txilobo. Nigakosaga dhotedhene dhikosile Habakuk ninojedha n’ofwasa. Njedhelo nehu ninonikamihedha odhowagavi banigamukuluvela Yehova, masiki nigagumanana makatamiho. Iyo nihikaana nikuluvelo nawi Babihu wa wirimu kananittiye dhawene.​—Roma 12:12.

13. Yehova omulibihile dhavi Habakuk?

¹³ Kengesa Habakuk 2:3. Yehova wahagalala sabwa ya Habakuk omujedhela Iyene okosa elobo-txilobo. Namawodha-wodha wanziwa makattamiho agumanana Habakuk, nona na mukalelo wokwela, wahimulibiha amukuluvelihaga wi agahakula nivuzo naye. Venevo Habakuk wahiroma okurumuwa. Enkala ninga Yehova wamwaddela dhahi: “Nsaka nowireya mpaganyo ologilemi, kaninathi ofiya; osogorhowa dhetedhene dhinowireya ninga mulogelimi.” Yehova wahinvaha ebaribari Habakuk wila dhotedhene dhilogiliye dhinele wakwanihedheya. Iyene wahimulibiha Habakuk wila ajedhelegevi. Sabwani Yehova kagamudhivaleli.

14. Masiki nifwanyiwaga makattamiho ottabwaya ninakose nni?

¹⁴ Iyo vina ninofwanyela omujedhela Yehova okosa elobo-txilobo vina niwege dhinnipanga iyene. Ningamukuluvela ninele okala attu okurumuwa vina ninele okana murenddele muyubuweloni masiki nifwanyiwaga makattamiho. Yezu ohinilibiha wila nihizuzumele “oziwa nsaka peno mudhidhi” sabwani onziwa ddi Yehova bahi txipo kananipange. (Merelo 1:7) Iyo ninofwanyela omuroromela Yehova sabwani ddiyene onziwa mudhidhiya wonikamihedha. Kaniyelele mundduni nikale oviyeviha vina okurumuwa nimuroromelege Yehova. Nijedhelaga, nilabihedhege deretu mudhidhi wehu nimulabelagavi iyene.​—Marko 13:35-37; Galásia 6:9.

YEHOVA ONELE WAVAHA EGUMI YAMUKALAKALA ATTU OTENE ANIMUROROMELA

15, 16. (a) Nipikirhelo gani ninfwanyeya va nivuru na Habakuk? (b) Nipikirhelo ntti ninnisunziha nni?

¹⁵ Yehova ohinipikirhela: “Onimuroromela Mulugu, onokalawo,” vina “venevo ovuwa wa Nabuya oner’oziweya, odhale mwilaboni mwetemwene.” (Habakuk 2:4, 14) Txibarene, Yehova ohipikirela wavaha egumi yamukalakala abale anakale okurumuwa vina anamuroromelege.

¹⁶ Nipikirhelo ntti ninfwanyeya va Habakuk 2:4 nihikaana ttima enddimuwa vaddiddi, Paulo wanroromela-wene; iyene ohifiyedha oromola mwari mwa majangarha aye mararu! (Roma 1:17; Galásia 3:11; Ahebreu 10:38) Masiki nifwanyiwaga makattamiho ottabwaya ninofwanyela omuroromelagavi Yehova vina nilibegevi wila none wakwana wa dhopikirhela dhaye. Yehova onfuna wila iyo nang’anelegevi njedhelo nehu na musogorho.

17. Txini enanikosele Yehova nigamuroromela?

¹⁷ Nivuru na Habakuk ninonisunziha vaddiddi iyo notene ninkala masaka abano omariha. Yehova ohipikirhela wila attu etene animuroromela anele ofwanya egumi yohimala. Ninofwanyela odhowagavi banigamuroromela Mulugu masiki na makattamiho angumanana iyo. Dhotene dhimpangile Yehova Habakuk dhinonilibiha sabwani Yehova onele onikamihedha vina onivuna. Iyene onnikumbirha bahi omuroromela vina okala attu okurumuwa, mpaka mudhidhi onadhe Omwene wa Mulugu mwilaboni mpuno. Mudhidhi obo ogafiya, elabo enele okala mburho woziva okalamowa na attu okurumuwa vina animwebedha Yehova.​—Mateu 5:5; Ahebreu 10:36-39.

OMUROROMELE YEHOVA ONELE WAGALALA

18. Habakuk wiwalemo dhavi na dhilobo dhimpangile Yehova?

¹⁸ Kengesa Habakuk 3:16-19. Elogile Yehova na Habakuk yahimulibiha. Habakuk wantanala mukalelo wakamihedhile Yehova nikuru naye na mundduni. Ovano omuroromela waye Yehova wahivadda. Iyene wanimujedhela Yehova wila akose elobo-txilobo! Ejene ehimulibiha, masiki aziwaga wila nalabona agahifwanyiwa makattamiho. Habakuk kaganyedha. Iyene wanimuroromela-wene Yehova wila agahinvuna. Elogiliye va versu ya 18 enowoniha nroromelo naye na ebaribari, noona ninofwanyela odhowavi banigengesa. Anamasunza ena anorumeela entapulela mazu aba: “Apo miyo ddinere othabaga mwa Nabuya, dditeyaga mwa Mulugu Mvulumutxi waga.” Ninsunzavo nni na mazu aba! Yehova kanttiya ovirihamo dhopikiirhela dhaye dha musogorho, mbwenye iyene onologa wila onovilibihedha wi akwanihe.

19. Yehova onanikamihedhe dhavi ninga mumukamihedhiliye Habakuk?

¹⁹ Elobo yamakamakaya ensunza iyo mu nivuruni na Habakuk, ku omuroromela Yehova. (Habakuk 2:4) Wila nimuroromelegevi Yehova, ninofwanyela ovaddiha wandana wehu na iyene. Dhihikalawo dhinfuniwanihu okosa. (1) Nimulobelelege Yehova vina nimpangege dhotene dhinnizuzumiha vina makattamiho ehu. (2) Ninvuruwanege nofwaseya dhotedhene dhinnipanga Yehova modhela Nzu naye nili mBibiliani vina nifwarege dhiniwa iyo mmulogoni. (3) Enofwanyela iyo okala okurumuwa vina nimujedhelaga Yehova wakwaniha yopikirhela yaye. Eji jikosile Habakuk. Masiki varomiliye oleba nivuru naye mokubanya-mwene omagomelowa iyene wahagalala! Iyo nigamutagiha Habakuk, ninele wona okubatta wokwela wa Babi wehu wawirimu, Yehova. Ehikalawo elobo enladdanihiwa na ejene?