Weddiha Nsunzo na Bibilia Ninimuttukulela Namasunza Obatiziwa—Mpaddi Woroma

1. Karta ya 2 Korinto 3:1-3 ennikamihedha dhavi wona ttima ya gari enihu ya omukamihedha namasunza wa Bibilia ofiyedha wubatiziwani? (Kang’ana foto ya kapa.)

WEYO onkala dhavi ogamonaga namasunza wa Bibilia wa murudda onlaleya mulogo wawo adhowagana vasogorho nsunzo naye ofiyedha obatiziwa? Txibarene eji enohagalaliha! (Mt. 28:19) Vina akala ddi weyo osunzile na namafwara oddo muswa, bumukamihedha ofiyedha wubatiziwani, onottaba venjene! (1 Tes. 2:19, 20) Anamabatiziwa aswa ankala ninga karta yapama “yodhowana wa athu ena”, vina opama oku kunoniwa na namasunzihayevi bahi, onowoniwa vina na abali otene a mmulogoni.—Kengesa 2 Korinto 3:1-3.

2. (a) Nivuzo gani na ttima ninfwanyelihu otanalela, vina sabwaya jani? (b) Nsunzo na Bibilia ninkosiwa dhavi? (Koona yawenjedhedha.)

² Enohagalaliha vaddiddi oziwa wi mwari mwa vyaka nai mundduni dhinoperengeziwaga miselu dhawi, ahikalawo anamasunza 10.000.000, orugunuwab elabo yotene. Vina mwari mwa vyakadhene eso, yaka modha-modha anobatiziwa attu 280.000. ninga Anamoona a Yehova, abuwene ankala anamafwara aswa a Yezu Kristu. Ninawodhe dhavi wakamihedha amiliyau a anamasunza a Bibilia mpaka ofiyedha wubatiziwani? Vowi Yehova onowakanelavi supaje attu, attiyedhaga mudhidhi wa orugunutxa murima wawa, iyo ninfuna nikose guru dhotene dhinwodhihu wi nakamihedhe awene odhowa vasogorho momaguva ofiyedha obatiziwa. Mudhidhi kunimujedha muttu!—1 Kor. 7:29a; 1 Ped. 4:7.

3. Txini enasunzehu mwari mwa mutoma obu eniwanana na weddiha nsunzo?

³ Abali okatti ahiparapattela marhe menjene anniwodhiha wakamihedhana anamasunza ofiyedha obatiziwa, yonihaga wi mudhidhi wa wakosa anamafwara ohalewo mung’onovi. Mwari mwa mutoma obu vina na mwina ondawo, ninela wona txini enfwanyelehu osunza na dhawira dha apionero a ttotto, amisionario, na anameddelela milogo.c (Gano 11:14; 15:22) Awene anotapulelamo txini ensunziha Bibilia vina anowawaddela anamasunza awa enfwanyelani okosa wi nsunzona napurelegemo. Ninele ologa vina dhilobo tanu dhinfwanyela okosa anamasunza wi nsunzo nawa nidhowegevi vasogorho ofiyedha obatiziwa.

OSUNZA SUMANA DHETEDHENE

4. Txini enfwanyelihu oziwa mwari mwa namasunza ohinkanetxa mudhidhi wa osunza?

⁴ Abali vamodha na arogoraya ehu anowasunziha anamurala vatakulu vawa. Masiki eji yonihaga wi ezinddiyelo ya anamasunza a Bibiliyaya oroma wenjedha efunelo yawa ya omusunza Bibilia, masaka mena masunzo aba anokwelaga obe anolupihiwaga sumana dhotedhene. Abali ena anokumbirhaga numeru na muttitto wa namasunzaya, wi amulebelege miselu n’efunelo ya wona akala oli vatakulu, wi adhowe asunze na iyene. Yawireya eji enodhowavi ofiyedha myeri mingasi, awene ahinatti okana nsunzo na Bibilia naderetu-nene. Kito veneva nsunzo na Bibilia ninela wunuwa ofiyedha namasunzaya olupela ttarho dha wubatiziwani mwari mwa mudhidhi obu mung’onovid onsunziye Mazu a Mulugu? Enowaganyedheya.

5. Ninga mulogele Yezu va Luka 14:27-33, txini enanikamihedhe mmabasani mwehu a wakosa anamafwara?

⁵ Mudhidhi dhahi, Yezu wahiloga txini enfuneya wila muttu akale namafwara waye. Iyene wahimuloga mulobwana wafuna omaga murhingotti na mwene wafuna odhowa mukoddoni. Yezu wahiloga wila namamagaya onofwayela oroma “ogilati, apima dhineye, ona akala dhinowakwanela opulihana mabasa otene”; yakakene jimpadduwa na mwene, iyene onoroma “ogilati, apima ona akala na anyakoddo aye matxikwe kumi onowodha oraba na anyakoddo matxikwi makumeli.” (Kengesa Luka 14:27-33.) Yezu ohiloga wi ole onfuna okala namafwara waye onofwanyela ogilati wi one akala onela owodha omfwara. Bu mwahene obu onnittukulela omulibiha ole onfuna okala namafwara wa Kristu wi enofuneya osunzaga sumana dhetedhene. Ninakose dhavi?

6. Txini enfwanyelihu okosa wila nunuwihe ttarho dha namasunza?

⁶ Onofwanyela wawaralihagavi abale animusuza Bibilia na weyo. Txino poddi okala yofuneya weyo omuttapulelagamo malebo mena dila dhotene dhindowiwe omoona. Akala mwinya wa vatakulu onorumela osunza na weyo, onofwanyela omvuza akala egakala yofuneya otamela mburho mwina wila musunzege venevo. Yowakula yaye enele wunoniha akala iyene ohikana efunelo ya omusunza Bibilia. Wila wunuwihe ttarho dha namasunzaya, onofwanyela onvuza akala iyene onele okana mudhidhi wa osunzaga dila bili vasumanani. Mbwenye ottiya osunzavi dila bili vasumanani, dhihikalawo dhinna dhinfuneya.

OSASANYEDHA MUTOMA WA NSUNZO NIMODHA-NIMODHA

7. Namasunziha onawodhe dhavi osasanyedha mwawakwana-mwene nsunzo nimodha-nimodha?

⁷ Ninga namasunziha weyo onofwanyela osasanyedhaga mwawakwana-mwene mutoma wa nsunzo nimodha-nimodha. Onofwanyela wengesa makaniya otene vina osunza malebo otene alimo. Otamelege wika makaniya muyubuweloni mwawo. Wubuwelege mwaha wa Mutoma wa nsunzona, anamitomadha, mavuzo a nsunzona vina malebo anlogiwa “kengesa”, mafoto vankala mavidiyu na dhotene dhigadhile wukamiha ononihedhamo makaniya. Oku omubuwelaga namasunzaya, katanalela mukalelo onawodhiwe olabihedha muselu obu muswa wila omutapulelemo namasunza wawo mpaka iyeneya ofiyedha ononelamo vina ovirihamo momaguva.—Ne. 8:8; Gano 15:28a.

8. Mazu a murumiwi Paulo anfwanyeya va Kolosi 1:9, 10 anisunziha eni mwaha wa ofuneya wa walobelela anamasunza ehu?

⁸ Ohinatti oroma ovisasanyedha, karoma omulobelela Yehova wi omuziwihe dhinfuna namasunzaya. Omukumbirhe Yehova wi awukamihedhe weddiha nsunzona na mukalelo onawodhiwe oddiginya murima wa namasunzaya. (Kengesa Kolosi 1:9, 10.) Omuziwihe na ottaga namasunza wawo wila owaddele elobo-txilobo enimurutxa ononelamo obe orumela. Okane muyubuweloni mwawo yawi enfwanyeliwe okosa ku omukamihedha iyene mpaka obatiziwa.

9. Namasunziha onawodhe dhavi omukamihedha namasunza owodhaga osasanyedha nsunzo naye? Katapulela.

⁹ Ogakana efunelo ya weddihaga nsunzo sumana dhotene, namasunzaya onelege otamalela dhotedhene dhikosile Yehova na Yezu vina onele ofuna osunzagavi. (Mt. 5:3, 6) Wila apurelemo masunzoya, namasunza onofwanyela ofwaseyela esile dhinsunziye. Wila ejo ewodheye, omutapulelemo namasunzaya ofuneya wa osasanyedhaga nsunzo naye mwa wengesaga makaniya mutanene vina otanaalelaga mpattelo onimpatta makaniya. Namasunziha onamukamihedhe dhavi? Na mudhidhiya musasanyedhege nsunzona vamodha wi omulagihe namasunza wawo musasanyedho wa nsunzona.e Omusunzihe mfwanyelo wa nakulona, vina omulagihe mukalelo wa ozinddiyeliha mazu ali nipara na yowakula ya nivuzona; dhawene kigamurutxa wakula mudhidhi wa nsunzona. Omwaddelege wila enofuneya wakulaga na mazu ayene. Ogawodha okosa dhawene onele oziwa wila ohiwodha omunonihedhamo makaniya. Dhikalawo dhilobo dhina dhinfwanyeliwe omukokomezaga namasunza wawo wila akosege.

OLOGA NA YEHOVA MALABO OTENE

10. Ekaleleni yofuneya omwengesaga Bibilia malabo otene, nanda onawodhe dhavi opurelamo wengesa wawo wa Bibilia?

¹⁰ Ottiya osunzavi sumana dhotedhene na namasunziha waye, namasunza onofwanyela okosa dhilobo dhina yeka. Iyene onofwanyela wunuwiha mandano aye na Yehova. Onawodhe dhavi? Mwa omvuruwana vina ologaga na iyene. Onvuruwana Yehova oku onlogiwa, kwa okule wa namasunza okana elemelelo ya omwengesaga Bibilia malabo otene. (Jos. 1:8; Masal. 1:1-3) Kamulagihe mukalelo wa olabihedha Tabela ya Wengesa wa Bibilia eli mu jw.org.f Wi omukamihedhetxe namasunza wawo ononelamo pama dhinengesiye mBibiliani, onofwanyela omwaddela wi atanaalelege, obuwelaga txini eninfunana Yehova vina txini dhinakosiye wi avirihemo mwigumini mwaye malebo engesiliye.—Mer. 17:11; Tia. 1:25.

11. Namasunza onaziwe dhavi mukalelo wapama wa olobela, vina ekaleleni yofuneya iyene omulobelelaga Yehova?

¹¹ Omulibihege namasunza wawo ologaga na Yehova mwa Olobelaga Malabo otene. Olobelege na murima wetene ogaromaga vina ogafugaga nsunzo na Bibilia vamodha na namasunza wawo. Iyene agavuruwana nlobelo nawo, onela osunza mukalelo wa olobela na murima wotene, amperekelaga malobeloya Yehova Mulugu, na nzina na Yezu Kristu. (Mt. 6:9; Jo. 15:16) Omwengesa Bibilia malabo otene, merelo anladdanihiwa na (ovuruwana dhinloga Yehova), olobela, onladdanihiwa na (ologa na Yehova); esi dhinele omuwodhiha venjene namasunza wawo okala wofiyedheya na Mulugu! (Tia. 4:8) Okana elemelelo eji enele omukamihedha namasunza wawo okosa guru enfuneya wila attukule ttarho enanfiyihe wubatiziwani.

WUNUWIHA OMARHO NA YEHOVA

12. Namasunziha onawodhe dhavi omukamihedha namasunza olibiha manddano aye na Yehova?

¹² Esile dhinsunza namasunza wa Bibilia kadhinfwanyela opakeyela muyubuwelonivi bahi, dhinofwanyela vina ofiya mmirimani. Empadduwa dhavi? Murima—etagano ennittukulela oziveliwana vina wira elobo-txilobo. Yezu wali namasunza waddiginya mobuwelo wa anamewa aye. Mbwenye attu anfwarela Yezu sabwani masunziho aye anvolowa mmurimani mwawa. (Lk. 24:15, 27, 32) Namasunza wawo onofwanyela okana mmirimani mwaye yubuwelo yawi Yehova Mulugu wa ebaribari, Mulugu onfwanyeliye wandanana, amonaga ninga Babi vina ninga marho waye. (Masal. 25:4, 5) Ogeddihihaga nsunzo na Bibilia, kudduwale ologa merelo otikiniha a Mulugu vina na ejileya eliye. (Obud. 34:5, 6; 1 Ped. 5:6, 7) Ologege ejile eli Yehova, mowiwanana na mutoma wa nsunzo onloginyu. Omukamihedhe namasunza wawo otanaalelaga mikalelo dhamakamaka dha Yehova—ninga okwela ovilela vina ttagaraga yaye. Muvuzeliwe Yezu mwaha wa nlamulo ninddimuwanavo, iyene ohiloga: “Omukwele Nabuya, Mulugu wawo . . . nthi thi ninddimuwaná”. (Mt. 22:37, 38) Tamelá otxeya okwela wa Mulugu mmurimani mwa namasunza wawo.

13. Kavaha yotagiha enaniwodhihe wakamihedha anamasunza ofiyedha ozinddiyela mikalelo dha Yehova.

¹³ Ogalogaga na namasunza wawo, omunonihedhemo dhinuttukulela weyo omukwela Yehova. Eji enodha omukamihedha namasunza wawo wona wi iyene onofwanyela wuniwiha mandano aye na Mulugu. (Masal. 73:28) Ninga motagiha, ddima enengesinyu muhikala mazu anloga ekalelo ya Yehova—okwela, eziwelo, oligana, na owodhawa waye—okuwene ousunzihile venjene? Kamwaddele esuwene namasunza wawo, vina omunonihedhemo wi si esuwene dhuttukulele omukwela venjene Babihu wa wirimu. Ehikalawo yina enfwanyela okosa anamasunza a Bibilia, ejuwene enattukulela wubatiziwani.

WOONA MATUGUMANO A MMULOGONI

14. Ninga munlogela Ahebreu 10:24, 25 txini enfwanyela okosa namasunza wa Bibilia ejuwene enamukamihedhe odhowavi vasogorho?

¹⁴ Notene iyo nihikana efunelo ya anamasunza ehu odhowavi vasogorho, ofiyedha olupela ttarho ya obatiziwa. Enddimuwaya enfwanyelihu okosa, ja wawaddela wi jofuneya awene odhowaga omatugumanoni. Abali aromile omusunziha Bibilia walene, ahiloga wi anamasunza ammaguvela odhowa vasogorho agaroma odhowa omatugumanoni. (Masal. 111:1) Anamasunziha ena anowawaddelaga anamasunza awa wi mpaddi mmodha wa masunzo ehu ninkana vansunzoni nehu na Bibilia mwina ninkana mmatugumanoni mwehu. Kengesa Ahebreu 10:24, 25 na namasunza wawo, vina omonihe opurelamo onkaniye agadhowaga omatugumanoni. Kamulagihe vidiyu Txini Enkosiwa va Numbani ya Omwene?g Kamukamihedhe namasunza wawo ozinddiyela wi odhowa omatugumanoni kofuneya vina onokosa mpaddi wa egumi yaye.

15. Txini enfwanyelihu okosa wi nimuttukulele namasunza okana efunelo ya wona matugumano mudhidhi wetene?

¹⁵ Txini enfwanyeliwe okosa akala namasunza wawo kanatti oroma wona matugumano obe akala onojombaga venjene? N’ohagala wetene kamwaddele dhisunzile weyo omatugumanoni. Eji enela omuttukulela ofuna odhowavi omatugumanoniwa, enottiyana vina na ejile ya omukukuselawo. Kamvahe Mwang’aneli obe Nivuru na Mabasa a Matugumano ninsunziwana mwere-nne obo. Kamulagihe dhinasunziwe vasumananiva vina omvuze epaddi emuziveletxe. Masunziho anarome wiwa namasunza wawo omatugumanoni, anela omukosiha wona wi ahittiyana na masunziho-masunzihovi a kapela dhina. (1 Kor. 14:24, 25) Onumbani ya omwene, iyene onela ogumana na abali ali yotagiha yapama, abuwene anamuttukulele iyene ofuna odhowanavi ttarho dhaye vasogorho, ofiyedha obatiziwa.

16. Txini enfuneya wi namasunziha eddihe nsunzo na Bibilia ofiyedha namasunzaya obatiziwa, vina txini dhinasunzehu mutoma onfwarela?

¹⁶ Niwodhe dhavi weddiha nsunzo na Bibilia ninimuttukulela namasunzaya wubatiziwani? Iyo ninofwanyela wakamihedha anamasunza wonaga masunzoya n’ekalelo yohivegana, mwa waziwihaga wi jofuneya osunza sumana dhotedhene vina mwa osasanyedhaga nsunzona. Ninofwanyela omunonihedhamo namasunza wehu wi jofuneya ologa na Yehova malabo otene vina ovedaga merelo a wunuwihana omarho waye na iyene. Nawaddelege anamasunza ehu wi jofuneya awene wonaga matugumano. (Kangʼana kasha na nikuku 12, enloga “Dhinfwanyela Okosa Namasunza wi Afiyedhe Ttarho Yobatiziwa.”) Dhahene ninga munfunela ologa mutoma onfwarela, dhihikalawo dhilobo tanu dhinfwanyela okosa namasunziha wa Bibilia wi amukamihedhe namasunza waye ofiyedha obatiziwa.