Kamukamihedhe Namasunza Wawo wa Bibilia wi Akale Namalaleya Wobatiziwa

1. Muttitti munddimuwa nsaka zana noroma addeliwe okosa nni?

MUTTITTI munddimuwa wa alobwana na ayana a dhilabo dhinjene ahidhowa o Jeruzalemi. Labo nttile yahipadduwa elobo yotikiniha. Saddu, nikuru na anamafwara a Yezu ahiroma ologa dhilogelo dha attu abale adhile wenewale! Attuya ahitikina venjene na yopadduwa eji, mbwenye yaddiginyile murima wali muselu wewalani na anamafwara vina murumiwi Pedro. Ahisunza wila avuneye anfwanyela omuroromela Yezu Kristu. Awene ahiziveliwa venjene ofiyedha ovuza: ‘Enfuneya nirege nni?’ Pedro wahawaddela dhahi: “Muthu-muthu abatiziwe.”—Mer. 2:37, 38.

2. Txini enasekeserihu munsunzoni ntti? (Kang’ana foto ya kapa.)

² Vasogorhova yahipadduwa elobo yowumiha milomo. Labo nttile abatiziwe attu owakwana matxikwi mararu, badha okala anamafwara a Kristu. Ntti nali nipadduwo noroma na mabasa arumile Yezu anamafwara aye okosa. Napanovi mabasa aba anottiddiwavi. Masaka abano, kinwodheya omukamihedha muttu ofiyedha obatiziwa labonene. Ejo enottukula myeri, yaka obe mudhidhene. Akala onomusunziha muttu Bibilia wi akale namafwara wa Kristu, weyo onoziwa wi enofuneya ovilibihedha. Munsunzoni ntti ninele wona mukalelo onfwanyeliwe omukamihedha namasunza wa Bibilia ofiyedha ttarho yobatiziwa.

KAMUKAMIHEDHE NAMASUNZA WAWO WI AVIRIHEGEMO DHINSUZIYE

3. Mowiwanana na Mateu 28:19, 20, txini enakose namasunza ofiyedha obatiziwa?

³ Ahinatti obatiziwa, namasunza wa Bibilia onofwanyela ovirihamo dhinsunziha Bibilia. (Kengesa Mateu 28:19, 20.) Namasunzaya agakosaga ejuwene, onkala ninga “muthu” wamalago ologiwe vamusiboni ya Yezu omagile nyumba yaye vego vowela. (Mt. 7:24, 25; Lk. 6:47, 48) Ninamukamihedhe dhavi namasunza ovirihagamo dhinsunziye? Ninele wona marhe miraru.

4. Ninawodhe dhavi omukamihedha namasunza ovilibihedha wi afiyedhe ttarho ya obatiziwa? (Kang’ana kasha “Omukamihedhe Namasunza Wawo Okana Dhogana vina Wakwanihedha.”)

⁴ Kamukamihedhe namasunza okana dhogana. Onfwanyelela nni okosa ejuwene? Kobuwela nladdaniho ntti: Weyo ogana okosa oleddo wolapela na karo, nanda muleddonimwa otadelamo wimela mmimburoni dhinuzivela. Dhawene, kunakukumuwe-wene sabwa yowubuwelaga wi ondowiwe olapa vaddiddi. Na mukalelo wakakene, japama namasunza wa Bibilia okana dhogana dhinfuniye wakwanihedha mwa mudhidhi mungo’onovi na dhina dha mudhidhi wolapela. Wi omukamihedhe namasunza wawo odhowa vasogorho kalabihedha epaddi ya “Yogana” enfwanyeya munivuruni Kajavo Egumi Yamukalakala! Omagomo wa nsunzo nimodha-nimodha, kanvuze namasunza wawo mukalelo onamukamihedhe okana dhogana ovirihamo dhisunziliye. Ogafuna wi namasunzaya afiyedhe yogana yina, kaleba yoganaya mpaddi onkuweliwa “Yina.” Mudhidhi wotene kalabihedhaga dhipano dhili munivurunimwa na namasunza wawo wi omukamihedhe wakwanihedha dhogana dhaye dha mudhidhi mungo’onovi na dhina dha mudhidhi wolapela.

5. Mowiwanana na Marko 10:17-22, txini emwaddelile Yezu mulobwana wa mureli, nanda sabwaya jani?

⁵ Kamukamihedhe namasunza okosa matxinjo mwigumini mwaye. (Kengesa Marko 10:17-22.) Yezu wanziwa wi egahirutxa mureli oguliha dhorela dhaye. (Mk. 10:23) Masiki dhawene, Yezu wahimwaddela mulobwana oddule wi wanfwanyela okosa matxinjo orutxa mwigumini. Sabwaya? Sabwani Yezu wanimukwela. Masaka mena, ninottiya omulibiha namasunza wi avirihegemo dhinsunziye nubuwelaga wi iyene kanakala womala nawale wi akose matxinjo. Ebaribari wi ottiya mweddelo wabure banittukula ekalelo ya omuttu oswa enogonela. (Kol. 3:9, 10) Mbwenye ogamwaddela namasunzaya na ottaga, enele omukamihedha wi arome okosa matxinjo. Ogalogaga na namasunza wawo na murima wotene, onolagiha wi onomukwela.—Masal. 141:5; Gano 27:17.

6. Ninfwanyelelani olabihedha mavuzo animuttukulela namasunzaya ovaha monelo waye?

⁶ Olabihedha mavuzo animuttiya namasunzaya ovaha monelo waye enele omukamihedha ologa enubuweliye sabwa ya makaniya. Kalabihedha mavuzo aba wi oziwe ennonelamo namasunza wawo vina ejile enrumeliye. Ogakosa ejuwe mudhidhi wotene, enele okala yovevuwa musogorho ologa na iyene sabwa ya makani orutxa. Nivuru Kajavo Egumi Yamukalakala! muhikala mavuzo menjene animuttukulela namasunza ovaha monelo waye. Motagiha, nsunzo 04 vahikala nivuzo ntti: “Muwonamo wawo Yehova ononamo dhavi agakuweliwaga na nzina naye?” Nsunzo 09 vahikala nivuzo ntti: “Dhilobo gani dhigaziveliwe weyo okumbirha munlobeloni?” Vamaromo, txino namasunzaya onele ofuna mudhidhi wi awodhe wakula mavuzoya. Enowodheya weyo omukamihedha otanalela. Motagiha, kalabihedha Malebo a Bibilia obe mafoto anfwanyeya vanikukuniva.

7. Ninalabihedhe dhavi mapadduwo a attu wi nimukamihedhena manasunza?

⁷ Namasunza wawo aganonelamo matxinjo anfwanyeliye okosa, kalabihedha mapadduwo a attu wi omulibihe okosa matxinjoya. Motagiha, akala namasunza wawo onorutxiwa wona matugumano, kamulagihe vidiyu Jeová sempre cuidou de mim eli nsunzo 14 mpaddi olebiwe “Tamelá Ononelamo Deretu.” Dhipaddi dhinjene dha masunzo a nivuru, Kajavo Egumi Yamukalakala! weyo onele ofwanya dhopadduwa dhireyile mwigumini mwa attu, dhili mpaddi wa “Kasunzavi” obe “Tamelá Ononelamo Deretu.”b Kukane elemelelo ya omuladdaniha namasunza wawo na attu ena ologaga dhilobo ninga: “Akala iyene ohiwodha, weyo vina onele owodha.” Omuttiye namasunzaya oziwa ejuwene mwinyene. Yamakamakaya ja omulagiha mitoma dhattimadha dhimukamihedhile muttu olagihiwe mvidiyunimwa ovirihamo ensunziha Bibilia. Txino kamunonihedhemo nlebo na Bibilia obe elobo yina ekosile muttuya. Vina egawodheya, kamunonihedhemo mukalelo okamihedhiwe muttuya na Yehova.

8. Ninamukamihedhe dhavi namasunza omukwela Yehova?

⁸ Kamukamihedhe namasunza omukwela Yehova. Onakose dhavi? Ogeddihaga nsuzo kamunonihedhemo namasunzaya mikalelo dha Yehova. Kamukamihedhe oziwa wi Yehova Mulugu wottaba vina onowakamihedha abale otene animukwela. (1 Tim. 1:11; Aheb. 11:6) Kamulagihe wi ovirihamo enloga Bibilia onodhana yopurelamo nanda dhopurelamo eso dholagiha dhinoniha onikwela wa Yehova. (Iza. 48:17, 18) Namasunza agaroma omukwela Yehova venjene ejo enele omuttukulela okosa matxinjo mwigumi mwaye.—1 Jo. 5:3.

KAMUZIWIHE NAMASUNZA WAWO ABALI ENA

9. Mowiwanana na Marko 10:29, 30, txini enamukamihedhe namasunza okala namafwara wobatiziwa?

⁹ Wila namasunza afiye wubatizuni, iyene onofwanyela okosa matxinjo manddimuwa. Dhahene ninga mulobwana wa mureli ologiwe omaromo, enofuneya anamasunza ena ottiya dhilobo dhina dhomaningoni. Motagiha, akala ganyo yawa enogudulana na magano a Bibilia, enofuneya otxinja. Ottiya ejo, anamasunza enjene anofwanyela ogwadda mandano na attu abale ahinimukwela Yehova. Ena anonyanyaliwa na amudhawa ahinziveliwa na Anamoona a Yehova. Yezu wahona wi okosa matxinjo aba, mwa attu ena kigali elobo yovevuwa. Mbwenye iyene wahapikirela abale agaganile onfwara wi kagatxinuwile. Awene agahittuviwa na anamudhi okwela a mpaddi womuyani. (Kengesa Marko 10:29, 30.) Onamukamihedhe dhavi namasunza wawo opurelamo nvaho obu?

10. Txini esunziliwe na yotagiha ya Manueli?

¹⁰ Kakala marho wa namasunza wawo. Jamakamaka omutonyihedha namasunza wawo wi onomuzuzumela. Sabwaya? Koona elogile Manueli onkala elabo y’o México. Obuwelaga mudhidhi waliye namasunza wa Bibilia, iyene ohiloga: “Nihinaroma okosa nsunzo, namasunzihaya wanddivuza akala ddamugumi. Iyene wanddittiya okala ofwaseyene vina okala otapuwa wi ddiloge sabwa ya elobo-elobovi. Miyo ddannonelamo mwebaribari wi iyene wandditanala.”

11. Ekaleleni yamakamaka namasunza otamelaga mudhidhi wokala vamodha na namasunziha waye?

¹¹ Yezu wanziveliwa okala mudhidhi mwinjene na anamafwara aye. (Jo. 3:22) Kakosa yakakene na namasunza wawo. Akala iyene onodhowa vasogorho kamuwobele omwa elobo-txilobo, oja vamodha obe wona Porogarama ya vamwerini ya JW broadcasting. Eji enele omukamihedha namasunzaya makamaka nigakala labo na feriyado, vowi malabwene abo onodhaga ovyona yeka. Kazibwe onkala elabo y’o Uganda ohiloga: “Ddigakala na namasunza waga ddansunza vina sabwa ya Yehova ottiya vansunzoni na Bibilia bahi. Ddihoona mukalelo onazuzumela Yehova alabeli aye vina wagalala onkaanani. Yali ejuwene yaveda miyo.”

12. Ninfwanyelelani wawoba anamalaleya ottiyana-ttiyana nigadhowaga weddiha nsunzo na Bibilia?

¹² Kawobege anamalaleya ottiyana-ttiyana ogadhowaga weddiha nsunzo na Bibilia. Masaka mena enonikalelaga yovevuwa odhowa weddiya nsunzo nokinhu obe omuwoba namalaleya mmodha. Masiki ekodda okala yabure, okosa ejuwene, egahikala yapama mudhidhi na mudhidhi wawobaga anamalaleya ottiyana, nigakosaga ejuwene namasunza wehu onele opurelamo. Dmitri, onkala elabo y’o Moldávia ohiloga: “Namalaleya ddi namalaleya wamuwoba namasunziha waga agadhaga weddiya nsunzo, wantapulelamo makaniya na mukalelo wotiyana.” “Eji yanddikamihedha wona makaniya na mukalelo mwina. Ottiya ejo, labo noroma wona matugumano, kaddana manyazo vowi ddanaziwa abali na arogora enjene.”

13. Ninfwanyelelani omukamihedha namusunza wehu wonaga matugumano?

¹³ Kamukamihedhe namasunza wonaga matugumano. Enfuneyelani okosa ejuwene? Sabwani Yehova ohivaha nlamulo nawi nlogo naye nitugumanege mumodhani; vina ejo enokosa mpaddi wa omwebedha wehu. (Aheb. 10:24, 25) Mowenjedhedha, abali na arogora ba amudhehu a mpaddi womuyani. Nigakala vamodha na awene mmatugumanoni, enkala ninga nigumaneli oja siyari vamodhavene. Jamakamaka omukamihedha namasunza wawo wi onege matugumano, sabwani ejo enele omukamihedha ofiyedha ttarho yobatiziwa. Mwa mpaddi mwina, txino namasunza wawo onodha orutxiwa ofiyedha ttarho eji. Nivuru Kajavo Egumi Yamukalakala! ninamukamihedhe dhavi?

14. Ninamukamihedhe dhavi namasunza wehu wonaga matugumano?

¹⁴ Kalabihedha nsunzo 10 nili munivuruni Kajavo Egumi Yamukalakala! wi omulibihena namasunza wawo. Nivuru ntti nihinarome ovuwihiwa, ahiwobiwa anamalaleya adhile vawale wi arome weha alabihedhaga nsunzo kumi. Awene ahiloga wi nsunzona nihakamihedha anamasunza awa oroma wona matugumano. Mbwenye kujedhele ofiyedha nsunzo 10 wi omuwobe namasunza wawo oroma wona matugumano. Kamuwobe egawodheya momaguvamwene vina kadhowagavi okosaga ejuwene. Kadda namasunza onogumanana makattamiho ottiyana. Nona kazuzumela dhofuna dha namasunza wawo, wi wone akala onele owodha omukamihedha. Masiki akala onogonela orumela niwobo na wona matugumano kukumuwe. Kavilela vina kakana ntidi.

KAMUKAMIHEDHE NAMASUNZA WAWO OPEMBERHA WOVA

15. Dhilobo gani dhigamutoteli wova namasunza?

¹⁵ Kobuwela, weyo wannovaga oromaga okala Munamoona wa Yehova? Txino wahubuwela wi kugawodhile walaleyela attu ena. Obe wannova onyanyaliwa na akwawo vina na amudhawo. Akala pumwenemo, weyo onowodha ononelamo pama eniwamo namasunza wawo. Yezu wahinonelamo wi txino ena agahittiddiwa wova ninga okwene. Masiki dhawene, iyene wahalibiha anamafwara aye wi kiyali yofuneya ottiya wova watximiha omulabela Yehova. (Mt. 10:16, 17, 27, 28) Txini ekosile Yezu wi akamihedhe anamafwara aye opembera wova? Onafware dhavi yotagiha yaye?

16. Ninawodhe dhavi omushagiha namasunza wi awodhege olaleya?

¹⁶ Omuswagihe namasunza wawo olaleya. Yezu mwarumeliye anamafwara aye odhowa olaleya, txino ahidhugudheya. Mbwenye iyene wahakamihedha, vowi ahawaddela wadhowani olalaleya vina muselu wafunani olaleya. (Mt. 10:5-7) Onamutagiye dhavi Yezu? Omukamihedhe namasunza wawo oziwa mburo onfwanyeliye olaleya. Motagiha, kanvuze dhahi, weyo onomuziwa muttu agaziveliwe wiwa sabwa ya ebaribari eji ya mBibiliani. Kamukamihedhe namasunza wawo ologa ebaribari na attuya anawubuweliye na mukalelo wohirutxa. Egawodheya kamushagihe musasanyedhaga vamodha mazu oromana makani, olabihedhaga dhipaddi esi “Attu Ena Anloga Wi” vina “Akala Muttu Onouvuza” dhinfwanyeya mu nivuruni Kajavo Egumi Yamukalakala! Ogakosaga ejuwene, onele omukamihedha namasunzaya omulabihedhega Bibilia wi avahege dhowakula dhovevuwa vina noriheya.

17. Ninalabihedhe dhavi malago ali va Mateu 10:19, 20, 29-31 wi nimukamihedhena namasunza wehu omukuluvela Yehova?

¹⁷ Kamukamihedhe namasunza omukuluvela Yehova. Yezu wahalibiha anamafwara aye wi Yehova onowakwela vina onelege wakamihedhavi. (Kengesa Mateu 10:19, 20, 29-31.) Kamubutxedhe namasunza wawo wi Yehova onele omukamihedha vina. Mukalelo mmodha wa omukamihedha namasunza wawo omukuluvela Yehova ku olobelaga na iyene sabwa ya dhogana dhaye. Franciszek, onkala o Polônia, ohiloga: “Namasunziha waga wanloga mmalobeloni sabwa ya dhogana dhaga.” Vonilemi wi Yehova onowakula malobelo a namasunziha waga, miyo vina ddahiroma olobela. “Miyo ddahona nikamihedho na Yehova mudhidhi wagumelimi ganyo, nanda ddikumbira malabo a odhowa wona matugumano mmulogoni vina a ttattamwa.”

18. Yehova ononamo dhavi mabasa ankosa anamasunziha?

¹⁸ Yehova onowatanala venjene anamasuza ehu a Bibilia. Vina onowakwela vaddiddi anamasunziha sabwani onoziwa guru dhetedhene dhinkosani wi asunzihe attu ebaribari ya Mulugu. (Iza. 52:7) Txino weyo mudhidhene obu kuneddiha nsunzo na Bibilia. Nona, kapura mudhidhi y’owavelela anamalaleya ena mmasunzoni mwawa. Dhahene, weyo vina onele wakamihedha anamasunza abo ofiyedha ottukula ttarho y’obatiziwa.