Mavuzo Ankosa Anamengesa

Mmaleli Yezu obaliwa, sabwaya jani José na Maria akalavi o Belemi ottiya wiyelela owaniwawa o Nazareti?

Bibilia kanloga. Mbwenyi, ononaddela mwaha dhing’onovi dhintapulela sabwaya yattukuleli awene ohiyelela owaniwawa o Nazareti mudhidhene obule.

Anju wahimwaddela Maria wi agahikana yari vina agahimbala mwana. Mudhidhi ologile anju muselu obu, Maria na José akala o Nazareti, o Galileya elabo yabaliwe José. (Lk. 1:26-31; 2:4) Vasogorhova, mwiyelilani w’Ejipitu, akala o Nazareti. Kuwenewo wunuwile Yezu vina okaliliye Munazareti. (Mt. 2:19-23) Obu bu mwahaya onkuweliwa—Yezu, José, na Maria—ninga akadda Nazareti.

Mwanammudhi mmodha wa Maria wakuweliwa Elizabeti, wakala o Juda. Elizabeti wali mwadhi namakutta Zakariya vina wahidha okala mayi wa Joau Batista. (Lk. 1:5, 9, 13, 36) Maria mudhoweliye omona Elizabeti wahikala na iyene o Juda mwari mwa myeri miraru. Mmalelani Maria wahiyelela o Nazareti. (Lk. 1:39, 40, 56) Oleddo obu ohimukamihedha oziwa pama murudda obule w’o Juda.

Na mudhidhiya José wahiwelela nlamulo na odhowa olebiha matelo. Dhahene iyene wahikosa oleddo wa obudduwa o Nazareti, wi adhowe o Belemi wenewo wali muttette wa Davidi. Kuwenewo o Belemi obaliwe Mesiya ninga mwalogela mavuhulo. (Lk. 2:3, 4; 1 Sam. 17:15; 20:6; Mik. 5:2) Mumaleli Yezu obaliwa wenewale, José kajedhela wi Maria agahimuttukula mwana wi akose oleddo wolapela wowiyelela o Nazareti. Awene ahikalavi o Belemi walapelani na Jeruzalemi makilometru 9. Yahakalela pama awene okalavi wenewale na mwaniwa wa nyenye ajedhelaga omperhekela mukutto mumparhani ninga mwalogela malamulo.—Onam. 12:2, 6-8; Lk. 2:22-24.

Vamaromo anju wa Mulugu wahimwaddela Maria wi mwana agambaliliye agahakela mpaddo wa Davidi vina agahilamulela ninga Mwene. Eji yatapulela wi José na Maria annonelamo ttima ya mwaniwa obaliwa mmuttetteni mwa Davidi? (Lk. 1:32, 33; 2:11, 17) Akala anziwa ejuwene yali ya malago awene okalavi wenewale ajedhelaga oziwa ejile yafunana Mulugu okosa vasogorho.

Iyo kaninziwa mudhidhi okalilani o Belemi nsaka nifiyile anamengesa dhineneri. Ofiyedha mudhidhene obo anamudhi aba ahikana ntakulu nakalani vina “mwanayá” wahunuwa. (Mt. 2:11) Ottiya wiyelela o Nazareti awene ahikalavi o Belemi mwa mudhidhi mwinjene ninga owaniwawa.

Herodi wahiruma wi “ayima otene o Belemi . . . oromana abale abaliwe-wene ofiyedha a vyaka bili” apiwe. (Mt. 2:16) Mwaddeliwe José na anju murowani wi amuttukule mwana attawele w’Ejipitu, iyene na Maria vina Yezu ahikala w’Ejipitu mpaka nsaka nikwile Herodi. Vasogorhova, José wahattukulela amudhaye o Nazareti. Sabwaya jani mubudduwilani w’Ejipitu keyeleli o Belemi? Sabwa y’omova mwana wa Herodi wotakala murima wakuweliwa Arkelau, walamulela o Judeya, vina anju wa Yehova wahimwaddela José wi egali yowopiha, iyene kowiyelela o Judeya. O Nazareti José agahiwodha omulela Yezu na nibarelo vina ninga mulabeli watxibarene wa Mulugu.—Mt. 2:19-22; 13:55; Lk. 2:39, 52.

Enkala ninga José okwile Yezu ahinatti odhowa wirimu. José agavenyihiwa mukwani velaboni ya vati, attu enjene anele omuziwa vina anele oziwa dhilobo dhinjene sabwa yamuttukuleli iyene na Maria okalavi o Belemi mmaleli Yezu obaliwa.