Dhowagalaliha Dhohijedheleya vina Dhisunzile Miyo Mmabasani a Yehova

Amambali aga ahimwala o Estónia nsaka na Koddo II Erabiwe Elabo Yotene badhowa o Alemanha wenewo obaliwe miyo. Mbaliwe miyo amambali aga ahimwalela o Canadá. Nyumba yehu yali vakuvi na Ottawa, o Canadá, yali okomoni wa kapwerhe mwafuwiwa anaku. Nali ayelegi vaddiddi mbwenyi nankana mazayi a okosana matabishu.

Labo nimodha, Anamoona a Yehova ahimwengesela mmani Ovuhulela 21:3, 4 eji yahiddiginya murima waye baroma wunla. Bewu ya ebaribari yahunuwa, babani na mmani ahivilibihedha vina momaguva-mwene ahibatiziwa.

Amambali aga kawodhetxa ologa venjene Engelezi, mbwenyi annivilibihedha ovirihamo esile dhasunzani. Masabuddu otene babani wannittukulela mmabasani a olaleya miyo na murogoraga mung’onoya Sylvia, masiki na olema sabwa ya olaba omattiyu wotene o fabrika o Sudbury, Ontário. Ninga anamudhi sumana dhotene nankosa nsunzo na Mwang’aneli. Babani na Mmani ahiddisunziha omukwela Mulugu. Eji ehiddittukulela omperhekela Yehova egumi yaga vina obatiza yaka ya 1956 na vyaka kumi. Efunelo yawa enddimuwa ya omukwela Yehova ehiddilibiha venjene odhowavi ddimulabelaga Yehova.

Mugomihedhi miyo masunzo manddimuwa, ddahiyelela efunelo ya omulabela Mulugu. Miyo ddahiroma wubuwela, ddigakala pionero txipo kaddinawodhe okana kobiri yinjene wi ddiwodhe wakwaniha efunelo yaga ya okosa oleddo na aviyawu wi ddiziwe dhipaddi dhina dha elabo. Ddahifwanya mabasa a orumiha muzika dhogaravariwa o radioni, ddanziveliwa mabasaya. Miyo ddalaba na mattiyu, vina sabwa ya ovitaganyiha na attu ahamukwela Mulugu dila dhinjene kaddadhowa omatugumanoni. Mbwenyi mubuwelo waga woswagihiwa na Bibilia ohiddikamihedha okosa matxinjo.

Ddahimwalela Oshawa, Ontário. Wenewo ddahimuziwa Ray Norman na murogoriye Lesli, vina apionero ena. Otene ahiddakela na mada meeli. Wona wagalala wana awene ohiddittukulela ovenyihedha efunelo yaga. Awene ahiddilibiha wi ddilabe ninga pionero, jijuwene ekosile miyo oromana mweri wa Setemburu wa yaka ya 1966. Miyo ddahikana wagalala vina egumi yapama. Mbwenyi dhilobo dhigatxinjile egumi yaga dhigahipadduwa mohijedheleya.

YEHOVA AGAWULOBA WI OKOSE ELOBO KATAGIHA OKOSA

Mudhidhi wakosa miyo masunzo manddimuwa ddahivilevela okamihedha o Beteli yo Toronto, Canadá. Vasogorhova ddilabaga ninga pionero, ddahiwobiwa wi ddakamihedhe o Beteli vyaka nayi. Mbwenyi ddahiziveliwa venjene na Lesli, venevo miyo oroma wova wi akala ddinorumela niwobo ntti, miyo txipo kaddinamone wili. Mbwenyi mukoseli miyo malobelo dila dhinjene, ddahirumela odhowa okamihedha o Beteli mbwenyi kiyali yovevuwa ompaganya Lesli.

O Beteli ddalaba mpaddi wa ofula vasogorhova ninga sekretario. Lesli wahikala pionera wa mudhidhi wotene o Gatineau, Quebeque. Dila dhinjene ddanivivuza, txini enimpadduwela vina akala ddahikosa yosakula yapama. Mbwenyi yahipadduwa elobo yamakamaka mwigumini mwaga yahajedhela miyo. Ray, mbali wa Lesli, wahiwobiwa wi akamihedhe o Beteli. Mufiyeliye wali kwartu modhene na miyo! Eji ehiddikamihedha wiyelela mandano aga na Lesli. Iyo nitelilena labo 27 na—Feverero yaka ya 1971 omagomo wa vyaka nayi dhattomeliwe miyo olaba o Beteli.

Miyo na Lesli nahittomeliwa okamihedha mulogo wa elogelo yo França o Quebeque. Vyaka dhing’onovi musogorhomwa, yahipadduwa elobo yahajedhela miyo, ddahittomeliwa oloba ninga nameddelela milogo na vyaka 28. Miyo ddobuwela wi ddali muzombwe vaddiddi vina kaddana ewodhelo ya okala nameddelela milogo, mbwenyi mazu a Jeremiya 1:7, 8 ahiddilibiha. Lesli wahikosa asidenti na karo vina yanrutxa ottidda nikove. Venevo nahiroma wubuwela wi egali yorutxa odhowanavi vasogorho mabasa ehu. Mbwenyi iyene wahiloga dhahi, “Akala Yehova ononiwoba wi nikose elobo, kanigafwanyeleli otagiha?” Nahirumela mabasaya vina nihilaba ninga anameddelela milogo mwari mwa vyaka 17.

Ddilabaga ninga nameddelela milogo, kaddakana mudhidhi mwinjene vina yanrutxa ofwanya mudhidhi mung’onovi wa okala na Lesli. Eji ehiddisunziha elobo yina. Labo dhahi na membesi kampanya yahiruma otakulu. Mbwenyi vadhowile miyo kaddinfanyile muttu, ddifwanyile sestu ya picnic na guwo ya vameza, mafuruta, queijo, pawu, garafa na vinyu, kopo, vina njangarha nahana nzina nalebiwe mazu aba, “Omuttukule mwadhiyo odhowe o picnic.” Nali ddimingu nokoddela vaddiddi. Mbwenyi miyo ddahimwaddela Lesli wi kaddigawodhile odhowa sabwani ddahikana diskursu yosasanyedha. Iyene wahinonelamo mbwenyi wahikubanya vang’ono. Ddahigilati vameza mubuwelo waga wahiroma oddinyonya. Ddahubuwela nlebo na Éfeso 5:25, 28. Mazu abale a Yehova ahiddipangarhaza wi ddinofwanyelela otanalela mukalelo oniviwamo mwadhaga. Mmaleli miyo olobela ddahimwaddela Lesli, “Ndowe,” iyene wahiziveliwa. Nahidhowa sere-sere ya mwinje, nifwanya mburo wofwasa nitanika guwo ya vameza nija dhilobo dha picnic vina nivega vamodha, obule wali mudhidhi wowagalaliha opadduwile mwigumini mwehu. Mmalelani ddahidhowa osasanyedha diskursu yaga.

Nilabaga ninga anameddelela milogo dhihipadduwa dhilobo dhinji dhowagalaliha mwigumini mwehu, oromana o Colômbia Britânica ofiyedha o Terra Nova. Efunelo yaga ya okosa oleddo yahakwanihedheya. Mwaha wa esile dhisunzile miyo Oskola ya Jileadi kaddana efunelo ya okala misionario. Ddobuwela wi amisionario ali attu a vawoka vina kaddavyonana ttotto ya okala misionario. Mwa mpaddi mwina ddanova opattiwa na maredda obe koddo korumiwa dhilabo dha Afrika. Miyo ddahiziveliwa o Canadá walihu.

MOHIJEDHELEYA NAHIRUMIWA O ESTÓNIA VINA O BÁLTICO

Yaka ya 1992 mukanile Anamoona a Yehova ofuru wa olaleya mu dhilaboni dhakosa mpaddi wa pós-soviéticos, nahikumbiriwa akala nigahirumela odhowa o Estónia ninga amisionario. Nahitikina venjene, mbwenyi nahimulobelela Yehova. Nahubuwela wili, ‘Akala Yehova ononiwoba wi nikose elobo, kigali yapama otagiha?’ Nihirumela vina nahubuwela, ‘Ehikala vina kanindhowa dhilabo dha Afrika.’

Mohigonela nahiroma osunza elogelo enlogiwa o Estónia. Muvirile myeri dhing’onovi nahikumbirhiwa wi nirome olaba ninga anameddelela milogo. Niheddelela milogo 46 vina makuru mwilaboni yo Báltico vina o Kaliningrado, Rússia. Eji ehinittukulela osunza dhilogelo dhin’gonovi Letão, Lituano vina Russo. Kiyali yovevuwa. Mbwenyi wona wagalala wa abali na arogora ohinittukulela osunza dhilogelo dhawa vina awene ahinikamihedha. Yaka ya 1999, o Estónia wahikala filiali, miyo ddahiwobiwa wi ddalabelege wenewale vamodha na Toomas Edur , Lembit Reile vina Tommi Kauko.

Iyo nihaziwa Anamoona enjene atxedhiwe o Sibéria vyaka dha mundduni. Masiki na otabutxiwa onddimuwa nsaka nali awene mukambura vina omwalanihiwa na amudhawa, esi kadhattukuleli oyelela wagalala. Awene ahidhowavi alaleyaga miselu dhapama na nttokoso vina nowagalala. Eji ehinikamihedha wona wi enowodheya ovilela nowagalala masiki nigagweliwa makattamiho orutxa.

Nihilaba vaddiddi mwari mwa vyaka dhinjene vina kanakana mudhidhi wa ovuma, eji ehimuttukulela Lesli okana makattamiho a olema vaddiddi. Kanaziwile nomaguva wi olema oku wahivoloweleya na fibromialgia. Nahubuwela venjene akala yali yofuneya wiyelela o Canadá. Vawobiwehu wi nakose eskola ya abali o filiali o Patterson, Nova Iorque, E.U.A., miyo ddahaganyedha akala ddigahidhowa. Mbwenyi vakosilehu malobelo menjene, nahirumela niwobona. Vina Yehova wahiruriha yoganaya. Oku miyo baddili oskola, Lesli wahidhowa oja mirobwe osipitale. Omamalelowa nahiyelela ottidda mabasa ehu ninga mwakosela iyo.

ELOBO YINA YAHAJEDHELIHU —ODHOWA KONTINENTI YINA

Yaka ya 2008 banili o Estónia, omattiyu dhahi ddahiligareliwa na abali a kwatti enddimuwa addivuzaga akala ddigahirumela odhowa o Congo. Ddahitikina vowi yafuneya wi ddivahe yowakulaya mmagwananimwa. Vamaromo kaddamwaddeli Lesli sabwani ddanziwa wi komwaddela, omattiyu obule kagagonile. Mbwenyi ohigonile ddi miyo, omattiyu obule ddela olobela sabwa ya makani aba a odhowa o Afrika.

Mmangwananimwa vamwaddelile miyo Lesli, nihubuwela wi, “Yehova ddaniwoba wi nidhowe o Afrika. Ki ninaziwe dhavi nigakodda odhowa vina ninapurelemo dhavi oku nihitagihile?” Muvirile vyaka 16 banili o Estónia, nahikosa oleddo wa odhowa o Kinshasa, Congo. Filiali yo Congo yahikana jardim wokoddela vaddiddi vina mburo wofwasa. Elobo yoroma yekile Lesli va sala yali kartau emwalilena iyene o Canadá. Valebiwe mazu aba “Wunuwege vatxeyiwe weyo.” Mmalelihu waziwa abali na arogora, weddiha masunzo a Bibilia vina wona wagalala wa amisionario, wagalala wehu wa omulabela Yehova wahidhowavi wunuwaga. Na ovira wa mudhidhi ddahikana gari ya weddelela mafiliali 13 a elobo dhina o Afrika. O Afrika ddihawona attu okoddela vina ottiyana-ttiyana. Wova wana miyo vamaromo wahigoma, vina ddahimutamalela Yehova sabwa ya oddiruma odhowa okamihedha o Afrika.

O Congo, nihisunza oja dhilobo dhottiyana-ttiyana ninga matalatala, mabalaga na dhina dhobuwelihu wi kanigawodhile oja. Mbwenyi wawona abali na arogora ajaga, iyo nahitagiha okosa yakene vina nahagalala oja na awene.

Nankosa oleddo wa odhowa mpaddi mwina wa elabo ejile wi napangarhaze abali vina wavaha ajuda humatária, dhipaddi eso wahikala makuru anyakoddo alupela mittette vina avoreya ayana na aima. Abali owinjiva ali ayelegi vaddiddi. Masiki dhawene, njedhelo nawa na ovenya mukwani, omukwela wawa Yehova vina weddeyana wawa na nikuru na Yehova nihiddiginya mirima dhehu. Eji ehinittukulela opima vina olibiha njedhelo nehu. Abali ena ahitabuwa vaddiddi, ayelela mindda dhawa vina numba dhawa. Eji ehiddubutxedha wi kinrutxa oyelela momaguva dhilobo dhehu dhomaningoni nona elobo elitxi yamakamaka, mandano ehu na Yehova. Abali na arogora enjene kayeleliwe wagalala masiki na makattamiho orutxa agumanilanina. Yotagiha yawa ehinisunziha wi enowodheya owanana makattamiho-makattamihovi na oliba murima.

O ÁSIA

Muwobiwihu wi nimwalele o filiali ya Hong Kong, matxinjo aba ahinitikiniha venjene. Iyo txipo kanobuwela wi nigahikala o Ásia! Mmalelihu wona onikwela wa Yehova dila dhinjene, mmabasani ottiyana-ttiyana anittomeliye, nahirumela niwobona. Yaka ya 2013, nahibudduwa o Afrika nikubanyaga sabwa yowattiya amarho ehu vina elabo ejile yokoddela nihiziwaga yajedhela iyo musogorho.

Omwalela o Hong Kong, ali matxinjo manddimuwa vaddiddi. Sabwani sidadi oli muttitti wa attu anda dhilabo dhottiyana-ttiyana. Osunza elogelo ya e China kiyali yovevuwa. Abali ahinakela na mada meeli vina nahiziveliwa na dhoja dha elabo ejile. Filiali ya elabo ejile yahikosa mabasa menjene mwari mwa mudhidhi mung’onovi, mbwenyi mudhidhi wakene muttengo wapitxeliwa nyumba dho Beteli wela winjivavi. Abali a Nikuru Nolamulela ahubuwela na malago oguliha nyumba dhina dha filiali ejile. Mudhidhi mung’onovi vasogorhova yaka ya 2015, iyo nahimwalela o Coreia do Sul nahidhowavi nilabaga mabasa ehu. O Coreia do Sul nahifwanyawo makattamiho mena a osunza elogeloya, kanawodha ologa pama mbwenyi abali na arogora ahinilibiha wi nigahiwodha ologaga pama e Coreano.

DHILOBO DHISUNZILEHU

Omaga omarho na attu ena dila dhina kiyakala yovevuwa, mbwenyi nihidha ononelamo wi iyo nigakala anamakela aleddo, nigahiwodha waziwa attu ena momaguva. Nihona wi abali na arogora ahikana dhilobo dhinji dholigana vina Yehova onipaddutxile na mukalelo wotikiniha wa owodha ofugula murima wehu wi nimage omarho na attu enjene.—2 Kor. 6:11.

Nihona wi yali elobo yapama wawakela attu ena dhahene ninga enkosa Yehova, nihona mukalelo wanikwela Yehova vina wasogorheliye egumi yehu. Dila dhina mudhidhi wakalihu okumuwene banigavivuza akala attu ena agahinakela ninga amarho awa, nanengesa wili makartau obe makarta olibiha anilebeligi amarho ehu. Dila dhinjene nihona mukalelo wakula Yehova malobelo ehu vina mukalelo wanilibihiliye wi nidhowenavi vasogorho mabasa ehu.

Mwa ovira wa vyaka miyo na Lesli nihisunza ttima ya otamela mudhidhi wa okala vamodha muttu na mukwaye, kintanala akala nihinjiveliwa dhilobo dhokosa. Ottiya ejo nihinonelamo ttima ya ologa makani vina oteya vamodha makamaka nigasunzaga elogelo eswa. Masiku otene na mattiyu ninotamela oziwa elobo gani yapama enikoseli Yehova wi nimutamalele.

Ologa ebaribari miyo txipo kaddajedhela wi ddigahikala misionario obe ddigahikala elabo yina. Na ovira wa mudhidhi sabwa ya dhilobo dhisunzilemi, ddihona wi dhilobo dhotene dhinowodheya na nikamihedho na Yehova. Eji enoddubutxedha mazu a namavuhulela Jeremiya: “Nyuwo Nabuya muddikwekwetha.” (Jer. 20:7) Ndde iyene ohiddivaha dhilobo dhinjene dhidditikinihile na mareliho ahajedhelimi vina ohakwanihedha efunelo yaga ya okosa oleddo na aviyawu. Iyo nihifiya dhilabo dhinjene na aviyawu okwaranya esile dhobuwela miyo baddili mwana, ddiheddelela mafiliali mwari mwa kontinenti tanu. Mmabasani otene attomeliwe iyo ddinotamalela venjene nikamihedho vina ovivelela wa Lesli.

Dila dhinjene ddinowubuwela wi dhilobo dhotene dhinkosihu, ninkosela sabwa ya omukwela Yehova. Mareliho ana iyo masaka abano ali ninga weha vang’onovi mukalelo onakale egumi yamukalakala, nsaka ninatapule Yehova nlada naye wi avahe attu dhilobo dhotene dhinunlelani.—Masal. 145:16.