Wunuwihegevi Okwela Wawo

1. Dhibaribari gani dhisunzile weyo varomiliwe omusunza Bibilia?

WEYO onowubuwela mudhidhi oromiliwe omusunza Bibilia? Txino wahitikina sabwa ya oziwa wi Mulugu ohikana nzina. Wahiziveliwa oziwa wi Mulugu kanatabutxa attu omottoni. Vina wahagalala oziwa wi onele wawona anamudhi awo akwile wili, ottiya ejo munele okala vamodha mparaizu velaboni ya vati.

2. Ottiya osunzavi dhibaribari dha mBibiliani, dhipaddi gani dhunuwile weyo? (Éfeso 5:1, 2)

² Venevo vadhowa weyo osunzaga nzu na Mulugu, omukwela wawo Yehova ohunuwa. Okwela oku owuttukulela ovirihamo esile dhisunziliwe. Ohikosa dhosakula dhapama dhiniwanana na magano a mBibiliani. Ohisunza wubuwela vina okosa dhilobo dhapama sabwani wanfuna omwagalaliha Mulugu. Dhahene ninga munimutagihela mwana babi wokwela, weyo wela omutagiha Babi wawo wawirimu.—Kengesa Éfeso 5:1, 2.

3. Mavuzo gani anfwanyela iyo ovikosa?

³ Iyo txino ninovivuza: ‘Omukwela waga Yehova ohiliba ovanene opitta labo nikalile miyo Mukristu? Oromana labo nibatiziwemi, mukalelo onubuwela miyo vina dhokosa dhaga dhinowiwanana na dhubuwelo dha Yehova—ttabwa-ttabwa mukalelo onatonyihedha miyo abali na arogora okwela?’ Akala ninozinddiyela wi omukwela wehu Yehova vina abali ehu kulibile ninga mwawale, iyo kaninfwanyela okumuwa, sabwani eji ehapadduwela Akristu oroma. Yezu kanyanyali vina iyene kananinyanyale. (Ovuh. 2:4, 7) Iyene onoziwa wi enowodheya iyo osunza okana okwela wanihuna mudhidhi osunzile iyo ebaribari.

4. Txini enasunze iyo mwari mwa nsunzo ntti?

⁴ Mwari mwa nsunzo ntti ninele osunza mukalelo wa odhowavi nunuwihaga omukwela wehu Yehova vina wakwela attu ena. Ninele osunza vina maruriho anakela iyo vina attu ena nigalibiha okwela wehu.

WUNUWIHE OMUKWELA WAWO YEHOVA

5-6. Makattamiho gani agumanilena Paulo mmabasani mwaye olaleya, mbwenyi txini emukamihedhile odhowavi amulabelaga Yehova?

⁵ Murumiwi Paulo wanagalala sabwa ya omulabela Yehova, mbwenyi dila dhina kiyali elobo yovevuwa. Paulo wankosa oleddo wolapela vina okosa oleddoya kiyali elobo yovevuwa. Sabwani muleddonimwa, masaka mena wanfwanyiwa “dhawopiha mwiko” vina “osegedhiwa na atimbwini.” Iyene vina wansottottiwa na amwiddani aye. (2 Kor. 11:23-27) Ottiya ejo, dila dhinjene abali aye kalagiha otamalela mwaha wa ovilibihedha wakosa iyene wila akamihedhe.—2 Kor. 10:10; Fil. 4:15.

⁶ Txini emukamihedhile Paulo odhowavi amulabelaga Yehova? Paulo ohisunza venjene mwaha wa omuttu wa Yehova mmaleboni vina na dhampadduweli. Paulo wahikana ebaribari wi Yehova wanimukwela. (Rom. 8:38, 39; Ef. 2:4, 5) Vina iyene wahidha omukwela Yehova vaddiddi. Paulo ohilagiha omukwela waye Yehova modhela wawirela ttagaraga akadda mutugumano.—Aheb. 6:10.

7. Mukalelo gani mmodha onanikamihedhe wunuwiha omukwela wehu Yehova?

⁷ Enowodheya iyo wunuwiha omukwela wehu Mulugu modhela osunza Nzu naye nofwasa. Ogamwengesaga Bibilia, katamela ononelamo enusunziha epaddiya mwaha wa Yehova. Kavivuze: ‘Nipadduwo ntti ninoniha dhavi wi Yehova onoddikwela? Mwaha gani dhina miyo dhinddittukulela omukwela Yehova?’

8. Olobela onanikamihedhe dhavi wunuwiha omukwela wehu Yehova?

⁸ Elobo yina enanikamihedhe wunuwiha omukwela wehu Yehova, onfugulela murima wehu malabo otene modhela nlobelo. (Masal. 25:4, 5) Yehova, onele wakula malobelo ehu. (1 Jo. 3:21, 22) Khanh, murogora onkala o Ásia, ohiloga: “Vamaromo miyo ddamukwela Yehova sabwa ya ejile esunzile miyo mwaha ya iyene, mbwenyi mmonile miyo iyene akulaga malobelo aga, omukwela waga ohunuwa vaddiddi. Eji ehiddittukulela ofuna okosa dhilobo dhinimwagalaliha.”b

WUNUWIHE WAKWELA ATTU ENA

9. Timóteo wonihile dhavi wi wahilibiha wakwela abali na arogora?

⁹ Vamalile Paulo okala Mukristu, iyene wahimuziwa muzombwe wakuweliwa Timóteo. Timóteo wanimukwela Yehova vina wanakwela attu. Paulo owawaddela akadda Filipi: “Kaddina mwina oniwanana na miyo ninga [Timóteo]; kawo mwina onzuzumela dhenyu na murima.” (Fil. 2:20) Apa Paulo kalogile ewodhelo yana Timóteo ya okosa diskursu dhapama, mbwenyi Paulo wantikina okwela watonyihedhela Timóteo abali na arogora. Kavali waganyedha wi mulogo wafuna odhowa Timóteo wanjedhela vaddiddi odha waye.—1 Kor. 4:17.

10. Anna na mamunaye alagihile dhavi wakwela abali na arogora?

¹⁰ Iyo vina ninotamela mikalelo dhowakamihedha abalihu na arogora. (Aheb. 13:16) Katanalela yotagiha ya Anna, ologiwe nsunzo nivirile. Pevo ya mutokora yahinyonga odhulu wa nyumba wa anamudhi ali Anamoona a Yehova, sabwa ya ejuwene anamudhi abale kana guwo dhokoddela. Anna ohiloga: “Nihittukula guwodha banidhowa ofula, nomala banavahedha banimalile wingomar vina ofunya. Mwa iyo, mabasa aba kali orutxa, mbwenyi sabwa ya okosa ejuwene nihidha okala amarho napanovi.” Sabwa ya Anna na mamunaye wakwela abali na arogora ahittukuleleya wakamihedha.—1 Jo. 3:17, 18.

11. (a) Ovilibihedha wehu wi nilagihe okwela onapatta dhavi attu ena? (b) Mowiwanana na Gano 19:17, Yehova oniwamo dhavi iyo nigalagiha okwela?

¹¹ Iyo nigatonyihedha attu ena opama vina okwela, awene anowona wi iyo ninovilibihedha omutagiha Yehova. Awene anodhaga otamalela opama wehu opitta munubuwelihu. Khanh, ologiwe mundduni, onowawubuwela abale amukamihedhile. Iyene ohiloga: “Ddinowatamalela venjene arogora okweleya addittukuleli omabasani. Awene andha oddittukula, anddiwoba wi nije lanche obe almoso vamodha vina anddittiya vatakulu mobareleyene. Ovanene ddinononelamo wi awene ahikosa guru enddimuwa. Yattukuleli awene okosa ejuwene okwela.” Ebaribari wi kahiyo otene anatamalele dhinakoselihu. Khanh ohiloga dhahi mwaha wa otene amukamihedhile: “Miyo kowodha ddigahiziveliwa opitxa dhotene dhiddikoselani, vano miyo kaddinziwa mburo onkala awene. Mbwenyi Yehova onowodha, nona miyo ddinolobela wi iyene apitxele dhiddikoselani.” Elogile Khanh ebaribari, Yehova onowona dhilobo dhotene dhapama dhinakoselihu attu ena. Masiki akala dhilobo dhing’ono iyene onowona ninga mvaho wa ttima vina ninga mangawu anapitxe iyene.—Kengesa Gano 19:17.

12. Abali anawodhe dhavi olagiha okwela wawa mmulogoni? (Koona vina mafoto.)

¹² Akala weyo wa mbali, onawodhe dhavi walagiha okwela attu ena vina okosa dhilobo wi wakamihedhe? Mbali wa muzombwe onkuweliwa Jordan wahinvuza munddimuwa wa mulogoni yafwanyeliye okosa wi akamihedhevi mulogo. Munddimuwa wa mulogo ohimwaddela wunuwa wakosiliye vina ohinvaha malago mang’onovi agamuwodhihile okamihedha venjene. Motagiha, iyene wahimwaddela Jordan wi afiyege na mudhidhene o Nyumbani ya Omwene, alejelege attu ena, avahege dhowakula omatugumanoni, alaleyege mudhidhi wotene na nikuru naye na mabasa olaleya vina atamelege mikalelo dhowakamihedha attu ena. Muvirihilemo Jordan nlago ntti, ottiya wunuwiha dhiwodhelo dhiswa iyene vina owunuwiha wakwela abali na arogora. Iyene ohisunza wi mbali agakala mudhari wokamihedha, kanoroma wakamihedha attu ena; mbwenyi onodhowavi akamihedhaga.—1 Tim. 3:8-10, 13.

13. Okwela omuttukuleli dhavi mbali Christian orumeliwa wili ninga munddimuwa wa mmulogoni?

¹³ Weyo wahiromaga olaba ninga mudhari wokamihedha obe munddimuwa wa mmulogoni? Yehova kandduwala mabasa attiddiliwe mundduni vina okwela owuttukuleli okosa mabasaya. (1 Kor. 15:58) Iyene vina onowona okwela ondowiwe otonyihedhaga. Mbali onkuweliwa Christian wahinyonyeya sabwa ya ottiyihiwa okala munddimuwa wa mmulogoni. Iyene ohiloga: “Miyo ddahigana okosa muli mwetemwene wi ddimulabele Yehova na okwela—masiki baddina ettomo obe nne.” Mwa ovira wa mudhidhi, iyene wahiyelela okala munddimuwa wa mmulogoni. Christian ohenjedhedha: “Miyo ddahova vang’onovi wiyelela okala munddimuwa wa mmulogoni. Mbwenyi miyo ddahubuwela, akala Yehova na ttagaraga dhaye, onoddiwoba wi ddimulabele wili ninga munddimuwa wa mmulogoni, miyo ddinele orumela sabwa ya omukwela waga iyene vina wakwela abali na arogora.”

14. Txini ensunza weyo na dhilogile murogora onkala o Georgia?

¹⁴ Alabeli a Yehova vina anowakwela attu akwawa. (Mt. 22:37-39) Motagiha, Elena murogora onkala o Georgia, ohiloga: “Vamaromo elobo yaddittukulela olaleya yali omukwela waga Yehova. Mbwenyi omukwela Babi waga wa wirimu vonuwilani, okwela wana miyo na attu ena ohunuwa vina. Miyo ddantamela wubuwela makattamiho anapatta vina ddanveda makani agawodhile oddiginya mirima dhawa. Wubuwela dhahene ehiddittukulela wakamihedha.”—Rom. 10:13-15.

MARURIHO ANDA SABWA YA WATONYIHEDHA ATTU ENA OKWELA

15-16. Ninga munlagihedha mafoto, maruriho gani anda sabwa ya watonyihedha attu ena okwela?

¹⁵ Iyo nigatonyihedha okwela abalihu, ompurelamo kahiyo awene bahi. Varomile ezini ya COVID-19, mbali onkuweliwa Paolo na mwadhiye ahakamihedha arogora owunuwelavo olabihedha telefoni dhawa, tabeleti vina komputadori wi alaleyena. Murogora mmodha wana makattamiho a olabihedha telefoni yaye wahiwodha olabihedha. Iyene wahawoba anamudhi aye wi one Wubuwela Okwa wa Yezu. Anamudhi aye owakwana 60 ahiwodha wona wubuwela okwa wa Yezu modhela videoconferência! Murogora oddo na anamudhi aye otene ahidha opurelamo sabwa ya ovilibihedha wa Paolo na mwadhiye. Osogorhowa, murogoraya ohimulebela Paolo: “Ddinowutamalela sabwa ya onisunziha iyo attu owunuwelavo. Miyo txipo kaddinadduwale mukalelo onnikamihedha Yehova vina ovilibihedha wawo wi onikamihedhe.”

¹⁶ Dhotagiha ninga dha Paolo dhinonisunziha elobo yamakamaka. Iyene wahubuwela wi okwela elobo yamakamaka opitta eziwelo obe ewodhelo. Iyene ohiloga: “Miyo ddahilabihedhiwa ninga nameddelela milogo. Ovano miyo ddihinonelamo wi txino abali na arogora ahidduwala diskursu dhaga, mbwenyi awene kanadduwale nikamihedho navahilemi.”  

17. Iyo nigatonyihedha okwela bani onapurelemo?

¹⁷ Nigakwela attu ena, iyo vina ninopurelamo na mukalelo wahajedhelihu. Jonathan, onkala o Nova Zelândia, ohirumela ejene. Sabuddu dhahi na mutana, iyene ohimona mbali wa pionero alaleyaga yeka. Jonathan wahigana olaba na pioneroya Sabuddu nafwarela na mutana. Jonathan kobuwela mukalelo ogapurelimo iyene sabwa ya okala muttu wapama. Iyene ohiloga, “Mudhidhi obule miyo kaddaziveliwa odhowa mmabasani olaleya. Mbwenyi wiwa mukalelo walaleya pionero ole vina wona dhopurelamodha, ehiddikamihedha okwela mabasa olaleya. Ottiya ejo mbali oddule wahidha okala marho waga, wahiddikamihedha wunuwa mpaddi womuyani, oziveliwana mabasa olaleya vina okana mandano ofiyedheya na Yehova.”

18. Txini enfuna Yehova wi iyo nikose?

¹⁸ Yehova onfuna wi iyo notene nunuwihe omukwela wehu iyene vina wakwela attu ena. Ninga musunzelihu, iyo ninele olibiha omukwela wehu Yehova modhela wengesa Nzu naye, otanalela vina malabo otene ologa na iyene modhela nlobelo. Enowodheya iyo vina wunuwiha wakwela abalihu na arogora modhela wakamihedha. Okwela wehu ogonuwa, ninele okana mandano ofiyedheya na Yehova vina abalihu vamodha na arogora. Ottiya ejo ninele ojavo mandano aba okala-nokalawene!