Oli Womala-nawale wi Oviperheke wa Yehova?

1-2. Txini enfanyela okosa muttu ahinatti obatiziwa?

VYAKA tanu dhivirile, attu okwaranya miliau modha abatiziwa ninga Anamoona a Yehova. Enji mwa awene ali ninga murumiwi Timóteo, osunzile ebaribari oromana muhimani. (2 Tim. 3:​14, 15) Ena asunzile ebaribari mmalelani wunuwa, oku ena bali azombwe. Muyana dhahi wamusunza Bibilia na Anamoona a Yehova obatiziwe na vyaka 97!

² Akala weyo oli namasunza wa Bibilia obe amambali awo Anamoona a Yehova, onowubuwela obatiziwa? Eji yogana yamakamaka vaddiddi! Mbwenyi ohinatti obatiziwa, onofanyela oviperheka wa Yehova. Mu nsunzoni ntti ninele wona entapulela oviperheka wa Yehova, vina sabwaya jani ehinfanyeliwe wova ogafuna obatiziwa mudhidhiya ogafiya.

OVIPERHEKA TXINI?

3. Kavaha dhotagiha dha attu aviperheka wa Yehova.

³ Mbibiliani, oviperheka entapulela osakuliwa na Yehova wi owodhe omulabela na murima wokoddela. Nlogo na Izrayel nali nlogo niviperhekeli wa Yehova. Mbwenyi attu ena aniviperheka wa Yehova na mukalelo wa vawoka. Motagiha, Aroni wannabala “nipapi nanddarhama nali ninga lámina.” Nipapi ntti nali ezinddiyelo yoniha wi Aroni wahisakuliwa ninga namakutta munddimuwa wa Izrayel wi amulabele Yehova na mukalelo wa vawoka. (Onam. 8:9) Anazireu vina aniviperheka wa Yehova na mukalelo wa vawoka. Nzu ntti “Nazireu,” na Ebrayiko nazirʹ, nintapulela “Ottiyiwa Vawa-vene,” obe “Oviperheka.” Anazireu anfwanyela ofwara malamulo avawoka alebiwe mu Nlamuloni na Mizé.—Oleb. 6:​2-8.

4. (a) Txini eniwanana na oviperheka wa Yehova? (b) Txini entapulela ovikodda? (Koona vina foto.)

⁴ Weyo ogaviperheka wa Yehova, onosakula okala namafwara wa Yezu Kristu vina oromana venevo okosa efunelo ya Yehova enakale elobo yamakamaka vaddiddi mwigumini mwawo. Kito oviperheka oniwanana na eni? Yezu ologa: “Ole onfuna oddifwara miyo, attukule pingirhizi yaye addifwaregevi.” (Mt. 16:24) Nzu ntti “pingirhizi yaye” na Egregu ninotapulela vina “ovikodde wamwinya.” Ogaviperheka wa Yehova, weyo onofanyela okodda elobo-txilobo egadhile omunyimula. (2 Kor. 5:​14, 15) Eji enowiwanana vina na okodda “[dhintopa] maningo,” ninga ogonihana wonyakuwa. (Gal. 5:​19-21; 1 Kor. 6:18) Omwiwelela Yehova enodhana makattamiho mwigumini mwawo? Nne, mbwenyi ejo enawodheye ogamukwela Yehova vina ogakuluvela wi malamulo aye anowupuriha. (Masal. 119:97; Iza. 48:​17, 18) Mbali dhahi onkuweliwa Nicholas ohiloga: “Enowodheya weyo wona malamulo a Yehova ninga ngome dha mukambura dhihinuttiya okosa enfuniwe obe ninga ngome enubarela otakuniwa na poddogoma.”

5. (a) Muttu oniviperheka dhavi wa Yehova? (b) Ottiyana gani olivo wa oviperheka na obatiziwa? (Koona vina foto.)

⁵ Onaviperheke dhavi wa Yehova? Weyo onokosa nlobelo ompikirhelaga Yehova wi onamulabele iyene bahi vina okosa efunelo yaye enakale vamburoni voroma mwigumini mwawo. Mwebaribari, onompikirhela Yehova wi onele omukwela na “murima wawo wotene, na thontho yawo yotene, na guru dhawo dhotene.” (Mk. 12:30) Nlobelo ntti noviperheka ninkosiwa muttu bali yeka, weyo na Yehova. Oku obatizo onkosiwa vari va anamwinji vina enotonyihedha wi ohiviperheka wa Yehova. Oviperheka wawo nipikirhelo na ttima vaddiddi, nona onele okosa muli mwetemwene wi wakwanihe nipikirhelo nawo, jijuwene enjedhela Yehova.—Koh. 5:​4, 5.

ONFWANYELELA NNI OVIPERHEKA WA YEHOVA?

6. Txini enimuttukulela muttu oviperheka wa Yehova?

⁶ Mwaha wamakamaka onuttukulela oviperheka wa Yehova ku omukwela wawo iyene. Okwela oku kahiye elobo eniwamo weyo mwa mudhidhi mung’onovi nomala bivira. Ottiya ejo okwela ondha sabwa ya eziwelo yebaribari vina ononelamo dhilobo dhomuyani—kuloga dhilobo dhisunziliwe mwaha wa Yehova vina efunelo yaye, sisene dhinonuwihe omukwela wawo. (Kol. 1:9) Omusunza wawo Bibilia ehukamihedha okana nikuluvelo wi (1) Yehova Mulugu webaribari, (2) Bibilia Nzu na Mulugu, vina (3) Yehova onolabihedha nikuru naye wi akwanihedhe efunelo yaye.

7. Txini enfwanyelihu okosa nihinatti oviperheka wa Yehova?

⁷ Abale aviperhekeli wa Yehova anofwanyela oziwa masunziho amakamaka a mBibiliani vina anokalawo mowiwanana na malamulo a Yehova. Awene anovilibihedha ologa na attu ena esile dhisunzilani mBibiliani. (Mt. 28:​19, 20) Omukwela wawa Yehova ohunuwa vina anofuna omulabela iyene na murima wawa wotene. Weyo vina oniviwamo dhahene? Ogamukwela Yehova na mukalelo obu, kunaviperheke wa iyene sabwa ya okokomeziwa na namasunziha wawo wa Bibilia obe amambali awo, vina kunakose yogana eji sabwa ya akwawo otene obatiziwa.

8. Otamalela onawukamihedhe dhavi oviperheka wa Yehova? (Masalmo 116:​12-14)

⁸ Ogatanalela dhilobo dhotene dhukoseli Yehova, weyo onotamalela venjene vina onofuna omperhekela egumi yawo. (Kengesa Masalmo 116:​12-14.) Bibilia onloga wi ddi Yehova onnivaha “dhapama dhetene na mivaho dhetene dhawakwana.” (Tia. 1:17) Mvaho wa ttimaya ompitta mivaho dhotene yobolo ya Mwanaye, Yezu. Kobuwela eji! Sabwa ya yobolo enowodheya weyo okana mandano ofiyedheya vaddiddi na Yehova ottiya ejo Yehova onowuvaha gari ya okalawo namukalakala. (1 Jo. 4:​9, 10, 19) Oviperheka wa Yehova mukalelo mmodha wa olagiha wi onomutamalela Yehova ottiya sabwa ya yobolo bahi mbwenyi vina sabwa ya mareliho otene akeliliwe. (Olib. 16:17; 2 Kor. 5:15) Jijene ensunzihu mu nivuruni Kajavo Egumi Yamukalakala! nsunzo 46 ddima 4, munfwanyeya vidiyu ya mitala miraru ena mutoma Kamperhekele Mulugu Mivaho Dhawo.

OLI OMALA-NAWALE WI OVIPERHEKE WA YEHOVA VINA OBATIZIWE?

9. Sabwaya jani muttu kanfwanyela odideliwa obatiziwa?

⁹ Txino weyo onubuwela wi kuli omala-nawale wi oviperheke wa Yehova vina obatiziwe. Txino onofwanyela okosa matxinjo mwigumini mwawo wi okalewo mowiwanana na malamulo a Yehova, obe txino onofunavi mudhidhi mwinjene wi olibihe nroromelo nawo. (Kol. 2:​6, 7) Kahiye anamasunza otene a Bibilia anunuwa mpaddi womuyani mudhidhi wakakene vina kahiye azombwe otene ambatiziwa na vyaka modhene. Jamakamaka otanalela matxinjo anfwanyeliwe okosa venevo ovilibihedhe wi wakwanihe yogana yawo, se oviladdaniha na muttu mwina.—Gal. 6:​4, 5.

10. Txini enfwanyeliwe okosa ogazinddiyela wi kuli omala-nawale wi oviperheke wa Yehova vina obatiziwa? (Koona vina kasha “Weyo Onleliwa Mwibaribarini?”)

¹⁰ Masiki wonaga wi kuli omala-nawale wi oviperheke wa Yehova kuwiyelele mundduni. Kamukumbirhe Yehova nikamihedho wi odhowegevi bugakosa matxinjo anfuneya. (Fil. 2:13; 3:16) Kakana nikuluvelo wi Yehova onele ovuruwana nlobelo nawo vina onele wukamihedha.—1 Jo. 5:14.

ENA ANRUTXELIWANI OVIPERHEKA WA YEHOVA VINA OBATIZIWA

11. Yehova onanikamihedhe dhavi odhowavi niroromeleyaga na iyene?

¹¹ Attu ena ali omala-nawale wi abatiziwe anowaganyedha akala anofwanyela obatiziwa obe nne. Txino anovivuza, ‘Kito akala ddinokosa yottega enddimuwa nomala ddiburutxiwa mmulogoni?’ Akala jijuwene enupadduwela kakana nikuluvelo nawi Yehova onele wuvaha dhotene dhinfuniwe wi “[weddena] makalelo animfwanyelela muthu wa Nabuya, [wi wirege] dhetene dhinimuzivela.” (Kol. 1:10) Iyene vina onele wuvaha guru dhinfuniwe wila okose dhili dhapama. Yehova ohakamihedha attu enjene okosa efunelo yaye. (1 Kor. 10:13) Nona sabwa ya ejene, ankala attu ang’onovi bahi amburutxiwa mmulogoni. Yehova ononivaha dhotene dhinfunihu wi nidhowe nikalagavi ororomeleya.

12. Txini enfwanyeliwe okosa wi ohikose yottega enddimuwa?

¹² Iyo notene ninokwekwetteleya okosa dhilobo dhabure. (Tia. 1:14) Mbwenyi ogagumanana dhoweha weyo ohikana ofuru wa osakula enfwanyeliwe okosa. Ebaribariya jiji, weyo ohikana ofuru wosakula enfwanyeliwe okosa. Attu ena anloga wi kinwodheya wang’anela mukalelo onviwamo iyo vina dhinkosihu, mbwenyi ejo kahiye ebaribari weyo onowodha wang’anela dhifunelo dhohifwanyelela. Nona dila dhotene dhinagumaniwena yoweha weyo ohikana ofuru wosakula ohikosa elobo yabure. Wi ejo ewodheye dhihikalawo dhilobo dhinawukamihedhe, motagiha, kamulobelelege Yehova malabo otene. Kakana matadelo a pama a okosa nsunzo nomwinya. Wonege matugumano otene vina wawaddelege attu ena esile dhinsunziwe. Ogawodha okosa esi dhotene, onele okana guru ya odhowavi okalaga ororomeleya na Yehova. Txipo kudduwale wi Yehova onele wukamihedha okosa dhilobo esi.—Gal. 5:16.

13. Yotagiha gani yapama enittiyedhi José?

¹³ Enele okala yovevuwa odhowavi weddeyagana na Yehova ogagana ejile enakosiwe ohinagumanana yoweha. Bibilia onowaloga attu enjene akosile ejuwene, awene ali attu ohiligana ninga iyo. Motagiha, mwadhi Putifar dila dhinjene wannimudidela José wi agone na iyene, José wanziwa yafwanyeliye okosa. Bibilia onloga dhahi: José wankodda. José mwinyene ohiloga dhahi: “Ddinwodha dhavi wira elobo ninga eji, yothabwetxa otakala, ddimuddawelaga Mulugu?” (Wita 39:​8-10) Eji enowoniha kakamwe wi José wanziwa yafwanyeliye okosa ahinatti wehiwa na mwadhi Putifar, nona eji ehimukamihedha okosa dhilobo dhapama vagumaniliyena yoweha.

14. Ninawodhe dhavi orabela yoweha?

¹⁴ Ninawodhe dhavi okana mubuwelo wakene wanna José? Enowodheya osakula ovanene ejile enakosiwe ogadha ogumanana yoweha. Kuwubuwele nne dila bili, akala jofuneya obe nne otxatxama dhilobo dhinidda Yehova vina kudidele wubuwela esuwene. (Masal. 97:10; 119:165) Ogakosa ejuwene onele owodha orabela yoweha vowi onele oziwa yokosa.

15. Muttu ononiha dhavi wi onomutamela Yehova na murima wotene? (Ahebreu 11:6)

¹⁵ Txino weyo onubuwela wi ohimala ofwanya ebaribari vina onofuna omulabela Yehova na murima wawo wotene, masiki dhawene onoviwona ninga kuli womala-nawale wi oviperheke wa Yehova vina obatiziwe. Akala pumwenemo kakosa ninga ejile ekosile Mwene Davidi. Iyene wahimunlela Yehova: “Nabuya, ddipimení, onaní murimaga; ddehení wi muziwe mobuwelo aga. Mone akala ddipupuruwa; muddeddihe mudila mwenyu y’egumi.” (Masal. 139:​23, 24) Yehova onowaruriha abale animutamela na murima wetene. Guru enkosiwe ya wakwanihedha dhogana esi ya oviperheka vina obatiziwa enowoniha ejuwene.—Kengesa Ahebreu 11:6.

ODHOWEGEVI OKALAGA OFIYEDHEYA NA YEHOVA

16-17. Abale anleliwa mwibaribarini anawodhe dhavi omususela Yehova? (Joau 6:44)

¹⁶ Yezu ohiloga wi anamafwara aye ankukusiwa na Yehova. (Kengesa Joau 6:44.) Katanalela ttima ena mazu aba vina mukalelo anupattani. Yehova onowona elobo yapama eli mmurimani mwa muttu-muttu onimukukuseliye mwibaribarini. Iyene onomona muttu-muttu na mikalelo dha vawoka vina onna ttima vamentoni vaye. (Olib. 7:6) Yehova onuwona dhahene.

¹⁷ Txino weyo oli muzombwe onleliwa mwibaribarini na amambali awo. Txino onodhaga wubuwela wi onowodha omulabela Yehova sabwa ya amambali awo okala mwibaribarini ottiya wi ddi Yehova wukukusile. Mbwenyi Bibilia onloga wi: “Mmususele Mulugu, iyene onowususelani.” (Tia. 4:8; 1 Map. 28:9) Weyo ogaroma omususela Yehova, iyene onokosa mpaddi waye, onele wususela. Yehova kanuwona ninga muttu-muttuvi obe muttu onkosa mpaddi wa nikuru. Yehova onomususela muttu-muttu—masiki na abaleya anleliwa mwibaribarini. Akala muttu onogana omususela Yehova iyene onkosa eji eli va Tiago 4:8.—Koona vina 2 Tesalónika 2:13.

18. Txini enone iyo nsunzo ninfwarela? (Masalmo 40:8)

¹⁸ Ogaviperheka wa Yehova vina obatiziwa, onomutagiha Yezu. Na ofuna waye Yezu wali omala-nawale wi akose elobo-txilobo egamukumbirhile Babe. (Kengesa Masalmo 40:8; Aheb. 10:7) Nsunzo ninfwarela, ninele wona txini enawukamihedhe odhowagavi ororomeleyaga na Yehova ogamala obatiziwa.