“Virihaganimo Nzu na Mulugu”

1-2. Txini enakosiha adhari a Mulugu okala owagalala? (Tiago 1:​22-25)

YEHOVA vina Mwanaye wokweleya anfuna wi iyo nikane wagalala. Namaleba wa Masalmo 119:2 ohiloga: “Agari babale anvirihamo dhirumileye, animutamela na murima wotene.” Yezu ohivaha nikuluvelo nina, alogaga: “Agari thabwa-thabwa babale aniwa nzu na Mulugu, avirihagamo.”—Lk. 11:28.

² Ninga adhari a Yehova, nili nlogo nowagalala. Sabwaya jani? Nihikana mwaha dhinji, mbwenyi ehindduwalihu jawi ninowengesa masiku otene Mazu a Mulugu vina ninovilibihedha ovirihamo dhinsunzihu.—Kengesa Tiago 1:​22-25.

3. Nimpurelamo dhavi nigavirihamo dhinengesihu mu Nzuni na Mulugu?

³ Dhihikalawo dhilobo dhinji dhimpurelamo iyo nigavirihagamo mazu a Mulugu. Mwa mpaddi mwina, ninoziwa wi ejo ttarho yamakamaka wi nimwagalalihe Yehova. Oziwa ejuwene enonagalaliha. (Koh. 12:13) Nigavirihamo dhinsunzihu mu Nzuni na Mulugu ninolibiha mandano na amudhihu vina abali a mmulogoni. Ejo txino ehupadduwela. Vina ninorabela makattamiho menji anapatta abale ahinfwara dila dha Yehova. Mwebaribari ninorumela na elogile Mwene Davidi. Mmaleliye ologa mu jiboni malamulo, dhoruma vina dhottonga dha Yehova, iyene ohiloga: “Onvirihamo, onopúrana vopitha.”—Masal. 19:​8-12, [Masal. 19:​7-11 NM].

4. Ekalele nni yorutxa ovirihamo Nzu na Mulugu?

⁴ Mwebaribari dila dhina enokala yorutxa ovirihamo Mazu a Mulugu. Masiki dhikalagawo dhilobo dhinji dhokosa, ninofwanyela otamela mudhidhi wa omwengesa Bibilia vina omusunza wi niziwe enijedhelana Yehova wila nikose. Nona, ninele wona marhe mang’onovi ananikamihedhe wengesa masiku otene. Ninele vina osekeserha enanikamihedhe otanalela dhinengesihu vina wona mikalelo dhinawodhihu ovirihamo mwigumini mwehu esile dhinsunzihu.

OTAMELE MUDHIDHI WA WENGESA NZU NA MULUGU

5. Dhilobo gani dhinnijela mudhidhi?

⁵ Enjene ankosa mpaddi wa nlogo na Yehova ahikana dhilobo dhinji dhokosa mwigumini mwawa. Ninononga mudhidhi mwinjene nizuzumelaga okosa dhilobo dhinloga Bibilia wi samakamaka. Motagiha, enji mwa iyo ninolaba wi nivisapele nanya vina nasapele anamudhi ehu. (1 Tim. 5:8) Akristu enji anowazuzumela anamudhi ali aredda obe owunuwelavo. Vina iyo notene ninofwanyela ozuzumela egumi yehu, ejo enofuna mudhidhi. Ottiya mabasa aba, iyo nihikana dhilobo dhina dhamakamaka dhokosa mmulogoni. Elobo modha yamakamaka ja ozuzumela mabasa a olaleya. Na mabasa aba otene anihuna, onawodhe dhavi ofwanya mudhidhi wa omwengesa Bibilia malabo otene, otanalela dhinengesiwe vina ovirihamo?

6. Onawodhe dhavi wika vamburoni voroma wengesa wawo wa Bibilia? (Koona vina foto.)

⁶ Omwengesa Bibilia elobo yamakamaka vaddiddi mwa iyo ninga Akristu, nona ninofwanyela ovilibihedha omwengesa malabo otene. (Fil. 1:10) Alogaga sabwa ya muttu wohagalala, Masalmo kapitulu 1 onologa: Onojiwa murima na magano a Nabuya, onofwaseyela mattiyu na mutana. (Masal. 1:​1, 2) Ejo entapulela wi ninofwanyela otamela mudhidhi wa wengesa. Mudhidhi gani ogafwanyeleli omwengesa Bibilia? Yowakulaya enodhaga ottiyana mwa muttu-muttu wa iyo. Yamakamakaya ja osakula mudhidhi onanikamihedhe omwengesa Bibilia masiku otene. Mbali dhahi onkuweliwa Victor ohiloga: “Miyo ddinoziveliwa okosa wengesa waga wa Bibilia mudhidhi wa membesi. Masiki ddihiziveliwaga obeya, mudhidhi obu kadhiwo dhilobo dhinji dhinddizuzumiha, jovevuwa ofwaseyela dhinsunzimi sabwani kaddinakanetxa dhilobo dhinji dhowubuwela.” Enopadduwa yakakene na weyo? Kavivuze, ‘Mudhidhi waga wa omwengesa Bibilia buvi?’

OTANALALE DHENGESILIWE

7-8. Txini endhaga onizuzumiha ohipurelamo mowakwana-mwene esile dhinengesihu? Kaladdaniha.

⁷ Ogasakula mudhidhi wa omwengesa Bibilia, ekalawo elobo yina enfwanyeliwe okalela txenjewa. Wahiromaga wengesa elobo mudhidhi mung’onovi musogorhomwa budduwala yengesiliwe? Iyo notene nahiromaga opadduweliwa ejuwene. Mokubanyiha-mwene eji enodhaga opadduwa na omwengesa wehu Bibilia. Txino nihigana wengesa makapitulu menjene a Bibilia masiku otene. Ejo japama. Ninofwanyela wimetxa dhogana vina ovilibihedha wakwanihedha. (1 Kor. 9:26) Nona omwengesa Bibilia kumaromowa—omaromo wapama, mbwenyi kunttiya okala omaromo. Enofuneya elobo yina nigafuna opurelamo venjene wengesa wehu wa Bibilia.

⁸ Kobuwela yoladdaniha eji: Miri dhinofuna muzogwe wi dhunuwe. Mbwenyi akala muzogwe onorubwa vaddiddi mattakaya anorubala manje. Ejo egapadduwa, miridha kadhinapurelemo manjeya. Jaderetu muzogwe agarubwa vang’ono-vang’ono sabwani manjeya anonyowela mmattakani, ejo enokamihedha miridha wunuwa. Na mukalelo wakakene, ninofwanyela orabela omwengesa Bibilia n’owaguva, kuloga, omaguviha nihikanaga mudhidhi wotanalela vina ovirihamo dhinengesihu.—Tia. 1:24.

9. Txini enfwanyelihu okosa akala nihikana elemelelo ya omwengesa Bibilia nomaguva?

⁹ Weyo ohizinddiyela wi onomwengesa Bibilia nanda kumpurelamo elo? Txini enfwanyeliwe okosa? Kengesa vang’ono-vang’ono. Kavilibihedhe otanalela dhinengesiwe obe dhengesile weyo. Ejo kinfwanyela okala yorutxa. Akala moonelo wotanalela onowukalela worutxa, egahiwodheya otagiha eji, otxima buroma wubuwela esile dhengesiliwe. Egahikala weyo osunza mudhidhi mwinjene wi owodhe otanalela dhinsunziwe. Mwa mpaddi mwina enowodheya weyo ogana wengesa maversikulu mang’onovi vina olabihedha mudhidhi onahalewo wi otanalele dhinengesiwe. Victor ologiwe mundduni ohiloga: “Miyo ddinengesa maversikulu mang’onovi obe kapitulu modha. Vowi ddinengesa na membesi ddinovira labo nantero dditanalelaga dhengesilimi.” Kintanala mudhidhi onnongiwe ogengesaga, jamakamaka wengesa na mukalelo onokamihedhe opurelamo esile dhinengesiwe.—Masal. 119:97; koona kasha “Mavuzo Anfwanyeliwe Otanalela.”

10. Kavaha yotagiha enlagiha mukalelo onawodhiwe ovirihamo dhinsunziwe. (1 Tesalónika 5:​17, 18)

¹⁰ Kintanala mudhidhi onimwengesiwe Bibilia vina mudhidhi onnongiwe, onofwanyela otamela marhe a ovirihamo dhinengesiwe. Ogengesaga mpaddi wa Bibilia, kavivuze, ‘Ddinawodhe dhavi ovirihamo miselu esi ovanene obe musogorho?’ Wi niladdanihe, kobuwela wi onimwengesa 1 Tesalónika 5:​17, 18. (Kengesa.) Ogamala wengesaga maversu aba enowodheya otxima, butanalela mukalelo wa malobelo awo vina dila ngasi dhinlobeliwe. Ottiya ejo enowodheya weyo otanalela dhilobo dhigawodhiliwe otamalela. Txino onogana omutamalela Yehova mwa dhilobo ttaru. Masiki akala onvira mudhidhi mung’onovi otanalelaga esile dhinsunziwe mBibiliani ejo enele wukamihedha ononelamo Mazu a Mulugu vina ovirihamo enlogani. Kobuwela mukalelo onapurelemo weyo wengesa wawo wa Biblia ogafwara ttarho esi masiku otene na dhipaddi dhina dhinengesiwe. Onele okala namavirihamo wa Nzu na Mulugu. Kito ogazinddiyela wi dhihikalawo dhilobo dhinjene dhinfwanyeliwe okosa matxinjo?

KAKANA DHOGANA DHOPIMELELEYA

11. Sabwaya jani mudhidhi mwina onodhaga okala wozuzumene? Kavaha yotagiha.

¹¹ Ogamwengesaga Bibilia, weyo onodhaga ozinddiyela wi onofwanyela okosa matxinjo menjene mwigumini mwawo. Kobuwela eji: Wengesa wawo wa ddabuno ohikana malago mwaha wa nsakulano. (Tia. 2:​1-8) Weyo wona wi onofwanyela okosa matxinjo mwaha wa mukalelo onaweddiwiwe attu ena, venevo onogana okosa matxinjoya. Ehikala! Mwangwana wengesa mpaddi wa Bibilia onloga mwaha wa ttima ya wang’anela nlumi. (Tia. 3:​1-12) Weyo ozinddiyela wi dila dhina mazu awo ankalaga okumula. Venevo onogana ologa na attu ena mazu olibiha. Labo nina wengesa wawo wa Bibilia onovaha malago mwaha wa wopiha wa okala marho wa elabo. (Tia. 4:​4-12) Nomala weyo ozinddiyela wi onofwanyela osakula deretu mavego awo. Labo nina onodhaga wubuwela wi jorutxa vaddiddi okosa matxinjo aba otene.

12. Sabwaya jani kunfwanyela okumuwa akala wengesa wawo wa Bibilia onolagiha wi onofwanyela okosa matxinjo? (Koona vina nota.)

¹² Akala onozinddiyela wi onofwanyela okosa matxinjo menjene, kukumuwe. Sabwa ya weyo ozinddiyela wi onfwanyela okosa matxinjo aba enowoniha wi oli muttu wovyeviha. Nigakala ovyeviha, ninele wengesa Malebo vina otamela vanfwanyelihu osisigula.a Kudduwale wi ottukula omuttu oswa elobo enfwanyeliwe odhowavi okosaga. (Kol. 3:10) Txini enokamihedhe okala namavirihamo wa Nzu na Mulugu?

13. Onawodhe dhavi okana dhogana dhopimeleleya? (Koona vina foto.)

¹³ Ottiya otamela ovirihamo dhinengesiwe mudhidhi wakakene, enowodheya ovirihamo vang’ono-vang’ono. (Gano 11:2) Katagiha okosa eji: Okana lista na dhilobo dhinfwanyeliwe okosa matxinjo, vasogorhova kasakulavo modha obe bili wi orome okosa matxinjoya, ottiyaga dhina ninga dhilobo dhinfwanyeliwe ovilibihedha okosa vasogorhova. Onarome wuvi?

14. Yogana gani enfwanyeliwe oromana?

¹⁴ Karoma na yogana enakale yovevuwa wakwanihedha. Obe enowodheya weyo oroma na mpaddi ononiwe wi onofwanyela okosa matxinjo menjene. Ogamala ozinddiyela ejile enfuniwe, katamela mmapublikasauni ehu, txino olabihedhaga Índice das Publicações da Torre de Vigia obe Guia de Pesquisa para Testemunhas de Jeová. Olobele mwaha wa yogana yawo omukumbirhaga Yehova wi ovahe efunelo vina guru ya wirana. (Fil. 2:13) Vasogorhova ovirihemo ejile esunziliwe. Okosa matxinjo mwa yogana yawo yoroma txino enele wuttukulela okosa matxinjo mwa elobo yina. Mwebaribari, weyo ogona wi ohiwodha okosa matxinjo obe wunuwiha mukalelo w’Okristu, txino enele okala yovevuwa okosa yakakene mwa dhipaddi dhina.

KATTIYA NZU NA MULUGU NEDDIHE EGUMI YAWO

15. Ottiyana gani olivo wa nlogo na Yehova na enji animwengesa Bibilia? (1 Tesalónika 2:13)

¹⁵ Attu ena anloga wi ahimwengesa Bibilia dila dhinjidhene. Mbwenyi awene anorumela dhinloga Bibilia? Anovirihamo vina anottiya Bibilia weddiha egumi yawa? Mokubanyiha-mwene dila dhinji yowakulaya enkalaga nne. Ottiyana gani olivo na nlogo na Yehova! Dhahene ninga Akristu a nsaka zana noroma, iyo ninomurumela Bibilia ninga “nzu na Mulugu.” Ottiya ejo, ninokosa mpaka munwodhelihu wi nilabihedhe magano ansunzihu mBibiliani.—Kengesa 1 Tesalónika 2:13.

16. Txini enanikamihedhe okala anamavirihamo Mazu?

¹⁶ Mbwenyi kahiye yovevuwa wengesa vina ovirihamo Nzu na Mulugu. Enodhaga okala yorutxa ofwanya mudhidhi wi nengese. Obe ninodhaga okana elemelelo ya wengesa nomaguva nihiwodhaga opurelamo ejile enengesihu. Obe ninodhaga okala ozuzumene na matxinjo otene anfwanyelihu okosa, kintanala dhorutxa dhinagumanihuna, ejo kintapulela wi kaninawodhe owanana. Na nikamihedho na Yehova ninele owodha opemberha. Venevo kaninakale anamewa bahi, ninele okala vina anamavirihamo Mazu a Mulugu. Mohaganyedha, venevo vandowihu nengesaga Nzu na Mulugu vina nivirihagamo mwigumini mwehu, ninokalavi owagalalene.—Tia. 1:25.