Kafwanya Wagalala Sabwa ya Okala Muttu Wotapuwa Mada

1-2. Nimpurelamo dhavi sabwa ya ottanddiwa na ewodhelo ya ofwanya wagalala modhela ovaha opitta ovahiwa?

YEHOVA onipaddutxile na mukalelo onwodhihu wagalala vaddiddi modhela wakosela opama attu ena opitta ovahiwa. (Mer. 20:35) Ejo entapulela wi iyo kaninziveliwa nigavahiwa elobo na ena? Nne. Iyo notene ninowagalala nigavahiwa elobo na attu ena. Mbwenyi akala ninovaha, ninowagalala vopitta. Ninowagalala sabwa ya oziwa wi Yehova onittanddile dhahene. Sabwaya jani?

² Sabwa ya Yehova onittandda dhahene, iyo ninowodha okana wagalala. Enowodheya iyo wagalala vaddiddi nigatamela marhe a wakamihedha ena. Kunrumela wi japama vaddiddi oziwa wi Yehova onipaddutxile na mukalelo obu?—Masal. 139:14.

3. Yehova onkuweleliwa nni Mulugu wowagalala?

³ Bibilia onologa wi wakosela dhapama attu ena ononidhelana wagalala onddimuwa, nona kanintikina Yehova agalogiwaga ninga Mulugu wowagalala. (1 Tim. 1:11) Iyene ddiromile wakosela dhapama attu ena vina kawo muttu wapama onimpitta Yehova. Mwaha waye, iyo nihikana egumi, ninowedda vina nihikalawo dhahene ninga mulogile Paulo va Merelo 17:28. Ebaribariya jawi, “dhapama dhetene na mivaho dhetene dhawakwana” dhinakelihu dhinda wa Yehova.—Tia. 1:17.

4. Txini enanikamihedhe okana wagalala?

⁴ Se waganyedha iyo notene nigahiziveliwa okana wagalala modhela wawirela dhapama attu ena. Enowodheya okosa ejuwene sabwa ya otagiha otapuwa mada wa Yehova. (Ef. 5:1) Nigasunzaga yotagiha ya Yehova, ninele wona enfwanyelihu okosa akala ena kantamalela enakoselihu. Ejo enele onikamihedha wakosela dhapama attu ena vina wenjedhedhavi wagalala wehu.

KATAGIHA OTAPUWA MADA WA YEHOVA

5. Dhilobo gani dhinnivaha Yehova?

⁵ Yehova onlagiha dhavi otapuwa mada? Koona dhotagiha esi. Yehova ononivaha dhinnijombela mpaddi womaningoni. Txino Yehova kananivahe dhetene dhinfunihu, mbwenyi ononivaha dhotene dhinnijombela. Motagiha Yehova ononivaha dhoja, guwo vina mburo vokala. (Masal. 4:8; Mt. 6:​31-33; 1 Tim. 6:​6-8) Kito Yehova onkosa ejuwene sabwa ya odideliwa? Nne! Mwa dhahene Yehova onkosela nni ejuwene?

6. Txini ensunzihu na Mateu 6:​25, 26?

⁶ Yehova ononivaha dhetene dhinnijombela sabwani ononikwela venjene. Koona elogile Yezu va Mateu 6:​25, 26. (Kengesa.) Iyene ohilabihedha yotagiha ya dhottanddiwa. Alogaga mwaha wa balame, Yezu ohitapulelamo: “Kadhinala, kadhinsinanga nne kadhinkoya dhoja vanddarani.” Mbwenyi koona elogiliye vasogorhova: “Babinyu wa wirimu ddinsapela.” Venevo Yezu ohivuza: “Koddi nyuwo na balame eso, onetxa ttima kahiyo nyuwo?” Txini ensunzihu? Vamentoni va Yehova alabeli aye battima vaddiddi opitta dhinama. Akala Yehova onozuzumela dhojombeliwa dha dhinama iyo ninofwanyela okuluvela wi onele onikoya! Dhahene ninga Babi onzuzumela dhojombeliwa dha anamudhi aye, Yehova ononikwela vina onele odhowavi anizuzumelaga.—Masal. 145:16; Mt. 6:32.

7. Na mikalelo gani dhinawodhihu otagiha otapuwa mada wa Yehova? (Koona vina foto.)

⁷ Dhahene ninga Yehova, na okwela enowodheya iyo wakamihedha ena mpaddi womaningoni. Motagiha, weyo onomuziwa mbali onjombeliwa dhoja obe yowabala? Yehova onowodha wulabihedha wi omukamihedhe mbali oddo. Nlogo na Yehova ninoziwiwa ninga nikuru notapuwa mada vagapadduwa dhifoyo. Nsaka na COVID-19 abali na arogora ahavaha dhoja, guwo vina dhilobo dhina abale ajombeliwa. Enjene ahikosa mivaho wi akamihedhe mabasa a Omwene ankosiwa elabo yotene. Eji yahinikamihedha odhowagavi nazuzumelaga abalihu na arogora apattiwe na dhifoyo. Abali aba otapuwa mada ahilabihedha mazu ali va Ahebreu 13:16: “Muhidduwale wira dhapama, mukamyedhagana na dhinnenyuna, vowi mikutho dhinimuzivela Nabuya, sisene.”

8. Na mukalelo gani mwina onikamihedha Yehova? (Filipi 2:13)

⁸ Yehova ononivaha guru. Yehova onowagalala venjene wavaha adhari aye oweddeyana guru dhinfunani. (Kengesa Filipi 2:13.) Wahiromaga olobela okumbirhaga guru wi owodhe opemberha yoweha obe ovilela makattamiho? Txino weyo wahilobela okumbirhaga guru wi owodhe wakwaniha dhilobo dhafuniwe okosa vasikuni. Venevo voniliwe wi nlobelo nawo nahakuliwa, txino wahubuwela mazu a Paulo vina wahirumela na elogiliye va Filipi 4:13: “Ddinowodha dhetene na guru dha Kristu onddilibiha.”

9. Ninawodhe dhavi omutagiha Yehova nilabihedhaga guru dhehu wi nakamihedhena ena? (Koona vina foto.)

⁹ Masiki nikalaga attu ohiligana, ninowodha otagiha mukalelo onlabihedha Yehova ewodhelo yaye na otapuwa mada. Ebaribari wi kaninawodhe ogawa guru dhehu na ena. Masiki dhawene enowodheya olabihedha guru dhinihu wi nakamihedhe attu ena. Motagiha, enowodheya odhowa o musika obe okosa mabasa mena a vatakulu wi nimukamihedhe mbali wowunuwelavo obe oli muredda. Akala egumi yehu enonirumeliha, enowodheya vina okamihedha mabasa a okuputta obe a ovenyihedha Nyumba ya Omwene. Olabihedha guru dhehu na mikalelo esi enele wakamihedha ena animwebedha Yehova.

10. Ninawodhe dhavi walibiha ena na mazu ehu?

¹⁰ Kudduwale wi mazu vina ahikana ewodhelo. Onowodha omubuwela muttu agaziveliwe venjene weyo komutamalela na murima wawo wotene? Onomuziwa muttu ontamela nipangarhazo? Akala jijuwene, onkoddela nni omwaddela muttuya wi onomukwela vaddiddi? Enowodheya ologa na iyene kove na kove, omuligarela obe txino omulebela karta, e-mail vina mensaje. Kunfwanyela ozuzuma na dhinalogiwe. Mazu ovevuwa mbwenyi anda mmurimani, anodhaga okala ejilene enfuna mbaliya obe murogoraya wi adhowegevi akalaga ororomeleya obe wiyelela okana njedhelo.—Gano 12:25; Ef. 4:29.

11. Yehova ananivahe dhavi eziwelo?

¹¹ Yehova ononivaha eziwelo. Murumiwi Tiago ohileba: “Akala mmodhavo wenyu onotowa ononélamo, amulobe Mulugu: onovahiwa, vowi iyene onowatanala na murima athu etene; kanimuhimedha muthu.” (Tia. 1:5) Ninga munlagiha mazu aba, Yehova kanivikoyela eziwelo mwinyene. Na otapuwa mada iyene onogawa eziwelo yaye na attu ena. Koona vina wi, Yehova aganivaha eziwelo iyene onkosa ejuwene “se omwimwedha muttu,” obe “se ofwanya muladdu.” Yehova kanfuna wi noove okumbirha malago aye. Mwebaribari iyene onfuna wi nikumbirhe eziwelo.—Gano 2:​1-6.

12. Gari gani dhinihu dha ologa na ena esile dhinziwihu?

¹² Kito mwa mpaddi wehu? Enowodheya omutagiha Yehova vina ologa na ena ejile enziwehu? (Masal. 32:8) Nlogo na Yehova nihikana gari dhinjene dha ologa na ena esile dhinsunzani. Motagiha, iyo ninowashagiha anamalaleya aswa wi awodhe olaleya. Anddimuwa a mmulogoni anowakamihedha adhari okamihedha vina abali abatiziwe wi asunze ozuzumela mabasa attomeliwani mmulogoni. Vina abale anna ttotto yinjene mmabasani a omaga vina ovenyihedha, anowashagiha abale ahina ttotto yinjene wi awodhe omaga Nyumba dha Omwene, dha matugumano a murudda na dhina dhinlabihedhiwa mu nikuruni na Yehova.

13. Ninawodhe dhavi omutagiha Yehova nigashagihaga ena?

¹³ Katamela omutagiha Yehova ogashagihaga ena. Kobuwela wi Yehova onotapuwa mada agashagihaga ena esile dhinziwiye. Na mukalelo wakakene, iyo ninologa dhinziwihu na abale ansunza. Kaninfwanyela wova wasunziha ena esile dhinziwihu, novaga wi muttuya anadhe onaba mpaddo. Vina kaninfwanyela wubuwela: ‘Miyo kaddishagihiwe na muttu! Iyene atamele oziwa yeka.’ Mudhari wa Yehova kanfwanyela wubuwela dhahene. Ottiya ejo, iyo kanagalala bahi sabwa ya wawaddela ena esile dhinziwihu mbwenyi vina ovaha mpaka munwodhelihu wi nashagihe. (1 Tes. 2:8) Njedhelo nehu ttawi awene awodhe wasunziha attu ena. (2 Tim. 2:​1, 2) Iyo notene nigakala attu otapuwa mada vina nisunziha esile dhinziwihu, ninele owodha wakamihedha ena okala otapuwa mada, ejo enele onidhelana wagalala.

AKALA MUTTU KANVAHA TTIMA DHIMUKOSELIHU

14. Txini enkosa attu nigawirela dhilobo dhapama?

¹⁴ Nigakala attu otapuwa mada, makamaka na abalihu, dila dhinjene awene anonitamalela. Txino anonimandarela karta atamalelaga obe anokosa ejuwene na mukalelo mwina. (Kol. 3:15) Ejo egapadduwa iyo ninowagalala vaddiddi sabwa ya okosa elobo wila nakamihedhe.

15. Txini enfwanyelihu wubuwela akala muttu kanvaha ttima dhimukoselihu?

¹⁵ Mbwenyi ninofanyela oziwa wi attuya kanatamalele dila dhotene esile dhinakoselihu. Dila dhina ninodhaga ozinddiyela wi muttuya kavahile ttima nne vang’onovi mudhidhi, guru vina dhilobo dhinvahilihu. Ejo egapadduwa txini enfwanyelihu okosa wi ninayelele wagalala obe ninakumuwe? Kobuwela mazu a nlebo na nsunzo ntti, Merelo 20:35. Wagalala wehu kunda akala attu ena ahitamalela dhikosilihu obe nne. Enowodheya iyo osakula wakamihedha enna masiki awene ahitamalelaga, dhavi? Koona mikalelo dhing’onovi.

16. Txini enfwanyelihu ozuzumela?

¹⁶ Ozuzumele omutagiha Yehova. Yehova onowavaha attu dhilobo dhapama masiki dila dhina awene ahitamalelaga. (Mt. 5:​43-48) Yehova ohiloga wi iyo nigakosela opama attu ena “[nihijyedhaga] wiyelihedhiwa. Nlivo [nehu] ninakale ninddimuwa-nene.” (Lk. 6:35) Nona kukumuwe akala dila dhina attuya kanatamalele dhinkosiwe. Kobuwela wi Yehova onele wuttuva na dhilobo dhapama sabwa ya wakamihedha ena vina ovaha na wagalala.—Gano 19:17; 2 Kor. 9:7.

17. Mwaha gani wamakamaka onnittukulela wakamihedha ena? (Luka 14:​12-14)

¹⁷ Elobo yina enfwanyelihu okosa wi nimutagihe Yehova ja wubuwela mazu a Yezu anfwanyeya va Luka 14:​12-14. (Kengesa.) Kahiye yabure omuwoba muttu wi nije vamodha obe wakosela opama abale anziwehu wi anele oniyihedha. Kito nigazinddiyela wi dila dhinji ninowawirela opama attu ena nijedhelaga wakela elobo? Ejo egapadduwa ninofanyela okosa elogile Yezu. Enowodheya onvaha elobo muttu ohina mikalelo dha oniyihedha. Dhahene nigahagalala vaddiddi sabwani ninomutagiha Yehova. Bu mukalelo obu onanikamihedhe okanavi wagalala nigawirela dhapama ena oku awene ahitamalelaga.

18. Txini enanikamihedhe ohubuwela dhilobo dhabure mwaha wa attu ena?

¹⁸ Kuwubuwele wi ena Kanatamalele. (1 Kor. 13:7) Akala yahipadduwa muttu ohitamalela emukoseliwe kavivuze: ‘Muttuya kantamalela, obe ohidduwala ologa ddinowutamalela?’ Txino ohikana mwaha omuttukulele iyene ohikosa yajedhelihu. Attu enna txibarene anotamalela, mbwenyi anorutxiwa ologa mukalelo oniviwamo awene. Txino anokana manyazo sabwa ya okamihedhiwa, makamaka akala masaka a mundduni bawene akamihedha attu ena. Mbwenyi akala ninowakwela abalihu na arogora kaninobuwele bure mwaha wawa vina ninele odhowavi nakamihedhaga ena na wagalala.—Ef. 4:2.

19-20. Ekalele nni yamakamaka ovilela nigawirela dhapama attu ena? (Koona vina foto.)

¹⁹ Okale muttu wovilela. Alogaga mwaha wa otapuwa mada, Mwene wa eziwelo Salomau ohileba: Kaponyedha dhokana dhawo mmanjeni, sabwani malabo a musogorho onele ofwanya wili. (Koh. 11:1) Mazu aba anonisunziha wi dila dhina attuya anatamalele bahi vagavira—malabo menjene. Jijuwene epadduwile na murogora dhahi.

²⁰ Vyaka dhinjene mundduni, mwadhi wa nameddelela milogo wahimulebela karta ya nipangarhazo murogora wamalile-wene obatiziwa, alogaga ttima ya okalavi wororomeleya na Yehova. Muvireli vyaka tanu na ttaru, murogoraya wahakula modhela karta, alogaga: “Weyo kunziwa mbwenyi miyo ddanfuna-wene wuziwiha mukalelo okamihedhiwimi na mazu awo vyaka esi dhotene. Weyo oddilebela mazu apama vaddiddi vina miyo txipo kaddinadduwale nlebo nilogiliwe.”a Mmaleliye ologa makattamiho agumaniliyena, murogoraya ohiloga: “Masaka mena miyo ddanfuna onyanyala dhotene vina ottiya omulabela Yehova—mbwenyi musogorhomwa miyo ddanubuwela nlebo niddilebele weyo nanda nlebona nanddivaha guru . . . ya odhowagavi ddikalaga wororomeleya.” Iyene ohenjedhedha: “Mwari mwa vyaka esi tanu na ttaru karta nttile nihiddikamihedha odhowagavi ddivilelaga.” Katanalela wagalala okanile mwadhi wa nameddelela milogo mwakeleliye karta ntti mumaleli ovira malabo menjene! Na mukalelo wakakene txino iyo vina ninele otamaleliwa vagavira mudhidhi mwinjene.

21. Ninfunelani odhowagavi nitagihaga otapuwa mada wa Yehova?

²¹ Ninga monelihu, Yehova ohinittandda na mukalelo wavawoka. Iyene onittanddile wi nikane wagalala modhela wakosela dhilobo attu ena opitta wakela. Iyo vina ninowagalala venjene nigawodha wakamihedha abalihu. Ja deretu awene aganitamalela sabwa ya dhakosilihu. Masiki akala muttuya kanvaha ttima nikamihedho ninvahilihu, ninele wagalala sabwa ya oziwa wi nihikosa elobo yapama. Yehova onodhaga onivaha dhilobo dhinjene opitta nikamihedho navahilehu ena. (2 Map. 25:9) Ebaribariya jawi nigalogaga sabwa ya wavaha attu ena dhilobo dhapama, kawo muttu onimpitta Yehova! Vina kuli wagalala opitta ottuviwa na mwinyene Yehova. Nona ninofwanyela ogana dila dhotene otagiha otapuwa mada wa Babi wehu wa wirimu.