Mavuzo Ankosa Anamengesa
Anju ali asakuliwi anlogiwa va 1 Timóteo 5:21 anaddiwana ani?
Murumiwi Paulo wahimulebela mukwaye Timóteo wali vina munddimuwa wa mulogo: Ddinowukokomeza vamentoni va Mulugu, va Yezu Kristu vina anju ali asakuliwi, wi weddegena gano esi na etene ohimusakulaga muttu.—1 Tim. 5:21.
Wi enikamihedhe ononelamo anju aba anaddiwana ani, ninele osekeserha mwaha wa anju ahinfwanyela okosa mpaddi wa nikuru ntti na anju ali asakuliwi. Awene kahiyo abale ankosa mpaddi wa 144.000. Mudhidhi omulebele Paulo Timóteo ovenyihiwa mukwani wa Akristu ottikitteliwa wali ohinaroma. Arumiwi na attikitteliwi ena àli ahinatti okala dhopaddutxiwa dhomuyani, mwadhawene kigawodheyile awene okala anju asakuliwe.—1 Kor. 15:50-54; 1 Tes. 4:13-17; 1 Jo. 3:2.
Ottiya ejo, anju ali asakuliwi kahiyo anju abale amusadduweli Mulugu nsaka na Mpulo. Anju aba ahisakula okala mpaddi wa Satana, bakala adomonyo vina amwiddani a Yezu. (Wita 6:2; Lk. 8:30, 31; 2 Ped. 2:4) Musogorho awene anele ofugeliwa muvayani mwari mwa vyaka 1.000 vina musogorhomwa anele otolotxiwa vamodha na Satana.—Jud. 6; Ovuh. 20:1-3, 10.
Mwadhawene anju ali asakuliwi alogile Paulo, babale anlaba vamodha na “Mulugu [vina] Yezu Kristu,” abuwene anlogiwa va versu eji.
Ahikalawo matxikwi na matxikwi a anju ororomeleya. (Aheb. 12:22, 23) Enoneya ninga Yehova kanattomela mabasa akakene anju otene. (Ovuh. 14:17, 18) Motagiha, nsaka dhahi Yehova wahimuttoma anju mmodha wi àtolotxe anyakoddo awakwana 185.000 a akadda Asíria. (2 Amwe. 19:35) Txino ena ahittomeliwa wi “atugumanihe dhotene dhinkwakwattutxa Mumweneni [mwa Yezu], na otene anlupa malamulo.” (Mt. 13:39-41) Oku ena txino ahittomeliwa “watugumaniha otene asakuliwe,” wi akele egumi wirimu. (Mt. 24:31) Vina ena anottomeliwa wi anamelelege mwetemwene munvira iyo.—Masal. 91:11; Mt. 18:10; kaladdaniha na Mateu 4:11; Luka 22:43.
Anju ali asakuliwi anlogiwa va 1 Timóteo 5:21, txino anaddiwana anju attomeliwe okamihedha milogo. Mwari mwa makani a versu eji, Paulo ohivaha malago sabwa ya mukalelo wafwanyelela anddimuwa a mmulogoni weddiha mulogo vina wi abale ankosa mpaddi wa mulogo anfwanyelela wariha. Mwa mpaddi mwina, anddimuwa a mmulogoni anofwanyela wakwanihedha mabasa awa ahikanaga nsakulano vina kafwanyelela okosa dhogana se otanalela. Mwaha wamakamaka onattukulela anddimuwa a mmulogoni ofwara nlago nivudheleliwe murumiwi Paulo jawi awene analabela abaliwa vamentoni va Mulugu, Yezu vina va anju asakuliwe. Eji enolagiha wi anju ena anottomeliwa okamihedha milogo, wabarela alabeli a Mulugu, okamihedha mabasa a olaleya vina omwaddela Yehova esile dhinonani.—Mt. 18:10; Ovuh. 14:6.