Watagihe Anju Ororomeleya

1-2. (a) Iyo nittiyanilena dhavi na anju? (b) Mikalelo gani dhehu dhinligana na dha anju?

NINGA nlogo na Yehova iyo ninokosa mpaddi wa anamudhi okweleya vina animwebedha. Mwari mwa anamudhi aba anofwanyeyamo abali na arogora orugunuwa elabo yotene vina matxikwi na matxikwi a anju. (Da. 7:​9, 10) Nigatanalela mwaha wa anju, dila dhinjene ninzuzumela wang’ana mukalelo ottiyanilani na iyo. Motagiha, anju ahikalawo mwari mwa vyaka dhinjene mundduni iyo nihinatti okalawo. (Job 38:​4, 7) Awene ba guru vaddiddi, bokoddela, boligana opitta iyo sabwani iyo nili attu ottega.—Lk. 9:26.

² Masiki na ottiyana oku nihikana mikalelo dhinjene dhinligana na dha anju. Motagiha, iyo ninowodha otagiha mikalelo dha Yehova vina nihikana ofuru wosakula dhahene ninga awene. Anju ddi anju ohikana nzina naye, mikalelo dhaye vina mabasa ottiyana animuttiddeliye Yehova dhahene ninga iyo. Ottiya ejo, iyo notene nihikana efunelo ya omwebedha Muttanddi wehu.—1 Pe. 1:12.

3. Txini ensunzihu na anju?

³ Vowi nihikana mikalelo dhinji dhinladdana na dha anju, ninopangarhazeya vina ninosunza dhilobo dhamakamaka na yotagiha yawa. Mu nsunzoni ntti ninele wona mukalelo onawodhihu otagiha ovyeviha wa anju, wakwela wawa attu, ovilela wawa vina guru enkosani wi attiye mulogo wokoddelene.

ANJU ANOVYEVIHA

4. (a) Anju alagihile dhavi ovyeviha? (b) Txini enakosiha anju okala ovyeviha? (Masalmo 89:7)

⁴ Anju ororomeleya anovyeviha. Masiki akanaga ttotto, ewodhelo vina eziwelo, awene anofwara malago a Yehova. (Ms. 103:20) Agakwanihedhaga mabasa awa, awene txipo kanvisibana ewodhelo yawa. Anomwiwelela Yehova nowagalala masiki ena ahifiyedhaga oziwa mazina awa.a (Wi. 32:​24, 29; 2 Am. 19:35) Awene anokodda wakela nttittimiho nininfwanyelela Yehova. Txini enakosiha anju okala ovyeviha? Awene anomukwela Yehova vina anomuriha vaddiddi.—Kengesa Masalmo 89:7.

5. Anju mmodha olagihile dhavi ovyeviha amusisigulaga murumiwi Joau? (Koona vina foto.)

⁵ Ninele osekeserha nipadduwo ninlagiha ovyeviha wa anju. Mwari mwa yaka ya 96 N.K. (Nsaka na Kristu) anju ohinziwehu nzina naye wahimulagiha murumiwi Joau dhilobo dhotikiniha vaddiddi. (Ovu. 1:1) Txini ekosile Joau mooniliye dhilobo esi dhotikiniha? Iyene wahitamela omwebedha anjuya. Mbwenyi anju oddu woweddeyana momaguva-mwene wahikodda vina wahiloga: “Porhe! Kukose ejuwene! Miyo ddili mudhari ninga weyo . . . Omwebedhe Mulugu!” (Ovu. 19:10) Yowakula gani yovyeviha! Anju oddu kafuna wakela nttittimiho obe osibiwa, momaguva-mwene wahimwaddela Joau wi wanfwanyela omwebedha Yehova. Ottiya ejo iyene vina kavikosihile ninga wamakamaka opitta Joau. Masiki vadhiliye amwebedhaga Yehova mwari mwa mudhidhi mwinjene vina okana ewodhelo opitta Joau, na ovyeviha iyene wahiloga wi murumiwi Joau ddi mudhari mukwaye. Vamusisigulile anju oddule murumiwi Joau, iyene kakosile ejuwene na mukalelo wovadda vaddiddi obe kamunyanyuweli. Ottiya ejo wahiloga na opama. Txino iyene wahinonelamo wi Joau wahimukokorela sabwa ya wonihiwa okule wotikiniha.

6. Ninawodhe dhavi otagiha ovyeviha wa anju?

⁶ Ninawodhe dhavi otagiha ovyeviha wa anju? Enowodheya iyo okosa mabasa ehu se ovisibana obe otamela ottittimihiwa sabwa ya dhilobo dhiwodhilihu okosa. (1 Ko. 4:7) Ottiya ejuwenevi kaninfwanyela wubuwela wi nili amakamaka opitta ena sabwa ya omulabela Yehova mwari mwa mudhidhi mwinjene obe mabasa anttiddehu munikuruni na Yehova. Mwebaribari venevo vandowihu nikosaga mabasa menjene munikuruni na Yehova, ninofwanyela ovona ninga ang’onoyamo. (Lk. 9:48) Ninga anju, ninofwanyela walabela ena. Iyo kaninfuna wi ena anonege ninga amakamaka opitta awene.

7. Ninawodhe dhavi olagiha ovyeviha nigafunaga omusisigula obe onvaha malago muttu?

⁷ Enowodheya iyo vina olagiha ovyeviha nigafuna omusisigula obe onvaha malago muttu—masiki akala mbali wa mmulogoni obe anihu. Dila dhina enele ofuneya ovaha malagoya se opipiriha. Mbwenyi dhahene ninga anju wamulagile Joau na oderetu, enowodheya iyo vina ovaha malago ohipipiriheya nihimuttukulelaga muttuya okala okumuwene. Nigahiviwone ninga anddimuwa opitta ena, ninele owodha ovaha malago andela mBibiliani na okwela vina nriho.—Kol. 4:6.

ANJU ANOWAKWELA ATTU

8. (a) Mowiwanana na Luka 15:​10, anju anlagiha dhavi wakwela wawa attu? (b) Anju ankamihedha dhavi mabasa a olaleya? (Koona vina kapa.)

⁸ Anju kampwaza dhinapadduwela attu vina kanubuwela wi attuya kanna ttima. Awene anowakwela venjene attu. Anowagalala muttu ottegile agatxinuwa vina ole wattiyile omulabela Yehova agamwiyelela. Anju anowagalala muttu agasunza sabwa ya Yehova, osogorhowa bagana okosa matxinjo mwigumini mwaye wi awodhe omulabela. (Kengesa Luka 15:10.) Anju vina anokamihedha mabasa a olaleya. (Ovu. 14:6) Masiki ahikosaga mabasa aba anyene, awene anodhaga omulabihedha namalaleya wi aloge na muttu onfuna omuziwa Yehova. Ebaribari wi kaninfwanyela ologa na nikuluvelo midhidhi gani dhinilabihedhile anju wi niloge na muttu sabwa ya Yehova. Vowi Yehova onodhaga olabihedha marhe mena—ninga muya waye wokoddela—wi àkamihedhe attu obe àlabihedhe adhari aye wila awodhe ologa na awene. (Mer. 16:​6, 7) Masiki dhawene iyene onowalabihedha anju wi anikamihedhe nigalaleyaga. Nona nigalaleyaga miselu dhapama, ninofwanyela okuluvela wi anju anele okala na iyo wi anikamihedhe.—Koona kasha “Malobelo Awa Ahakuliwa.”b

9. Ninawodhe dhavi watagiha anju vina wakwela attu?

⁹ Ninawodhe dhavi watagiha anju vina wakwela attu? Egavuwihiwa mmulogoni wi mbali ohiyelela okala Munamoona wa Yehova iyo ninofwanyela wagalala dhahene ninga munagalala anju. Ottiya ejo ninofwanyela ovilibihedha olagiha wi ninomukwela. (Lk. 15:​4-7; 2 Ko. 2:​6-8) Enowodheya vina watagiha modhela okosa mpaka munwodhelihu mmabasani a olaleya. (Ko. 11:6) Dhahene ninga munkamihedha anju mabasa ehu a olaleya, iyo vina ninofwanyela otamela marhe a wakamihedha abalihu na arogora mmabasani a olaleya. Motagiha, enowodheya olagana odhowa mmalaleyoni na namalaleya ohinna ttotto yinjene? Enowodheya wakamihedha abali na arogora owunuwelavo obe ali aredda wi awodhe ozuzumela mabasa a olaleya?

10. Txini ensunzihu na yotagiha ya Sara?

¹⁰ Kito akala kaninwodha okosa mpaka mwafunelihu mmabasani a Yehova sabwa ya makattamiho annipatta? Masiki dhawene enowodheya ofwanya marhe a olaba vamodha na anju mmalaleyoni. Katanalela yotagiha ya murogora dhahi onkala o India onkuweliwa Sara.c Mmaleliye olaba ninga pionera mwari mwa vyaka 20, Sara wahikala muredda vina kawodha obudduwa vakamani. Iyene wahikumuwa vaddiddi. Mbwenyi sabwa ya nikamihedho nokwela na anamudhi aye omuyani vina wengesa waye wa Bibilia, vang’ono-vang’ono Sara wahiyelela okana monelo wofwanyelela. Ebaribari wi iyene wanfwanyela oparhapattela mabasa aye a olaleya mowiwanana na makattamiho agumaniyena. Vowi kawodha ogilati wi alebe makarta, yawodhiye okosa ja olaleya modhela telefoni. Nona iyene wahaligarela attu afuniye wawiyelela, nanda awene ahinvahedhela manumero a attu ana efunelo ya osunza. Yodhelavoya? Mwari mwa myeri dhing’onovi Sara wahifiyedha okana masunzo a Bibilia owakwana 70—iyene kawodha weddiha masunzoya otene yeka! Nona wahavaha anamasunza ena abali a mmulogoni. Anamasunzaya enjene ovano anowoona matugumano. Anju anowagalala venjene olaba vamodha na abali vina arogora ninga Sara, ankosa mpaka munwodhelani mmabasani a olaleya!

ANJU ANOVILELA

11. Anju anlagiha dhavi ovilela?

¹¹ Anju dhotagiha dhapama dha ovilela. Awene ahivilela ohiligana vina obure mwa vyaka matxikwi na matxikwi. Awene ahimoona Satana na anju ena amulabela Yehova vamodha na awene amusadduwelaga Yehova. (Wi. 3:1; 6:​1, 2; Jud. 6) Bibilia onomuloga anju wororomeleya owanile na anju mwina wabure mwari mwa malabo menjene. (Da. 10:13) Ottiya ejuwenevi, mwa vyaka dhinjene dha okalawo wa attu, anju anowawoona attu enjene asakulaga omwika ekotti Yehova. Masiki dhawene, anju aba oweddeyana anodhowavi amulabelaga Yehova na wagalala vina na murima wetene. Awene anoziwa wi mudhidhi wofwanyelela, Yehova onele ogomiha ohiligana wetene.

12. Txini enanikamihedhe ovilela?

¹² Ninawodhe dhavi otagiha ovilela wa anju? Dhahene ninga anju, iyo ninowona ohiligana vina ninogumanana ofwara-fwariwa. Mbwenyi ninga awene, iyo nihikana nikuluvelo nawi nsaka nofwanyelela, Yehova onele ogomiha obure wetene. Nona ninofwanyela watagiha anju ororomeleya vina “nihitxelele wira dhapama.” (Gal. 6:9) Yehova ohipikirhela wi onele onikamihedha ovilela. (1 Ko. 10:13) Enowodheya olobela wa Yehova nikumbiraga muya wokoddela, ejo enele onikamihedha ovilela vina wagalala. (Gal. 5:22; Kol. 1:11) Ki akala onogumanana ofwara-fwariwa? Kamukuluvele kakamwe Yehova vina kuwove. Iyene onele wukamihedha vina wulibiha.—Ahe. 13:6.

ANJU ANOKAMIHEDHA MULOGO OKALAVI WOKODDELA

13. Mabasa gani amakamaka anttidda anju masaka aba omariha? (Mateu 13:​47-49)

¹³ Yehova ohavaha mabasa amakamaka anju masaka aba omariha. (Kengesa Mateu 13:​47-49.) Attu matxikwi na matxikwi orugunuwa elabo yotene anofuna oziwa miselu dhapama. Ena mwa abuwene anele okosa matxinjo mwigumini mwawa vina akale Akristu ebaribari, oku ena kanakose. Anju ahivahiwa mabasa a “wattiyaniha avuti na aligani.” Na mazu mena ejo entapulela wi awene ahittomiwa wi abarele okoddela wa mulogo. Ejo kintapulela wi muttu ottiyile otugumana kintanala mwahaya, txipo kaneyele; kintapulela vina wi milogo kadhinakane makattamiho. Masiki dhawene ninokuluvela wi anju anolaba vaddiddi wi milogo dhikalevi dhokoddela.

14-15. Ninawodhe dhavi watagiha anju vina ozuzumela wawa okoddela wa mulogo? (Koona vina foto.)

¹⁴ Ninawodhe dhavi watagiha anju sabwa ya ozuzumela okoddela wa mulogo? Modhela okosa mpaddi wehu wi nittiye mulogoya wokoddelene mpaddi womuyani vina modhela mweddelo wehu. Wi ejo ewodheye ninovilibihedha obarela murima wehu. Mukalelo mmodha wa okosa ejuwene bwa wasakula amarho animukwela Yehova vina orabela okosa dhilobo dhiganittukuleli ottiya omulabela Yehova. (Ms. 101:3) Enowodheya iyo vina wakamihedha abalihu odhowagavi akalaga ororomeleya na Yehova. Motagiha, txini enfwanyeliwe okosa ogazinddiyela wi mbali ohikosa yottega enddimuwa? Sabwa ya omukwela mbaliya, jamakamaka vaddiddi omwaddela wi àtamele anddimuwa a mmulogoni. Akala iyene kankosa ejuwene iyo ninofwanyela wawaddela anddimuwa a mmulogoni epadduwile. Efunelo yehu jawi muttu-muttuvi ontamela nikamihedho nomuyani akamihedhiwe momaguva-mwene!—Tia. 5:​14, 15.

¹⁵ Mokubanyiha-mwene ena anokosa yottega enddimuwa vina anofwanyela oburutxiwa mmulogoni. Ejo egapadduwa, iyo ninottiya wedda na muttuya.d (1 Ko. 5:​9-13) Eji enokamihedha mulogo okalavi wokoddelene. Nigattiya wedda na muttu oburutxiwe mmulogoni, mwebaribari ninomulagiha oderetu. Dhavi? Sabwani enodhaga omukamihedha ononelamo wi iyene onofwanyela omwiyelela Yehova. Agakosa ejuwene, iyo vamodha na Yehova vina anju ninele wagalala venjene.—Lk. 15:7.

16. Onawodhe watagiha anju na mikalelo gani?

¹⁶ Gari enddimuwa vaddiddi osunza sabwa ya anju vina olaba vamodha na awene! Iyo ninofuna otagiha mikalelo dhinani, ninga: ovyeviha, wakwela attu, ovilela vina efunelo yawa ya okoddelihavi mulogo. Nigaatagiha anju aba ororomeleya iyo vina ninele okosa mpaddi wa anamudhi anamulabele Yehova namukalakala.