Kakosa Dhogana Dhinimwagalaliha Yehova

1. Yorutxa gani engumanana iyo notene?

MASIKU otene iyo ninofwanyela okosa dhogana, dhogana dhina dhing’ono dhina kadhinrutxa. Ninga motagiha ogana dhinfunihu oja va matabishuni obe mudhidhi wogona. Oku dhogana dhina dhinorutxa, dhinodhaga opatta egumi yehu, wagalala wehu, attu anakwelihu ofiyedha opatta mandano ehu na Yehova. Ninfuna wi nikosege dhogana dhinanipurhihe iyo nanya vina dhinapurelemo amudhihu. Opitta dhotedhene esi ninfuna wi dhogana dhehu dhimwagalalihege Yehova.—Rom. 12:​1, 2.

2. Dhilobo gani dhinawukamihedhe okosa dhogana dha malago?

² Enowodheya weyo okosa yogana ya malago akala (1) onotamela oziwa makaniya, (2) ogapima enubuwela Yehova mwaha wa makaniya vina (3) ogatanalela dhosakula dhinna weyo. Nsunzo ntti ninele ologa mwaha wa dhilobodhene esi ttaru dhinfwanyelihu okosa vina ninele onikamihedha oziwa mukalelo onawodhihu oshagiha ewodhelo yehu yotanalela.—Gan. 2:11.

KATAMELA OZIWA PAMA MAKANIYA

3. Ekalele nni yamakamaka oziwa makaniya otene ohinatti okosa yogana? Kavaha yotagiha.

³ Elobo yoroma enfwanyeliwe okosa wila osakule yogana yapama, kuziwa mowakwana-mwene makaniya. Ejo ekalele nni yofuneya? Kamubuwele muttu ondowa ologa na mediku mwaha wa makattamiho a mwigumini aniyena. Koddi medikuya agahinvaha murobwe ahiromile omombeza mureddaya obe okosa mavuzo aniwanana na ereddaya? Nne-wene. Weyo vina onele okosa dhosakula dhapama ogaroma opima dhilobo dhotedhene dhiniwanana na makaniya. Kito onawodhe dhavi okosa ejoya?

4. Mowiwanana na Gano 18:​13, txini enfwanyeliwe okosa wi oziwe makaniya otene? (Koona vina foto.)

⁴ Dila dhina enowodheya oziwa makaniya mowakwana-mwene modhela okosa mavuzo. Kobuwela wi weyo okonvidareliwa opikinikini. Koddi onofwanyela odhowawo? Akala weyo kunimuziwa pama osasanyedhile pikinikiya obe dhinfuna opadduwawo enele ofuneya okosa mavuzo ninga aba: “Wuvi vina mudhidhi gani onakosiwe pikinikiya? Bani okonvidariwe? Attu angasi anakalewo? Bani onfuna osogorhela pikinikiya? Attuya andowa akosewo eni? Koddi onele okala dhomwa dholezeliha?” Dhowakula dha mavuzo aba dhinele wukamihedha weyo ogana akala onofwanyelela odhowawo obe nne.—Kengesa Gano 18:13.

5. Ogamala oziwa makaniya otene, elobo gani enfwanyeliwe okosa?

⁵ Ovano weyo omala okana miselu dhotedhene, kobuwela mowakwana-mwene makaniya. Motagiha, kito akala weyo onoziwa wi attu ena anfuna okala vapikinikiniva kanriha magano a Yehova vina kavanakale muttu onawang’anelege attuya wi anamwe vopitta? Onoona ninga pikinikiya agahidha olupa maddile? (1 Pe. 4:3) Enofuneya vina oroma opima akala pikinikiya onakosiwe mudhidhi wakene wa matugumano obe wa mabasa wolaleya. Ogamala oziwa makaniya mowakwana-mwene weyo onele owodha osakula yogana yapama. Mbwenyi ekalawo elobo yina enfwanyela weyo okosa. Ovano ohimala oziwa ejile enubuwela weyo mwaha wa makaniya; kito Yehova onubuwela eni?—Gan. 2:6.

KATANALELA EJILE ENUBUWELA YEHOVA MWAHA WA MAKANIYA

6. Mowiwanana na Tiago 1:5 ninfwanyelela nni okumbirha nikamihedho na Yehova modhela nlobelo?

⁶ Kamukumbirhe Yehova wi owodhe ononelamo ejile enubuweliye mwaha wa makaniya. Yehova onopikirhela onivaha eziwelo wi niwodhe okosa dhogana dhinamwagalalihe. Yehova onowavaha eziwelo ejo attu ‘otene na murima wotene, ahakoddihaga.’—Kengesa Tiago 1:5.

7. Onawodhe dhavi oziwa moonelo wa Yehova mwaha wa makaniya? Kaladdaniha.

⁷ Ogamala olobela okumbirhaga malago a Yehova, kafwaseyela wona yowakula enavahiye. Kobuwela yoladdaniha eji: Kowiliwa weyo welokosa oleddo nanda burimela, kavali waganyedha wi ogahimukumbirha muttu onziwawo wi awukamihedhe. Ovano, koddi ogahiroma odhowa muttuya ahinakula? Nne, kugakosile. Weyo ogahifwaseyela ovuruwana dhotedhene dhigaloga muttuya. Na mukalelo wakakene ogamala omukumbirha Yehova eziwelo, katamela oziwa yowakula yaye, onele ozinddiyela modhela otamela mBibiliani malamulo na magano aniwanana na makani awo. Motagiha ogaganaga akala onele odhowa obe nne o pikinikini weyo onofwanyela otanalela wila oziwe txini enloga Bibilia mwaha wa mattanga, mandano abure vina wika Omwene wa Mulugu vamburoni voroma ottiya dhifunelo dhawo.—Mt. 6:33; Rom. 13:13; 1 Ko. 15:33.

8. Txini enfwanyeliwe okosa akala onofuna nikamihedho wila ofwanye miselu dhintameliwe? (Koona vina foto.)

⁸ Txino onele ofuna nikamihedho wila ofwanye miselu dhintameliwe, enowodheya weyo omukumbirha malago mbali obe murogora woliba mpaddi womuyani. Mbwenyi enofuneya vina weyo wamwinya opepesa. Enowodheya vina ofwanya miselu dhinjidhene mu dhipanoni dhehu dhopepesana. Ninga Mutonyo Wopepesa wa Anamoona a Yehova vina munivuruni Malebo a Bibilia Anakamihedha Akristu. Kudduwale enfuna weyo: okosa yogana enamwagalalihe Yehova.

9. Ninawodhe dhavi okana ebaribari wi yogana yehu enele omwagalaliha Yehova? (Éfezo 5:17)

⁹ Ninawodhe dhavi oziwa akala yogana yehu enele omwagalaliha Yehova? Vamaromo ninofwanyela omuziwa pama Yehova. Bibilia onloga wi: Omuziwa Mukoddeli onodhana ononelamo. (Gan. 9:10) Ononelamo webaribari onda mwa oziwa mikalelo dha Yehova, efunelo yaye, esile dhinziveliwiye na esile dhiniddiye. Bili dhahene kavivuze, ‘Dditanalelaga dhotedhene dhinziwimi mwaha wa Yehova, koddi yogana eji enele omwagalaliha?’—Kengesa Éfezo 5:17.

10. Magano a mBibiliani anfwanyelela nni okala amakamaka mwa iyo?

¹⁰ Dila dhina wila nimwagalalihe Yehova enofuneya okosa yogana ehinazivele akwihu obe anamudhi ehu. Motagiha, amambali enagu na efunelo yawi anawa anatabuwe—anowadidelaga wila ateliwe na mulobwana onna kobirhi dhinji—masiki bobanile mpaddi womuyani. Ebaribari wi amambali aba anomuzuzumela mwanawa vina anfuna wi iyene akaane egumi yottugareya, koddi mulobwanaya oddo onele owodha omukamihedha wunuwa mpaddi womuyani? Onele omukamihedha okana mandano oliba na Yehova? Txini enubuwela Yehova mwaha wa makaniya aba? Iyo ninofwanya yowakulaya va Mateu 6:33. Va nleboni ntti Akristu anokokomeziwa “otamela voroma Omwene wa Mulugu.” Ebaribari wi ninoriha monelo dha amambali ehu vina dha attu anakwelihu, mbwenyi enfwanyelihu ozuzumela vamaromo ja omwagalaliha Yehova.

KAPIMA DHOSAKULA DHINNA WEYO

11. Mukalelo gani onlogiwa va Gano 2:11 onanikamihedhe opima dhilobo dhetedhene dhiniwanana na makaniya?

¹¹ Ogamala ofwanya magano a mBibiliani aniwanana na yogana yawo enele ofuneya wubuwela pama mwaha wa dhosakula dhinna weyo. (Kengesa Gano 2:11.) Zelu enele wukamihedha wubuwela txini enapadduwe ogasakula yogana-yoganavi. Dila dhina kinrutxa ogana yokosa, mbwenyi dila dhina enorutxaga. Dhogana dhina dhinddimuwa, nona zelu enele wukamihedha ogana elobo yokosa masiki egakala yorutxa.

12-13. Ogatamelaga mabasa, okana zelu enawukamihedhe dhavi okosa yogana yopureleyamo?

¹² Kobuwela nipadduwo ntti. Weyo onotamela ganyo wi owodhe wasapela amudhawo. Venevo ofwanya ganyo bili vina ganyo dhobili dhinowiwanana na magano a mBibiliani. Venevo weyo otxima wila otanalele makaniya, motagiha, mabasa gani agakosiwe, masasanyedho gani anemetxiwe vina otamela oziwa akala o mabasaniwa ohilapelana na vatakulu vawo na dhilobo dhina. Txino onosakula ganyo modha enoniwe wi japama vina onelege ottambirha muttengo mwinjene wa kobiri. Masiki dhawene dhihikalawo dhilobo dhina dhinfwanyeleliwe otanalela ohinatti orumela ganyoya.

¹³ Koddi mabasaya anele wuzuzumiha ofiyedha ojombaga o matugumanoni? Anele ovugula mudhidhi ogalabihedhiwe wi okale na amudhawo vina ozuzumela dhilobo dhomuyani dha amudhawo? Wakula mavuzo aba enele wukamihedha oziwa wika “dhili dhamakamakadha” vamburoni voroma—kuloga wika omwebedha wawo Yehova na dhofuna dha amudhawo vamburoni voroma—ottiya mabasa vina ottambirha kobiri gwé. Dhahene weyo onele owodha okosa yogana yapama vina enarurihe Yehova.

14. Zelu vina okwela dhinanikamihedhe dhavi ohakwakwattutxa attu ena?

¹⁴ Zelu vina enele onikamihedha wubuwelela mukalelo ompattiwa attu ena na dhogana dhehu, dhahene kaninakose elobo enaattukulele attu ena okwakwattuwa. (Flp. 1:10) Ejo jofuneya makamaka nigakosaga yogana eniwanana na mwabalelo wehu vina mukalelo wa ovisasanyedha. Motagiha, attu ena anoziveliwa wabala vina ovisasanyedha na mukalelo onttiyana na ena. Kito akala attu ena mmulogoni obe otakulu anosilidhiwa na yosakula ejo? Zelu enele onikamihedha oriha dhubuwelo dha attu ena. Okwela onele onittukulela ozuzumelaga dha muttu mwina vina okala attu ovipimelela. (1 Ko. 10:​23, 24, 32; 1 Tm. 2:​9, 10) Dhahene ninele owodha okosa dhogana dhinonihe wi ninowakwela vina ninowariha attu ena.

15. Txini enfwanyeliwe otanalela ohinatti okosa yogana yamakamaka?

¹⁵ Ogafunaga okosa yogana enddimuwa, wubuwele dhotedhene dhinafuneye wi yoganaya yakwanele. Yezu ohinisunziha opima dhinfuneya. (Lk. 14:28) Bili dhawene katanalela mudhidhi onanongiwe vina guru dhinafuneye wi owodhe wakwaniha yoganaya. Dila dhina enele ofuneya weyo ologa vamodha na amudhawo wi oziwe txini enfwanyela okosa muttu-muttu wila yoganaya yakwanele. Ejo ekalele nni yofuneya? Sabwani, akala weyo onofuna okosa matxinjo mwaha wa yogana yakosiliwe, awene anodhaga ovaha monelo wottiyana obuwene onalabele. Anamudhi otene agakosa epaddi ya yogana vina ogavuruwana nofwaseya monelo dhawa, kinarutxe wakwaniha yoganaya vina okosa yogana yopureleyamo.—Gan. 15:22.

OKOSE YOGANA YOPURELEYAMO

16. Ttarho gani dhinawukamihedhe okosa yogana yopureleyamo? (Koona vina kasha “Onawodhe Dhavi Okosa Dhogana dha Malago.”)

¹⁶ Akala weyo ohifwara ttarho dhilogiwe mundduni, oli womala-nawale wi okose yogana yamalago. Weyo omala oziwa dhetedhene dhiniwanana na yoganaya vina ohipepesa magano a mBibiliani anawukamihedhe okosa yogana enimwagalaliha Yehova. Ovano ndde, enowodheya okumbirha nikamihedho na Yehova wi yogana yawo ekaane yopurelamo yapama.

17. Txini enawukamihedhe okosa dhogana dha malago?

¹⁷ Masiki akala ohikosa dhogana dhapama mundduni, kobuwela wi enawukamihedhe okosa dhogana dha malago, kahiye okuluvela eziwelo yawo obe dhilobo dhipadduwile mwigumini mwawo. Mbwenyi okuluvele eziwelo ya Yehova. Ddi iyene bahi onwodha wuvaha eziwelo yebaribari, ononelamo vina zelu—sisene dhinfuneya wi okane eziwelo. (Gan. 2:​1-5) Ogakosa ejuwene onele okana nikamihedho na Yehova wi okose dhogana dhinamwagalalihe iyene.—Ms. 23:​2, 3.