Katagiha Mukalelo wa Wubuwela wa Yehova vina wa Yezu

1-2. Omukwela wehu Yehova oniwanana na eni vina Yezu olagihile dhavi wi wanimukwela Yehova na mubuwelo waye wotene?

YEZU ohitapulela ejile yali yamakamaka mmalamuloni a Mulugu mulogiliye dhahi: “Omukwele Yehova Mulugu wawo, na murima wawo wotene, na omuttu wawo wotene, na guru dhawo dhotene vina na yubuwelo yawo yotene.” (Lk. 10:27) Nona ninomukwela Yehova na dhotene dhinihuna vina ejile elihu. Ejo enowiwanana na dhifunelo dhehu, mukalelo oniviwamo iyo vina guru yehu. Vina enowiwanana na mukalelo onlabihedhihu mubuwelo wehu. Ebaribari wi txipo kaninawodhe ononelamo mowakwana-mwene dhubuwelo dha Yehova, mbwenyi ninowodha ononelamo pama mukalelo onubuwela iyene modhela osunza “yubuwelo ya Kristu” sabwani Yezu ohilagiha mowakwana-wene yubuwelo ya Babe.—1 Ko. 2:16.

² Yezu wanimukwela Yehova na mubuwelo waye wotene. Iyene wanziwa ejile yanfunana Yehova vina wali womala-nawale wi akose, masiki akala agahitabuwa sabwa yokosa ejuwene. Yezu wanfwaseyela okosa efunelo ya Babe, nona kattiyile elobo-txilobo ozuzumiha yogana yaye.

3. Txini esunzile murumiwi Pedro na Yezu vina wakokomezile Akristu okosa eni? (1 Pedro 4:1)

³ Pedro vina arumiwi ena ahikana gari ya vawoka ya okala na Yezu mudhidhi mwinjene vina osunza mukalelo wobuweliye. Pedro valebiliye karta naye noroma novudheleliwa, wahakokomeza Akristu wi akaane mubuwelo wakakene wa Kristu. (Kengesa 1 Pedro 4:1.) Na elogelo yoroma elebiwena Bibilia, murumiwi Pedro mulebeliye nzu ntti: “Mukane” iyene ohilabihedha nzu ninaloga anyakoddo anna dhipano wi avisasanyedhele odhowa mukoddoni. Nona Akristu agasunza wubuwela ninga Yezu, anele owodha okaana dhinfunani wi awanena efunelo ya okosa eli yabure vina na elabo ejino enlamuleliwa na Satana.—2 Ko. 10:​3-5; Ef. 6:12.

4. Nsunzo ntti ninanikamihedhe dhavi ofwara nlago na Pedro?

⁴ Mu nsunzoni ntti ninele osekeserha ninawodhe dhavi (1) otagiha mukalelo wa wubuwela wa Yehova, ejuwene enanikamihedhe okaana mubuwelo wakakene, (2) okala oviyeviha vina (3) okala a malago nimukuluvelaga Yehova modhela nlobelo. Wi nisunze ejuwene ninele wona mukalelo wobuwela Yezu vina ninawodhe dhavi omutagiha.

OTAGIHE MUKALELO WA WUBUWELA WA YEHOVA

5. Pedro olagihile dhavi wi kaana mubuwelo mmodhene wa Yehova?

⁵ Koona mudhidhi ohilagihile Pedro mubuwelo wa Yehova. Yezu wahawaddela anamafwara aye wi agahidhowa o Jeruzalemi, agahiperhekiwa mmadani mwa asogorheli a relijiau, agahitabutxiwa vina musogorhomwa agahipiwa. (Mt. 16:21) Pedro wobuwela wi egali yorutxa Yehova omuttiya Yezu—odduwene wali njedhelo na Izrayel vina Mesiya wapikirheliwe—opiwa. (Mt. 16:16) Mwadhawene Pedro wahimuttukulela Yezu mburo wayene, baloga dhahi: “Muvyeddele ttagaraga Nabuya, eso kadhinaupadduweleni.” (Mt. 16:22) Vowi Pedro kaana mubuwelo wa Yehova mwaha wa makaniya, iyene kobuwela dhahene ninga Yezu.

6. Yezu olagihile dhavi wi wannubuwela dhahene ninga mobuwela Yehova?

⁶ Yezu wanubuwela dhahene ninga Babe. Iyene wahimwaddela dhahi Pedro: “Kavenyawo osogorho waga, Satana! Weyo oli nlugu noddikwakwattutxa, sabwani kunna dhubuwelo dha Mulugu, dhubuwelo dhawo s’attu.” (Mt. 16:23) Yezu wanziwa wila akose efunelo ya Yehova, iyene wanfwanyelela otabuwa vina okwa. Nona Yezu wahikodda nlago na Pedro masiki iyene afunaga omukamihedha, na eji Pedro wahisunza wi wanfwanyelela wubuwela ninga Mulugu. Iyo vina ninosunzavo elobo yamakamaka.

7. Musogorhomwa Pedro olagihile dhavi wi wanfuna osaddula mubuwelo waye wi wiwanane na wa Yehova? (Koona kapa.)

⁷ Musogorhomwa Pedro wahilagiha wi wanfuna otagiha mubuwelo wa Yehova. Wahifiya mudhidhi wi Amalabo akose mpaddi wa nlogo na Mulugu. Pedro wahittomiwa wi amulaleyele Mmalabo Kornéliyu, agakosile mpaddi wa nikuru ntti niswa wa alabeli a Mulugu. Ayuda kewanana na Amalabo, nona kanintikina Pedro otamela nikamihedho wi avisasanyedhele mabasa aba. Mmalile Pedro ononelamo efunelo ya Mulugu mwaha wa makani aba, iyene wahitxinja mubuwelo waye. Yodhelavoyá, varumiwiye ‘iyene kakoddile.’ (Mer. 10:​28, 29) Iyene wahimulaleyela Kornéliyu vamodha na anamudhi aye vina awene ahibatiziwa.—Mer. 10:​21-23, 34, 35, 44-48.

8. Ninawodhe dhavi olagiha wi ninowubuwela ninga Yehova? (1 Pedro 3:8)

⁸ Vyaka dhing’onovi musogorho, Pedro wahakokomeza Akristu wi akaane ‘mubuwelo mmodhene.’ (Kengesa 1 Pedro 3:8) Ninga nlogo na Yehova, ninowodha wubuwela mumodhani na abalihu nigatagiha mukalelo wa wubuwela wa Yehova obuwene onsunzihu mBibiliani. Motagiha, Yezu ohakokomeza anamafwara aye wika vamburoni voroma Omwene wa Mulugu mwigumini mwawa. (Mt. 6:33) Mwadhawene, mbali obe murogora wa mmulogoni mwawo onowodha ogana okala pionero obe omulabela Yehova mmabasani a mudhidhi wotene obe na marhe mena. Kaninfwanyela ologa dhilobo dhinamunyimule mbaliya obe dhinamuttukulele ovizuzumela mwinya. Ottiya ejo, enofuneya omwaddela dhilobo dhapama sabwa yogana yaye vina omukamihedha.

KAKALA WOVIYEVIHA

9-10. Yezu olagihile dhavi wi wali woviyeviha?

⁹ Omattiyu wafwarela labo nikwiliye, Yezu wahimusunziha Pedro vina arumiwi ena elobo yamakamaka sabwa ya oviyeviha. Mudhidhi obu ohinafiya, Yezu wahimuruma Pedro vina Joau wi asasanyedhe dhilobo dhigalabihedhilani va siyarini yomariha egakosiliye na awene ahinatti okwa. Txino masasanyedhoya aniwanana na okalavo basiya vina tuwaliya wi attu akonvidariwe awodhe osuwa manyalo ahinatti oja siyari. Kito bani agali woviyeviha vina agasuwile manyalo a ena?

¹⁰ Yezu kobuwele wi kafwanyela ottidda mabasa aba, iyene ohilagiha oviyeviha onddimuwa. Anamafwara a Yezu txino ahitikina vamonani Yezu akosaga mabasa akosiwa na adhari. Yezu wahirula mukumi waye bamagelela tuwaliya muyununi mwaye, beka manje mbasiyani baroma wasuwa manyalo arumiwi aye. (Jo. 13:​4, 5) Yezu wahisuwa manyalo arumiwi aye 12—iyene vina wahifiyedha osuwa manyalo a Juda ogamugulihile. Txino ejo yahittukula mudhidhi mwinjene, masiki dhawene, Yezu n’oviyeviha ohikosa mabasa aba. Iyene ohitapulelamo: “Munonelamo eji yuwireleni miyo? Nyuwo munddikuwela ‘Namasunziha’ vina ‘Nabuya,’ kamuvonyile, sabwani miyo ddili-wene. Akala miyo oli Nabuya vina namasunziha wenyu ddihusuwani manyalo, enofuneya nyuwo vina musuwegena manyalo.”—Jo. 13:​12-14.

11. Pedro olagihile dhavi wi wahisunza okala muttu woviyeviha? (1 Pedro 5:5) (Koona vina foto.)

¹¹ Pedro ohisunza na oviyeviha wa Yezu. Mmaleli Yezu wiyelela wirimu, Pedro ohikosa matikiniho a onvulumutxa mulobwana wabaaliwe woragalene. (Mer. 1:​8, 9; 3:​2, 6-8) Muttitti munddimuwa wa attu ohona matikiniho aba vina ahimurugunuwela Pedro. (Mer. 3:11) Mbwenyi Pedro kafuna ovahiwa nttittimiho masiki valeliwiye mwilaboni mwazuzumela attu enjene okala ovuwa. Ottiya ejo iyene n’oviyeviha ohawaddela wi amuttittimihe Yehova vina Yezu valogiliye mazu aba: “Mwaha wa nzina na Yezu vina mwaha wa iyo ororomela nzina naye, myeddo dha mulobwana oddu onimoninyu vina onimuziwenyu dhiliba.” (Mer. 3:​12-16) Musogorhomwa Pedro wahalebela Akristu ofuneya wa okala woviyeviha. Na elogelo yoroma elebiwena Bibilia, iyene ohilabihedha mazu anoniha wi jofuneya wabala oviyeviha ninga munabaleliwa guwo. Eji enonubutxedha mudhidhi wamagile Yezu tuwaliya muyununi vina basuwa manyalo a arumiwi aye.—Kengesa 1 Pedro 5:5.

12. Moligana na Pedro ninawodhe dhavi odhowavi nikalaga oviyeviha?

¹² Enowodheya iyo ofwara yotagiha ya Pedro modhela wunuwiha oviyeviha. Mbwenyi kudduwale wi oviyeviha webaribari onopitta ologa bahi mazu apama. Mazu alabihedhile Pedro antapuleliwa ninga “oviyeviha” anolagiha wi oviyeviha onowiwanana na ejile enubuwelihu mwaha wa iyo nanya vina attu ena. Ninowakosela dhilobo dhapama ena sabwani ninomukwela Yehova vina attu, kahiyo sabwa ya ofuna osibiwa. Ninolagiha wi nili attu oviyeviha nigamulabela Yehova nohagalala vina nigakamihedha abalihu masiki attu ena ahonaga dhinkosihu.—Mt. 6:​1-4.

OKALE WAMALAGO

13. Katapulelamo ejile eniwanana na okala wamalago.

¹³ Txini eniwanana na okala wamalago? (1 Pe. 4:7) Mukristu wamalago onovilibihedha okosa dhogana dhapama dhinlagiha mubuwelo wa Yehova. Mukristu oddu onoziwa wi kayiwo elobo yamakamaka opitta mandano aye na Yehova. Onorabela oviwubuweletxa vina onononelamo wi kanziwa dhotedhene. Iyene onolagiha omukuluvela Mulugu modhela omulobelela dila dhinjene n’oviyeviha.a

14. Pedro olagihile dhavi wi wahittiya omukuluvela Yehova?

¹⁴ Omattiyu womariha Yezu ahinakwa, iyene ohawaddela anamasunza aye: “Mattiyabano nyuwo motene munele okwakwattuwa sabwa ya miyo.” Na nikuluvelo Pedro wahakula: “Masiki otene aba akwakwattuwe mwaha wa nyuwo, miyo txipo kaddinakwakwattuwe!” Omattiyu obulene Yezu wahakokomeza anamasunza ena: “Mukale txenjewa vina mudidele olobela.” (Mt. 26:​31, 33, 41) Pedro kofwara nlago ntti agahiwodha oliba murima vina agahiloga wi wali namafwara wa Yezu. Ottiya ejuwene, Pedro wahiloga wi kamuziwa Yezu, musogorhomwa wahikubanya vaddiddi.—Mt. 26:​69-75.

15. Yezu owodhile dhavi okala wamalago omattiyu womariha ahinatti okwa?

¹⁵ Yezu wannimukuluvela Yehova na murima wotene. Masiki valiye woligana, iyene wanlobela dila dhinjene. Ejo emukamihedha oliba murima wi akosa dhilobo dhamujedhelana Yehova. (Mt. 26:​39, 42, 44; Jo. 18:​4, 5) Kavali waganyedha wi Pedro txipo kadduwalile wila Yezu olobela dila dhinjene omattiyu obule womariha.

16. Pedro olagihile dhavi wi wahiwodha okala muttu wamalago? (1 Pedro 4:7)

¹⁶ Movira wa mudhidhi Pedro wahiroma omukuluvela venjene Yehova modhela nlobelo. Mmaleliye ovenyihiwa mukwani, Yezu ohimukuluveliha Pedro vina arumiwi ena wi agahavaha muya wokoddela wila awodhe wakwanihedha mabasa a olaleya. Nona, iyene wahakumbirha wila ajedhele o Jeruzalemi mpaka ejo opadduwa. (Lk. 24:49; Mer. 1:​4, 5) Txini ekosile Pedro mudhidhi wajedheliye? Pedro na Akristu ena ‘andidela olobela.’ (Mer. 1:​13, 14) Musogorhomwa mu kartani naye noroma, Pedro ohakokomeza Akristu okala a malago vina omukuluvela Yehova modhela nlobelo. (Kengesa 1 Pedro 4:7.) Pedro wahisunza omukuluvela Yehova, wawodha wakamihedha vina walibiha abali na arogora.—Gal. 2:9.

17. Masiki nikanaga ewodhelo ya okosa elobo-txilobo, txini enfwanyelelihu odhowavi nikosaga? (Koona vina foto.)

¹⁷ Wi nikale attu a malago ninofwanyela odhowavi nimulobelelaga Yehova, kintanala ewodhelo enihu. Nona, nigafunaga okosa dhogana dhamakamaka, ninomulobelela Yehova nimukumbirhaga malago, nikuluvelaga wi iyene onoziwa ejile eli yapama mwa iyo.

18. Ninawodhe dhavi otxinja mubuwelo wehu wi niwodhe otagiha pama mubuwelo wa Yehova?

¹⁸ Ninomutamalela venjene Yehova sabwa ya onipaddutxa na ewodhelo ya otagiha mikalelo dhaye. (Wi. 1:26) Ebaribari wi kaninwodha omutagiha mowakwana-mwene Yehova. (Iza. 55:9) Mbwenyi moligana na Pedro, ninfuna nidhowegevi nitagihaga mukalelo wa wubuwela wa Yehova, nikalaga oviyeviha vina attu a malago.