Kakosa Guru wi Wakamihedhe Abale Anfuna Osunza Mwaha wa Mulugu

1. Txini enkosa attu agewa miselu dhinlaleyihu? (Merelo 13:​47, 48; 16:​14, 15)

NSAKA na Akristu oroma attu enjene ahirumela ebaribari vewalani miselu dhapama. (Kengesa Merelo 13:​47, 48; 16:​14, 15.) Masaka abano vina, attu enjene anowagalala dila yoroma eniwani miselu dhapama. Ena vamaromo kanna efunelo, mbwenyi musogorhomwa anoroma okana efunelo ya osunza miselu dha Omwene. Txini enfwanyelihu okosa nigaafwanya attu anna “murima womyala”?

2. Txini ennittukulela oladdaniha mabasa a wakosa anamafwara na mabasa a namalima?

² Mabasa a wakosa anamafwara anoladdana na mabasa a namalima. Namalima agoona wi milima dha mmuddani mwaye dhihittwa enofuneya iyene osinanga momaguva. Mbwenyi kanttiya olima vina wang’anela milima dhina dhihinatti wittwa. Na mukalelo wakakene, niganfwanya muttu onna efunelo ya ovuruwana miselu dhapama, ninofwanyela omukamihedha momaguva-mwene okala namafwara wa Kristu. Mbwenyi iyo vina ninodhowavi naakamihedhaga abale angonela ononelamo ttima ya miselu dhapama. (Jo. 4:​35, 36) Nigawodha ononelamo akala muttu okana obe kanna efunelo ya ovuruwana miselu dhapama, enokala yovevuwa ofwanya marhe a omukamihedha. Mwari mwa nsunzo ntti ninele woona txini enfwanyelihu okosa dila yoroma enlogihu na attu wila nakamihedhe abale anfuna onivuruwana. Ottiya ejo ninele osunza marhe a wakamihedha awene odhowavi onuwaga.

NINAWODHE DHAVI WAKAMIHEDHA ABALE ANNA EFUNELO YA OVURUWANA MISELU DHAPAMA?

3. Txini enfwanyelihu okosa mmalaleyoni niganfwanya muttu onlagiha efunelo? (1 Korinto 9:26)

³ Mmabasani a olaleya niganfwanya muttu onna efunelo, ninfuna nimukamihedhe momaguva-mwene osunza mwaha wa Yehova vina onfiyedha iyene. Nona dila yoroma enlogihu na muttuya ninofwanyela onvaha nsunzo na Bibilia vina omukonvidari wi adhe one matugumano ehu.—Kengesa 1 Korinto 9:26.

4. Kaloga yotagiha ya muttu wali womala-nawale wila arome omusunza Bibilia.

⁴ Kavaha nsunzo na Bibilia. Attu ena analaleyihu ali omala-nawale wi arome omusunza Bibilia. Motagiha, siku dhahi na txinai, mwana-muyana dhahi w’o Canadá wahaddamela karinya yolaleyana vina wahittukula broshura Kajavo Egumi Yamukalakala!. Murogora walaleya ohimutapulelamo wi vamodha na broshura egawodheya okana nsunzo na Bibilia nihimpitxeliwa elo. Mwana-muyanaya wahilagiha efunelo vina avahana manumero awa a telefoni. Musogorhomwa sikunene nttile mwana-muyanaya wahinvavihedha muselu murogora anvuzaga sabwa ya nsunzona. Munvuzeli murogora akala yanwodheya ogumana omamalelo wa sumana iyene wahimwakula: “Ononamo dhavi mangwana? Kaddinakane yokosa.” Awene ahiroma nsunzo nawa siku nafwarela. Vina omamalelo wa sumana mwana-muyana ole wahona matugumano ehu, ottiya ejo ohidhowavi onuwaga mpaddi womuyani.

5. Masaka mena txini enfwanyelihu okosa nihinatti ovaha nsunzo na Bibilia? (Koona vina mafoto.)

⁵ Ebaribari wi kahiyo attu otene anarumele omusunza Bibilia dhahene ninga mwana-muyana ole. Masaka mena enofuneya iyo wunuwiha efunelo ya muttuya. Enowodheya okosa ejoya modhela ologa makani animuzivela muttuya. Nigakana monelo wapama vina nigalagiha wi ninomutanala muttuya, mwari mwa mudhidhi mung’onovi ninodhaga owodha oroma nsunzo na Bibilia. Kito txini enfwanyelihu ologa nigafunaga ovaha nsunzo na Bibilia? Nihavuza abali na arogora enjene ahinrutxiwa oroma masunzo a Bibilia. Ndowe noone monelo dhivahilani.

6. Txini enfwanyelihu ologa wila muttuya akane efunelo ya ologavi makaniya?

⁶ Abali aba ahitapulelamo wi dhilabo dhina ogafunaga oroma nsunzo na Bibilia ja malago orabela mazu aba “nsunzo,” “kursu ya Bibilia,” obe “miyo ddinele wusunziha.” Awene ahizinddiyela wi mazu anlabela baba “mwana-makani,” vina “omunonelamo Bibilia.” Wi muttuya akane efunelo ya odhowanavi vasogorho makaniya, katagiha ologa dhahi, “Jotikiniha mukalelo onakula Bibilia mavuzo amakamaka a mwigumini” obe “Bibilia kahiyo bahi nivuru na anakapela, iyene ononivaha malago a siku-siku.” Enowodheya vina ologa: “Kunanonge mudhidhi mwinjene; mwari mwa mitala 10 obe 15 enowodheya weyo osunza dhilobo dhinatxinje egumi yawo.” Wila onamutxutxe muttuya, ja malago orabela ologa mazu ninga aba “kaninajombihege” obe “sumana dhotedhene.”

7. Mudhidhi gani ozinddiyelile attu ena wi ela osunza ebaribari? (1 Korinto 14:​23-25)

⁷ Omukonvidarele omatugumanoni. Masaka a murumiwi Paulo enkala ninga ena ahizinddiyela wi ela osunza ebaribari muromilani otugumana. (Kengesa 1 Korinto 14:​23-25.) Ejo vina enopadduwa masaka abano. Anamasunza enjene a Bibilia anowunuwa momaguva mpaddi womuyani munromani otugumana. Mudhidhi gani onfwanyelihu omuwobela omatugumanoni muttu onna efunelo? Mu nsunzoni 10 na nivuru Kajavo Egumi Yamukalakala! mukala konviti. Mbwenyi weyo kunfwanyela ojedhela ofiya nsunzo ntti wila omukonvidari muttuya. Mmakanini mwenyu oroma, enowodheya omukonvidari muttuya wi adhe one matugumano a omamalelo wa sumana. Katagiha ologa mutoma wa diskursu ya vattaddo obe elobo yotikiniha enasekeserhiwe mu Nsunzoni na Mwang’aneli.

8. Txini enfwanyelihu ologa nigamukonvidargi muttu wi adhe woone matugumano? (Izaiya 54:13)

⁸ Ogamuwobaga muttu ona efunelo, omutapulelemo mukalelo ottiyanile matugumano ehu na ejile yoniliye mmakapelani mena. Namasunza wonile dila yoroma Nsunzo na Mwang’aneli ohinvuza dhahi namasunziha waye: “Nameddihaya onoziwa mazina a attu otene?” Murogora ohimwaddela wi, dhahene ninga munziwihu mazina a anamudhi ehu iyo vina ninovilibihedha oziwa mazina a abalihu. Namasunzaya ohiloga wi eji kiyapadduwa mukapelani mwaye. Enowodheya iyo vina omutapulelamo elobo yina enkosiha matugumano ehu okala ottiyana. (Kengesa Izaiya 54:13.) Iyo nintugumanela omwebedha Yehova, osunza mwaha wa iyene vina olibihana muttu na mukwaye. (Ahe. 2:12; 10:​24, 25) Nona matugumano ehu kasasanyedheliwe ofwara dhilemelelo, mbwenyi asasanyedheliwe wila anisunzihe mwaha wa Yehova. (1 Ko. 14:40) Vina mimburo dhintugumanihu dhisasanyedhiwa pama wila dhinikamihedhe osunza. Vowi iyo kaninivivolotxa mmakanini a politika, kaningilatela ologela ejuwene. Elobo enamukamihedhe namasunzaya, ja omulagiha na mutanene vidiyu Txini Enkosiwa va Numbani ya Omwene? Dhahene iyene onele odhowa omatugumanoni aziwaga mweddihedho wa matugumanoya.

9-10. Txini enfwanyelihu omwaddela muttu onova woona matugumano? (Koona vina foto.)

⁹ Attu ena anowova woona matugumano obuwelaga wila anela okala “Anamoona a Yehova.” Nona kamutapulelemo muttuya wila iyo ninoziveliwa wawakela aleddo, mbwenyi kaninimudidela muttu okosa obe ologa elobo mmatugumanonimwa nne vina kaninimudidela muttu okala Munamoona wa Yehova. Attu otene anomoyeliwa, masiki na aima. Mmatugumanoni mwehu, aima kanttiyanihiwa na anddimuwa. Ottiya ejo, amambali na anawa anogilati vina anosunza vamodha. Dhahene amambali anoziwa vali aniwa vina dhinsunzani. (Oli. 31:12) Mmatugumanoni mwehu kamunkosiwa sokela. Iyo ninfwara nlago na Yezu ninloga: “Nyuwo mul’ovahiwa muhipitxelaga elo, muvahe vina muhilogosaga elo.” (Mt. 10:8) Enowodheya vina omwaddela muttuya wila kinfuneya wabala guwo dha muttengo munddimuwa wila adhowe omatugumanoni. Mulugu kanfwaseyela okoddela wehu, mbwenyi onfwaseyela murima wehu.—1 Sam. 16:7.

¹⁰ Akala muttuya onodha omatugumanoni, kakosa muli-mwetemwene wi iyene aviwemo pama. Omuziwihe wa anddimuwa a mmulogoni vina wa abali ena na arogora. Iyene agaziveliwa txino onele ofuna wiyela. Akala muttuya kanna Bibilia enowodheya wengesa maleboya vamodha mBibiliani mwawo. Ottiya ejo kamukamihedhe muttuya ononelamo diskursu enkosiwa vina mukalelo onsunzihu mumodhani.

ONAWODHE DHAVI OMUKAMIHEDHA MUTTU ONROMA OMUSUNZA BIBILIA?

11. Onalagihe dhavi wi onoriha mudhidhi olaganilenyu vina masasanyedho a namasunza?

¹¹ Ogeddihaga nsunzo na Bibilia, txini enfwanyela weyo okana muyubuweloni? Kavaha ttima mudhidhi olaganilenyu vina masasanyedho a muttuya. Motagiha, akala munolagana mudhidhi wa osunza, ofiye mudhidhi olaganilenyu, masiki akala attu a mmuruddani mwawo akana elemelelo ya oyeluwa. Ottiya ejo, egahikala ya malago nsunzo noroma nihigoneletxe vaddiddi. Anamalaleya ena a ttotto anloga wila ja malago ogomiha nsunzona na mutanene masiki muttuya afunagavi osunza. Orabele ologa vaddiddi. Vina onvahe namasunzaya ofuru wa ologa enubuweliye.—Gan. 10:19.

12. Nigaroma omusunziha muttu Bibilia, yogana gani enfwanyelihu okana?

¹² Ovenyana omaromo wa nsunzo nenyu, yogana yawo ekale ya omukamihedha namasunza omuziwa Yehova na Yezu vina wunuwiha okwela waye. Mukalelo mmodha wa okosa ejuwene ja mudhidhi wetene olagiha ejile enloga Bibilia ottiya wawaddela ejile enziwiwe. (Mer. 10:​25, 26) Murumiwi Paulo ohinittiyedha yotagiha yapama. Àsunzihaga attu, iyene wafwaseyela yotagiha ya Yezu odhile velaboni ya vati wila anikamihedhe omuziwa vina omukwela Yehova. (1 Ko. 2:​1, 2) Ottiya ejo, Paulo ohitapulelamo wi jamakamaka wakamihedha anamafwara aswa wunuwiha mikalelo dhapama dhaladdanihiwa na woru, parata vina malugu a ttima. (1 Ko. 3:​11-15) Merelo abo apama aniwanana na nroromelo, eziwelo, zelu vina omova Yehova. (Ms. 19:​9, 10; Gan. 3:​13-15; 1 Pe. 1:7) Katagiha mukalelo wasunziha Paulo vina wakamihedhe anamasunza awo okana nroromelo noliba vina mandano ofiyedheya na Babi wawa wokwela wa wirimu.—2 Ko. 1:24.

13. Nigamukamihedhaga namasunza, ninalagihe dhavi ovilela vina ntanalo? (2 Korinto 10:​4, 5) (Koona vina foto.)

¹³ Ogasunzihaga, kafwara yotagiha ya Yezu modhela okala wovilela vina omutanala namasunzaya. Karabela okosa mavuzo animutota manyazo. Akala namasunza onorutxiwa ononelamo elobo, kadhowanavi osogorho nsunzona vina mulogele makaniya mudhidhi mwina. Ottiya omudidela namasunzaya orumela dhinsunziye, kanvahe mudhidhi wa wubuwela vina otxinja moonelo waye. (Jo. 16:12; Kol. 2:​6, 7) Bibilia onoladdaniha masunziho ottambi na ngome dhovadda dhintamelihu obwanyula. (Kengesa 2 Korinto 10:​4, 5.) Enodhaga okala yorutxa namasunza ottiya ororomela elobo ekuluveliliye mwari mwa mudhidhi mwinjene, nona ninofwanyela omukamihedha wimetxa ngome eswa yovadda—entapulela omukamihedha iyene omukuluvela Yehova. Venevo enele okala yovevuwa namasunza ottiya dhilemelelo dhakweliye vina dhakuluveliye.—Ms. 91:9.

NINAWODHE DHAVI OMUKAMIHEDHA MUTTU OROMILE WOONA MATUGUMANO

14. Ninfwanyela waweddiha dhavi abale anda woona matugumano?

¹⁴ Yehova onfuna wila nihikane nsakulano vina naweddihe attu otene na opama, kintanala dhilemelelo dhawa, mburo obaliwani vina akala ayelegi obe areeli. (Tia. 2:​1-4, 9) Kito ninawodhe dhavi walagiha okwela abale aromile woona matugumano?

15-16. Ninawodhe dhavi wakamihedha abale anda woona matugumano dila yoroma oviwamo pama?

¹⁵ Ena andowa omatugumanoni wila one empadduwawo, oku ena alokonvidariwa na muttu wa mulogo mwina. Ogamona muttu muswa omatugumanoni, kamulejele vina ommoyele. Mbwenyi okale pasope wila wagalala wawo onamutote manyazo. Kamukonvidari wila agilati na weyo. Mwengese vamodha Bibilia na mapublikasau awo obe kamutamelele mapublikasau ayene. Ottiya ejo kafwaseyela ononelamo enubuweliye. Mulobwana dhahi wadhowile omatugumanoni ohimwaddela mbali wamwakelile wila wahikana manyazo sabwa ya guwo dhaye. Mbaliya wahimukamihedha iyene oviwamo pama vina ohimutapulelamo wi Anamoona a Yehova kattiyanile na attu ena. Musogorhomwa, mulobwana oddu wahibatiziwa, mbwenyi iyene kadduwalile yowakula ejile. Ogalogaga na muttu onona matugumano dila yoroma matugumanoya ahinaroma obe agagoma kudduwale eji: Ninfuna nilagihe wi ninomutanala, mbwenyi kaninfuna ovivolotxa mwigumini mwaye.—1 Pe. 4:15.

¹⁶ Ekalawo elobo yina yowakamihedhana abale anda woona matugumano ehu dila yoroma oviwamo pama. Mmakanini mwawo, dhowakula dhawo vina dhipaddi dhinkosiwe, ogalogaga mwaha wa attu ahili Anamoona a Yehova, katamela ologa na nriho. Karabela ologa dhilobo dhigamunyimulile muttuya obe dhigamuttukuleli ohifuna vina woona matugumano. (Tit. 2:8; 3:2) Ninga motagiha, kaninfuna ottonga obe ologa bure esile dhinrumela attu ena. (2 Ko. 6:3) Abali ankosa diskursu dha vattaddo anofwanyela okalela pasope ejuwene. Abali aba anolagiha vina wila anowatanala abale anda woona matugumano dila yoroma modhela otapulela mazu vina masunziho ahinnonelamo awene.

17. Txini enfwanyelihu okosa nigaafwanya attu anna “murima womyala” wi akele egumi yohimala?

¹⁷ Siku-siku ninvira, mabasa ehu a wakosa anamafwara anodhowavi akalaga a namaguve vina iyo ninele odhowavi nafwanyaga attu anna “murima womyala wi akele egumi yohimala.” (Mer. 13:48) Ejo egapadduwa, kaninfwanyela wova wavaha nsunzo na Bibilia obe wakonvidari wi adhe one matugumano. Dhahene ninele wakamihedha oroma wedda ‘mudilani enttukulela wigumini.’—Mt. 7:14.