Olagiwa Ezinddiyelo ya Okwela wa Mulugu

1. Bibilia ontapulela dhavi osaddeya?

TXINI enubuweliwe ogewa mazu aba “olagiwa”? Attu enjeene anubuwela osaddeyiwa, mbwenye olagiwa kahiye osaddeyiwavi bahi. Bibilia onloga wi olagiwa ononipurhihamo, vina masaka meena ononivaha ononelamo, oziwelamo, okwela vamodha na okalawo. (Gano 1:2-7; 4:11-13) Eji empadduwa sabwa yawi Mulugu ononivaha malago, yonihaga wi iyene ononikwela vina onfuna wi iyo nikalewo na mukalakala. (Ahebreu 12:6) Masiki eziweyaga wi olagiwa dila dhina oniwanana na osaddeyiwa, oku txipo kumputtula nne vina kunimpa muttu. Mwebaribari, otapuleliwa wa mazu aba olagiwa, kuloga osunzihiwa, enkala ninga masunziho anvahiwa mwana na amambali aye.

2, 3. Malago ankosa dhavi mpaddi wa masunziho na osaddeya? (Koona foto eli omaromo.)

² Karoma wona yotagiha eji. Mwana dhahi onkuweliwa Johnny wela ovegana bola mba. Venevo maye omwaddela: “Weyo Johnny, miyo ddimala wuwaddela wi kuvegege mba na bola! Onodha otwana dh’obo.” Mbwenye Johnny nne kamutanale mayeya, ol’odhowavi bagavega na bolaye. Mponyeliye bolaya ovaddile murhinga wa marhuwa, butweya! Kito veneva, mayi wa Johnny onakose nni wi amulage mwanaye? Voroma iyene ohaddeliwa wi yakosiye kayakalile. Maye anfuna amunonihedhemo wi jofuneya ovuruwana dhinloga amambali aye vina amuziwihe wi malagoya bopureyamo nanda kanrutxa wiwelelawa. Ohimwaka, ohimvita malabo mang’onovi; apo welela amusunzihe elemelelo ya wiwelela dhinloga amambali aye. Johnny kaziveliwe mbwenye ehimukamihedha ononelamo wi okoodda wawiwelela malago a amambali onimusegedha mwinya.

³ Ninga Akristu, ninokosa epaddi ya numba ya Mulugu. (1 Timóteo 3:15) Obu bumukalelo wa babihu Yehova, iyene okaana mirugu dhapama, kanziveliwa okalaga onilagavi, vowi ononikwela, onfuna wi nimwiwelelege. Merelo ehu agadhana dhopurelamo dhoniputtula, malago a okwela wa Yehova anonikamihedha wubuwela ofuneya wa omwiwelela. (Galásia 6:7) Mulugu ononikwela vaddiddivene, kanfuna onoona banigatabuwa.​—1 Pedro 5:6, 7.

4. (a) Malago animuwaraliha dhavi muttu? (b) Mavuzo gani analogelihu mwari mwa mutoma obu?

⁴ Malago a mBibiliani anomuswagiha muttu vina anomukamihedha ofwanya dhogana dhaye, dhiniwanana na wasunziha aima, obe anamasunza a Bibilia otene ofiyedha okala anamafwara a Kristu. Iyo ninowalagiha malebo a mBibiliani anamasunza ehu wi naziwihe ejile eli yomyala, nakamihedhaga ononelamo vina ‘nasunzihaga ovirihamo dhetene dhinirumile Yezu.’ (Mateu 28:19, 20; 2 Timóteo 3:16) Yehova onfuna wi naswagihe, wi awene vina awodhe wakamihedha ena onfwara Kristu. (Kengesa Tito 2:11-14.) Ovano ndoweni nisekeserhe mavuzo aba mararu: (1) Malago a Mulugu anoniha dhavi wi iyene ononikwela? (2) Ninsunzavo nni na dhotagiha dha attu alagiwe na Mulugu? (3) Niwodhe dhavi otagiha mulagelo wa Yehova vamodha na mwanaye Yezu?

MULUGU ONLAGA N’OKWELA

5. Malago a Yehova anoniha dhavi onikwela waye?

⁵ Yehova ononilaga, ononisaddeya, vina ononiswagiha sabwani ononikwela. Onfuna wi nimususele, nikalewo na mukalakala. (1 Joau 4:16) Iyene txipo kanniveyiha nne kannitota manyazo. (Gano 12:18) Enzuzumeletxa Yehova wang’ana ba merelo ehu apama veli-veli amuttiyaga muttu-muttu wa iyo osakula dila dhinfuniye. Malago anvahiwehu mBibiliani, mmanivuruni mwehu, naamambali ehu, vamodha na anddimuwa a mmulogoni, weyo kunoona wi otene aba antonyihedha okwela wa Yehova? Mwa ologa wohipottowa, akala anddimuwa a mmulogoni anfuna anihelemo n’okwela vina na ttogorogo masiki iyo nihinatti ozinddiyela vavonyilehu, niziwe wi awene antagiha supaje ya Yehova.​—Galásia 6:1.

6. Malago a Mulugu anoniha dhavi okwela waye masiki akala muttuya onottiyihiwa mabasa aye a mmulogoni?

⁶ Dila dhina olagiwa onokwaranya ovahiwa zelu. Akala muttu onottega vopitta, iyene kanttomeliwa mabasa mmulogoni. Ohittomeliwa mabasa oku, ezinddiyelo ya olagihiwa ovonya waye, vowi Mulugu onomukwela. Ninga motagiha, eji enodha omusunziha okaana elemelelo ya omusunzaga Bibilia mudhidhi mwinjene, omutanalelaga, vina omulobelelaga Mulugu. Okosa esi dhotene onela ovaddiha wandana waye na Yehova. (Masalmo 19:7) Mwa ovira wa mudhidhi, iyene onodha ovahiwa mabasa obe ettomo yayeleeliye. Masiki akala muttu onoburutxiwa mmulogoni, eji enlagiha okwela wa Yehova sabwani attu ena a mmulogonimwa anela ozinddiyela ofuneya wa orabela obure. (1 Korinto 5:6, 7, 11) Vina sabwa yawi malago a Mulugu kana-wene mavirigano, eji enomukamihedha namaddawaya ononelamo ovonya waye. Musogorhomwa onodha otxinuwa.—Merelo 3:19.

OLAGIWA NA YEHOVA ONONIVAHA YOPURELAMO

7. Sebna wali ani vina merelo gani abure akosiliye?

⁷ Ninfuna nalogeni attu eli alagiwe na Yehova; dhotagiha dha attu aba dhinela onikamihedha ononelamo txini entapulela malago a Mulugu. Muttu woromaya ddi Sebna, mwana mw’Izrayel okalilewo masaka a Mwene Ezekiya; wanawiliya ddi Graham, mbali onkalawo malabo abano ehu. Sebna wali “munddimuwa wa varhuwani,” enkala ninga rhuwaniya yali ya Mwene Ezekiya, noona iyene wahikaana onddimuwa vaddiddi. (Izaiya 22:15) Mbwenye ovittukulela wa munddimuwa oddu wahimukosiha ovyoonaga na ttima opitta akwaye. Iyene ohifiyedha ovimagela ekutta ya muttengo munddimuwa vina ohivisasanyedha ‘myuva dha nttittimiho.’​—Izaiya 22:16-18.

8. Yehova omusaddeyile dhavi Sebna, vina yopurelamoya yali yivi?

⁸ Sabwa ya Sebna ovittittimiha mwinya, Mulugu wahimwakiha ettomo yaye, bamvaha mulobwana wakuweliwa Helkiya. (Izaiya 22:19-21) Eji epadduwile mudhidhi wabeddegeliwa Jeruzalemi na Mwene Sinakeribi w’o Asíria. Musogorhomwa Sinakeribi wahimuruma musogoreli waye vamodha na muttitti wa anyakoddo wi awane na Ayuda vina amurije Mwene Ezekiya. (2 Amwene 18:17-25) Ezekiya ohimuruma Helkiya na alobwana ena eli wi agumane na musogoreli wa Sinakeribi. Mwa alobwana aba arumiwe na Ezekiya, Sebna wali venevo vowi wahititihiwa ettomo yaye bakala namaleba. Yawireya eji enoniziwiha wi Sebna wahisunza ttima ya ovyeviha, vina iyene kanyimuwile. Veneva vahikala masunziho mararu anfuniwanihu ottidda mwari mwa eji empadduwele Sebna.

9-11. (a) Masunziho gani opureleyamo ankaanihu na ejile empadduwele Sebna? (b) Onona dhavi mukalelo omweddihile Yehova Sebna?

⁹ Yoroma, sabwa ya Sebna otitihiwa mabasa aye, eji enonubutxedha wi “mundduni mwa opanela mundha otolowa.” (Gano 16:18) Iyo nigakaana mabasa ettomo mmulogoni, attu ena anodha wubuwela wi nili a ttimaya opitta awene. Egapadduwa dhawene, ninela okala attu oviyeviha? Ninela wubuwela wi merelo otene apama anihu vina ewodhelo yotene enihu ja muya wa Yehova? (1 Korinto 4:7) Murumiwi Paulo ohiloga: “Miyo na guru dha mahala avahiwemi, ddinologa na mmodha-mmodha wenyu wi ahivyonena onddimuwa opitha eliye, aziwe ovipimana ebaribari.”​—Roma 12:3.

¹⁰ Yanawili, malago ovadda amulagilena Yehova Sebna anowoniha wi iyene wahiziwa yawila Sebnaya agahisaddula ekalelo yaye. (Gano 3:11, 12) Aba masunziho anapurhihamo abale ayelele ettomo yawa. Enfuneya kahiye ya awene okalaga woludduwene, yofuneyaya ja awene odhowaga bagamulabela Yehova na guru dhinani. Akaane ekalelo ya wakela malago a Yehova na ononelamo wi Mulugu onimulaga ole onimukweliye. Nubuwelege wi Babihu onela wattuva abale aniviyeviha. (Kengesa 1 Pedro 5:6, 7.) Malago okwela a Yehova anonuba obe anonogolela nigakala ninga ddongo nofwewa.

¹¹ Yaneraru, mukalelo omweddihile Yehova Sebna, ononivaha masunziho opureleyamo. Masiki niziwaga wi Yehova onowidda yottega, iyene onomukwela muttuya ottegile. Yehova onang’anetxa merelo apama a muttuya. Akala wa mambali obe munddimuwa wa mmulogoni, onela otagiha mulagelo wa Yehova?​—Juda 22, 23.

12-14. (a) Attu ena ankala dhavi agavahiwa malago a Yehova? (b) Mazu a Mulugu amukamihedhile dhavi mbali dhahi osaddula ekalelo yaye, vina opurelemo nni?

¹² Attu enjeene ankala onyonyeya vaddiddi agalagiwa, awene anofiyedha onyanyala dila dha Mulugu vina anovivapa na mulogo. (Ahebreu 3:12, 13) Kuloga kawo muttu ona ewodhelo ya wakamihedha? Nne! Karoma wona yotagiha eji ya Graham, wattamagihiwe mmulogoni mmaleliye beyihedhiwamo. Mwihiyedhiwiye mmulogoni, ohinyanyala odhowa mmalaleyoni vina omatugumanoni. Ohikalawo munddimuwa dhahi wa mmulogoni okosile guru ya okala marho wa Graham, mmaleleni Graham ohikumbirha wi amusunzege Bibilia na munddimuwa ole.

¹³ Munddimuwaya onowubuwela: “Makani a Graham ali a ovittukulela. Iyene wanaloga bure anddimuwa a mmulogoni attongile makani aye. Labo dhahi nihinatti osunza niromile opepesa malebo anloga dha ovittukulela vina ngovi dhinkana namavittukulela. Graham ohiroma wona vavonyiye musupeyoni ya Mazu a Mulugu, venevo ohifiyedha osiridhiwa na ekalelo yaye! Emuddiginyiletxe murima ali manivuru! Mmaleliye oziwa wi wahimala opibeya omentoni na ‘nani’ n’ovittukulela vina aziwaga wi makaniya ali marabwa aye, iyene ohiroma ovisaddula. Ohiroma odhowa omatugumanoni malabo otene osunzaga Mazu a Mulugu, vina ottidda elemelelo ya olobelaga mudhidhi wotene. Musogorhomwa ohidha wimelela ntakulu naye, omukwela mwadhiye vamodha na anayeya vowi wali babi.”​—Luka 6:41, 42; Tiago 1:23-25.

¹⁴ Munddimuwaya ohenjedhedha: “Labo dhahi, Graham ohiloga elobo eddiribihile murima. Iyene bela, ‘miyo ddihisunza ebaribari, ddihilaba mabasa opionero. Mbwenye mologa ebaribari, ovanene panonimi omukwela waga Yehova.’” Mudhidhi mung’onovi Graham ohikumbirhiwa wi akamihedhege dhipano dhovavihana mazu mmatugumanoni; iyene wahisanzaya vaddiddi na mabasa aba. Munddimuwa wa mmulogonimwa ohiloga: “Yotagiha yaye ehiddisunziha wi akala muttu onoviyeviha vamentoni va Mulugu mwari mwa orumela olagiwa, mareliho kanimmalela!”

OMUTAGIHE MULUGU NA KRISTU OGAVAHAGA MALAGO

15. Txini enfuniwana iyo okosa wi malago ehu arumeeliwe?

¹⁵ Akala iyo ninfuna nikale anamasunziha a malago, voroma jofuneya okala anamasunza a ntidi. (1 Timóteo 4:15, 16) N’ekalelo yakakene, akala weyo ohikaana gari ya ottomiwa na Yehova wi walage akwawo, onofwanyela oviyeviha vina ottiye wi Yehova aweddihe mwigumini mwawo. Akala akwawoya anowoona wi weyo oli muttu woviyeviha, awene anela wuttittimiha vina enela wakela malago awo n’osanzaya. Ndoweni nitagiheni merelo a Yezu.

16. Mweddihedho waweddiha Yezu anamafwara aye onnisunziha nni?

¹⁶ Yezu mudhidhi wotene wanimwiwelela Babe, masiki vafwanyiwiye dhorutxa. (Mateu 26:39) Iyene ohaziwiha anamavuruna aye wi masunziho aye vamodha na ononelamowa onda wa Babe. (Joau 5:19, 30) Yezu wali namasunziha wa supaje vaddiddi, sabwani iyene ohivirihamo dhotedhene dhamurumile Babe. Attu oviyeviha akala vamodha na iyene. (Kengesa Mateu 11:29.) Mazu ofwewa a Yezu anahelamo abale akukumuwile, vina anawaraliha abale alemile. (Mateu 12:20) Iyene wannahelamo anamafwara aye n’okwela vina n’oleleya, masiki yubuweliwaga wi iyene wahinyaguleya sabwa ya anamafwara aye owanela onddimuwa.​—Marko 9:33-37; Luka 22:24-27.

17. Merelo gani anawodhihe anddimuwa a mmulogoni okweya nikuru na Mulugu?

¹⁷ Mudhidhi wotene anddimuwa a mmulogoni anofuniwana ovaha malago anda muniparhani na magano a Bibilia, amutagihaga Kristu. Agakosaga dhawene anela woniha wi ahikaana efunelo ya omutagiha Mulugu vamodha na Mwanaye. Murumiwi Pedro ohileba: “Sapihaní nikuru na mabila, authiyedheni Mulugu; muhañganele n’okurhumiziwa, mukoye n’okwela wenyu ninga munfunela Mulugu. Kamwire na murima onunlela opurana, eddihaní na murima wovilevela. Kamuvikalihe anya a athu athiyedhiwenyu, kalani asogorheli anfwanyela otagihiwa na otene.” (1 Pedro 5:2-4) Munddimuwa wa mulogo onttabela wiwelela malago a Mulugu onopurelamo vamodha na abaleya anakweyiye.​—Izaiya 32:1, 2, 17, 18.

18. (a) Txini enfuna Yehova wi amambali akose? (b) Yehova onavaha nikamihedho gani amambali?

¹⁸ Kito malago vamodha na maswagihoya a vamuralani? Yehova ohimala wawaddela emeleli a mirala: “Kamuthabwihe wasilidhiha aninyu, mwalele na magano animuzivela Nabuya.” (Éfeso 6:4) Maswagiho na malagoya anofuneya-wene? Gano 19:18 ninengesa dhahi: “Bazá omulaga mwanawo nsaka ninwodhiye olageya; porhe-porhe olagawá onadhe ompa.” Yehova ohavaha amambali mabasa a walela aniwa. Akala awene anokoodda walaga anawaya, muladduya onkaana bawene! (1 Samuwel 3:12-14) Yehova onowavaha ababi ononelamo waye na gurudha, akala anokumbirha munlobeloni vina agakuluvela Mazu aye vamodha na muyaya wokoddela.​—Kengesa Tiago 1:5.

OSUNZA DILA YA EGUMI YOHIMALA VINA YA MURENDDELE

19, 20. (a) Nigakela malago a Mulugu ninkaana mareliho gani? (b) Mutoma obo ondawo ninasunze nni?

¹⁹ Iyo nigakela malago a Mulugu, vina nitagihaga mulagelo wa Yehova vamodha na Yezu, mareliho kananigomele, anela onidhalela-wene! Murala wehu na mulogoya onela odhaleliwa murenddele, muttu-muttu onela ozinddiyela okwela wa mukwaye, ttima envahiwiye, vina otene anela okweyeya. Apa nisomolemo vang’onovi wagalala na murenddeleya onapadduwe musogorho. (Masalmo 72:7) Malago a Yehova anoniwaralihedha egumi yohimala, mwilaboni eswa mwenemo munakalihu notene mumodhani, vowi ninakale anamudhi, Yehova onakale Babihu. (Kengesa Izaiya 11:9.) Wubuwela yopadduwa eji enela onikosiha ozinddiyela wi malago: marhe a Mulugu olagihana onikwela waye.

²⁰ Mutoma obo ondawo, onela onisunziha malago anvahiwa anamudhi vamodha na mulogo. Ninela osunza marhe ovogolelana nanyene. Ninela vina osunza orabela merelo annisegedha, opitta malago-malagovi anvahiweho.