Onakose Eni wi Nsunzo Nawo na Bibilia Nikale N’ozivela vina Nopureleyamo

Josuwé onowengesela malamulo na lizu noliba; rhinga dha Jeriko dhimotta, numba ya Rahabi eli yowimelene: Jozuwé onovenyiha mada aye vina onolobela

JOSUWÉ wahivahiwa muttorho wolelema wi avolotxe nlogo na Izrayel mwilaboni yottomeliwa. Txibarene obu wali muttorho worutxa. Mbwenye Yehova wahimulibiha anvahaga nikuluvelo nawi: “Nona kawarala, olibe murima.” Ohimwaddela Josuwé yawi ogengesa vina ovirihamo malamulo aba ttarho dhawo dhinosogora onele ofwanya eziwelo vina wedda na enonelo.—Josuwé 1:7, 8.

Ovano ninkala ‘masaka orutxa olabiyedhawa,’ weddiha egumi yehu elobo yorutxa vaddiddi. (2 Timóteo 3:1) Akala ninofuna egumi yehu yeeddege pama moligana na Josuwé, enofuneya wi nifarege malago annivaha Yehova. Enofuneya vina omwengesaga Bibilia malabo otene vina olabihedha esile dhinsunza iyo mwari mwa dhosakula dhehu.

Mbwenye ahikalawo abali ahinziwa osasanyedha nsunzo obe ahinziveliwa osunza. Masiki ekalaga dhawene omusunza Bibilia elobo yamakamaka. Kalabiyedha kasha enahuvahe ‘Karoma Olabihedha Malago Aba,’ anahukamihedhe ofwanya marhe anazivihege nsuzo nawo.

Munasalmo ohileba: ‘Ddeddiheni mudila ya malamulo enyu, mwenemo puli oziveliwa waga.’ (Masalmo 119:35) Jowodheya weyo ofwanya oziveliwa ogasunzaga Nzu na Mulugu. Eli ninga otamela nddarhama, ogadidela otamela onele ofwanya mafumo menjene omuyani.

Weyo ottiyana na Josuwé wasogorhela nlogo nddimuwa, masiki egalivi dhawene ohikaana makattamiho awo. Makattamihoya ba osunza vina ovirihamo Mazu a Mulugu. Ogavirihamo, onele okala muziwetxi vina dhintameliwe oganfwanya.

KAROMA OLABIHEDHA MALAGO ABA

Olobele ohinatti oroma osunza. Bibilia onsunziha dhubuwelo dha Mulugu, dhubuwelo esi dhilebeliwe wi iyo niwodhe opurelamo. Ogamwengesaga Bibilia kakumbirha nikamihedho na Yehova wi owodhe omunonelamo, kamukumbirhe vina wi awukamihedhe wubuwela dhisunzile weyo vina wi owodhe olabihedha mabasa.—Ezdra 7:10.
Okosege mavuzo mudhidhi onimwengesa weyo Bibilia obe manivuru mena anawukamihedhe ononelamo dhili mBibiliani ovivuzege dhahi. Motagiha: ‘Miselu esi dhinddisunziha eni ttangwi ya Yehova? Dhiniwanana dhavi na mutoma wa Bibilia? Ddinalabihedhe dhavi dhisunzile miyo wi ddakamihedhena attu ena?’
Otanaalelege dhinsunza weyo. Oromege wimela wi otanaalele, okosaga mavuzo aba. ‘Ddiniwamo dhavi esidhá? Sabwaya jani enfiyedhela miyo wiwamo dhahene? Mudhidhi ovirile makaniya aba addipatta dhavi, kito movanene anddipatta dhavi vina musogoro anaddipattege dhavi? Ddinawodhe dhavi alabihedha esene?’ (Job 23:5; Masalmo 49:3) Ogatanalelaga otamele ononelamo sabwaya enkoddihedha Yehova dhilobo dhina. Obe kobuwela txini egapadduwile kowiliwa muttuya ologiwe mBibiliani wakosile na mukalelo wottiyana.—Olibiha 32:28, 29.
Olabihedhege dhotanaalela dhawo ogengesaga. Motagiha, onowodha wubuwela makani abale apadduwile na José mudhidhi wamugulihile abaale na akadda Ejumayili? (Wita 37:18-28) Onwodha woonamo eni? Karoma ovika mwari mwa nipadduwona ninga ninpadduwa na weyo. Oniwamo eni vina onubuwela eni? Ogatanaalela dhetedhene esi onele owodha ononelamo mowakwana makaniya aba.
Olabihedhe dhipano dhopepesa dha nikuru nehu. Dhipano esi dhinele wunuwiha dhopepesa dhawo. Oziwe olabihedha dhipano esi dhetene, dhopidiwa obe dhili mu site na elogelo yawo. Kukane manyazo okumbirha nikamihedho wi osunzihiwe olabihedha dhipano esi. Motagiha, Mutonyo Wopepesa wa Anamoona a Yehova onele oukamihedha ofwanya makani menjene anvediwe. Olabihedhe vina dhowenjedhedha dha Tradução do Novo Mundo da Bíblia Sagrada akala ohikalawo na elogelo ennonelamo weyo. Dhipaddi esi dhinokamihedha ononelamo mpimo walabihedhiwa, mburho opadduwile makaniya, mudhidhiya na dhilobo dhina.
Osakulele mitoma dhamakamaka. Ogasakula dhisunzile weyo, onele owodha wubuwela mudhidhi mwina. Kawaddele attu ena esunziliwe. Egawodheya olabihedhe mmalaleyoni. Olabihedhe wi wakamihedhena attu eena.