“Nzu na Mulugu . . . Tholaba”
“Nzu na Mulugu tholaba, ninowira enlogani.”—AHEBREU 4:12.
1. Txini enurumeeliha yawi Nzu na Mulugu ttolaba? (Koona foto eli omaromo.)
ATTU a nlogo na Yehova, akaana ebaribari yawi Nzu naye “tholaba, ninowira enlogani.” (Ahebreu 4:12) Ninowoonaga guru ya Bibilia mwigumini mwehu vina mwa attu eena. Attu enji ahinatti okala Anamoona a Yehova, txino aali anamalezela, obe aziveliwa okosa mararuwo. Enaya ahivuwa, obe ahikaana kobiri gwé, mbwenye annoona wila ekala elobo yajombela mwigumini. (Kohelét 2:3-11) Yohagalalihayá, jawi enjene ahaana njedhelo vina arimeelile, ddabuno akaana njedhelo na musogorho. Ninowengesaga mu revistani A Sentinela, dhotagiha dhaderetu dhinloga “A Bíblia muda a vida das pessoas.” Masiki muttu akale Mukristu, japama olibiha omarho waye na Yehova na nikamihedho na Bibilia.
2. Guru ya Nzu na Mulugu yakamihedhile dhavi akristu a nsaka noroma?
2 Kayo elobo yotikiniha wawoona attu enjene bagakosa masadduwo manddimuwa agasunza ebaribari. Vyaka zana dhoroma abali na arogora enjene aana njedhelo na wirimu, akosa masadduwo menjene viina. (Kengesa 1 Korinto 6:9-11.) Paulo valogiye n’abale ahisakuleliwe ohalana Omwene wa Mulugu iyene wahenjedhedha: “Ena mwa nyuwo wale edda dhawene.” Nzu na Mulugu vamodha na muya waye ohakamihedha attu abo okosa masadduwo menjene. Enaya masiki valani Akristu, ahikosa dhilobo dhabure dhatakalihile mandano awa na Yehova. Motagiha, Bibilia onowaloga abali ottikitteliwa adhile ottamagihiwa mmulogoni. Musogorho-mwa akosa matxinjo menjene, nanda ahiyelela okosa mpaddi wa mulogo wa Okristu. (1 Korinto 5:1-5; 2 Korinto 2:5-8) Johagalaliha vina yolibiha oziwa yawi abali vamodha na arogora abo, akosa masadduwo menjene sabwa ya guru enna Nzu na Mulugu.
3. Txini enasunze iyo mmutomani obu?
3 Mazu a Mulugu ba guru-wene. Vowi Yehova omala onivaha, ninfuna nikaane ebaribari yawi ninolabihedha mowakwana. (2 Timóteo 2:15) Mutoma obu ninele ologa mukalelo onfwanyeelihu olabihedha ewodhelo ya Bibilia (1) mwigumini mwehu, (2) mmabasani mwehu a olaleya, nina (3) nigasunzihaga otribunani wa mmulogoni. Enfuna osunza iyo ovanene, enele onikamihedha olagiha omukwela vina omutamaalela wehu Babi wodhulu, onnisunziha opurelamo malago ankaliha.—Izaiya 48:17.
MWIGUMINI MWEHU
4. (a) Txini enakose iyo wila Nzu na Mulugu niddiginye murima wehu? (b) Ontamela dhavi mudhidhi wi omwengese Bibilia?
4 Wila Mazu a Mulugu addiginye murima wehu, japama wengesa. Kuloga wengesa malabo etene. (Josuwé 1:8) Niziwa wi attu enjene ankala mabasavi, mbwenye kanittiye mabasa ehu ogudulana na omwengesa wehu Bibilia. (Kengesa Éfeso 5:15, 16.) Japama otamela mudhidhi ngafuna membesene, obe mudhidhi wa txiguwo. Nigakosa dhawene ninele okala ninga munasalmo walogile: “Okwela gani ona miyo na malamulo enyu Nabuya! Mwenemo ddinofwaseyelamo wubuwela malabo etene.”—Masalmo 119:97.
Kanirumele mabasa obe ettomo enihu wobaniha efunelo yehu ya omwengesa Bibilia malabo etene
5, 6. (a) Otanaalela malebo ekalele nni elobo yaderetu? (b) Ninawodhe dhavi otanaalela na mukalelo onlibiha nroromelo? (c) Omwengesa Bibilia na otanaalela maleboya wukamihedhile dhavi?
5 Mbwenye kahiyo okalelaga omwengesavi Bibilia. Japama n’ofwaseya otamela mudhidhi w’otanaalela malebo ali otene. (Masalmo 1:1-3) Nigamala japama olabihedha zelu dha Bibilia mwigumini mwehu. Noona masiki akala Bibilia onimwengesa iyo ddwa mmadani obe mudhipanoni, jaderetu ottiya wila miseludha dhiddiginye murima wehu.
6 Kito otanaalela wehu malebo onnipatta dhavi? Nigamwengesaga Bibilia, ninofwanyeela otxima vang’onovi nigamala ovivuza: ‘Esi dhinengesa miyo dhinddisunziha eni sabwa ya Yehova? Ddittiddihedhe dhavi mwigumini mwaga? Masadduwo gani anfwanyeela miyo okosa? Nigatanaalela Nzu na Mulugu, vina nigalobela esile dhinengesa iyo, ninele ottukuleleya ottiddihedha mabasa. Nigamala ninele woona olaba wa guru ya Bibilia mwigumini mwehu.—2 Korinto 10:4, 5.
MMABASANI A OLALEYA
7. Ninalabihedhe dhavi nzu na Mulugu mmabasani a olaleya?
7 Elobo yamakamaka olabihedha Nzu na Mulugu mudhidhi wotene nalaleyaga obe osunziha. Mbali dhahi ologa, “Kowiliwa wela olaleya numba-numba na Yehova mwinya, makaniya ogalogile weka, obe ogahimuttiyedha mudhidhi wi aloge?” Nigamwengesaga Bibilia na muttu, enkala ninga ninimuttiya Yehova omwaddela obe ologa na muttuya. Nlebo nofanyeela, elobo yapama opitta mazu oziva agalogile iyo. (1 Tesalónika 2:13) Koddi ogalaleyaga onomwengesa Bibilia mudhidhi wotene enfuneyani?
Nigamwengesela Bibilia na muttu, enkala ninga nnimuttiya Yehova wila amulogena muttuya
8. Ekalelini yapama otapulela nlebo ninengesa iyo mmabasani a olaleya?
8 Wawengesela versu modha bahi abale anafwanya iyo kinakwana. Attu enjene kanwodha omunonelamo Bibilia. Akala yampadduwa mu vyaka zana dhoroma, ovanene vina enopadduwa. (Roma 10:2) Noona kanamagedhe anamurala ononelamo nlebo nengesile iyo. Japama wakamihedha modhela wiyelela mazu ali mutoma wa nlebona, nigamala watapulela enloga nlebona. Nigakosa dhawene, Nzu na Mulugu ninele olaba mmurimani mwa attuya.—Kengesa Luka 24:32.
9. Ninakamihedhe dhavi attu omuriha Bibilia odheela esile dhinlogihu nihinatti wengesa nlebo? Katagiha.
9 Enloga iyo nihinatti wengesa nlebo, enomukamhedha mwanamurala omwika ttima Bibilia. Txino iyo ninologa: “Ndowe noone enloga muttanddi wehu sabwa ya makaniya aba.” Obe akala ninloga na muttu ohinziwa dh’okristu, niloge: “Ndowe noone enloga Malebo Okoddela.” Akala ninloga na muttu ohinziveliwa na relijiau, ninvuze dhahi: “Waromaga wiwa nigano ntti na wale?” Niganonelamo yawi muttu-muttu, okaana dhorumeela dhaye, onele onikamihedha okoddeliha masunziho ehu.—1 Korinto 9:22, 23.
10. (a) Txini yapadduwile na mbali dhahi? (b) Kito weyo wonilemo dhavi ewodhelo ya mazu a Mulugu mmalaleyoni mwawo?
10 Enjene anonelamo wi olabihedha Nzu na Mulugu onoddiginya kakamwe mirima dha attu analaleyani. Motagiha, mbali dhahi wadhowa omoona mulobwana wa kalaba wengesa manivuru ehu. Labo nimodha mbali afunaga omuttiyedha revista niswa, iyene wahitamela wengesa nlebo. Mbali wengesile va 2 Korinto 1:3, 4, vanloga dhahi: “Babi oneddela thagaraga, . . . Babi onnipangarhaza mudhidhi wotene.” Nlebo ntti nahiddiginya vaddiddi murima wa mulobwana oddule wa kalaba ofiyedha omukumbirha mbali wi engese wili-wili. Nomala wahiloga wi iyene na mwadhiye anfuna nipangarhazo. Sabwa ya nlebo nttile, mulobwanaya wahitamelavi oziwa ebaribari ya Bibilia. Olabihedha Nzu na Mulugu mmalaleyoni, onowooniha guru enddimuwa!—Merelo 19:20.
WASUNZIHAGA OTRIBUNANI
11. Abali ansunziha otribunani anna mabasa gani?
11 Ninoziveliwa vaddiddi woona matugumano ehu a mmulogoni. Elobo enddimuwa ennittukulela woona matugumano abo, ku omwebedha Yehova. Vina ninopurelamo ensunza iyo. Noona, abali ansunziha otribunani, akaana gari ya mabasa manddimuwa. (Tiago 3:1) Noona anofwanyeela okaana ebaribari yawi masunziho awa andela mu Nzu na Mulugu. Akala weyo okaana gari ejo, onalabihedhe dhavi guru ya Bibilia wi oddiginye mirima dha anamewa awo?
12. Namakosa diskursu onalagihe dhavi yawi mazu anlogiye andela Mmaleboni?
12 Enofuneya malebo okosa epaddi enddimuwa ya makaniya. (Joau 7:16) Noona kakala pasope wi onadhe wakwekwette attu na dhologa vina dhotagiha dhawo, ottiyaga omutonya Bibilia wila ewodhelo yaye eddiginye mirima. Ottiya eji vina kobuwela yawi omwengesa Bibilia ohittiyana vaddiddi na osunziha modhela Bibilia. Ndde, ogengesa malebo menjene attuya kanawodhe wubuwela etene. Noona katamela vina osakule malebo anfuniwe wengesa-wene. Otamele mudhidhi wila wengese, otapulelemo, otagihe vina ottiddihedhe mabasa mowakwana. (Nehemiya 8:8) Akala makani anloga weyo diskursu, kakaana ebaribari yawi ohengesa, diskursuya, vamodha na maleboya atonyiwe anfuniwe olabihedha. Katamela wona mukalelo oniwanana diskursu na maleboya alimo. Ogamala kalabihedha malebo mang’onovi wila ologe mitoma dhamakamaka dha diskursuya. (Koona mubutxedho dhili va nsunzoni 21 mpaka 23 wa nivuru Beneficie-se da Escola do Ministério Teocrático.) Elobo yina yamakamaka ja omukumbirha Yehova wi okamihedhe ovuwiha dhinziwa weyo dha Bibilia.—Kengesa Ezdra 7:10; Gano 3:13, 14.
13. (a) Murogora mmodha wapattiwe dhavi na nlebo nengesiwe omatugumanoni? (b) Mukalelo onlabihedhiwa Bibilia mmatugumanoni onddiginya dhavi murima wawo?
13 Murogora dhahi wo Australia, wahipaduweliwa dhilobo dhinjene dhabure bali mima, nanda masiki vonuwiliye bamuziwa Yehova iyene wanaganyedhavi akala Yehova wannimukwela. Labo nimodha omatugumanoni, wahiwa nlebo nengesiwe nanda nimuddiginya murima. Wahiroma otanaalela nlebona, wahipepesa mowakwana, vina wahengesa malebo meena owenjedhedha. Nomala wahinonelamo vina wahirumeela yawi txibarene Yehova wanimukwela.a (Koona yowenjedha.) Weyo waromaga wiwa nlebo omatugumanoni, nanda niddiginya murima wawo ninga yapadduwile na murogora oddu?—Nehemiya 8:12.
14. Ninalagihe dhavi yawi ninowika ttima vina oriha Nzu na Mulugu?
14 Koddi kannimutamaalela Yehova ttangwi y’onivaha Nzu naye Bibilia? Iyene wahiloga wi nzu naye ninokalawovi, nanda ohakwanihedha. (1 Pedro 1:24, 25) Noona ninfuna nikaane ebaribari yawi ninomwengesa Bibilia malabo etene, ninomuttiddihedha mabasa mwigumini vina ninowakamihedha attu eena okosa yakakene. Nigakosa dhawene ninlagiha wi ninomuriha vina ninowika ttima nifumo ntti vamodha na Mwinyaya Yehova Mulugu.
a Koona kaxa “Ttarho Yoroma.”