Txini Ensunzihu na Makarta Meeli a Pedro

1. Yehova omulabihedhile dhavi Pedro ahinatti okwa?

MURUMIWI Pedro wanziwa wi mohigonela agahikwa. Vyaka dhotene dha mabasa aye ororomeleya ohedda na Yezu mmabasani olaleya, ohikamihedha mabasa aba mimburo dhottiyana-ttiyana, vina ohikosa mpaddi wa nikuru nolamulela. Mbwenyi mabasa a Pedro ali ahinatti ogoma. Oromana yaka ya 62-64 EC, Mulugu ohimukamihedha oleba makarta meeli—ankosa mpaddi wa Bibilia, 1 Pedro vina 2 Pedro. Pedro wanjedhela wi makarta aba akamihedhe Akristu masiki iyene bakwile.—2 Ped. 1:12-15.

2. Ninlogela nni wi makarta alebile Pedro alebiwe nsaka nofwanyelela?

² Pedro olebile makarta aba meeli nsaka natabuwa abali na “makathamiho menjene.” (1 Ped. 1:6) Attu otakala murima antamela opigidha mulogo na masunziho awota vina mweddelo wonyakuwa. (2 Ped. 2:1, 2, 14) Mohigonela Akristu akala o Jeruzalemi agahipattiwa “ogoma wa dhetedhene”—obe akadda Roma agahitolotxa sidadi ya Jeruzalemi na dhilobo dhotene dha Ayuda. (1 Ped. 4:7) Kaninaganyedha wi makarta a Pedro ahakamihedha Akristu abale oziwa yafwanyelani okosa wi awanena dhoweha esile vina akale omala-nawale sabwa ya dhilobo dhigapadduwile musogorho.b

3. Ninfwanyelela nni ofwaseyela makarta alebile Pedro?

³ Masiki Pedro valebeliye makarta aba Akristu a nsaka zana noroma, Yehova ohilebiha makarta aba mBibiliani. Nona enowodheya iyo vina osunza na makarta aba. (Rom. 15:4) Ninkala mwilaboni yonyakuwa vaddiddi, vina muli attu ahinimwebedha Yehova. Nona ninogumanana makattamiho menjene, sabwa ya ejuwene dila dhina enokala yorutxa omulabela Mulugu. Ottiya ejo, mohigonela ninele opattiwa goyi enddimuwa, makattamiho ottabwa mottiyana na abale agumanilena Ayuda. Nona mubutxedho dhinfwanyeya mmakartani a Pedro samakamaka vaddiddi wa iyo. Malago anfwanyeya mmakartani aba anele onikamihedha ojedhela labo na Yehova, opemberha wawova attu vina otonyihedhana okwela muttu na mukwaye. Mubutxedho esi dhinele wakamihedha vina anddimuwa a mulogo oziwa enfwanyelani okosa wi azuzumele mabila a Yehova.

OJEDHEGEVI

4. Mowiwanana na 2 Pedro 3:3, 4, txini egadhile wobaniha nroromelo nehu?

⁴ Iyo ninkala mwilaboni muli attu ahinrumela mavuhulo a Bibilia. Ena anonibedda sabwa ya iyo odha nilaleyaga mwa vyaka dhinjene ogoma wa elabo. Enaya anopambiha alogaga wi ogoma wa elabo txipo kunafiye. (Kengesa 2 Pedro 3:3, 4.) Nigamwiwa mwana murala, mukwihu w’oskola, w’omabasani, obe mwana mmudhi alogaga mazu aba nroromelo nehu ninodhaga wobana. Mbwenyi Pedro ononaddela elobo enanikamihedhe.

5. Txini enanikamihedhe ojedha na ovilela ogoma wa elabo? (2 Pedro 3:8, 9)

⁵ Mwa ena enkala ninga Yehova onogonela ogomiha dhilobo dhotakala dha elabo ejino. Mbwenyi Nzu na Mulugu ninonikamihedha okana moonelo wapama, ninonubutxedha wi mukalelo onona Yehova mudhidhi onottiyana vaddiddi na mukalelo onona iyo. (Kengesa 2 Pedro 3:8, 9.) Vamentoni va Yehova vyaka txikwi enkala ninga labo nimodha. Yehova Mulugu wovilela, nona kanfuna otolowa nne wa muttu mmodha. Nigafiya nsaka nofwanyelela, onele ogomiha makattamiho otene. Iyo nikana gari enddimuwa ya olabihedha mudhidhi ohalilewo wi nafiyedhena attu ali elabo yotene miselu dhapama.

6. Txini enfwanyelihu okosa wi nijedhe siku na Yehova? (2 Pedro 3:11, 12)

⁶ Pedro ononikokomeza wi nijedhege siku na Yehova. (Kengesa 2 Pedro 3:11, 12.) Dhavi? Japama otanalela—egawodheya otanalelege malabo otene—mareliho anakanehu mwilaboni eswa. Karoma otanalela bugilatile mburo wokoddela ovadiwaga pevo yapama, ojaga dhoja dhonukela vina wamoyelaga amarho na anamudhi anvenyihiwa mukwani obe wasunzihaga attu akwile wale vaddiddi mavuhulo a Bibilia amalile wakwanihedheya. Otanalela dhilobo esi enele wukamihedha odhowavi ojedhaga labo na Yehova vina okuluvelaga wi omagomo onele ofiya mohigonela. Oziwa mutanene dhilobo dhinapadduwe musogorho, enonikamihedha ohipupurutxiwa na masunziho opela malago.—2 Ped. 3:17.

NIHAWOVE ATTU

7. Wawova attu ennipatta dhavi?

⁷ Iyo ninoziwa wi siku na Yehova nili vakuvi, nona ninovilibihedha wawaddela attu ena miselu dhapama. Mbwenyi dila dhina ninorutxiwaga ologa. Sabwaya? Ninodhaga wawova attu. Jijene epadduwile na Pedro. Omattiyu ottongiwe Yezu Pedro wahova ologa wi wali namafwara wa Yezu vina wahimukodda dila ttaru alogaga wi kamuziwa. (Mt. 26:69-75) Mbwenyi Pedro wahittiya wawova attu, vasogorhova wahileba dhahi: “Kamwawove aboyá, kamutxutxeye.” (1 Ped. 3:14) Mazu a Pedro anonilibiha wi iyo vina ninele owodha opemberha wawova attu.

8. Txini enanikamihedhe opemberha wawova attu? (1 Pedro 3:15)

⁸ Txini enanikamihedhe opemberha wawova attu? Pedro ohiloga dhahi: “Mmurimani mwenyu mmuthithimihe Kristu.” (Kengesa 1 Pedro 3:15.) Eji enonittukulela otanalela ettomo enna Nabuya vina Mwene wehu Yezu Kristu. Ogona gari ya ologa miselu dhapama na attu ena weyo onogurumelaga sabwa ya wova? Ejo egapadduwa kamubuwele Yezu alamulelaga wirimu vina barugunuwiwe na angelo owinjiva vaddiddi. Kudduwale wi iyene ohivahiwa “owodha wotene, wa wirimu na elabo ya vati” vina iyene ohipikirhela dhahi “miyo ddili na nyuwo masiku otene ofiyedha omagomelo wa elabo.” (Mt. 28:18-20) Pedro ononikokomeza wi nikale “omala-nawale” wi niloge sabwa ya esile dhinrumelihu. Weyo ogahiziveliwa omulaleya muttu buli oskola, omabasani obe mburho-mburovi? Vamaromo karoma otanalela makani agottukuleli ologa miselu dhapama vina kasasanyedha na ottaga makani anfunewe ologa. Kalobela wi olibe murima, kakuluvela wi Yehova onele wukamihedha opemberha wawova attu.—Mer. 4:29.

“MUZIWE OKWELANA-WENE NA MURIMA WOTENE”

9. Mudhidhi gani ottiyile Pedro olagiha okwela? (Koona vina foto.)

⁹ Pedro ohisunza olagiha okwela. Iyene wali vamodha na Yezu mudhidhi ologile Yezu dhahi: “Ddinouvahani nlamulo niswa: Mukwelanege. N’ekalelo yukwelilenina miyo, nyuwo vina mukwelanege.” (Jo. 13:34) Masiki vewaliye mazu aba, mudhidhi mwina vasogorhova Pedro wahijeya na wova battiya oja na abali ahali Ayuda. Murumiwi Paulo ohiloga wi mweddelo obu wa Pedro wali “osalapitha.” (Gal. 2:11-14) Pedro wahirumela olagiwa vina wahisunzavo elobo. Nona mmakartani alebiliye iyene ohoniha wi kaninfwanyela ologa wi ninowakwela bahi abalihu, ninofwanyela woniha okwelawa.

10. Txini enanikamihedhe okwelana muttu na mukwaye se osalapitha? (1 Pedro 1:22)

¹⁰ Pedro ohiloga wi ninofwanyela wakwela abalihu na murima wotene se osalapitha. (Kengesa 1 Pedro 1:22.) Wi niwodhe okana okwela oku ninofwanyela wiwelela ebaribari. Ebaribariya enologa wi “Mulugu kanimuthiyaniha muthu.” (Mer. 10:34, 35) Iyo kaninawodhe-wene wiwelela mazu a Yezu nigatonyihedhaga okwela abalihu ena a mmulogoni oku ena nihakwelaga. Enoziweya wi ninodhaga okala ofiyedheya na attu ena dhahene ninga yapadduwa na Yezu na arumiwi ena. (Jo. 13:23; 20:2) Mbwenyi Pedro ononubutxedha wi ninofwanyela ovilibihedha okana okwelana wenamudhi—okana ofiyedheya na abalihu —dhahene ninga ofiyedheya onkanihu na amudhihu.—1 Ped. 2:17.

11. Txini entapulela “okwelana na murima wotene”?

¹¹ Pedro ohoniha wi ja ttima okwelana muttu na mukwaye na murima wotene. Mazu aba okwelana-wene na murima wotene, antapulela omukwela muttu masiki akala kahiye yovevuwa omutonyihedha okwela muttuya oddo. Motagiha, txini egakosiliwe kowiliwa mbali wile wunyimula obe wukosela elobo yabure? Yubuwelo yehu egali ya omwiyihedha obure na obure ottiya omutonyihedha okwela. Mbwenyi Pedro ohisunza na Yezu wi ekalelo ejo kinimwagalaliha Yehova. (Jo. 18:10, 11) Pedro ohileba dhahi: “Onuwirelani yabure, kammwirele yakene; onuruwanani, kammuruwane. Omwakula wenyu okale omuddoddobelela dhapama.” (1 Ped. 3:9) Ogakwelaga abali na murima wotene onele okala muttu wa pama vina onele otamela omuziwa pama muttuya masiki akala wile wunyimula.

12. (a) Okwelana muttu na mukwaye onnikamihedha okosa eni? (b) Ninga munlagiha vidiyu Mantenha a União Cristã, txini enfwanyeliwe ovilibihedha okosa?

¹² Mukartani mwaye noroma, Pedro ohilabihedha nzu ntti “okwelana.” Okwela oku ononikamihedha olevelela dhottega dhing’ono vina “dhothega dhinjene.” (1 Ped. 4:8) Txino Pedro wahubuwela esunziliye na Yezu mwaha wa olevelela. Mudhidhene obule, Pedro wobuwela wi iyene wali muttu wa pama valogiliye wi wanfwanyelela omulevelela mbalaye dila “tanu na bili.” Mbwenyi Yezu ohimusunziha Pedro—vina iyo notene wi—ninofwanyela olevelela “ofiyedha dila 77,” kuloga, mudhidhi wotene. (Mt. 18:21, 22) Akala weyo onubuwela wi jorutxa ovirihamo nlago ntti, kukumuwe! Iyo notene dila dhina ninorutxiwa olevelela. Yamakamakaya ja iyo walevelela abalihu vina wandana na awene.c

ANDDIMUWA A MMULOGONI, MUZUZUMELE PAMA MULOGO

13. Txini egadhile warutxiha anddimuwa a mmulogoni ofwanya mudhidhi wowalibiha abali?

¹³ Pedro txipo kadduwalile mazu amwaddele Yezu mmaleliye ovenyihiwa mukwani: “Sapihagá mabilaga.” (Jo. 21:16) Akala weyo wa munddimuwa wa mmulogoni, onoziwa wi mazu aba anowupatta. Ebaribari wi enodhaga okala yorutxa munddimuwa wa mmulogoni ozuzumela mabasa aba amakamaka. Anddimuwa a mmulogoni anofwanyela vamaromo wazuzumela anamudhi awa mpaddi womaningoni, womuyani vina wapangarhaza. Ottiya ejo awene anofwanyela okala tagiha yapama mmabasani a olaleya, asasanyedhaga dhipaddi dha matugumano a mmulogoni, matugumano a murudda vina a ttattamwa. Ena anokamihedha Nikuru Ninlaba Vamodha na Masipitale obe a mabasa a omaga. Se waganyedha anddimuwa a mmulogoni ahikana mabasa menjene!

14. Txini enakamihedhe anddimuwa a mmulogoni osapiha mabila? (1 Pedro 5:1-4)

¹⁴ Pedro ohawaddela anddimuwa a mmulogoni, “Sapihaganí nikuru na mabila, authiyedheni Mulugu.” (Kengesa 1 Pedro 5:1-4.) Akala weyo oli munddimuwa wa mmulogoni, iyo ninoziwa wi weyo onowakwela abali vina onofuna wazuzumela. Mbwenyi masaka mena onodhaga okana mabasa menjene obe okala wolemene nanda buhiwodha wakwaniha mabasa awo. Ejo egapadduwa, txini enfwanyeliwe okosa? Kamwaddele Yehova mukalelo oniviwamo weyo. Pedro ohileba: “Ole ovahiwe nibasa thi nibasa, alabe na guru ya Mulugu yakelileye.” (1 Ped. 4:11) Abaliya txino anogumana na makattamiho orutxa ahinagome mwilaboni ejino yabure. Mbwenyi kobuwela wi “mukumbuzi-mukumbuziyá,” Yezu Kristu, onowodha wakamihedha opitta mugakamihedhiliwe, iyene onowodha okosa ejuwene ovanene vina mwilaboni eswa. Enfuna Yehova wi anddimuwa a mmulogoni akose ja wakwela abalihu, wazuzumela vina akale “asogorheli anfwanyela otagihiwa na etene.”

15. Mbali dhahi onzuzumela dhavi mulogo? (Koona vina foto.)

¹⁵ William, mbali onlaba mwa vyaka dhinjidhene ninga munddimuwa wa mmulogoni onoziwa ttima ya wazuzumela abali. Muromile ezini ya COVID-19 iyene na anddimuwa ena a mmulogoni ahikosa masasanyedho wi awodhe ologa na mbali mmodha mmodha a nikuru nawa na mabasa a olaleya. Iyene ohiloga sabwaya ekosilani ejuwene: “Abali enjene akala yekiwa vatakulu, sabwa ya ejuwene kiyarutxa okana dhubuwelo dhohifwanyelela.” Mbali mmodha agagumanana makattamiho, William ononvuruwana na ofwaseya wi anonelemo mukalelo oniviwamo mbaliya vina enfuniye. Mwa venevo iyene onotamela mapublikasau vina mavidiyu mu saiti wi awodhe ompangarhaza mbaliya. Iyene ohiloga: “Obu mudhidhi wa wazuzumela abalihu opitta mwakosela iyo wale. Iyo ninovilibihedha venjene wakamihedha attu ahinimuziwa Yehova; nona ninofwanyela okosa guru yakene wi nakamihedhe abalihu okalavi mwibaribarini.”

KARUMELA NIKAMIHEDHO NA YEHOVA

16. Ninawodhe dhavi ovirihamo masunziho anfwanyeya mmakartani a Pedro?

¹⁶ Mpaka veneva iyo nonile dhilobo dhing’onovi dhinsunzihu na makarta meeli alebile Pedro. Txino weyo ohizinddiyela mpaddi onfwanyeliwe ovyogolela. Motagiha, weyo ogahiziveliwa otanalela mwaha wa mareliho anakeliwe mwilaboni eswa? Ogahiwodha okana yogana ya ovaha onamoona omabasani, oskola, obe mburo mwina? Ohiwodha ozinddiyela mukalelo ogawodhiliwe walagiha okwela abalihu na arogora? Nyuwo vina anddimuwa a mmulogoni, muhigana osapiha mabila a Yehova na murima wotene? Ovipepesa enodhaga ouzinddiyeliha vobaniliwe, mbwenyi kukumuwe sabwa ya ejuwene. Mulugu ddwapama, vina iyene onele wukamihedha okosa matxinjo anfuneya. (1 Ped. 2:3) Pedro ononikuluveliha: “Mulugu onowulibihani, onowuwaralihani, onowimetxani pwi.”—1 Ped. 5:10.

17. Txini enapurehu nigamuttiya Yehova onishagiha?

¹⁷ Pedro vamaromo wobuwela wi kafwanyela okala na Yezu. (Lk. 5:8) Mbwenyi na nikamihedho na Yehova vina Yezu, Pedro ohivilela vina ohidhowavi anfwaraga Kristu. Yodhelavoya Yehova ohinfugulela Pedro musuwo “wovolowana mumweneni wohimala wa Nabuyehu, Mvulumutxi wehu Yezu Kristu.” (2 Ped. 1:11) Obu mperhe munddimuwa wakelile Pedro! Akala dhahene ninga Pedro weyo onodhowavi bugavilela vina bugarumela oshagihiwa na Yehova, onele wakela mperhe wa egumi yohimala. Dhahene onele ofwanya ovulumutxa wadha weyo ororomelaga.—1 Ped. 1:9.