Kakana Njedhelo Weyo Kunatxinuwe

1. Txini yamuttukulela Abrahamu okuluvela wi agahikana mwana?

YEHOVA wahimupikirhela marho waye Abrahamu wi agahikana mwana vina sabwa ya iyene malogo otene a mwilaboni agahakela mareliho. (Wita 15:5; 22:18) Abrahamu wahimuroromela venjene Mulugu vina wahikana ebaribari wi Mulugu agawakwaniha nipikirhelo naye. Nsaka nene-ntto, Abrahamu wanna vyaka 100 oku Sara wanna vyaka 90, mbwenyi ali ahinatti okana nne mwana mmodha. (Wita 21:​1-7) Masiki dhawene Bibilia onloga dhahi: Abrahamu aroromelaga dhajedhiye, orumela wi onere okala nikolo na malogo menjene ninga mamwaddelele Mulugu. (Rom. 4:18) Weyo onoziwa wi ejile yajedhela Abrahamu yahipadduwa txibarene. Iyene wahikala babi wa Izaki mwana wamujedheliye. Txini yamuttukulela Abrahamu omukuluvela Yehova?

2. Txini yamuttukulela Abrahamu okuluvela wi nipikirhelo na Yehova nigahakwanihedheya?

² Abrahamu wannimuroromela Yehova vina wanziwa-wene wi Mulugu onowodha “opuliha dhiroromelihileye.” (Rom. 4:21) Yehova wahimurumela Abrahamu vina wahimwira muligani sabwa ya nroromelo naye. (Tia. 2:23) Ninga munlagiha Roma 4:18, nroromelo na njedhelo nana Abrahamu dhedda mumodhani. Ovano ninfuna none ennaddela Paulo sabwa ya njedhelo, va Roma Kapitulu 5.

3. Txini elogile Paulo sabwa ya njedhelo?

³ Paulo ohitapulela mwahaya onnittukulela okuluvela wi njedhelo kaninnitxinutxa. (Rom. 5:5) Iyene vina ohinikamihedha ononelamo wi enowodheya wunuwiha njedhelo nehu. Ninele osekeserha mazu alogile Paulo va Roma kapitulu 5:1-5, koona mukalelo onwodha nroromelo nawo nunuwagavi mwa ovira wa mudhidhi. Yalebeli Paulo akadda Roma enele onikamihedha wona mukalelo w’owunuwiha njedhelo nehu masaka abano. Mbwenyi vamaromo ninele wona njedhelo nowagalaliha nilogile murumiwi Paulo nttuwene nihinnitxinutxa.

NJEDHELO NEHU NOWAGALALIHA

4. Txini ensunzihu va Roma 5:​1, 2?

⁴ Kengesa Roma 5:​1, 2. Paulo walebeli mazu aba Akristu o Roma. Abali a mulogo obule ahisunza ebaribari sabwa ya Yehova vina Yezu, ahunuwiha nroromelo vina ahidha okala Akristu. Sabwa ya nroromelo nawa Mulugu wahidha wawittana aligani vina wahattikittela na muya wokoddela. Awene anjedhela wakela nlivo nowagalaliha, vina ahikana nikuluvelo wi njedhelo nawa nigahakwanihedheya.

5. Njedhelo gani nina attikitteliwi?

⁵ Vasogorhova Paulo ohalebela Akristu ottikitteliwa o Éfeso sabwa ya njedhelo nakelilani. Njedhelo ntto newanana n’owakela dhorela dhikoyeliwe akoddeli. (Ef. 1:18) Vina alebelaga akadda Kolosi, Paulo ohoniha mburho ogakelile Akristu ottikitteliwa nlivo nawa. Paulo ohiloga wi nlivo nawa nakoyiwe wirimu. (Kol. 1:4, 5) Nona njedhelo na Akristu ottikitteliwa tta ovenyihiwa mukwani wi akele egumi yamukalakala wirimu, wenewo onalamulelani vamodha na Kristu.—1 Tes. 4:13-17; Ovuh. 20:6.

6. Txini elogile mbali mmodha wottikitteliwa sabwa ya njedhelo naye?

⁶ Akristu ottikitteliwa anovaha ttima enddimuwa njedhelo ntti. Mmodha wa abali abo ottikitteliwa, ddi Mbali Frederick Franz, labo nimodha wahiloga dhahi sabwa ya mukalelo waviwiyemo: “Njedhelo nehu ttokuluveleya vina ninokwaranya mubuwelo wehu, ninele wakwanihedheya kakamwe mwa muttu mmodha-mmodha wa attikitteliwi 144.000 ankosa epaddi ya nikuru ning’ono.” Yaka ya 1991, mmaleliye omulabela Yehova na ororomeleya Mbali Franz ohiloga: “[Iyo] kaninrimeliwa ttima ena njedhelo nehu. . . . Ninottittimiha vaddiddi vina ninojedhela venjene. Ji elobo yamakamaka enfwanyelihu ojedhela, masiki efuneye ojedhela vyaka matxikwi na matxikwi. Miyo ddinovaha ttima njedhelo nehu opitta elobo-elobovi.”

7-8. Alabeli enjene a Yehova anna njedhelo gani? (Roma 8:​20, 21)

⁷ Enjene animulabela Yehova masaka abano njedhelo nawa nihittiyana. Njedhelo nawa ttakene nana Abramu—wakela egumi yamukalakala velaboni ya vati mutxiddo mwa Omwene wa Mulugu. (Aheb. 11:​8-10, 13) Paulo ohiloga sabwa ya njedhelo ntti. (Kengesa Roma 8:​20, 21.) Dila yoroma esunzile weyo njedhelo ntti nohagalaliha mBibiliani, txini eddiginyile murima wawo? Ji sabwa ya oziwa wi siku nimodha onele ofuruleya muttegani bukala muttu woligana? Obe ku wagalala okanile weyo wa oziwa wi onele wawona wili attu akweletxiwe mparaizu velaboni ya vati? Se waganyedha, sabwa ya njedhelo ntti ninojedhela dhilobo dhinjene dhowagalaliha.

⁸ Kintanala akala njedhelo nehu tta okala wirimu obe elabo ya vati, iyo notene nihikana mwaha dhinjene dhinnagalaliha. Elogile Paulo vasogorhova enowoniha mukalelo ondhowa nroromelo ntti nunuwaga. Mazu alebiliye anele onikamihedha okanavi nikuluvelo wi njedhelo nehu ninele wakwanihedheya.

NINONUWIHE DHAVI NJEDHELO NEHU

9-10. Ninga munlagiha yotagiha ya Paulo, dhorutxa gani dhinjedhela ogumanana Akristu? (Roma 5:3) (Koona vina mafoto.)

⁹ Kengesa Roma 5:3. Paulo ohiloga wi matabuwo anonihu anonikamihedha owaraliha njedhelo nehu. Ejo txino enonitikiniha. Ebaribariya jawi, anamafwara otene a Yezu anele ogumanana makattamiho. Koona yotagiha ya Paulo. Iyene ohawaddela dhahi Akristu o Tesalónika: “Válihu na nyuwo, nawaddelani mutanene wi niner’ofwanyiwa masoso. Jijene epadduwile. . . . ” (1 Tes. 3:4) Alebelaga Akristu o Korinto, Paulo ohiloga dhahi: “Amudhaga, ninofuna muziwe masoso othabwa anipadduwele . . . Kanajedha-wene okalawo.”—2 Kor. 1:8; 11:​23-27.

¹⁰ Masaka abano, iyo notene ninojeedhela otabuwa na elobo-elobovi. (2 Tim. 3:12) Ki mwa weyo? Ohitabuwa na ofwarafwariwa sabwa ya omuroromela Yezu? Ohibeddiwa na amarho awo obe anamudhi. Txino awene ahuweddiha na mukalelo wohifwanyelela. Obe ohitabuwa omabasani sabwa ya okala muttu wororomeleya? (Aheb. 13:18) Txino ohitabuwa na ofwarafwariwa na guverno sabwa ya odhowa mmabasani a olaleya? Kintanala matabuwo agumaniliwena, Paulo ohiloga wi enowodheya okana wagalala. Sabwaya?

11. Masiki nigumanagana makattamiho ottiyana-ttiyana ekalele nni yamakamaka odhowavi nivilelaga?

¹¹ Enowodheya okana wagalala nigagumanaga makattamiho sabwani eji enonikamihedha wunuwiha mukalelo wamakamaka. Roma 5:3 onloga wi, “masoso anonivaha guru dh’ovilela.” Akristu otene anele ogumanana matabuwo, sabwa ya ejuwene otene anofuniwana ovilela. Nona niganeni okala attu ovilela kintanala makattamiho angumanihuna. Dhahene panawodhihu wona wakwanihedheya wa njedhelo nehu. Iyo kaninfuna okala ninga attu abale awubuwela Yezu valogiliye mwaha wa beu emottele vamaluguni. Attu abo vamaromo anorumela ebaribari nowagalala mbwenyi vasogorhova agafwanyiwa “makattamiho vina ofwara-fwariwa” anowojeya vina anottiya nroromelo nawa. (Mt. 13:​5, 6, 20, 21) Ebaribari wi akala ninotabuwa sabwa ya ofwara-fwariwa, obe ogumanana makattamiho kaninziveliwa mbwenyi nigavilibihedha odhowavi nivilelaga ninokana dhopurelamo dhinjene. Na mukalelo gani?

12. Ninkana dhopurelamo gani sabwa ya ovilela makattamiho?

¹² Tiago ohiloga wi ovilela matabuwo ononidhelana dhopurelamo. Iyene ohileba dhahi: “Ovilelawá wunuwe mmurimani mwenyu, wi mukale awakwana, owarala, ahinjombeliwa elo.” (Tia. 1:​2-4) Tiago ohiloga ekalelani yofuneya ovilela. Sabwaya jani? Ovilela ononikamihedha okala attu opisa murima, okana nroromelo vina omukuluvela Yehova. Ottiya ejo ovilela ononidhelana dhopurelamo dhinjene dhamakamaka.

13-14. Txini empadduwa sabwa ya iyo ovilela, nanda ejo empatta dhavi njedhelo nehu? (Roma 5:4)

¹³ Kengesa Roma 5:4. Paulo ohiloga wi nigakala attu ovilela ninorumeliwa vamentoni va Yehova. Ovilela wawo onowuttukulela orumeeliwa na Yehova. Eji kintapulela wi ogatabuwaga na ofwara-fwariwa obe na makattamiho mena Yehova onowagalala na makattamihoya, kahiye mwenemo. Ebaribariya jawi Yehova onagalala sabwa ya ovilela wawo. Ovilela wawo bunuttukulela orumeliwa na iyene. Eji gari enddimuwa enihu!—Masal. 5:12.

¹⁴ Kudduwale wi Abrahamu ohigumanana makattamiho ottiyana-ttiyana vina ovilela waye ehimwagalaliha Yehova. Yehova wamoona Abrahamu ninga marho Waye vina wamweddiha ninga muttu woligana. (Wita 15:6; Rom. 4:​13, 22) Enopadduwa yakakene na iyo. Orumeliwa wehu vamentoni va Yehova kunda sabwa ya iyo okosa dhilobo dhinjene mmabasani mwaye obe ettomo dhinihu. Yehova onnirumelela sabwa ya ovilela na nroromelo. Kintanala yimo yehu, makattamiho angumanihuna obe dhilobo dhinwodhihu, iyo notene ninofuniwana ovilela. Ahikalawo makattamiho anvileliwe ovanene? Akala pumwenemo, kudduwale wi enkosiwe enomwagalaliha Yehova. Nigazinddiyela wi ninorumeeliwa vamentoni va Yehova, njedhelo ninihu wi iyene onele wakwaniha dhotene dhipikireliye ninele odhowavi nikalaga noliba.

NJEDHELO NOLIBA

15. Txini elogile Paulo va Roma 5:​4, 5, nanda nigadhile ovivuza eni?

¹⁵ Ninga mulogile Paulo, iyo ninorumeliwa na Yehova nigakala aweddeyana vina nigavilela muwehiwani. Mukartani nalebeliye akadda Roma, Paulo onodhowavi alogaga dhahi: Nigamala orumeliwa na Yehova ninokana njedhelo, njedhelona kaninitotela otxinuwa. (Rom. 5:​4, 5) Ejo enodhaga woneya ninga elobo yozuzumiha. Sabwaya jani? Sabwani vamaromo, ninga munlogela Roma 5:​2, Paulo ohiloga wi Akristu o Roma ahikana njedhelo na “oya munthithimihoni [mwa Mulugu].” Nona, muttu agahidha ovuza dhahi, ‘Akala Akristu abale ahikana njedhelo, kito Paulo ologeleni wili sabwa ya njedhelo?’

16. Njedhelo nindha dhavi wunuwa mwa muttu-muttu? (Koona vina mafoto.)

¹⁶ Iyo ninowodha ononelamo mazu a Paulo nigobuwela wi njedhelo elobo enunuwa obe enenjedhedhiwa. Motagiha, weyo onowubuwela dila yoroma yiwaliwe sabwa ya njedhelo ntti nowagalaliha na Omwene wa Mulugu omusunzaga Bibilia? Vamaromo weyo txino wahubuwela wi okala namukalakala mparaizu velaboni ya vati elobo yamakamaka, mbwenyi kuwana ebaribari wi egahipadduwa txibarene. Venevo vadhowa weyo osunzagavi venjene sabwa ya Yehova vina mapikirhelo aye anfwanyeya mBibiliani, njedhelo nawo nawi Yehova onele wakwanihedha dhetene dhipikireliye nihiliba vaddiddi.

17. Ogamperhekela Yehova egumi yawo vina obatiziwa, onawodhe dhavi odhowavi wunuwihaga njedhelo nawo?

¹⁷ Masiki bumalile obatiziwa, njedhelo nawo nihidhowavi nunuwaga venevo vadhowa weyo osunzaga venjene vina wunuwagavi mpaddi omuyani. (Aheb. 5:13–6:1) Onele wona wamwinya ebaribari ya mazu ali va Roma 5:​2-4. Txino weyo ohivira mmakattamihoni menjene, masiki dhawene ohidhowavi ovilelaga vina ohoniha wi oli worumelihiwa vamentoni va Yehova. Oziwa wi Yehova onowukwela ehuttukulela okana mwaha dhinjene dha odhowavi ojeedhelaga esile dhipikireliye. Njedhelo nawo nihiliba venjene ovanene mottiyana na mudhidhi oromiliwe osunza ebaribari. Ovano njedhelo ntti ttebaribari mwa weyo, vina nihikana yotapulela yamakamaka mwigumini mwawo. Ninopatta dhotene dhinkosiwe, mukalelo onaweddihiwe amudhawo, dhogana dhinkosiwe, ottiya ejo mukalelo onlabihedhiwe mudhidhi wawo.

18. Nikuluvelo gani ninnivaha Yehova?

¹⁸ Paulo onologa elobo yina yamakamaka eniwanana na njedhelo nehu nigamala orumeliwa na Yehova. Iyene ohinikuluveliha wi njedhelo nehu ninele wakwanihedheya. Txini ennittukulela okuluvela ejuwene? Paulo ohakuluveliha Akristu mulebeliye mazu aba: Njedhelona kaninittukulela otxinuwa; vowi Mulugu okuttulela mmurimani mwehu okwela waye anivahaga muya wokoddela. (Rom. 5:5) Nihikana mwaha dhinjene dhinnittukulela okuluvela njedhelo ntti ninnivaha Yehova—ntti njedhelo nehu.

19. Ebaribari gani enfwanyeliwe okana sabwa ya njedhelo nawo?

¹⁹ Katamela mudhidhi wi wubuwele ejile empikirheli Yehova Abrahamu vina mukalelo orumeliwe na Yehova badha okala marho Waye. Njedhelo na Abrahamu kanali na ebewene. Bibilia onloga dhahi: “Abrahamu ojedha n’ovilela, ohona esodhá dhampikirhele Mulugu.” (Aheb. 6:15; 11:​9, 18; Rom. 4:​20-22) Abrahamu katxinuwile. Weyo vina ogadhowavi okalaga wororomeleya kunatxinuwe, ojedhela wawo onele ottuviwa. Njedhelo nawo ttebaribari vina ninowudhelana wagalala ottiya otxinuwa! (Rom. 12:12) Paulo ohileba dhahi: “Mulugu onvaha [njedhelo], audhaliheni othaba, murenddele, nyuwo munimuroromela; onuwihe [njedhelo] nenyu na guru dha muya wokoddela.”—Rom. 15:13.