NSUNZO 30
Amarafula Anele Wiyelela Okalawo!
Okwa onodhana goyi vina wiwa opa. Bibilia onloga wi okwa, mwiddani. (1 Korinto 15:26) Mwari mwa nsunzo 27, weyo ohona wi Yehova onele ompemberha mwiddani oddu. Txini enapadduwele attu abale akwile? Mwari mwa nsunzo ntti, weyo onele osunza mwaha wa nipikirelo nowagalaliha na Yehova—iyene onele wavenyiha matxikwi menjene a attu wi eyelele okalawo na mukalakala. Ejo enele opadduwa wene? Awene anavenyihedhiwe wi akalege wuvi, wirimu obe velaboni ya vati?
1. Txini enakosele Yehova amarho na anamudhi ehu akwile?
Yehova onofuna venjene wavenyiha attu abale akwile. Mulobwana wororomeleya wakuweliwa Job, wahikana ebaribari wi Yehova kagamudduwalile mudhidhi ogakwiliye. Iyene ologa dhahi na Mulugu: ‘Venevo Nyuwo munere oddittana, miyo ddinere owakulani [Omasiye].’—Kengesa Job 14:13-15.
2. Ninziwa dhavi wi amarafula anele ovenyihiwa mukwani?
Mudhidhi wali Yezu velaboni ya vati, Mulugu wahinvaha ewodhelo yowavenyiha attu mukwani. Motagiha, Yezu ohinvenyiha mwana muyana wa vyaka 12 vina mwana wa mamukwela. (Marko 5:41, 42; Luka 7:12-15) Iyene vina wahinvenyiha mukwaye Lázaro. Masiki bavirile malabo manai mukweli Lázaro, Yezu wahimwiyihedha okalawo. Iyene ohimulobelela Mulugu vina ohiloga: “Lázaro, kabudduwela otakulu!” venevo “marafula obudduwamo”—Lázaro wahiyelela okalawo! (Joau 11:43, 44) Kobuwela wagalala wana amarho vina anamudhi a Lázaro!
3. Njedhelo gani nina amarho vina anamudhi awo akwile?
Bibilia onopikirela: “Attu apama na abure anele ovenyihiwa mukwani.” (Merelo 24:15) Attu abale avenyihiwe mukwani kadhowile wirimu. (Joau 3:13) Awene ahagalala ovenyihedhiwa okala velaboni ya vati. Na mukalelo wakakene, mohigonela Yezu onele wavenyiha attu awinjiva wi akalewo namukalakala mparaizu velaboni ya vati. Iyene ohiloga, ‘ali mmasiye anele ovenyihiwa mukwani’—ejo entapulela wi attu otene ali muyubuweloni mwa Mulugu—anele wiyelela okalawo, masiki na abaleya ahinwodhihu wawubuwela.—Joau 5:28, 29.
KASUNZAVI
Koona malagiho a mBibiliani antonyihedha wi amarafula anele ovenyihiwa vina ejoya enele opadduwa wene. Koona mukalelo onawupangarhaze vina onawuvahe njedhelo ovenyihiwa mukwani.
4. Yezu ohoniha wi onele wavenyiha amarafula
Kasunzavi emukosele Yezu mukwaye Lázaro. Kengesa Joau 11:14, 38-44, mugamala mutanaalele mavuzo aba:
Ninziwa dhavi wi Lázaro wahikwa txibarene? —Koona versu 39.
Yezu wahinvenyiha Lázaro wi akale velaboni ya vati. Kowiliwa Lázaro wadhowile wirimu, Yezu agahinvenyiha?
5. Attu enjene anele ovenyihiwa!
Kengesa Masalmo 37:29, mugamala mutanaalele nivuzo ntti:
Attu owinjiva anele ovenyihiwa mukwani. Aweneya anakalege wuvi?
Ottiya wavenyiha alabeli ororomeleya a Yehova bahi, Yezu onele wavenyiha vina attu ena enjene. Kengesa Merelo 24:15, mugamala mutanaalele nivuzo ntti:
Weyo ogaziveliwe omona ani attu agavenyihiwa mukwani?
Kobuwela: Akala kinrutxa mambali onvenyiha mwanaye ongona, moligana na ejene Yezu kanarutxiwe wavenyiha attu akwile
6. Ovenyihiwa mukwani enovaha njedhelo vina nipangarhazo
Wengesa mBibiliani epadduwile na mwana Jáiro, enowapangarhaza vina enowalibiha attu enji antabuwa sabwa ya okweliwa muttu onimukwelani. Kengesani nipadduwo ntti va Luka 8:40-42, 49-56.
Ahinatti onvenyiha mukwani mwana Jáiro, Yezu ologa na babeya dhahi: ‘Kamove, muroromele.’ (Koona versu 50.) Njedhelo novenyihiwa mukwani ninawukamihedhe dhavi . . .
akala muttu wamukweliwe ohikwa?
akala egumi yawo enokala vangovini?
Karumiha VIDIYU, mugamala mutanaalele nivuzo ntti.
Njedhelo n’ovenyihiwa mukwani naalibihile vina napangarhazile dhavi amambali a Filismina?
ATTU ENA ANLOGA WI: “Jorutxa okuluvela wi attu abale akwile anele ovenyihiwa mukwani.”
Weyo ononamo dhavi?
Nlebo gani na mBibiliani nigalabihedhile weyo wila otonyihedhe wi ovenyihiwa mukwani onele opadduwa-wene?
OGWADDELA
Bibilia ohipikirela wi attu owinjiva akwile, anele ovenyihiwa mukwani. Yehova onfuna wi awene akalewo wili, iyene ohinvaha Yezu ewodhelo yokosana ejuwene.
Kobuwela Dhisunziliwe
Yehova na Yezu anakosele eni attu abale akwile?
Attu owinjiva anfuna ovenyihiwa mukwani anakale wuvi—wirimu obe velaboni ya vati? Weyo onlogelani dhawene?
Weyo ohikana nikuluvelo nawi attu abale akweliwe, anele wiyelela okalawo? Sabwaya jani?
TAMELÁ ONONELAMO DERETU
Koona mashagiho aderetu agawukamihedhile owanana makattamiho o’kweliwa.
Magano a mBibiliani anowodha omukamihedha muttu ontabuwa sabwa ya okweliwa?
Onakamihedhe dhavi aima owanana makattamiho a okweliwa mwanamudhi?
Ohikalawo muttu anavenyihedhiwe okala wirimu? Bani ohinavenyihiwe mukwani?