Yehova Ononikuluveliha wi Elabo Enele Okala Paraizu

1. Muselu gani wawaddelile Izaiya ana Izrayel?

NAMAVUHULELA Izaiya ohiloga wi Yehova Mulugu webaribari. Nzu ntti ebaribari nintapulela “amen.” (Iza. 65:16) “Amen” nintapulela “pumwenemo,” obe “ekale dhawene.” Nzu ntti “amen” nigalabihedhiwa mBibiliani nimutonyaga Yehova obe Yezu, ninonikuluveliha wi eloboya jebaribari. Nona muselu wavahile Izaiya ana Izrayel bubu: Mudhidhi wetene onloga Yehova wi elobo enele opadduwa, eloboya enopadduwa-wene. Ebaribariya jawi Yehova onowakwaniha dhotene dhimpikireliye.

2. Ninfwanyelelani okuluvela mapikirhelo akosile Yehova mwaha wa musogorho, nanda mavuzo gani anakule iyo mwari mwa nsunzo ntti?

² Ninfwanyelelani okuluvela wi mapikirhelo akosile Yehova anele wakwanihedheya? Muvirile vyaka 800 Izaiya bamalile okwa, murumiwi Paulo ohiloga sabwaya enfwanyelihu okuluvela wi mapikirhelo ankosa Yehova anowakwanihedheya. Paulo ohiloga: “Kinwodheya wi Mulugu aloge othambi.” (Aheb. 6:18) Kinwodheya fukuwa modha obudduwa manje a mwinyu vina manje oridha, na mukalelo wakakene Yehova oli Fukuwa yebaribari, kanzivala. Ji sabwaya enfwanyelihu okuluvela dhotene dhinloga Yehova, eji enotaganyiheya na nipikirhelo nikosiliye mwaha wa musogorho. Nsunzo ntti ninele wakula mavuzo meeli: Txini epikirhele Yehova onivaha musogorho? Vina nikuluvelo gani ninivahile Yehova wi mapikirhelo aye anele wakwanihedheya?

TXINI EPIKIRHELE YEHOVA?

3. (a) Nipikirhelo gani nikosile Yehova nili na ttima mwa iyo? (Ovuhulela 21:3, 4) (b) Attu ena anakula dhavi iyo nigaloga mwaha wa nipikirhelo ntti?

³ Ninele otanalela nipikirhelo nimodha namakamaka mwa iyo. (Kengesa Ovuhulela 21:3, 4.) Yehova ohipikirhela wi ninele ofiya nsaka “[nihinakalewo] vina okwa, kutho, obulela, segedho.” Enji wa iyo ninowengesa Nlebo ntti namakamaka wi napangarhazena attu analaleyihu vina walagiha mukalelo onakale egumi mParaizu. Attu ena anakula dhavi nigawaddela mwaha wa nipikirhelo ntti? Txino awene anologa, “Ejoya kinapadduwe.”

4. (a) Vapikirheli Yehova Paraizu txini yaziwa iyene wi egahipadduwa? (b) Ottiya opikirhela bahi, elobo gani yina ekosile Yehova?

⁴ Munvudhelile Yehova murumiwi Joau wi alebe mwaha wa nipikirhelo ntti na egumi mParaizu, Yehova wanziwa wi iyo nigahilabihedha nipikirhelo ntti masaka abano nalaleyaga ena mwaha wa miselu dha Omwene. Yehova vina wanziwa wi attu enjene agahirutxiwa orumela wi dhilobo dhigahisadduwa musogorho. (Iza. 42:9; 60:2; 2 Kor. 4:3, 4) Ki ninawodhe dhavi wakamihedha attu ena orumela wi mareliho anfwanyeya va Ovuhulela 21:3, 4 anele wakwanihedheya? Ninawodhe dhavi olibiha omukuluvela wehu Yehova vina mapikirhelo aye? Yehova ohinivaha mwaha dhinjene dhinnikamihedha okuluvela wi mapikirhelo akosiliye anele wakwanihedheya. Mwaha eso sivi?

YEHOVA ONELE WAKWANIHEDHA NIPIKIRHELO NAYE

5. Maversu gani annikuluveliha mapikirhelo a Mulugu vina txini dhinlogani?

⁵ Va Ovuhulela 21:5, 6a ninofwanya mwaha dhinnittukulela okuluvela nipikirhelo na Yehova nawi elabo enele okala Paraizu. Ninowengesa: “Ole wagilatile vampaddoni w’omwene, ologa: Koona! ‘Dhetene, miyo ddinokaliha dhiswa.’ Ohenjedhedhavo vina: ‘Kaleba, vowi dhinlogimi sebaribari, dhinofwanyela orumeliwa.’ Odhowanavi: ‘Dhetene dhimala wireya! Miyo ddili [Alfa vina Omega], oroma na omariha.’”

6. Nipikirhelo nili va Ovuhulela 21:5, 6 ninlibiha dhavi okuluvela wehu mapikirhelo a Mulugu?

⁶ Malebo aba anlibiha dhavi okuluvela wehu mapikirhelo akosile Mulugu? Va versu esi, enkosa Yehova enoladdanihiwa na ottikitta dokumento ennikuluveliha wi iyene se waganyedha onele wakwaniha nipikirhelo naye. Ovuhulela 21:3, 4 ononaddela epikirhele Yehova. Mbwenyi versu 5 na 6, iyo ninofwanya assinatura ya Yehova ennikuluveliha wi nipikirelo naye ninele wakwanihedheya. Ovano ninfuna none mukalelo onaddela Yehova wi ninofwanyela omukuluvela.

7. Bani ologile mazu anfwanyeya va versu 5 vina akalele nni attima?

⁷ Versu 5 enroma na mazu aba: “Ole wagilatile vampaddoni w’omwene, ologa.” (Ovuh. 21:5a) Mazu aba bamakamaka sabwani Yehova onologa dila ttaru mazu akakene munivuruni na Ovuhulela. Kahiye anju obe Yezu okosile nipikirhelo ntti, mbwenyi ddi mwinyene Yehova! Eji enowoniha wi ninofwanyela okuluvela enlogiye vasogorho. Sabwaya jani? Sabwani Mulugu “[kampela] malago.” (Tito 1:2) Nona ninofwanyela okuluvela mazu ali va Ovuhulela 21:5, 6.

KOONA! “DHETENE, MIYO DDINOKALIHA DHISWA”

8. Nzu gani ninlabihedha Yehova ninlagiha wi nipikirhelo naye ninele wakwanihedheya? (Izaiya 46:10)

⁸ Mazu anloga Yehova vasogorhova baba, Koona! (Ovuh. 21:5) Nzu ntti koona! na Egregu ninolabihedhiwa venjene munivuruni na Ovuhulela. Nivuru dhahi ninologa wi nzu ntti na sinali eji ya exclamação ninlabihedhiwa ninga “mukalelo wa omwaddela namengesaya ofwaseyela dhinengese iyene vasogorho.” Txini elogile Mulugu vasogorhova? Iyene ohiloga: “Dhetene, miyo ddinokaliha dhiswa.” Yehova onele okosa matxinjo aba musogorho, mbwenyi iyene ohikana nikuluvelo ninddimuwa nawi onele wakwanihedha nona aloga ninga matxinjoya anopadduwa ovanene.—Kengesa Izaiya 46:10.

9. (a) Mazu aba “dhetene, miyo ddinokaliha dhiswa” antapulela nni? (b) Txini enapadduwe na “erimu” vina “elabo” dhiliwo masaka abano?

⁹ Yehova ohiloga: “Dhetene, miyo ddinokaliha dhiswa.” Eji entapulela eni? Va kapitulu eji, mazu aba antonya dhilobo bili dhinakose Yehova. Yoroma, Yehova onele otolotxa elabo eji yabure. Yanawili, onele odhana elabo eswa. Va Ovuhulela 21:​1, ninowengesa: “Erimu yawale na elabo yawale dharimela.” “Erimu yawale” enatonya alamuleli ansogorheliwa na Satana vina adomonyo aye. (Mt. 4:8, 9; 1 Jo. 5:19) Nzu ntti “elabo” mBibiliani enodhaga olabihedhiwa wi yatonye attu ankala mwilabonimwa. (Wita 11:1; Masal. 96:1) Nona, “elabo yawale” enatonya attu abure. Yehova kanatagihe osasanya “erimu” na “elabo” eliwo masaka abano ottiya ejo iyene onele otolotxa. Vamburoni vawa Yehova onele wika “erimu eswa na elabo eswa”—kuloga, olamulela oswa onaalamulele attu oligana murima.

10. Txini enakose Yehova wi dhilobo dhikale dhiswa?

¹⁰ Na mukalelo gani mwina onasaddule Yehova dhilobo dhotene dhikale dhiswa? (Ovuh. 21:5) Yehova onele osaddula elabo vina onele okosa wi nlogo na attu nikale noligana. Ninga elogile nivuhulo na Izaiya, Yehova onele okosa wi elabo yotene ekale mburho wokoddela moladdana na mundda wa Edeni, osadduwa oku onele wapatta vina attu. Yehova ohipikirhela wi maredda otene anele ogoma. Akwettenkwe, aliba ohona, aliba ohiwa anele ovulumuwa, vina attu akwile anele ovenya mukwani.—Iza. 25:8; 35:1-7.

“DHINLOGIMI SEBARIBARI, DHINOFWANYELA ORUMELIWA. . . . DHETENE DHIMALA WIREYA!”

11. Txini emukumbirhile Yehova Joau okosa nanda nikuluvelo gani ninvahiliye?

¹¹ Elobo gani yina elogile Mulugu ennittukulela okuluvela mapikirhelo aye? Yehova ohimwaddela Joau: “Kaleba, vowi dhinlogimi sebaribari, dhinofwanyela orumeliwa.” (Ovuh. 21:5) Ottiya bahi omukumbirha Joau wi “alebe.” Yehova ohimutapulelamo sabwaya. Iyene ohiloga: “Vowi dhinlogimi sebaribari, dhinofwanyela orumeliwa”—eji entapulela wi mazu a Mulugu bokuluveleya. Iyo ninotamalela venjene sabwa ya Joau oleba ninga mumwaddelile Yehova. Sabwa ya ejuwene, masaka abano iyo ninowengesa mwaha wa nipikirhelo na elabo eswa vina otanalela mareliho attima vaddiddi anakelihu musogorho.

12. Yehova ologeleni mazu aba: “Dhetene dhimala wireya!”

¹² Txini yina elogile Yehova? Iyene ohiloga: “Dhetene dhimala wireya!” (Ovuh. 21:6) Va versu eji Yehova onologa ninga mapikirhelo akosiliye mwaha wa Paraizu amala wakwanihedheya. Yehova onologa dhawene sabwani kuli elobo enimutximiha wakwaniha yogana yaye. Vasogorhova Yehova onologa elobo yina ennikuluveliha wi mapikirhelo aye anele wakwanihedheya. Txini?

MIYO DDILI ALFA VINA OMEGA

13. Yehova ologeleni mazu aba: Miyo ddili Alfa vina Omega?

¹³ Ninga monile iyo mundduni, Yehova mwinyene ohiloga dila ttaru mwa dhawonihiwa dhikanile Joau. (Ovuh. 1:8; 21:​5, 6; 22:13) Dila esi dhotene dhilogile Yehova, iyene ohilabihedha mazu akakene: Miyo ddili Alfa vina Omega. Nzu ntti alfa letra noroma na alfabetu w’Egregu, omega letra nomariha. Valogiliye wi miyo ddili Alfa vina Omega, Yehova ohoniha wi agaroma elobo onopuliha vina onokosa eloboya wi yireye.

14. (a) Mudhidhi gani ologile Yehova mazu aba Alfa vina mudhidhi gani onaloge iyene Omega. (b) Nikuluvelo gani ninfwanyeya va Wita 2:1-3?

¹⁴ Vamuttanddile Yehova Adamu na Eva, Iyene ohiloga efunelo yaye na attu vina elabo ya vati. Bibilia onologa: “Mulugu àrurihaga ologilena dhahi: ‘Kalanina guru dh’obala, enjivihanani, dhalani mwilaboni, muthongemo.’” (Wita 1:28) Valogile Yehova efunelo yaye yakala ninga ologile Alfa. Ziza na Adamu na Eva nowiwelela nigakala attu oligana adhale mwilaboni vina basaddula elaboya wi ekale Paraizu pavenevo vanakwanihedheye efunelo ya Yehova. Mudhidhi obo onapadduwe dhilobo esi, enakale ninga Yehova onologa, Omega. Mmalile Yehova opaddutxa “[elabo] y’odhulo, elabo ya vati na dhetene dhilimo,” iyene ohinivaha nikuluvelo nimodha. Iyo ninofwanya nikuluvelo ntti va Wita 2:1-3. (Kengesa.) Yehova ohiloga wi siku nanotanu nawili siku nokoddela. Eji entapulela nni? Eji enoniha wi efunelo ya Yehova na attu vina elabo ya vati enele wakwanihedheya omagomo wa siku nanotanu nawili.

15. Txini egamuttukuleli Satana wubuwela wi agahiwodha omutximiha Yehova wakwaniha efunelo yaye?

¹⁵ Vamusadduweli Adamu na Eva Yehova, awene ahidha okala attu ottega venevo aaharaviha aniwa ottega vina okwa. (Rom. 5:12) Egahidha woneya ninga Satana wahiwodha omutximiha Yehova wakwaniha efunelo yaye ya odhaliha elabo na attu oligana vina animwiwelela. Egahidha vina woneya ninga Yehova kagawodhile wakwaniha efunelo yaye vina opuliha alogaga Omega. Txino Satana wobuwela wi Yehova kagawodhile wakwaniha epikirheliye. Iyene txino obuwela wi Yehova agaatolotxa Adamu na Eva vina apaddutxa attu ena oligana wi akwanihe efunelo yaye na attu. Mbwenyi Yehova kokosa ejuwene Satana agahiloga wi Yehova muttambi. Sabwaya jani? Sabwani va Wita 1:28, Yehova ohawaddela Adamu na Eva wi ziza nawa nigahidhala mwilaboni.

16. Txini emuttukuleli Satana wubuwela wi wanfwanyela ologa wi Yehova Mulugu wawobana?

¹⁶ Txini yina txino yubuweli Satana wi Yehova agahikosa? Txino iyene obuwela wi Yehova agahattiya Adamu na Eva okana aima mbwenyi txipo kagawodhile okala attu oligana. (Koh. 7:20; Rom. 3:23) Mwa dhahene, kavali waganyedha wi Satana agahiloga wi Yehova Mulugu wawobana. Sabwaya? Sabwani ejo kopadduwa Yehova kagawodhile wakwanihedha efunelo yaye ya elabo ekale Paraizu vina mudhale attu oligana vina animwiwelela.

17. Yehova opulihile dhavi osadduwela wa Satana vina wa Adamu na Eva, nanda txini enapadduwe omagomo? (Koona vina foto.)

¹⁷ Mbwenyi Satana txipo kobuwela wi Yehova agahikosa elobo. Yehova ohisasanyedha dhilobodha na mukalelo woligana wi akwanihe efunelo yaye. (Masal. 92:5) Yehova ohattiya Adamu na Eva okana aima, dhahene iyene ohilagiha wi kanzivala. Iyene vina ohikosa masasanyedho wi abaliwe muttu wa ziza na Adamu na Eva odduwene ogavunile ziza nowiwelela na Adamu na Eva alagihaga wi efunelo yaye egahakwanihedheya, dhahene kawo muttu agalogile wi Yehova ddawobana. Muttu mmodha obudduwile mwa Adamu na Eva agahiperheka egumi yaye wi avune nlogo na attu dhahene ninga mwapikirheli Yehova. (Wita 3:15; 22:18) Satana txipo kobuwela wi Yehova agahikosa masasanyedho aba! Sabwaya jani? Sabwani yobolo okwela onddimuwa olagihile Yehova. (Mt. 20:28; Jo. 3:16) Satana kana mukalelo obu wa okwela sabwani iyene mukumbela vaye. Kito txini enapadduwe sabwa ya mukutto wa yobolo? Omagomo wa olamulela wa Vyaka 1.000 dha Kristu, ziza nowiwelela vina noligana na Adamu na Eva ninele odhala mwilaboni enakale paraizu —dhahene ninga elogile Yehova wi egahipadduwa. Nsakanene-ntto enele okala ninga Yehova onologa, Omega.

NINAWODHE DHAVI OLIBIHA OKULUVELA PARAIZU EPIKIRHELI YEHOVA

18. Mwaha gani miraru dhinnivaha Yehova? (Koona vina kasha “Mwaha Miraru Dhinnittukulela Okuluvela Nipikirhelo na Yehova.”)

¹⁸ Mwari mwa nsunzo nti iyo nihona dhilobo dhinji dhinnittukulela orumela wi elabo enele okala Paraizu, nona txini enalogihu na abale ahinrumela wi eso dhinele opadduwa? Yoroma, Yehova mwinyene ddipikirheli. Nivuru na Ovuhulela ninologa: “Ole wagilatile vampaddoni w’omwene, ologa: ‘[Koona!] Dhetene, miyo ddinokaliha dhiswa.’” Yehova ohikana eziwelo, ewodhelo vina efunelo ya wakwaniha epikirheliye. Yanawili, mwa mpaddi wa Yehova, epikirheliye enkala ninga ehimala wakwanihedheya. Nona iyene ohiloga dhahi: “Dhinlogimi sebaribari, dhinofwanyela orumeliwa. . . . Dhetene dhimala wireya!” Yaneraru, kuli elobo enimutximiha Yehova wakwaniha epikirheliye, nona iyene ohiloga miyo ddili Alfa vina Omega. Omagomo wa dhetedhene enele woneya wi ottiya Yehova ddi Satana oli muttambi vina wawobana.

19. Akala attu anorutxiwa orumela nipikirhelo nikosile Mulugu mwaha wa Paraizu txini enfwanyeliwe okosa?

¹⁹ Kudduwale, dila dhotene dhinaloge weyo na muttu omalaleyoni wi enowodheya iyene okuluvela mapikirhelo a Yehova, mwebaribari weyo vina onolibiha okuluvela wawo mapikirhelo aye. Nona mudhidhi wotene onengese weyo njedhelo ntti nili va Ovuhulela 21:4 ninloga sabwa ya Paraizu enadhe musogorho, nanda muttu baloga dhahi, “Ejoya kinapadduwe,” txini enfwanyeliwe okosa? Wengese versu 5 na 6. Omutapulelemo muttuya omukamihedhaga ononelamo wi enkala ninga Yehova ottikittile dukumento ennikuluveliha wi onele wakwaniha epikirheliye.—Iza. 65:16.