Omwene Wa Mulugu Txini?

1. Nlobelo gani novuwa ninfuna opepesiwa?

MATXIKWI na matxikwi a attu ozugunuwa elabo yotene anoziwa nlobelo nttile nintxemerha attu enjene Babi Wehu, obe Nlobelo na Nabuya. Mazu aba oomeli anaddana nlobelo nttile novuwa nivahiwe na mwinyene Yezu ninga nlobelo na nlagiho. Nlobelo ntti tta ntapulelo vaddiddi, nanda woona dhipaddidha ttaru dhoromadha onela wukamiha osunza dhilobo dhinji mwaha wa esile dhinsunziha Bibilia txibarene.

2. Dhilobo gani ttaru dhasunzihile Yezu anamasunza aye olobelelaga?

² Omaromo wa nlobelo ntti na nlagiho, Yezu wahasunziha anamewa aye: ‘Noona, munofanyeela olobelaga dhahi: “Baba wehu muli odhulu, nzina nenyu nikoddelihiwe. Omwene wenyu odhe. Efunelo yenyu ekosiwege velaboni ya vati ninga munkoseliwani odhulu.’” (Mateu 6:9-13) Ntapulelona ttivi vina dhokumbirha esi ttaru sivi?

3. Enfanyeelihu oziwa txini mwaha wa Omwene wa Mulugu?

³ Nihimala osunza dhilobo gwe mwaha wa nzina na Mulugu, Yehova. Vina dhipaddi dhiina nihimala ologela efunelo ya Mulugu​—ejile ekosiliye vina ejile enaakoseliye nlogo na attu. Kito Yezu waddana eni mwanipangeliye wila nilobelege: ‘Omwene wenyu odhe’? Omwene wa Mulugu txini? Odhawa onakoddelihe dhavi nzina na Mulugu, obe onatxenihe dhavi? Nanda odha wa Omwene oniwanana dhavi na okosa efunelo ya Mulugu?

EJILE ELI OMWENE WA MULUGU

4. Omwene wa Mulugu txini, nanda Mweneya bani?

⁴ Omwene wa Mulugu tti nlamulelo nimetxiwe na Yehova Mulugu nina Mwene osakuliwe na Mulugu. Mwene wa Omwene wa Mulugu bani? Yezu Kristu. Yezu ninga Mwene, iyene munddimuwa opitta alamuleli otene a omuttu vina onotxemerhiwa ‘Mwene wa abale anlamula ninga amwene vina Nabuya wa abale anttonga ninga anabuya.’ (1 Timóteo 6:15) Iyene ohikaana ewodhelo ya okosa deretu opitta mulamuleli mulamulelivi wa omuttu, masiki ompitta waderetuya vari va alamuleli a omuttu.

5. Omwene wa Mulugu onlamulela ovenyedha wuvi, nanda onalamulege eni?

⁵ Omwene wa Mulugu onalamulelege ovenyedha wuvi? Koddi Yezu oli wuvi? Txibarene weyo onowubuwela wila ohisunza yawila iyene wahipiwa va pingirizini ya goi, nanda mumaleliye wahivenyihiwa mu okwani. Mudhidhi mung’onovi mumalelani, iyene wahiwela odhulu. (Merelo 2:33) Noona, ku wenewale oli Omwene wa Mulugu​—odhulu. Ji sabwa ya ejene entxemerhela Bibilia okala ‘Omwene wa Odhulu.’ (2 Timóteo 4:18) Masiki Omwene wa Mulugu vakalilani odhulu, obu onela olamula elabo ya vati.​—Kengesa Ovuhulela 11:15.

6, 7. Txini enimukosiha Yezu okala Mwene wokaletxa vaddiddi?

⁶ Txini enimukosiha Yezu okala Mwene wokaletxa vaddiddi? Sabwaya modha jawila, txipo iyene kanda akwaga. Momuladdaniha Yezu na amwene a omuttu, Bibilia onimutxemerha iyene ‘mmodha yeka ohinkwa, onkala mu txezani yohaddameleya.’ (1 Timóteo 6:16) Eji entapulela wila dhilobo dhotene dhaderetu dhinkosa Yezu dhinela ogoneela. Nanda iyene onela okosa dhilobo dhinddimuwa vina dhaderetu.

⁷ Koona nivuhulo ntti na Bibilia mwaha wa Yezu: ‘Muya wa Yehova onere okalagavi na iyene: muya wa ononelamo na wa ttotto, muya wa malago na w’olibiha, muya wa onona na w’omukwela Yehova. Kanattonge na ejile enoona iyene na mento aye bahi, nne kanasumulele bahi mowiwanana na elobo yiwale maru aye. Onowasoriha ayelegi na murima woligana, onowamelela dhinafwanyelela apujiwi a mwilaboni.’ (Izaiya 11:2-4) Mazu aba anlagiha wila Yezu wahiroromelihiwa wila agahikala Mwene woligana vina wowakaanela nttebwa attu a velaboni ya vati. Weyo kugaziveliwe okaana mulamuleli ninga oddwene?

8. Analamule na Yezu bani?

⁸ Ebaribari yina mwaha wa Omwene wa Mulugu ji eji: Yezu kanalamulege yeka. Iyene onela okaana alamuleli akwaye. Motagiha, murumiwi Paulo wahimpanga Timóteo: ‘Nigadhowavi banigavilela, ninela vina olamula vamodha ninga amwene.’ (2 Timóteo 2:12) Indde, Paulo, Timóteo, vamodha na aroromeleyi ena abene asakuliwe na Mulugu anela olamula vamodha na Yezu mu Omweneni wa odhulu. Attu angasi anakaane gari eji?

9. Attu angasi analamulege na Yezu, ki Mulugu oromile wasakula mudhidhi gani?

⁹ Ninga mulagihedhiwani mu Kapitulu 7 ya nivuru ntti, murumiwi Joau wahivahiwa yowoona mwenemo mwamooniliye ‘Mwana Nibila [Yezu Kristu] beemelile va Mwangoni Sioni [mpaddo waye wa olamula odhulu], nanda vamodha na iyene 144.000 ana nzina naye vina nzina na Babi waye banilebiwe va koveni vawa.’ Kito 144.000 aba bani? Joau mwinyene ononipanga: ‘Aba ba abene aninfara Mwana Nibila wego wegovi ondowiye. Aba aguliwe mwari mwa nlogo na attu ninga namulibu wa Mulugu vina wa Mwana Nibila.’ (Ovuhulela 14:1, 4) Indde, awene anamafara oororomeleya a Yezu Kristu makamaka asakuleliwe olamula odhulu na iyene. Agamala ovenyihedhiwa egumi ya odhulu, ‘anela olamula elabo ya vati ninga amwene’ vamodha na Yezu. (Ovuhulela 5:10) Oromana mmasikuni a arumiwi, Mulugu onowasakulaga Akristu oororomeleya wila akwanihedhe muttengo wa 144.000.

10. Okaleli eni musasanyedho wa okwela, Yezu na attu 144.000 olamulaga nlogo na attu?

¹⁰ Ja okwela vaddiddi osasanyedha wila Yezu vamodha na attu 144.000 alamulege nlogo na attu. Txibarene, Yezu onoziwa txini okala muttu vina woona goi. Paulo walogile wila Yezu “Txibarene namakutha wehu munddimuwa onoziwa okubanyedha dhawobana dhehu, vowi iyene ohehiwa mwa dhetedhene ninga iyo; othega, kathegile.” (Ahebreu 4:15; 5:8) Alamuleli akwaye vina ahoona goi vina aahivilela ninga attu. Mowenjedhedha, awene aahiwana na ohakwana vina aahakwaniha makalelo otene a maredda. Txibarene, awene anela ononelamo makattamiho angumana na attu!

OMWENE WA MULUGU ONAKOSE ENI?

11. Yezu walogile wila anamasunza aye anfanyeela olobelela eni mwaha wa efunelo ya Mulugu?

¹¹ Yezu mwalogeliye wila anamasunza aye anfanyeela olobela wila Omwene wa Mulugu odhe, iyene walogile vina wila awene anfanyeela olobela wila efunelo ya Mulugu ekosiwege ‘velaboni ya vati ninga odhulu.’ Mulugu oli odhulu, nanda efunelo yaye enokosiwa wenewale na angelo oororomeleya. Mu Kapitulu 3 ya nivuru ntti, txibarene, iyo nihisunza wila mungelo wabure wahittiya okosa efunelo ya Mulugu vina wahatotiha Adamu na Eva ottega. Mu Kapitulu 10, ninela osunza dhilobo dhinji mwaha wa esile dhinsunziha Bibilia mowiwanana na mungelo oddule wabure, oddwene ontxemerhiwa Satana Ddiabo. Satana vamodha na dhottandda dha omuyani, angelo, abene asakulile onfara iyene​—antxemerhiwa adomonyo​—aahittiyiwa okala odhulu na mudhidhi mung’onovi. Dhahene, kayo angelo otene odhulu aakosa efunelo ya Mulugu. Eji yanfanyeela osadduwa mugaromeli olamula Omwene wa Mulugu. Mwene muswa wagilatihiwe va mpaddoni, Yezu Kristu, wanfanyeela oraba koddo na Satana.​—Kengesa Ovuhulela 12:7-9.

12. Mapadduwo gani meeli a makamaka anlogiwa va Ovuhulela 12:10?

¹² Mazu aba a nivuhulo andawo anologa ejile egapadduwile: ‘Ddahiwa lizu nowiweya odhulu banigaloga: “Ovanene ovuneya ohipadduwa, vamodha na ewodhelo, vina Omwene wa Mulugu wehu, vamodha na onddimuwa wa Kristu waye, sabwani namamagedha wa abali ehu [Satana] ohimala ovokedhiwa vati, oddwene wamagedha awene mutana na mattiyu vamentoni va Mulugu wehu!”’ (Ovuhulela 12:10) Weyo ohizinddiyela dhopadduwa biili dha makamaka dhilogiwe va versikuluni eji ya Bibilia? Yoroma, Omwene wa Mulugu mutxiddo mwa Yezu Kristu ohiroma olamula. Yanawili, Satana ohittamagihiwa odhulu badha velaboni ya vati.

13. Txini epadduwile sabwa ya Satana ottamagihiwa odhulu?

¹³ Txini epadduwile sabwa ya mapadduwo aba meeli? Mowiwanana na ejile epadduwile odhulu, ninowengesa: ‘Sabwa ya ejene weyo elabo ya odhulu ohagalale, vamodha na nyuwo munkalawo!’ (Ovuhulela 12:12) Indde, angelo oororomeleya odhulu ahihagalala sabwani ovanene Satana na adomonyo aye kawo viina odhulu, kadda muttu oli odhulu ddororomeleya wa Yehova Mulugu. Wenewale ohikala murenddele vamodha na wiwanana wowakwana. Ovanene efunelo ya Mulugu enokosiwa odhulu.

14. Epadduwile txini sabwa ya Satana ottamagihedhiwa velaboni ya vati?

¹⁴ Kito, dhavi mwaha wa elabo ya vati? Bibilia onloga dhahi: ‘Zeze tta elabo ya vati vina nyaza, sabwani Ddiabo ohutitelani, bana owali onddimuwa, bagaziwa yawila ohalinawo mudhidhi mung’onovi.’ (Ovuhulela 12:12) Satana ohiludduwa sabwa ya ottamagihiwa odhulu vina sabwa ya ohalanawo mudhidhi mung’onovi bahi. Mwa oludduwa waye iyene onotota makattamiho, obe ‘zeze,’ velaboni ya vati. Mu kapitulu endawo ninela osunza dhilobo dhiina mwaha wa ‘zeze’ ntti. Mbwenye banina eji mmubuweloni, nigahifanyeela ovuza: Omwene onakosihe dhavi wila efunelo ya Mulugu ekoseye velaboni ya vati?

15. Efunelo ya Mulugu na elabo ya vati jivi?

¹⁵ Indde, kobuwela efunelo ya Mulugu na elabo ya vati. Weyo ohimala osunza mwaha wa eji mu Kapitulu 3. Mu Edeni, Mulugu wahilagiha wila efunelo yaye jawila elabo eji ya vati ekale paraizu yodhaala na nlogo na attu ahinkwa vina ooligana. Satana wahatotiha Adamu na Eva ottega, nanda eji yahipakela osoriheya wa efunelo ya Mulugu na elabo ya vati mbwenye eji kisaddulile efuneloya ya Mulugu. Yehova onofunavi wila “athu apama aner’okala anya a elabo, akalegemo masiku otene.” (Masalmo 37:29) Nanda Omwene wa Mulugu onela wakwanihedha ejene. Na mukalelo gani?

16, 17. Txini ennipanga Daniyel 2:44 mwaha wa Omwene wa Mulugu?

¹⁶ Koona nivuhulo nili va Daniyel 2:44. Apa ninowengesa: “Nsaka ninathongege amwene aba, Mulugu w’odhulu onere wita omwene ohinamale-wene, ohinawodheye na malogo mena. Omwene obu onere otolotxa-wene omwene mwina wotene, onere ogonela okala n’okala-wene.” Eji ennipanga eni mwaha wa Omwene wa Mulugu?

¹⁷ Yoroma, eji ennipanga wila Omwene wa Mulugu wanfanyeela wimetxiwa ‘mmasikuni a amwene abale,’ obe oku mamwene mena baliwo. Yanawili, eji ennipanga wila Omweneya onela ogoneela na mudhidhi wa mukalakala. Obu kunaattukuliwe nanda butxinjiwa na nlamulelo niina. Yanoraru, nihoona yawila onela okala koddo vari va Omwene wa Mulugu na mamwene a elabo eji. Omwene wa Mulugu onela opemberha. Omagomelowa, ntti ninakale nlamulelo nimodha bahi ninalamulege nlogo na attu. Venevo attu anela ojavo nlamulelo naderetu nihinaziwiwaga.

18. Ttivi nzina na koddo yomariha vari va Omwene wa Mulugu na alamuleli a elabo eji?

¹⁸ Bibilia ohikaana dhilobo dhinji dha ologa mwaha wa koddo eji yogomihedha vari va Omwene wa Mulugu na malamulelo a elabo eji. Motagiha, Bibilia onsunziha wila vowila omagomo onowaddamela, muya dhabure dhinela omwadha ottambi wila dhanyengette ‘amwene a elabo yotene ya vati enkaliwa.’ Na efunelo gani? ‘Wila dhaagumanihedhe [amwene] vamodhavi va koddoni ya siku nddimuwa na Mulugu, Wa Guru Dhotene.’ Mamwene a elabo ya vati anela ogumanihiwa vamodhavi va ‘mburhoni mu Ebraiko ontxemerhiwa Armageddo.’ (Ovuhulela 16:14, 16) Sabwa ya ejile elogiwe mmaversikuluni aba meeli, koddo yomariha vari va alamuleli a omuttu na Omwene wa Mulugu entxemerhiwa koddo ya Armageddo.

19, 20. Txini enkattamiha wila efunelo ya Mulugu ehikoseye ovanene apa?

¹⁹ Omwene wa Mulugu onafiyedhe eni modheela koddo ya Armageddo? Kobuwela wili mwaha wa efunelo ya Mulugu na elabo ya vati. Yehova Mulugu wafunile wila elabo ya vati edhaale nlogo na attu ooligana, vina owakwana bagamulaba iyene mParaizu. Txini enkattamiha wila eji ehikoseye ovanene apa? Yoroma, iyo nili attegi, ninobulela vina ninokwa. Txibarene iyo nihisunza mu Kapitulu 5, wila Yezu wahikwa sabwa yehu wila iyo nikalewo na mukalakala. Vina, weyo onowubuwela mazu alebiwe mmuttakani wa Joau: ‘Mulugu wahikwela vaddiddi elabo mpaka omperheka Mwanaye wa nammodha, wila muttu wotene onimuroromela iyene ahitolotxiwe, mbwenye akaane egumi ya mukalakala.’​—Joau 3:16.

²⁰ Nikattamiho niina ttawila attu enjene anokosa dhilobo dhabure. Anologa ottambi, anopela malago, vina anoraruwa. Awene kanfuna okosa efunelo ya Mulugu. Attu ankosa dhilobo dhabure anela otolotxiwa vari va koddo ya Mulugu Armageddo. (Kengesa Masalmo 37:10.) Vina sabwa yina enkooddela okosiwa efunelo ya Mulugu velaboni ya vati jawila malamulelo kanaalibiha attu okosa ejene. Malamulelo menjene bowobana, ba otabala, obe bovirigana. Na ebaribari Bibilia onloga wila: ‘Muttu onomulamulaga muttu mukwaye mwa oputtuleya waye.’​—Kohelét 8:9.

21. Omwene onakosihe dhavi efunelo ya Mulugu okosiwa velaboni ya vati?

²¹ Armageddo agavira, nlogo na attu ninela okala mutxiddo mwa nlamulelo nimodha bahi, Omwene wa Mulugu. Omwene obu onela okosa efunelo ya Mulugu vina onela odhana mareeliho ootikiniha. Motagiha, Omwene obu onela omburutxavo Satana na adomonyo aye. (Ovuhulela 20:1-3) Ewodhelo ya mukutto wa Yezu enela ottiddihedhiwa mabasa wila attu oororomeleya ahibulelege nne ahikwege viina. Ottiya eji, mutxiddo mwa olamula wa Omwene awene anela owodha okalagawo na mukalakala. (Kengesa Ovuhulela 22:1-3.) Elabo ya vati enela okala paraizu. Venevo Omwene onela okosiha wila efunelo ya Mulugu ekosiwe velaboni ya vati, vina onela okoddeliha nzina na Mulugu. Eji entapulela eni? Eji entapulela wila musogorhomwa mutxiddo mwa Omwene wa Mulugu kadda muttu onkalawo onela ottittimiha nzina na Yehova.

MUDHIDHI GANI ONAKOSIHE OMWENE WA MULUGU WILA EFUNELO YAYE EKOSIWE VELABONI YA VATI?

22. Niziwile dhavi wila Omwene wa Mulugu kuwadhile Yezu bali velaboni ya vati obe bali ovenyihiwawene mu okwani?

²² Yezu mwapangeliye anamasunza aye wila alobelege wila: ‘Omwene wenyu odhe,’ eji yali yowooneyene wila nsaka nttile Omweneya kuwadhile. Koddi Omwene obu wahidha mudhidhi wawelile Yezu odhulu? Nne, sabwani ooheli Pedro na Paulo aalogile wila mumaleli Yezu ovenyihiwa mu okwani, nivuhulo na va Masalmo 110:1 nahisoriheya wa iyene: ‘Ologa wa Yehova wa Nabuya waga ku oku: “Kagilati o mononi waga wa oja, mpaka miyo wawika amwiddani awo ninga vonyigala manyalo awo.”’ (Merelo 2:32-35; Ahebreu 10:12, 13) Wahikala mudhidhi wa ojeedha.

23. (a) Omwene wa Mulugu oromile olamula mudhidhi gani? (b) Txini enalogeliwe mu kapitulu endawo?

²³ Mpaka mudhidhi mungasi? Mwari mwa vyaka zana dha 19 na 20, anamasunza a txibarene a Bibilia aatanalela odhowavi osogorho wila mudhidhi wa ojeedha ogaagomile yaka ya 1914. (Mowiwanana na data eji, koona Yowenjedha “1914​—Yaka ya Ntapulelo Mu Nivuhuloni na Bibilia.”) Mapadduwo a mwilaboni abene aromile mu yaka ya 1914 anorumeelela wila ononelamo oku wa anamasunza aba a txibarene a Bibilia wahiligana. Osoriheya wa mavuhulo a Bibilia onlagiha wila mu yaka ya 1914, Yezu wahikala Mwene nanda Omwene wa odhulu wa Mulugu wahiroma olamula. Noona iyo ninkalawo mu nsaka na ‘mudhidhi mung’onovi’ obwene omuhaleliwo Satana. (Ovuhulela 12:12; Masalmo 110:2) Iyo vina poddi ologa na ebaribari wila mohigoneela, Omwene wa Mulugu onela okosiha wila efunelo ya Mulugu ekosiwe velaboni ya vati. Weyo onowoona esi okala miselu dhaderetu vaddiddi? Weyo onororomela wila eji ebaribari? Kapitulu endawo enela wukamiha woona wila Bibilia txibarene onosunziha dhilobo esi.