Hulda Ohiwodha Yafuniye

KOWILIWA vyaka dha mundduni wahiwodha odhowa wona vankala suwa eng’ono ya Sangir Besar o Indonésia, txino ogahaziwa arogorihu araru. Awene anoziwiwa sabwa ya—wakamihedha attu ena omunonelamo Bibilia. Mbwenyi dila eji akosa elobo yina yottiyana.

Awene andowa nikome na bara oddodda malugu. Malugu mena ali manddimuwa okwaranya bola. Annimuttukula martelu bagilati baroma otwa malugu bakala mang’ono vaddiddi opitta nzayi na mwanaku. Agamala annika maluguya mmabaldini mang’ono a palastiku badhowana vatakulu. Omamalelowa annika malaguya abo mmasakuni dhinddimuwa, bekiwa mukaroni bidhowa osasanyiwana rampa.

Mwa arogora aba araru mmodhaya wakuweliwa Hulda. Iyene wankana mudhidhi mwinjene wa okosa mabasa abo. Kobiri yagumeliye wannakamihedhana amudhaye. Mbwenyi dila eji, kobiriya wafuna akosena elobo yina. Iyene afuna amugule tablet wi akane epano ya JW Library^®. Hulda wanziwa wi mavidiyu na dhetene dhili mu JW Library® dhigahimukamihedha mmabasani mwaye a olaleya vina munsunzoni naye nomwinya.

Vasikuni Hulda wanlaba wora bili na membesi, ohikosa ejene mweri wantero na jiddiga wi awodhe otwa malugu menjene ofiyedha odhaliha kamiau. Omamalelowa wahigumela kobiri yakwanela omugulana tablet.

Hulda ohiloga, “Ebaribari wi miyo ddanttema vaddiddi sabwa ya otwa malugu, mbwenyi mohigonela ddahidduwala goyi ejile yotene varomile miyo omulabihedha tablet oddule vowi ohiddikamihedha mmabasani a olaleya vina osasanyedha pama matugumano.” Iyene onologa vina wi tablet oddule ohimukamihedha mweteyile eredda ya Covid-19 vina mabasa otene a mmulogoni baroma weddihiwa na interneti. Iyo vina ninowodha wagalala sabwa ya Hulda owodha ejile yafuniye.