Kutuhuka

16 Muze ayo akatukile ku Elime, chikungulwila cheswe cha A-Izalele yichiheta ku puya ya Shini, yize yatwama hakachi ka Elime ni Sinai, ha tangwa 15 lia kakweji wamuchiali, chize haze akatukile mu Engitu.

2 Chocho chikungulwila cheswe cha A-Izalele yichiputuka kulinyenyeta kuli Mose ni Arone mu puya. 3 A-Izalele yamba kuli ayo ngwo: “Kachi Yehova katushihile kwetu mu Engitu, muze te twakulia mandoho a yifwo ni kulia mbolo ngwe chize te tunazange! Alioze yenu nwatuneha mu puya yino hanga chikungulwila cheswe chifwe ni zala.”

4 Mba Yehova yamba kuli Mose ngwenyi: “Mungununokesena kulia kukatuka mwilu. Tangwa ni tangwa, mutu mweswe katamba kwanda kulia chenyi, hanga ngwase mu cheseko ngumone nyi mononokena shimbi yami nyi ka. 5 Alioze, ha tangwa liamuchisambano, akande kulia cha matangwa aali, ni kulianga kuchilulieka.”

6 Kashika, Mose ni Arone yamba kuli A-Izalele ngwo: “Musono chingoloshi, yenu mununyingika pundu ngwenu Yehova mwe wanuchijile mu chifuchi cha Engitu. 7 Hamene chimene munumona uhenya wa Yehova, mumu Yehova kevwa kulinyenyeta chenu kuli iye. Yetu aya mba nulinyenyete kuli yetu?” 8 Mose yamba nawa ngwenyi: “Chingoloshi, muze Yehova makanwaha yifwo ni kunwaha mbolo chimene ngwe chize nwakuzanga, munukanyingika ngwenu Yehova kevwa kulinyenyeta chenu. Alioze yetu aya? Yenu kunwalinyenyetene kuli yetu, alioze nwalinyenyeta kuli Yehova.”

9 Mba Mose yamba kuli Arone ngwenyi: “Lweza chikungulwila cheswe cha A-Izalele ngwe: ‘Tweyenu kumeso ja Yehova, mumu iye kevwa kulinyenyeta chenu.’” 10 Muze Arone halweza chikungulwila cha A-Izalele maliji wano, ayo yateuluka yatala ku puya, yamona uhenya wa Yehova mu lelwa.

11 Yehova yamba nawa kuli Mose ngwenyi: 12 “Hinevwa kulinyenyeta cha A-Izalele. Amba kuli ayo ngwe: ‘Chingoloshi munukalia yifwo, chimene munukalia mbolo ngwe chize nwakuzanga, pundu lume, munukanyingika ngwenu yami nguli Yehova Zambi yenu.’”

13 Chingoloshi, ngwali yeza, yazala too mu chilombo, chimene mume unji yiujingilika chilombo cheswe. 14 Muze mume womine, yikusoloka tuma tukehe-tukehe hashi mu puya ngwe chiwe. 15 Muze A-Izalele amwene tuma twacho, yamba kuli umwe ni mukwo ngwo: “Ayi yene yika?” Mumu te kayinyingikine. Mose yaalweza ngwenyi: “Che kulia achi Yehova anwaha. 16 Yehova kamba ngwenyi: ‘Mutu ni mutu ande kulia chize mahasa kulia. Mutu ni mutu ande ngomere yimuwika kulita ni unji wa atu atwama ku zuwo lienyi.’” 17 A-Izalele yalinga chocho, amwe yanda kulia chinji, akwo yanda chikehe. 18 Muze esekele kulia chacho mu ngomere, yamona ngwo mutu ni mutu kanjile kulia chakumbana. Mutu ni mutu kanjile kulita ni chize te mahasa kulia.

19 Chocho Mose yamba kuli ayo ngwenyi: “Mutu niumwe katambile kutulika kulia ndo hamene.” 20 Alioze ayo kapanjikile Mose. Muze amwe a kuli ayo atulikile kulia chacho ndo ha tangwa likwo, kulia yichipwa ni mavuno, yichinuka vumba lipi. Chocho Mose yaevwila uli. 21 Ha chimene cheswe, mutu mweswe kapwile ni kwanda kulia chize te mahasa kulia, muze mwalwa wapwile ni kutwa, kulia chacho te chakusangunuka.

22 Ha tangwa liamuchisambano, ayo yanda kulia cha matangwa aali, mutu ni mutu ngomere jaali. Mba miata eswe a chikungulwila yaya ni kulweza Mose chikuma chacho. 23 Kashika, iye yamba kuli ayo ngwenyi: “Yehova kanambe ngwenyi, tangwa lia hamene mulikapwa tangwa lia kuhwima, mumu mulikapwa sambata yisandu kuli Yehova. Ochenu yize munufupa, telekenu yize munufupa, alioze yize muyisalaho nuyitulike ndo hamene.” 24 Chocho, o yatulika kulia ndo tangwa likwo ngwe chize Mose aalwezele, kulia chize atulikile kuchanukine, chipwe kutuhuka mavuno. 25 Mba Mose yamba ngwenyi: “Chilienu musono, mumu musono sambata ya Yehova. Musono kunuchi kuwana kulia hashi. 26 Yenu munupwa ni kwanda kulia ha matangwa asambano, alioze ha tangwa liamuchishimbiali, lia Sambata, kuchichi kupwako.” 27 Chipwe chocho, ha tangwa liamuchishimbiali, amwe a kuli A-Izalele yaya hanga ande kulia, alioze kawanyine nichimwe.

28 Mba Yehova yamba kuli Mose ngwenyi: “Ndo tangwa lika munulituna kukaula yuma yize nakunulweza ni shimbi jami? 29 Kanda nuvulama ngwenu Yehova kanuhele Sambata. Kashika ha tangwa liamuchisambano iye akunwaha kulia cha matangwa aali. Ha tangwa liamuchishimbiali mutu ni mutu atwame ha chihela chenyi, kanda akatuka ni kuya kweka.” 30 Chocho A-Izalele yafunga Sambata ha tangwa liamuchishimbiali.

31 A-Izalele yavuluka kulia chacho ngwo, “manaa.”* Manaa kapwile atoma ngwe mbuto ya koentru, kuyema cho chapwile ngwe mbolo ja kuchinga ni uchi. 32 Mose yamba ngwenyi: “Yehova kanambe ngwenyi: ‘Andenu ngomere yimuwika ya manaa nuyitulike ndo ku yisemuko yenu yeswe, hanga ayo akamone kulia chize nanuhele mu puya muze nanuchijile mu chifuchi cha Engitu.’” 33 Chocho Mose yamba kuli Arone ngwenyi: “Anda mulondo usemo ngomere yimuwika ya manaa, uyise kumeso ja Yehova hanga ayitulike ndo ku yisemuko yeswe.” 34 Arone yasa mulondo wacho kulutwe lia Mushete wa Uchela hanga aufunge, ngwe chize Yehova alwezele Mose. 35 A-Izalele yalia manaa ha miaka 40 ndo muze ahetele mu chifuchi muze mwapwile atu. Yalia manaa ndo muze ahetele mu njiza ya chifuchi cha Kanana. 36 Chikashi chimuwika cha Efa* chapwile ni kunjila ngomere kumi.