Kutuhuka
18 Yetoru, sasendote wa Mindiane, tato-weno ya Mose, yevwa yuma yeswe yize Zambi alingilile Mose ni atu jenyi A-Izalele, ni chize Yehova atuhwishile A-Izalele mu Engitu. 2 Tangwa limwe, Mose kahilwishile mukwo-pwo Zepora ku zuwo lia tato-weno Yetoru, chocho Yetoru yatambula Zepora 3 hamwe ni ana jenyi aali a malunga. Umwe jina lienyi te Ngeshome,* mumu Mose yamba ngwenyi: “Napwa chilambala mu chifuchi cha yilambala.” 4 Mukwo jina lienyi te Elieza,* mumu iye yamba ngwenyi: “Zambi ya tata mwe chikwashi chami yoze wangulamwinyine ku moko ja Falau.”
5 Chocho, Yetoru tato-weno ya Mose yaya hamwe ni ana ni pwo lia Mose ni kulitakana nenyi mu puya, kuze iye apwile mu chilombo, hakamwihi ni mulundu wa Zambi wamwenemwene. 6 Mba iye yatumina Mose maliji wano ngwenyi: “Yami tatenu-weno Yetoru, nguneza ngulitakane ni yena, nguneza hamwe ni mukwenu-pwo ni ana je aali.” 7 Hazehene Mose yatuhuka, yaya ni kulitakana ni tato-weno, yafulamana, yamwaha mbeju. Mutu ni mutu yahula chize mukwo te ali, mba yanjila mu mbalaka.
8 Mose yalweza tato-weno yuma yeswe yize Yehova alingile kuli Falau ni kuli A-Engitu mumu lia A-Izalele, ni lamba lieswe lize amwene mu jila ni chize Yehova anakaapulwila. 9 Yetoru yawahilila ha yuma yeswe yipema yize Yehova anakalingila A-Izalele ha kwatusula mu Engitu. 10 Mba Yetoru yamba ngwenyi: “Yehova afumane, yoze wanutusula ku moko ja A-Engitu ni ja Falau, ni kutusula A-Izalele mu wanangana wa A-Engitu. 11 Haliapwila hinanyingika ngwami, Yehova kali munene kuhiana tuzambi akwo eswe, mumu lia yize alinga hali A-Engitu waze te akumwesa atu jenyi lamba ni kulinangamisa.” 12 Chocho, Yetoru tato-weno ya Mose, yaneha mulambu wa kulumba ni yitapo kuli Zambi, mba Arone hamwe ni makulwana eswe a mu Izalele, yaya ni kulia hamuwika ni tato-weno ya Mose, kumeso ja Zambi wamwenemwene.
13 Mukwachako, Mose yatwama hanga asopese A-Izalele ngwe chize te akulinga, atu yatwama kumeso ja Mose chize chimene ndo chingoloshi. 14 Muze Yetoru amwene yuma yeswe yize Mose apwile ni kulingila A-Izalele, yamba ngwenyi: “Mumu liaka unalingi chize? Mumu liaka unasopesa A-Izalele eswe ukawe shimbu ayo anamana kumeso je chize chimene ndo chingoloshi?” 15 Mose yamba kuli tato-weno ngwenyi: “Mumu A-Izalele kakwiza kuli yami hanga ngwahulile kuli Zambi. 16 Muze kwakupwa mulonga hakachi ka atu aali, kakungulwezawo hanga ngwasopese ni kwalweza yize Zambi wamwenemwene amba ni shimbi jenyi.”
17 Yetoru yamba kuli Mose ngwenyi: “Yize unalingi kuyapemene. 18 Pundu lume, yena ni atu wano munuhonga, mumu mulimo uno uli ukalu chinji, watambile kuulinga ukawe. 19 Haliapwila ngupanjike. Mungukwaha mana, Zambi mapwa hamwe ni yena. Yena pwako hako wa atu kumeso ja Zambi wamwenemwene ni kulweza Zambi wamwenemwene milonga yo. 20 Walongese shimbi ni kwalweza jila yize atamba kwendela ni mulimo uze atamba kulinga. 21 Sakula nawa malunga ajama hakachi ka atu, waze akuvwila Zambi woma, waze mahasa kujikijila, waze keshi kuzanga kuzuka mbongo mu jila yipi, wapwise miata a kanunu ka atu, miata a lukama, miata a makumi atano ni miata a kumi. 22 Muze mukupwa mulonga,* ayo masopesa atu, mulonga uze uli ukalu mautwala kuli yena, alioze milonga yashi ayo mahasa kuyisopa. Lianyine no chiteli che, hanga chiteli che chilele. 23 Nyi wachilinga, chikwo nawa nyi Zambi machitayiza, mulinga mulimo we kanawa, mutu mweswe mafuna ku zuwo lienyi ni uwahililo.”
24 Hazehene Mose yapanjika yize tato-weno amulwezele, yeswe amulwezele yayilinga. 25 Mose yasakula malunga ajama hakachi ka A-Izalele eswe, yaatongola hanga apwe miata a kanunu ka atu, miata a lukama, miata a makumi atano ni miata a kumi. 26 Muze te kwakupwa mulonga, ayo e apwile ni kuusopa. Milonga yeswe yikalu te kakuyitwala kuli Mose, alioze milonga yeswe yashi ayo e apwile ni kuyisopa. 27 Mba Mose yalishika ni tato-weno, tato-weno yahiluka mu chifuchi chenyi.