Kutuhuka
21 “Lweza A-Izalele shimbi jino ngwe:
2 “Nyi mulanda ngamba Ka-Hepreu, iye makukalakalila miaka yisambano, alioze ha mwaka wamuchishimbiali umutusule chakuhona kukufweta nichimwe. 3 Nyi kejile ukawenyi, maya ukawenyi. Nyi kejile ni mukwo-pwo, maya ni mukwo-pwo. 4 Nyi mwene wenyi mamwaha pwo, mba pwo wacho mamusemena ana a malunga hanji a mapwo, pwo ni ana, mapwa a mwene wenyi, iye maya ukawenyi. 5 Alioze nyi ngamba mamba ngwenyi: ‘Nakuzanga mwene wami, pwo liami ni ana jami, chazangile angutusule,’ 6 mwene wenyi amutwale kumeso ja Zambi wamwenemwene, mba maya nenyi ku chikolo hanji ku nguji lia chikolo, mwene wenyi amutuwe twitwi ni katwala,* apwe ndungo yenyi ku mwono wenyi weswe.
7 “Nyi umwe lunga malanjisa mwanenyi wa pwo ngwe ngamba, mwana wacho kechi kamutusula ngwe chize akutusula ngamba wa lunga. 8 Nyi mwene wenyi kawahilile nenyi, chikwo nawa kazangile hanga apwe pwo lienyi mukwo, alioze kanazange kumulanjisa kuli mutu mukwo, kanda amulanjisa kuli chilambala, mumu kulinga chino chili chipi. 9 Nyi mamuhangisa kuli mwanenyi wa lunga, akamulingile yuma yeswe yize te malingila mwanenyi wa pwo. 10 Nyi mwanenyi wa lunga mambata pwo mukwo, katambile kutepulula yuma yize akuhana kuli pwo mutangu, ngwe kulia, mazalo ni kulisumbakenya.* 11 Nyi lunga kamuhele yuma yino yitatu, pwo wacho akatusuke chawana.
12 “Nyi mutu malamba mukwo, mba mukwo mafwa, neye katamba kumushiha. 13 Alioze, nyi kachilingile ku tachi, chikwo nawa Zambi wamwenemwene mecha hanga chilingiwe, mungukulweza chihela kuze mutu wacho atamba kuchinyina. 14 Nyi umwe mutu mevwila mukwo uli unji ni kumushiha ku tachi, neye katamba kumushiha, chipwe ngwe machinyina ku chilumbilo chami. 15 Mutu mweswawo malamba tato hanji naye, katamba kumushiha.
16 “Nyi mutu meya mutu ni mukwo ni kumulanjisa, chipwe mamuwana nenyi, katamba kumushiha.
17 “Yoze mashinga tato hanji naye, amushihe.
18 “Nyi atu aali mazwela, mba umwe masa mukwo liwe hanji kumwaha kome, kafwile, alioze mapwa ha muhela, lingenu chino: 19 Nyi kutala ngwe kanahase kukatuka ni kwendela ku pango, kanda alinga upi kuli mutu yoze wamulambanga. Alioze amufwete ha matangwa waze kahashile kukalakala ndo haze mahindukila.
20 “Nyi umwe malamba mutondo ngamba yenyi wa lunga hanji wa pwo ni kumushiha, mwene wenyi katamba kumumwesa lamba. 21 Alioze nyi matwama ni mwono tangwa limuwika hanji matangwa aali, kanda amwesa mwene wenyi lamba, mumu kamulanjile ni mbongo jenyi.
22 “Nyi malunga malilamba, mba manunguna pwo kafumba, chocho pwo masema muze shimbu lienyi lia kusema kanda lichiheta, alioze niumwe kafwile, yoze wanungunanga pwo mafweta yeswe yize mukwo-lunga mamwita kupalikila muli ngaji. 23 Alioze nyi umwe mafwa, akafwete mwono ni mwono, 24 liso ni liso, lizo ni lizo, kwoko ni kwoko, kulu ni kulu, 25 kwocha ni kwocha, chilonda ni chilonda, kulikita ni kulikita.
26 “Nyi mutu malamba ngamba yenyi wa lunga hanji wa pwo chuma ku liso, chocho liso mulifwa, katamba kumutusula ngwe fweto mumu lia liso lienyi. 27 Nyi mapukula lizo lia ngamba yenyi wa lunga hanji wa pwo, katamba kumutusula ngwe fweto mumu lia lizo lienyi.
28 “Nyi ngombe mapupa ni mbinga lunga hanji pwo, chocho mutu wacho mafwa, ngombe wacho katamba kumwasa mawe ndo haze mafwila, yifwo yenyi kanda ayilia, mwenya-ngombe kanda amusuma mulonga. 29 Alioze nyi ngombe te kakupupa atu ni mbinga, mba matoweza mwenya-ngombe, chipwe chocho iye kamukashile, mba ngombe wacho mashiha lunga hanji pwo, katamba kumwasa mawe ndo haze mafwila, ni mwenya-ngombe katamba kumushiha. 30 Nyi mamwita chimwe hanga akuule mwono* wenyi, katamba kufweta cheswacho mamwita. 31 Nyi ngombe mapupa ni mbinga mwana wa lunga hanji wa pwo, chatamba kukaula shimbi yino-yene. 32 Nyi ngombe mapupa ni mbinga ngamba wa lunga hanji wa pwo, mwenya-ngombe afwete shekele* 30 kuli mwenya-ngamba, ngombe amwase mawe ndo haze mafwila.
33 “Nyi umwe mutu mafukula wina hanji mafula wina kaufukile, mba ngombe hanji chimbulu maholokelamo, 34 mwenya-wina katamba kufweta. Katamba kufweta mbongo kuli mwenya-chimuna, chimuna yoze wafwa mapwa wa mwenya-wina. 35 Nyi ngombe wa umwe mutu malemeka ngombe wa mukwo ni kumushiha, ayo katamba kulanjisa ngombe wa mwono, alitetele mbongo, chikwo nawa, alianyine kashitu yoze wafwa. 36 Nyi mwenya-ngombe te kanyingika ngwenyi ngombe wenyi kakwete chako cha kupupa, alioze kamukashile, iye mafweta ngombe ni ngombe, kashitu yoze wafwa mapwa ni wenyi.