Yilinga ya Apostolo
21 Muze te hitwalihandununa no, twendele mu ulungu yitupatula pundu ndo ku Koshe. Tangwa likwo yituheta ku Rotese, katu ku kuze yituya ku Patara. 2 Mba yituwanako ulungu uze te unazauka ni kuya ku Fwenishia, chocho yitunjilamo ni kununga wenyi. 3 Muze te hitwamona tungu lia Shipre, yitulihichika ku kwoko lia chimeso, yitwenda ndo ku Seria ni kuheta ku Teru kuze te malongolwela yikashi mu ulungu. 4 Yitufupa tumbaji, yitwawana, mba yitutwamako matangwa shimbiali. Alioze kupalikila mu spiritu, tumbaji ha yisuho yinji alwezele Paulu hanga achine kuliata mu Yerusaleme. 5 Mba muze matangwa jetu te hakumbana, yitukatuka ni kununga ni wenyi wetu. Mba ayo eswe hamwe ni mapwo ni twanuke, yatushinjikila ndo haze lia mbonge. Kashika yitusa makungunwa hashi ku sesa lia kalunga-lwiji, yitulemba. 6 Yitulishika no, yitunjila mu ulungu, o yahiluka ku zuwo.
7 Muze te hitwamanununa wenyi wa kukatuka ku Teru, yituheta ku Tolemaise. Yitumeneka mandumbu ni kutwama no tangwa limuwika. 8 Mukwachako, yituheta ku Sezarea, koko yitunjila mu zuwo lia Fwilipe mukwa-kwambujola, yoze wapwile umwe wa kuli malunga shimbiali, mba yitutwama hamwe nenyi. 9 Lunga yono kapwile ni ana awana a mapwo twamishi,* waze te akuprofeteza. 10 Muze te hitwatwamako matangwa amwe, kwakatukile ku Yundeya umwe profeta jina lienyi Angavu. 11 Iye yeza kuli yetu, yanda muya wa Paulu yalijichika ku molu ni ku moko mba yamba ngwenyi: “Spiritu yisandu yinambe ngwo, ‘che chize A-Yunda a mu Yerusaleme makajichika mwenya-muya uno ni kumukunjika kuli akwa-mavungu.’” 12 Muze twevwile yino yuma, yetu ni waze apwileho yituputuka kuliumba kuli iye hanga achine kuya ku Yerusaleme. 13 Paulu yaakumbulula ngwenyi: “Yika nunalingi ha kulila ni kweseka kuzeyesa mbunge yami? Nyingikenu ngwenu hinalilulieka, hi wika ko hanga akangukase, alioze chipwe akangushihe ku Yerusaleme mumu ha jina lia Mwene Yesu.” 14 Amu katayijile, yituhola ni kwamba ngwetu: “Chikapwe ni kulita ni upale wa Yehova.”*
15 Kulutwe lia matangwa aze, yitukasa yuma yetu ni kuya ku Yerusaleme. 16 Amwe tumbaji a mu Sezarea yaya hamwe ni yetu, yaatuhetesa ku zuwo lia Nasone wa ku tungu lia Shipre kuze te mututulila. Iye kapwile umwe wa kuli tumbaji akulu. 17 Muze twahetele ku Yerusaleme, mandumbu yatusambilila. 18 Mukwachako, Paulu yaya hamwe ni yetu maha Tiangu, ni makulwana eswe a mu chikungulwila kwe apwile. 19 Paulu yaameneka ni kwalumbunwina mu yimako-yimako yuma yize Zambi anakalingila akwa-mavungu, kupalikila mu mulimo wenyi.
20 O hakuchivwa, yaputuka kuchichimieka Zambi, mba yamba kuli iye ngwo: “Ndumbwetu, unanyingika ngwe A-Yunda anji apwa akwa-kufuliela, chikwo nawa, kakufunga Shimbi ni mbunge yo yeswe. 21 Alioze kevwa sango ngwo, wakulongesa A-Yunda eswe waze atwama mukachi ka akwa-mavungu hanga ehuke Shimbi ya Mose, wakwamba nawa ngwe, kanda nupwisa ana jenu ngalami, chipwe kukaula mianda ya tulamba two. 22 Mba yika chatamba kulinga ha chikuma chino? Mumu kwamba pundu, o manyingika ngwo hiwaheta. 23 Kashika linga yize mutukulweza: Tuli ni malunga awana waze ali ni chilakenyo chize atamba kumanununa. 24 Yako hamwe no hanga nukalipemese, ni kwakwasa ha yize mafupiwa hanga akatewule kambu ku mitwe yo. Mba atu eswe manyingika ngwo, yuma yize ambile hakutwala kuli yena hi yamwenemwene ko, alioze mamba ngwo ni yena nawa wakwononokena Shimbi ya Mose. 25 Hakutwala kuli akwa-mavungu waze hafuliela, twatuminyine mukanda ni kupatula ngwetu, katamba kwehuka yuma yize hanayilambula ku mahamba, manyinga, ni tushitu a kuhonda* ni utanji.”*
26 Mukwachako, Paulu yaya hamwe ni e malunga, yalipemesa. Chocho, yanjila mu tembele hanga ambulule matangwa waze mamanununa kulipemesa, ni matangwa waze malambula chawana hali umwe ni umwe wa kuli ayo.
27 Muze te matangwa shimbiali himamanunuka, A-Yunda a ku Azia ha kumona Paulu mu tembele, yaavundula mbunga yeswe, o yamukwata, 28 yakololoka ngwo: “Malunga A-Izalele tukwasenu! Lunga yono mwe wakulongesa atu eswe ni ku yihela yeswe yuma yize yakulimika ni vungu lietu, ni je Shimbi ja Zambi ni zuwo lino. Chikwo nawa, hananjisa A-Ngresia mu tembele ni kukisa chihela chino chisandu.” 29 Mumu chitangu o kamwene Trofwimu, Ka-Efwesu mu mbonge hamwe nenyi, chocho yanyonga ngwe Paulu kamunjisa mu tembele. 30 Mbonge yeswe yapwile ni chizungo-zungo, atu yakunguluka yakwata Paulu yamumbulumuna haze lia tembele, hazehene yaajila mapito. 31 Muze azangile kumushiha, mwata wa maswalale yatambula lusango ngwo, mbonge yeswe ya Yerusaleme hiyavunduka ni zungo. 32 Hohene, yaya hamwe ni maswalale ni tupitau, yaapalumuka fuji ndo kuze kwapwile mbunga. Muze atu amwene mwata wa maswalale ni tupitau, yecha kulamba Paulu.
33 Chocho mwata wa maswalale yakundama, yamukwata, yamba amukase ni malenge aali, mba yahula hanga anyingike nyi lunga wacho iya, ni yuma yize iye alingile. 34 Alioze, hakachi ka mbunga, amwe yakololoka achi, akwo yakololoka chikwo. Mba muze mwata wa maswalale kahashile kusa shindakenyo ha yize mbunga te anambe mumu lia vunda, yatuma kutwala Paulu mu chilombo cha maswalale. 35 Muze ahetele ha ndalo, maswalale yamuzundula mumu lia utenu wa mbunga. 36 Kwapwile mbunga yinene ya atu waze amukawile ni kukololoka ngwo: “Mushihenu!”
37 Muze te himamunjisa mu chilombo cha maswalale, Paulu yahula mwata wa maswalale ngwenyi: “Muchilita kuhanjika ni yenu?” Iye yamukumbulula ngwenyi: “Unanyingika kuhanjika limi lia Ngregu? 38 Yena hi uli Ka-Engitu ko yoze ku mashimbu amwe kunyima, wavundwile atu ni kutwala 4,000 a yingalwe mu puya nyi?” 39 Alioze Paulu yamba ngwenyi: “Ami nguli Ka-Yunda wa ku Tarsu, wa mu mbonge yilemu ya Selishia. Ngunaliumbu kuli yena, ngutayize kama nguhanjike kuli atu.” 40 Muze te hamutayiza, Paulu yamana ha ndalo yaholesa atu ni kwoko. Muze te atu hahola kuluu, Paulu yahanjika mu limi lia Hepreu ngwenyi: