Shimbi Yamuchiali

27 Mose ni makulwana a mu Izalele yalweza atu ngwo: “Ononokenu shimbi jeswe ngunanwehe musono. 2 Ha tangwa lize munuzauka Yordau hanga nuye mu chifuchi chize Yehova Zambi yenu manwaha, mikenu mawe anene-anene ni kwakwita ndambo. 3 Mba muze munuzauka Yordau, sonekenuho maliji eswe a Shimbi, hanga nunjile mu chifuchi chize Yehova Zambi yenu manwaha, chifuchi cha yamwa ni wuchi, ngwe chize Yehova Zambi yenu alakenyene kuli tulamba jenu. 4 Muze munuzauka Yordau, mawe jacho nwatamba kwamika ku Mulundu wa Epale ni kwakwita ndambo, ngwe chize ngunanulweze musono. 5 Nwatamba kutungaho nawa chilumbilo cha Yehova Zambi yenu, chilumbilo cha mawe. Kunwatambile kuchinga utale ha mawe. 6 Nwatamba kutunga chilumbilo cha Yehova Zambi yenu ni mawe a muundu ni kulambulaho milambu ya kwocha kuli Yehova Zambi yenu. 7 Nwatamba kulambula yitapo ya sambukila ni kuyilila kuzekwene. Munukawahilila kumeso ja Yehova Zambi yenu. 8 Maliji eswe a Shimbi yino, nwatamba kwasoneka kanawa ha mawe.”

9 Mba Mose ni asasendote A-Levi, yalweza atu eswe ngwo: “Yenwe A-Izalele, holenu nupanjike. Musono hinwapwa atu ja Yehova Zambi yenu. 10 Panjikenu liji lia Yehova Zambi yenu ni kukaula shimbi jenyi ni yiyulo yenyi yize ngunanwehe musono.”

11 Ha tangwa liacho, Mose yalweza atu ngwenyi: 12 “Muze munuzauka Yordau, minyachi yize yatamba kumana ku Mulundu wa Ngerizime hanga yiwahise atu yili yino: Simeone, Levi, Yunda, Yisaka, Yosefwe ni Mbenjamine. 13 Minyachi yize muyikamana ku mulundu wa Epale hanga yishinge atu yili yino: Rupene, Ngate, Ashe, Zapulone, Ndane ni Napatali. 14 A-Levi makakololoka kuli malunga eswe A-Izalele ngwo:

15 “‘Mashingiwa mutu yoze masonga hanji kuzuzulula kaponya ni kumusweka, chuma chize chapwa chizelwokeso kuli Yehova, mulimo wa kulinga ni moko a chilangaji.’ (Atu eswe makumbulula ngwo: ‘Amene!’)

16 “‘Mashingiwa mutu yoze malengulula tato hanji naye.’ (Atu eswe makumbulula ngwo: ‘Amene!’)

17 “‘Mashingiwa mutu yoze matutulula njiza ya mwenyembo wenyi.’ (Atu eswe makumbulula ngwo: ‘Amene!’)

18 “‘Mashingiwa mutu yoze matokesa kapuputa.’ (Atu eswe makumbulula ngwo: ‘Amene!’)

19 “‘Mashingiwa mutu yoze masolola katonde ha kupatwila chilambala, mwana-shiwa ni tuliwa.’ (Atu eswe makumbulula ngwo: ‘Amene!’)

20 “‘Mashingiwa mutu yoze mapomba ni pwo lia tato, mumu iye malelesa tato.’ (Atu eswe makumbulula ngwo: ‘Amene!’)

21 “‘Mashingiwa mutu yoze malipomba ni kashitu.’ (Atu eswe makumbulula ngwo: ‘Amene!’)

22 “‘Mashingiwa mutu yoze malipomba ni ndumbwenyi, mwana wa tato hanji wa naye.’ (Atu eswe makumbulula ngwo: ‘Amene!’)

23 “‘Mashingiwa mutu yoze malipomba ni naye-weno.’ (Atu eswe makumbulula ngwo: ‘Amene!’)

24 “‘Mashingiwa mutu yoze majikinyina mwenyembo wenyi hanga amushihe.’ (Atu eswe makumbulula ngwo: ‘Amene!’)

25 “‘Mashingiwa mutu yoze matayiza mbongo ja kalimbalimba hanga ashihe mutu yoze keshi chitela.’ (Atu eswe makumbulula ngwo: ‘Amene!’)

26 “‘Mashingiwa mutu yoze malituna kwononokena ni kukaula maliji a Shimbi yino.’ (Atu eswe makumbulula ngwo: ‘Amene!’)