Kuli Fwilimu
1 Yami Paulu, funge mumu lia Kristu Yesu, ni ndumbwetu Timoteu, tunasonekena yena Fwilimu mukwa-milimo-ni-mukwetu, yoze twazanga chinji, 2 ni ndumbwetu wa pwo Apia, ni Arkipu swalale-ni-mukwetu mu mulimo wa Kristu, ni mandumbu waze akulikungulwila ku zuwo lie.
3 Chawana cha keke ni sambukila ya kuli Zambi, Tata yetu, ni ya Mwene Yesu Kristu, yikapwe hamwe ni yenu.
4 Mashimbu eswe nakusakwilila Zambi, muze nakukutongola mu yilemba yami, 5 mumu nakwivwa sango hakutwala ku ufulielo we ni zango lize ukwete hali Mwene Yesu, ni hali eswe waze aasakwile* kuli Zambi. 6 Nakulemba hanga ufulielo uze tukwete, ukukwase kwiwuluka yuma yeswe yipema yize tuli nayo kupalikila muli Kristu. 7 Nawahililile chinji ni kutakama ha kwivwa hakutwala ku zango lie, mumu yena ndumbwami, hiunahuzulula mbunge ya waze Zambi asakwile.
8 Kashika, chipwe ngwe muli Kristu nguli ni ulite weswe wa kukutuma kulinga chize chinalite, 9 nihindu mumu lia zango, ngunaliumbu, chipwe ngwe yami Paulu nguli kashinakaji, chikwo nawa, haliapwila nguli funge mumu lia Kristu Yesu. 10 Ngunaliumbu kuli yena, mumu lia Onesimu yoze wapwile ngwe mwanami muze napwile mu zuwo lia ususu.* 11 Ku miaka ya kunyima iye kapwile mutu wamokomoko kuli yena, alioze haliapwila, iye kali mulemu chinji kuli yena ni kuli yami. 12 Ngunamutumu cheka nawa kuli yena, mumu yami namuzanga chinji.*
13 Te ngunazange atwame kuno ni yami, akusalakane ni kungukwasa shimbu nguchili funge mumu lia sango jipema. 14 Alioze, chazangile kulinga chuma nichimwe chakuhona utayizo we, hanga chitanga che chipema kanda chikapwa cha kukuzangisa, alioze chikapwe cha ku mbunge ye. 15 Mumu hanji ha chikuma chino, iye walihandunwine ni yena ha shimbu* likehe mba te uhase kupwa nenyi ku miaka yeswe. 16 Hi ngwe ndungo ko nawa, alioze ngwe ndumbwetu wa zango, chipi-chipi kuli yami, alioze kuli yena kahiana chikolo, mu musunya ni muli Mwene. 17 Kashika, nyi wakungumona ngwe nguli sepa* lie, mutambule ni zango chizechene ngwe te mutambula yami. 18 Alioze nyi ngwe kakulingile chimwe chuma chipi hanji kakuli ni kongo, yami mungukafweta kongo liacho. 19 Yami Paulu ngunasoneka chikuma chino ni kwoko liami mwene ngwami: Mungukakufweta, alioze nyingika ngwe kongo lie kuli yami liapwa linene kuhiana. 20 Ewa ndumbwami, tayiza kama kwita chami ngwe kambaji ka Mwene, hwimisa kama mbunge yami muli Kristu.
21 Ngunafuliela ngwami, kumutayiza kwita chami. Kashika ngunakusonekena, mumu ngunanyingika ngwami, mukalinga yuma yinji kuhiana yize ngunakwichi. 22 Chikwo nawa, ungululikila zuwo kuze mungukatulila, mumu nguli ni kutalatala ngwami, makangutusula mu zuwo lia ususu kulita ni yilemba yenu, hanga ngukahiluke kuli yenu.*
23 Epafwa funge-ni-mukwetu muli Kristu Yesu, kanakumeneka, 24 hamwe ni Marku, Aristaku, Ndima ni Luka, akwa-milimo-ni-akwetu.
25 Chawana cha keke cha Mwene wetu Yesu Kristu, chipwe hamwe ni yena, mumu lia mbunge yipema yize wakusolola.