Mukanda Utangu wa Samuele

5 Muze A-Filistea atambwile Mushete wa Zambi wamwenemwene, yauchiza ku Ebenezere yautwala ku Ashedode. 2 A-Filistea yanda Mushete wa Zambi wamwenemwene, yautwala ku zuwo* lia Ndagone, yausa hakamwihi ni Ndagone. 3 Mukwachako, muze Akwa-Ashedode alawile chimenemene, yawana Ndagone halimbuka ni huma hashi kulutwe lia Mushete wa Yehova. Chocho yanda Ndagone yamufunyisa ha chihela chenyi. 4 Mukwachako nawa, muze ahindukile chimenemene, yawana nawa Ndagone halimbuka ni huma hashi kulutwe lia Mushete wa Yehova. Mutwe ni moko ja Ndagone te hiyapatuka, hiyaholokela mu chikolo, yikusala wika chipinji cha mujimba wenyi chize te chalifwa ni yishi. 5 Kashika ndo musono, asasendote ja Ndagone ni eswe waze te akunjila mu zuwo lienyi keshi kuliata ha chikuli cha chikolo cha zuwo lia Ndagone ku Ashedode.

6 Kwoko lia Yehova yililemena hali Akwa-Ashedode, yaonwona hakuneha musongo wa kutulumuka mukoko kuli Akwa-Ashedode ni mu manjiza jo akwo. 7 Muze Akwa-Ashedode hamona yize te yinalingiwa, yamba ngwo: “Mushete wa Zambi wa Izalele kuwatambile kutwama ni yetu, mumu kwoko lienyi hiliatulemena ha kulimika ni yetu, ni kulimika ni zambi yetu Ndagone.” 8 Hachino, yakungulula miata eswe ja A-Filistea, yaahula ngwo: “Yika mutuhasa kulinga ni Mushete wa Zambi wa Izalele?” Ayo yakumbulula ngwo: “Mushete wa Zambi wa Izalele autwale ku Ngata.” Chocho Mushete wa Zambi wa Izalele yautwalako.

9 Muze hatwalako Mushete, kwoko lia Yehova yiliputuka kulimika ni akwa-mbonge yacho ha kwevwisa mwongo. Iye yamwesa lamba atu a mu mbonge yacho, chize kuli twanuke ndo kuli makulwana, yakwachika musongo wa kutulumuka mukoko. 10 Chocho yatwala Mushete wa Zambi wamwenemwene ku Ekrone. Alioze, muze Mushete wa Zambi wamwenemwene waheteleko, Akwa-Ekrone yaputuka kukololoka ngwo: “Ayo kaneha Mushete wa Zambi wa Izalele kuno hanga atushihise yetu ni atu jetu!” 11 Chocho yatuma mikeji, yakungulula miata eswe ja A-Filistea ni kwamba kuli ayo ngwo: “Twalenu Mushete wa Zambi wa Izalele, uhiluke ku chihela chawo hanga yetu ni atu jetu tuchine kufwa.” Mumu woma wa kufwa walimwangine mu mbonge yeswe; kwoko lia Zambi wamwenemwene lialemene hali ayo, 12 atu waze kafwile, yakwachika musongo wa kutulumuka mukoko. Muteto wa atu a mu mbonge yiuheta mwilu.