Shimbi Yamuchiali

28 “Nyi munupanjika liji lia Yehova Zambi yenu ni kukaula shimbi jeswe jize ngunanulweze musono, Yehova Zambi yenu makanunangamisa helu lia mavungu eswe a hano hashi. 2 Yiwape yino ye munupwa nayo nyi munupanjika mashimbu eswe liji lia Yehova Zambi yenu:

3 “Makanuwahisa mu mbonge ni ku chihela cheswacho munukapwa.

4 “Makawahisa ana jenu, mbuto ja mu minda yenu, ana a yimuna jenu, ana a ngombe jenu ni ana a mapanga jenu.

5 “Makawahisa mutonga wenu ni chikashi chenu cha kulingila mbolo.

6 “Makanuwahisa mu milimo yenu yeswe.

7 “Yehova makakumba akwa-kole jenu eswe waze malimika ni yenu. Ayo meza ni kunulukukila sali limuwika, alioze machinyina ku yihela shimbiali yalisa. 8 Yehova manuwahisa, mawahisa machila jenu ni yeswe yize munulinga. Yehova Zambi yenu manuwahisa mu chifuchi chize iye manwaha. 9 Yehova manupwisa atu jenyi asandu ngwe chize alishingile, mumu nunakaula shimbi ja Yehova Zambi yenu ni kwenda mu majila jenyi. 10 Atu eswe hano hashi makanyingika ngwo, jina lia Yehova hali yenu lili, chocho ayo makanuvwila woma.

11 “Yehova makanuwahisa ni ana anji, yimuna anji ni mavu apema hanga nulime mu chifuchi chize Yehova makanwaha kulita ni chize alishingile kuli tulamba jenu. 12 Yehova makazulula malilu ngwe chize mutu akwazulula zuwo lia upite wenyi, iye manwaha vula ha shimbu lialita ni kunuwahisa ha yeswe yize munulinga. Munukahana mikuli kuli mavungu anji, alioze yenu kunuchi katambula mikuli. 13 Nyi nwanunga ni kwononokena shimbi ja Yehova Zambi yenu jize ngunanulweze musono, Yehova manunangamisa hali akwa-mavungu, ayo kechi kunukumba, iye makanusa helu hi kwishi ko. 14 Kanda nwehuka maliji eswe waze ngunanulweze musono, chipwe kuya sali lia utata chipwe lia umama ha kukaula tuzambi akwo ni kwalingila.

15 “Alioze, nyi kunwapanjikile liji lia Yehova Zambi yenu ni kukaula shimbi ni yiyulo yeswe yize ngunanulweze musono, shingo lino lieswe muliza hali yenu:

16 “Munukashingiwa mu mbonge ni ku chihela cheswacho chize munukapwa.

17 “Mitonga yenu ni yikashi ya kulingila mbolo muyikashingiwa.

18 “Ana jenu, mbuto ya mu minda yenu, ana a ngombe jenu ni ana a mapanga jenu makashingiwa.

19 “Milimo yenu yeswe muyikashingiwa.

20 “Yehova makatuma shingo, vunda ni lamba ha yuma yeswe yize munulinga, ndo muze manukuwisa kawashi-washi, mumu lia yitanga yenu yipi ni ha kumwehuka. 21 Yehova makanwasa yikola yeka ni yeka ndo muze munukakuwa mu chifuchi chize munuhinga. 22 Yehova makanumwesa lamba ni mukaka ni kachiki ni kujimba ni chivukuminya ni katana ni kusasaminya ni kuunda; munukapinda ni yuma yino yeswe ndo muze munukakuwa. 23 Malilu waze ali helu lia mitwe yenu, makapwa unengu, hashi haze nunaliate muhakapwa utale. 24 Yehova kechi kanutumina vula, alioze makanutumina fufuta ni mavu ndo muze yenu eswe munukanonga. 25 Yehova manukunjika kuli akwa-kole jenu hanga anukumbe. Yenu munukaalukukila sali limuwika, alioze munukachinyina ku yihela shimbiali. Mianangana eswe a hashi makevwa woma ha kumona ni kwivwa yuma yipi yize yalingiwa kuli yenu. 26 Mijimba yenu muyikapwa kulia cha tujila eswe a mwilu ni tushitu eswe a hano hashi, kukuchi kapwa niumwe yoze makaahuma.

27 “Yehova makatuma hali yenu, yivunda, mikoko, mbongola ni mukule, ngwe chize alingile kuli A-Engitu, yikola yize niumwe kechi kahasa kuyiwuka. 28 Yehova makanupwisa yizaluke, tupuputa ni kunuyambashanyisa. 29 Munukapuputa ha mwalwa ngwe kapuputa, kunuchi kawaha ha yeswe yize munulinga; makanumwesa lamba, makanwiya yuma, niumwe kechi kanulamwina. 30 Munukatenda pwo, alioze lunga mweka makapomba nenyi ku tachi. Munukatunga mazuwo, alioze kunuchi katwamamo. Munukatumba munda wa uva, alioze nuchi kalia mihuko yamo. 31 Ngombe jenu makaashihila kumeso jenu, alioze kunuchi kalia yifwo yo. Yimbulu jenu makeyila kumeso jenu, alioze kunuchi kalinga nichimwe. Mapanga jenu makaahana kuli akwa-kole jenu, alioze niumwe yoze makaalamwina wakuhi. 32 Ana jenu a malunga ni a mapwo makaahana kuli atu eka kumeso jenu, munukeevwila usona, alioze kunuchi kalinga nichimwe hanga nwatambule. 33 Mihuko ya mu minda yenu ni yuma yeswe yize munulima, makayilia kuli atu waze kunwanyingikine, makanumwesa lamba ni kunuvwisa yinyengo. 34 Munukazaluka mumu lia yuma yize munukamona.

35 “Yehova makanumwesa lamba ni kunwasa mahute ha makungunwa ni ku molu jenu, mahute waze keshi kuya, chize ku yiliato ndo ha mbanda-mitwe yenu. 36 Yehova mecha hanga yenu ni mwanangana yoze munusakula anuyule, anutwale ku vungu lize yenu ni tulamba jenu kunwanyingikine; kuze munukawayila tuzambi eka, tuzambi a mapaya ni a mawe. 37 Makanuvwila mwongo, makanulelesa ni kunuseha kuli atu eswe atwama kuma kuze Yehova makanutwala.

38 “Munukatumba mbuto yinji mu minda yenu, alioze munukahela yikehe, mumu makayilia kuli mapasu. 39 Munukalima munda wa uva, alioze kunuchi kanwa vinyu yamo, chipwe kuhela uva yamo, mumu makayilia kuli mavuno. 40 Mu chifuchi chenu mumukapwa mitondo yinji ya olevwe, alioze kunuchi kalikwita maji jako, mumu mihuko yeswe muyikalukumuka. 41 Munukasema ana a malunga ni a mapwo, alioze kechi katwama ni yenu, mumu makaambata ngwe funge. 42 Tututu makalia mitondo yeswe ni mihuko ya mu chifuchi chenu. 43 Yilambala waze ali mukachi kenu makanunga ni kulinangamisa hali yenu, yenu munukapwa mushi lio. 44 Ayo makanwaha mikuli, alioze yenu kunuchi kaaha mikuli. Ayo makapwa mitwe, alioze yenu munukapwa michila.

45 “Shingo lino lieswe mulikeza hali yenu, mulikanukaula ni kunuwana ndo muze munukuwa, mumu kunwapanjikile liji lia Yehova Zambi yenu ni kukaula shimbi ni yiyulo yize anulweza. 46 Shingo liacho mulinunga hali yenu ni hali munyachi wenu hanga lipwe chilayi cha mutolo ni utowezo, 47 mumu yenu nwechele kulingila Yehova Zambi yenu ni uwahililo ni chiseke, muze nwapwile ni yuma yeswe. 48 Yehova makatuma akwa-kole jenu alimike ni yenu, munukaakalakalila ni zala ni pwila ni uvu, munukahona yuma yinji. Ayo makakasa kanga ya utale ha kota jenu ndo muze makanukuwisa.

49 “Yehova makatuma vungu lize mulikakatuka kusuku hanga likanulukukile kawashi-washi ngwe pupa. Vungu lize liakuhanjika limi kunwanyingikine, 50 vungu likalu lize kulichi kalemesa kashinakaji chipwe kuvwila keke mukweze. 51 Ayo makalia ana a yimuna jenu ni mihuko ya mu chifuchi chenu ndo muze manunongesa. Kechi kanuhichikila mbuto chipwe vinyu yaha, chipwe maji a olevwe, chipwe ana a ngombe, chipwe ana a mapanga ndo muze manunongesa. 52 Ayo makanujingilika ni kunupwisa funge mu mambonge eswe a mu chifuchi chenu, ndo muze yipanga yisuku-yisuku yikolo yize nwakufuliela muyikapuzuka. Ewa, ayo makanuseleka mu mambonge eswe a mu chifuchi chize Yehova Zambi yenu manwaha. 53 Kashika, yenu munukalia ana jenu, yifwo ya ana jenu a malunga ni a mapwo waze Yehova Zambi yenu manwaha, mumu lia kunuseleka ni lamba lize akwa-kole jenu manumwesa.

54 “Chipwe lunga chimbovu, mwashi uli mukachi kenu kechi kuvwila keke ndumbwenyi, mukwo-pwo ni ana jenyi waze masala, 55 kechi kaaha yifwo ya ana jenyi yize iye makalia, mumu kukuchi kapwa nawa chimwe chuma cha kulia hamukunda wa kuseleka ni lamba lize makaamwesa kuli akwa-kole jo mu mambonge. 56 Chipwe pwo chimbovu, mwashi yoze kanda achinyonga kama kuliata hashi mumu lia umbovu, kechi kevwila keke mukwo-lunga, mwanenyi wa lunga hanji wa pwo, 57 iye kechi kaaha chingoji chize muchikatuhuka mu molu jenyi ni ana waze makasema. Iye makayilila kutenga mumu lia kuseleka ni lamba lize akwa-kole jenu makanumwesa mu mambonge jenu.

58 “Nyi kunwakawile kanawa maliji eswe a Shimbi yino, ali ha mukanda uno, nyi kunwavumbikile jina lino lilemu kole ni woma lia Yehova Zambi yenu, 59 Yehova maneha hali yenu ni ha munyachi wenu lamba lize kulishi kuhwa ni misongo yize kuyishi kuya. 60 Munukapwa ni misongo ngwe yize apwile nayo A-Engitu, misongo yize te nwakuvwila woma, misongo yacho kuyichi kaya. 61 Chikwo nawa, Yehova makaneha hali yenu musongo hanji lamba lize kulishi lia kusoneka mu mukanda wa Shimbi, ndo muze makanunongesa. 62 Chipwe ngwe nuli anji ngwe tutongonoshi a mu malilu, nihindu munukasala akehe, mumu kunwapanjikile liji lia Yehova Zambi yenu.

63 “Yehova kanakawahilila ha kunuwahisa ni kunwokesa, kashika, Yehova makawahilila nawa ha kununongesa ni kunukuwisa; makanuchiza mu chifuchi chize munuhinga.

64 “Yehova makanumwanga hakachi ka mavungu, chize ku songo limwe lia hashi ndo ku songo likwo lia hashi, kwenako munukawayila tuzambi a mapaya ni tuzambi a mawe. Tuzambi waze yenu ni tulamba jenu kunwanyingikine. 65 Yenu kunuchi kapwa ni sambukila mukachi ka mavungu wano. Yiliato yenu kuyichi kahwima. Yehova makanwaha mbunge ya kusakalala, makafuwisa meso jenu ni kunuvwisa yinyengo yinji. 66 Mwono wenu muukapwa mu ponde, munukevwa mwongo mwalwa ni ufuku, kunuchi kapwa ni shindakenyo ya kunulamwina. 67 Ha chimene, munukamba ngwenu: ‘Kachi hikwatoka kama!’ Ha ufuku munukamba ngwenu: ‘Kachi hikwapwa kama chimene!’ Mumu lia mwongo uze munukevwa ni yize meso jenu makamona. 68 Yehova makanuhilwisa ku Engitu mu ulungu mu jila yize anwambile ngwenyi: ‘Kunuchi kayimona nawa,’ yenu munukalilanjisa kuli akwa-kole jenu ngwe ndungo a mapwo ni a malunga, alioze kukuchi kapwa yoze makanulanda.”