Mukanda Wamuchiali Kuli Timoteu
3 Alioze nyingika chino ngwe, ha matangwa akusula, mukukapwa mashimbu akalu chinji. 2 Mumu atu makapwa akwa-kulizanga ene, akwa-kuzanga mbongo, akwa-kulisuta, akwa-kulinangamisa, akwa-kushililika* Zambi, keshi kwononokena yisemi jo, keshi kusakwilila, keshi kushishika, 3 keshi zango, kechi katayiza kulivwashana ni akwo, akwa-kuyenga-yenga akwo, keshi kulihumikiza, asasu, kechi kazanga yuma yipema, 4 akwa-kukunjika akwo, akwa-pami, akwa-kulizata chinji, makazanga kuheha, kechi kazanga Zambi, 5 makasoloka ngwe kakuwayila Zambi, alioze yitanga yo kuyichi kasolola ngwo kakumuwayila. Lihandunune kuli atu wano. 6 Hakachi ko hakusoloka atu waze akunjila mu mazuwo ja mapwo alelu ni kwonga, mapwo waze analemewa ni shili, akusongwela ku usolo weka ni weka, 7 akulilongesa mashimbu eswe, chipwe chocho chinyingi cha umwenemwene keshi nacho.
8 Chizechene ngwe Yane ni Yambwe alimikine ni Mose, no kananungu ni kulimika ni umwenemwene. Malunga wano, manyonga jo hanapiha kulu, Zambi hanalitunu malunga jacho, mumu hanapihisa kulu ufulielo wo. 9 Chipwe chocho, kechi kuya kusuku, mumu uhepuke wo muukasoloka zwalala kuli eswe, ngwe chize wasolokele wa Yane ni Yambwe. 10 Alioze, yena unakaula kanawa malongeso jami, yitanga yami, upale wami, ufulielo wami, kulihumikiza chami, zango liami, kunyongonona chami, 11 yihungumiona ni lamba ngwe yize namwene mu Andiakia, mu Ikoniu, ni mu Lisetra. Nanyongonwene mu yihungumiona yino, Mwene yangupulwila mu yihungumiona yacho yeswe. 12 Kwamba pundu, waze eswe mazanga kuwayila Zambi ku mwono wo, ni kulivwashana ni Kristu Yesu, no makaahungumiona. 13 Alioze, atu api ni akwa-mahuza makalinga yuma yipi chinji kuhiana, makapiangula akwo, no makaapiangula.
14 Alioze yena, nunga mu yuma yize walilongesele, yize akukwashile kufuliela, mumu unanyingika waze akulongeseleyo, 15 chikwo nawa, chize ku wanuke we unanyingika yisoneko yisandu, yize muyihasa kukwaha mana hanga akakulamwine, ha kufuliela muli Kristu Yesu. 16 Yisoneko yeswe kayisonekene ni ukwaso wa spiritu yisandu ya Zambi, yakukwasa ha kulongesa, ha kukumika, ha kululamisa yuma, ni kufumba ni ululi 17 hanga mutu wa Zambi ajame mu yuma yeswe, apwe ni yeswe yize anafupu mba alinge milimo yeswe yipema.