Mukanda Utangu Kuli A-Tesalonika

4 Kusulaho mandumbu, ngwe chizechene nwatambwile usongwelo kuli yetu hakutwala ku chize nwatamba kwenda, hanga nuvwise Zambi kuwaha, mba chino che nwakulinga, twakwita ni kuliumba kuli Mwene Yesu, hanga nununge ni kuchilinga kanawa. 2 Mumu nunanyingika usongwelo* uze twanuhele wa kuli* Mwene Yesu.

3 Mumu uno we upale wa Zambi, ngwo nupwe asandu ni kwehuka chikolo utanji.* 4 Mweswe wa kuli yenu anyingike kufunga mujimba* wenyi mwene mu usandu ni ulemu, 5 hi ni usolo upi wa kulisumbakenya ko, ni usolo wa kulisumbakenya uze kuushi kukuma ngwe akwa-mavungu waze kanyingikine Zambi. 6 Niumwe kanda alinga chuma chize kuchalitele ni kulimuna ndumbwenyi ha chikuma chino, mumu Yehova* makazangamisa eswe waze akulinga yuma yino yeswe. Chizechene ngwe twanwambulwilile kulu ni kunutoweza chikolo. 7 Mumu Zambi hanatusanyika ku usandu, hi ku luchisa ko. 8 Kashika, yoze malituna yuma yino, kechi kulituna atu, alioze malituna Zambi yoze wakunwaha spiritu yisandu.

9 Kashika, hakutwala ku zango lia undumbu, kutwafupiwile kunusonekena, mumu Zambi kakunulongesa hanga nulizange umwe ni mukwo. 10 Kwamba pundu, yino ye nwakulinga kuli mandumbu eswe, mu Masendoniya yeswe. Alioze, tunaliumbu mandumbu hanga nununge ni kuchilinga chinji kuhiana. 11 Likolwezenu kutwama ni sambukila, ni kulihulikila ha yuma ya yenu ene, ni kukilikita ni moko jenu ngwe chize twanulongesele, 12 hanga nukende ngwe chize chinalite kuli akwa-haze chakuhona kufupiwa nichimwe.

13 Chikwo nawa mandumbu, kutwazangile hanga nwalajale* hakutwala kuli waze anapombo mu ufwe, hanga nuchine kunenganyana chinji ngwe chize akulinga anji waze keshi ni kutalatala. 14 Nyi tuli ni ufulielo ngwetu, Yesu kafwile mba yamuhindwisa, tuli nawa ni ufulielo ngwetu, waze anapombo mu ufwe mukulinunga ni Yesu, Zambi makaaneha hamwe nenyi. 15 Mumu tunambe kuli yenu kulita ni liji lia Yehova* ngwetu: Yetu tuli ni mwono, waze mutukapwa ni mwono ndo ha kuheta cha Mwene, kutuchi katetekela waze hanapombo kulu mu ufwe. 16 Mumu Mwene makahulumuka mwilu ni liji lia shimbi, ni liji lia mungelo wa lutwe, ni chitavwi cha Zambi, mba atu waze afwile mukulinunga ni Kristu, makalianga kuhinduka. 17 Mba yetu waze mutukapwa ni mwono, makatupindumuna hamwe no mu malelwa hanga tukaliwane ni Mwene mwilu. Chocho mutukatwama hamwe nenyi ndo ku miaka ya mutolo. 18 Kashika, nungenu ni kulitakamisa umwe ni mukwo ni maliji wano.