MALONGESO A CHIFUKILO | ANGELO—SHINA KALI AMWENEMWENE? MUMU LIAKA CHIKUMA CHINO CHILI CHILEMU?

Umwenemwene Hakutwala Kuli Angelo

Unazange kunyingika umwenemwene hakutwala kuli angelo? Ayo aya? Kulihi akatukile? Nawa yika ayo akulinga? Kukushi nikumwe kuze muhasa kuwana kumbululo lipema kuhiana mu Liji lia Zambi, Mbimbiliya. (2 Timoteu 3:16) Yika Mbimbiliya yinatulweze?

Chizechene ngwe Zambi ali Spiritu, ni angelo no kali spiritu waze “keshi musunya ni yifwaha.” Angelo ashishika katwama mu malilu, nawa kakumona Zambi.—Luka 24:39; Mateu 18:10; Yoano 4:24.
Ha mashimbu amwe kunyima, angelo te kakulialumuna atu hanga alinge milimo yize Zambi te akwaaha hano hashi, mba hakuhwisa mulimo wacho, te kakulialumuna nawa ni kupwa angelo.—Akwa Kuyula 6:11-23; 13:15-20.
Chipwe ngwe angelo kakwaasolola mu Mbimbiliya ngwe malunga nawa kanji-kanji te kakulialumuna ngwe malunga, alioze ayo hi malunga ko hanji mapwo. Ayo keshi kulimbata hanga aseme. Angelo kakaatangile ngwe atu, hanga asemuke ngwe ana akemba, apwe akweze, mba hi mapwa makulwana. Yehova mwe watangile angelo; kashika Mbimbiliya yakwaatongola ngwo “ana a Zambi.”—Yombi 1:6; Samu 148:2, 5.
Mbimbiliya yinambe hakutwala ku “malimi ja atu ni ja angelo,” chino chinasolola ngwo ayo kakwete limi lize akuhanji. Chipwe ngwe Zambi te kakuzachisa angelo hanga ahanjike ni atu, iye keshi kutwecha hanga twaawayile hanji tulembe kuli ayo.—1 A-Korindu 13:1; Usolwelo 22:8, 9.
Kuli chihuji cha yihuji ya angelo, che kwamba, kanunu a tununu.a—Daniele 7:10; Usolwelo 5:11.
Angelo kali “akwa ndundo”—kakwete tachi jinji kuhiana atu, nawa kakwete mana anji. Ayo mahasa kuhumuka fuji, kukatuka mu malilu ndo hashi.—Samu 103:20; Daniele 9:20-23.
Chipwe ngwe ayo kakwete mana ni ndundo jinji, alioze kuli yimwe yize angelo keshi kuhasa kulinga, nawa kuli yimwe yize kanyingikine.—Mateu 24:36; 1 Petulu 1:12.
Angelo no kaatangile ni ndako ja uzambi ni utuswilo wa kusakula chipi ni chipema. Kashika, chizechene ngwe atu, ayo mahasa kusakula kulinga yuma yipema hanji yipi. Alioze, angelo amwe yasakula kulimika ni Zambi.—Yundase 6.

a Chihuji chili 10,000. Chihuji chimuwika chili 100 wa kanunu wa tununu. Chipwe chocho, mukanda wa Usolwelo unahanjika hakutwala ku “chihuji cha yihuji” ya angelo. Mahasa kupwa kulakaji a tununu, hanji 100.000.000.000 a yitangiwa ya spiritu!

Yizavu Yingahi Ya Angelo Yatwamako?

Mungelo wa lutwe, Mikele kali mwata wa angelo, kali ni ndundo jinji nawa ni chiyulo hali angelo akwo. Yisoneko yinasolola ngwo, Mikele lili jina likwo lia Yesu Kristu.—1 A-Tesalonika 4:16; Yundase 9.

A-Serafime: ayo kahiana chinji angelo akwo ha yiteli ni ulemu uze akwete, nawa kakujingilika ngunja ya Yehova.—Izaia 6:1-3.

A-Kerupimi: ayo no kakwete ulemu unji nawa kakufunga yiteli yilemu yize yinatale ha uhenya wa Zambi, Mukwa-Ndundo-Jeswe. Kanji-kanji ayo kakwaasolola kulutwe lia Zambi.—Uputukilo 3:24; Ezekiele 9:3; 11:22.

Yihunji yikwo ya angelo: kakukalakala ngwe tunganda Alemu Chinji hakulinga upale wa Zambi.b—A-Hepreu 1:7, 14.

b Mba unyingike nawa sango jikwo hakutwala kuli angelo, tala kapitulu 10 wa mukanda Yika Chamwenemwene Mbimbiliya Yakulongesa? ni ha apendice ha chikuma chinambe ngwo, “Mikele Mungelo wa Lutwe Iya?” wakufwambwisa kuli Yela ja Yehova. Uli nawa ha www.jw.org.