Mukanda Utangu wa Samuele
6 Mushete wa Yehova watwamine mu chifuchi cha A-Filistea ha tukweji shimbiali. 2 A-Filistea yasanyika asasendote ni akwa-kutaha ngombo, yaahula ngwo: “Yika mutulinga ni Mushete wa Yehova? Tulwezenu chize mutuhasa kuuhilwisa kuze wapwile.” 3 Ayo yakumbulula ngwo: “Muze munutuma Mushete wa Usendo wa Yehova, Zambi wa Izalele, kanda nuuhilwisa mokomoko. Nwatamba kuuhilwisa ni mulambu wa uhie mba manuuka. Chikwo nawa, mununyingika mumu liaka anumwesa lamba.” 4 A-Filistea yahula ngwo: “Mulambu uka wa uhie uze mutuhasa kutuma?” Ayo yakumbulula ngwo: “Mikoko yitano ya oru ni tumbi atano a oru kulita ni unji wa miata ja A-Filistea, mumu musongo umuwika wanukwata yenu eswe ni miata jenu. 5 Lingenu tuponya a mikoko ni tuponya a tumbi waze anapihisa chifuchi, lemesenu Zambi wa Izalele. Hanji iye mecha kunumwesa lamba, yenu ni kazambi kenu ni chifuchi chenu. 6 Mumu liaka munukalisa mbunge ngwe chize alingile A-Engitu ni Falau? Muze Zambi aamwesene lamba linji, mba ayo yatusula A-Izalele aye kwo. 7 Haliapwila, luliekenu temba liaha ni ngombe aali a yihwo waze ali ni ana, waze kanda achakasa kama kanga, nwakase ku temba, alioze ana-ngombe nwahilwise mu tanga. 8 Andenu Mushete wa Yehova nuuse mu temba, mba nwande tuponya a oru waze munumutumina ngwe mulambu wa uhie, nwase mu mushete ukwo nuutumbike sali lia Mushete wa Zambi, mba nuutume. 9 Nutale nyi muukanduka ku jila yize yinayi ku Mbete-Shemeshe ku chifuchi chawo, mba mutunyingika ngwetu iye mwe watumwesa lamba lieswe ali. Alioze nyi ka, mutunyingika ngwetu hi iye ko watumwesa lamba, alioze lialijila liene.”
10 A-Filistea yalinga chocho. Yanda ngombe aali waze te ali ni ana yaakasa ku temba, yanda ana yaasa mu tanga. 11 Mba yasa Mushete wa Yehova mu temba, yasa nawa mushete muze te muli tumbi a oru ni tuponya a mikoko. 12 Ngombe yatalikisa ku jila yize te yinayi ku Mbete-Shemeshe. Yanunga mu jila yacho ni kuteta, kayile ku kwoko lia utata chipwe lia umama. Ha mashimbu jacho, miata ja A-Filistea te kanakaula ngombe mu nyima, yaya ndo mu njiza ya chifuchi cha Mbete-Shemeshe. 13 Akwa-Mbete-Shemeshe te kanachi tiliku mu mungulunga. Muze amwene Mushete, yawahilila chinji. 14 Temba yilinjila mu munda wa Yoshua Ka-Mbete-Shemeshe yilimana hakamwihi ni liwe linene. Ayo yapatula mitondo ya temba, yawika kahia, yahana ngombe ngwe mulambu wa kulumba kuli Yehova.
15 A-Levi yachiza Mushete wa Yehova ni mushete ukwo uze te uli sali liawo, muze te muli yikwata ya oru, yayisa ha liwe linene. Ha tangwa liacho, atu aku Mbete-Shemeshe yahana milambu ya kulumba ni yitapo kuli Yehova.
16 Muze miata atano ja A-Filistea achimwene, yahiluka ku Ekrone tangwa lizeliene. 17 Mikoko ya oru yize A-Filistea atumine kuli Yehova ngwe mulambu wa uhie, yapwile: Umuwika wa Ashedode, umuwika wa Ngaza, umuwika wa Asekalone, umuwika wa Ngata, umuwika wa Ekrone. 18 Unji wa tumbi a oru te unalite ni unji wa mambonge ja A-Filistea waze miata atano te akuyula, mambonge waze apwile mu yipanga ni waze te keshi mu yipanga.
Liwe linene haze atumbikile Mushete wa Yehova lili mu munda wa Yoshua Ka-Mbete-Shemeshe, ngwe chela ndo musono. 19 Alioze Zambi yashiha atu ku Mbete-Shemeshe mumu katalile Mushete wa Yehova. Yashiha hakachi ko 50,070, atu yaputuka kulila mumu Yehova kashihile atu anji. 20 Akwa-Mbete-Shemeshe yahula ngwo: “Iya mahasa kumana kumeso ja Yehova, Zambi yono musandu? Muchipema nyi makatuka kuli yetu hanga aye kuli atu eka.” 21 Yatuma mikeji kuli A-Kiriate-Yerimi ngwo: “A-Filistea kahilwisa Mushete wa Yehova. Tweyenu nuwande.”