Chize Muhasa Kuzachisa Mashimbu je ni Mana

Chikuma 1: Sako Yuma mu Yihela Yalita

Sako Yuma yili ni ulemu mu chihela chitangu. Mbimbiliya yakutukolweza ngwo: “Nukase shindakenyo ha yuma yahiana ulemu” (A-Fwilipu 1:10) Soneka yuma yize yili ni ulemu ni yize yinafupiwa kuyilinga kawashi. Ha kulinga chino, iwuluka ngwe yuma yimwe yili ni ulemu kuyilinga ngwe kuya ni kulanda ku chitanda, alioze kuyishi kufupiwa kuyilinga kawashi. Chikwo nawa, yuma yize yakusoloka ngwe yinafupiwa ni kawashi ngwe kutala yimwe programa wakuzanga chinji ha TV, hanji kuyishi ni ulemu.a

Nyonga kulutwe. Mukanda wa Chilumbununyi 10:10, unambe ngwo: “Nyi njimbu kuyambukile ni kazangile kuyihela chatamba kuweza tachi alioze mana makwasa mutu kukumba.” Yika versu yino yinatulongesa? Ngwe chize akuhela njimbu hanga yambuke mba ayizachise kanawa, nyonga hakutwala ku chize muzachisa mashimbu je ni mana kulutwe. Ehuka kulinga chitangu yuma yize kuyishi ulemu hanji yize yakuhwisa mashimbu ni tachi je. Muze uli ni mashimbu anji, muchilita yena kulinga chitangu mulimo uze yena watesa kulinga shimbu yeka. Ngwe chize mutu akuhela njimbu yenyi hanga alinge kanawa milimo, kunyonga kulutwe muchikukwasa kulinga milimo ye kanawa.

Ashiwisa mwono we. Lilongese kulituna kulinga yuma yize kuyishi ulemu hanji yize yakuhwisa mashimbu je. Kupwa ni yuma yinji yakulinga, kuchishi kukukwasa kuwahilila ku mwono we.

Chikuma 2: Ehuka Yuma Yize Yakulia Mashimbu Je

Kuhona kulinga yuma ha shimbu lizeliene ni kuhona kukwata yiyulo. Mbimbiliya yakwamba ngwo: “Yoze matala ku fuji kechi kukuwa mbuto; yoze matala ku malelwa kechi kucha.” (Chilumbununyi 11:4) Yika twalilongesa ha versu yino? Twalilongesa ngwetu, kuhona kulinga yuma ha shimbu lizeliene, chakwiya mashimbu jetu. Mukwa-kulima yoze wakushimbwila hanga apwe ni yuma yeswe yinafupiwa mba atumbe mbuto, keshi kutumba mbuto chipwe kucha. Chizechene nawa, nyi kutwakanyamine, mutuhasa kwecha hanga woma ututwale kukwata yiyulo yize kutwanyingikine. Hanji mutuhasa kulivwa ngwetu twatamba kupwa ni sango jeswe shimbu kanda tuchikwata yiyulo. Kwamba pundu, yiyulo yilemu yakufupiwa kuhengwola ni kunyonga kanawa. Mukanda wa Yishima 14:15, wakwamba ngwo: “Chikanyame kakutala kanawa ku kwenda chenyi.” Alioze umwenemwene uli ngwo, kanji-kanji kutushi kunyingika yize muyilingiwa ha yiyulo yize twakukwata.—Chilumbununyi 11:6.

Kuzanga kupwa mungunu. Mukanda wa Tiangu 3:17, unambe ngwo: “Mana a kwilu chitangu kapwa atoma.” Chili chipema chinji muze mutu akufupa kulinga yuma kanawa. Alioze nyi ha mashimbu amwe mututesa kulinga yuma yize kutushi kuhasa, mutuhasa kunenganyana ni kuhonga. Chakutalilaho, mutu yoze unalilongesa limi lieka, katamba kunyingika ngwenyi, ha mashimbu amwe iye mahasa kuhengesa, chikwo nawa mahasa kulilongesa ha uhenge wacho. Sali likwo, mutu yoze wakuzanga kupwa mungunu, mahasa kwivwa woma wa kuhanjika yuma yize mahengesa. Chitanga chino muchihasa kumukwika kusenya kulutwe. Kashika, chili chipema chinji kulikehesa ni kupwa ni nyonga liakulinga yuma yize mutuhasa kulinga! Mukanda wa Yishima 11:2, unambe ngwo: “Mana katwama ni akwa kulikehesa.” Kashika, akwa-kulikehesa keshi kulilemesa chinji chipwe kwivwa woma wa kuliseha muze mahengesa.

Chikuma 3: Pwako ni Nyonga Lialita ha Yize Wakulinga

Tesa Kanawa Mashimbu a Kuheha ni Mashimbu Akukalakala. “Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima.” (Chilumbununyi 4:6) Mutu yoze keshi ni nyonga lialita ha mulimo, keshi kuwahilila ha yize akuzukako. Mumu mutu wacho keshi nawa ni mashimbu ni tachi jakulinga chino. Alioze chileya, kakuzanga ‘mwoko aali a too ni kuhwima’ keshi kuzachisa kanawa mashimbu jenyi, iye kakwakisa. Mbimbiliya yakutukolweza kupwa ni nyonga lialita. Kashika hondangana kanawa ni kuwahilila ni yize muzukako ha kuhondangana che. Kuwahilila chino, “chapwa chawana cha kuli Zambi.”—Chilumbununyi 5:19.

Pomba maola alita. Mbimbiliya yakwamba ngwo: “Mungupomba, munguya tulo ni sambukila.” (Samu 4:8) Makulwana anji kakufupa kupomba maola nake ha tangwa mba apwe ni tachi ku mujimba ni kumanyonga. Tulo no, kakutukwasa ku manyonga hanga tuhase kutulika yize tunalilongesa ni kuhasa kwiwuluka. Kuhona kupomba maola alita, muchihasa kukupinjisa muze unalilongesa, chikwo nawa, muchipwa chashi mutu kulinga tupalia anji, kusa mwono wenyi mu ponde ni kupihilila kawashi.

Tesa kulinga yize muhasa. Mbimbiliya yakwamba ngwo: “Kuzangazanga naye kuchayukishile; shinaho kumona ni meso” (Chilumbununyi 6:9) Yika yino yinatulongesa? Mutu yoze uli ni mana keshi kwecha hanga yuma yize akuzange yisongwele mwono wenyi, chipi-chipi yuma yize iye keshi kuhasa kulinga. Kashika iye keshi kwecha hanga atu amwonge ni kutambula makongo chamutambwila. Alioze, iye kakulilongesa kuwahilila ni yize alinayo.

Chikuma 4: Kaula Shimbi ja Zambi

Hengwola yitanga ye. Yitanga ye, muyikukwasa hanga usakule yuma yipema yize yili ni ulemu. Nyi ngwe mwono we uli ngwe mwivi, yitanga ye te muyitondekeza kuze mwivi watamba kuya. Kashika, kupwa ni yitanga yipema, muchikukwasa kutesa kulinga yuma yize yili ni ulemu ku mwono we ni kusa tachi hanga uzachise mashimbu je ni mana. Kuli hi muhasa kuwana yitanga yacho? Atu anji kakuyiwana mu Mbimbiliya.—Yishima 2:6, 7.

Sako zango mu chihela chitangu. Mukanda wa A-Kolosu 3:14, wakwamba ngwo: “Zango lili muya ungunu uze wakununga atu.” Chili chikalu kuwahilila ni kupwa kanawa ku manyonga nyi kutushi zango, chipi-chipi mu usoko. Mutu yoze wakulengulula chikuma chino, ha kusa mulimo hanji mbongo ha chihela chitangu, kakulikokela lamba. Kwamba pundu chili chilemu, kashika Mbimbiliya yakwamba ha yisuho yinji ngwo, zango likwete ulemu unji ku mwono.—1 A-Korindu 13:1-3; 1 Yoano 4:8.

Sako mashimbu hanga utange Mbimbiliya. Geoff kapwile ni pwo, anenyi ali ni masepa waze iye te akuzanga chinji, chikwo nawa iye kapwile ni kukalakala ngwe chikwashi wa ma ndotolo. Alioze, mumu lia mulimo wenyi, iye te kakulitakana ni yuma yinji ngwe, lamba ni kufwa. Iye kapwile ni kulihula ngwenyi: “Shina mwono che watamba kupwa?” Tangwa limwe, iye yatanga yimwe mikanda ya Mbimbiliya ya Yela ja Yehova yize yinakakumbulula yihula yenyi.

Geoff yalumbununa yize alilongesele kuli mukwo-pwo ni ana jenyi, mba no yazanga chinji yize evwile. Usoko wenyi yiuputuka kulilongesa Mbimbiliya yize yaakwashille ku mwono wo, mumu haliapwila kakuzachisa mashimbu jo ni mana hanga alinge yuma yize yili ni ulemu. Kulilongesa Mbimbiliya chaakwashile kupwa ni kutalatala cha mwono wa mutolo mu chifuchi chize kuchishi lamba.—Usolwelo 21:3, 4.

Chilweza cha Geoff chinatwiwulula yize Yesu ambile ngwenyi: “Kawaha waze ananyingika ngwo, kanafupu Zambi” (Mateu 5:3) Shina muchilita kufupa mashimbu hanga unyingike kanawa Zambi? Chino muchikukwasa kuzachisa kanawa mashimbu je, chipi-chipi mwono we.