Chimwe Kulia Chaha

YENA unanyingika ai yene yika atu anatongwona hashi? Yinasoloka ngwe chiwe. Yili yitoma ngwe mbundu. Mba alioze hi chiwe ko, yili yimwe yuma ya kulia.

Te hi kwapalika kakweji umuwika chize muze A-Izalele atuhukile mu Engitu. Ayo te jili mu puya. Mu puya kulia te chikehe chilimo, kashika atu apwile ni kulisozwola ngwo: ‘Yetwe te tunazange ngwo Yehova atuchahe kwetu mu Engitu. Mu Engitu te yetwe twakupwa ni kulia cheswe chize tunafupu.’

Kashika Yehova yamba ngwenyi: ‘Yami mungunokesa kulia mwilu.’ Chenacho che Yehova anakalinga. Chimene chize chinakasuloho, A-Izalele yamona yuma ai yitoma yinaholoka mwilu, ayo yalihula umwe ni mukwo ngwo: ‘Ai yene yika?’

Mose yamba kuli ayo ngwenyi: ‘Chino chili kulia chize Yehova anwaha hanga nulie.’ Atu yaputula kuchivuluka ngwo MANAA. Te cha kuyekemena ngwe bolu ya uchi.

Mose yalweza atu ngwenyi: ‘Mutu ni mutu ndo atongone nikulita ni chize mahasa kulia.’ Chimene cheswe ayo te che akulinga. Ha kusasaminya cha mwalwa, manaa eswe waze apwile ni kusala hashi te kakusangunuka.

Mose yamba nawa ngwenyi: ‘Niumwe kanda apombesa manaa hanga akalie tangwa likwo.’ Alioze atu akwo yalengulula. Yena unanyikika yize yinakapwa ko? Chimene chize chinakasuloho, manaa waze anakatulika yaawana hapwa ni mavuno anji, nawa te kananuku vumba lipi!

Yehova kanakatuma kuli atu ngwo, ha pwoso tangwa limuwika lie te ayo mahasa kukunga manaa anji kaali keswe. Te tangwa liamuchisambano. Nawa Yehova yamba ngwo, ndo te atulike ndambu hanga akalie ha tangwa lize mulizoho, mumu iye te kechi kunokesa nichimwe ha tangwa liamuchishimbiali. Muze ayo te akutulika manaa hanga akalie ha tangwa liamuchishimbiali, te keshi kupwa ni mavuno nawa te keshi kunuka vumba lipi! Chino te chikomokeso chikwo!

Miaka yeswe yize A-Izalele anakalinga mu puya Yehova te kakwalisa manaa.