Chize ha Utuswilo mu Engitu ndo hali Mwanangana Mutangu wa Izalele

Mose yasongwela A-Izalele ha kutuhuka mu undungo mu Engitu ndo ku Mulundu wa Sinai, kuzekwene kwe Zambi ehele shimbi jenyi. Kulutwe lia matangwa, Mose yatuma 12 a malunga hanga atale chifuchi cha Kanana. Alioze 10 a kuli ayo yafuna ni lusango mupi. Chino chinakanyongesa atu hanga afune ku Engitu. Ha kuhona ufulielo, Zambi yecha A-Izalele hanga amone lamba ha kweendesa mu unji wa 40 a miaka mu puya.

Mba hi, yasakula Yoshua asongwele A-Izalele hanga anjile mu chifuchi cha Kanana. Yehova yalinga yikomokeso hanga amukwase kutambula chifuchi. Iye yamanyisa meya a Lwiji Yordau, yapuzula yipanga ya Yeriku, nawa yamanyisa mwalwa ha tangwa lieswe lia muwundu. Yikupalika miaka yisambano, mba yijitambula chifuchi kuli A-Kanana.

Kuputukila kuli Yoshua, A-Izalele kanakaayula ha 356 a miaka kuli akwa kuyula. Yetwe mutulilongesa amwe akuli ayo ngwe, Mbarake, Ngideone, Jefeta, Samasone, ni Samuele. Mututanga nawa hakutwala kuli mapwo ngwe Rahape, Debola, Jaele, Rute, Noemi, ni Ndelila. Mu Chihanda CHAMUCHITATU muli yishima yize yinakalinga 396 a miaka.