Akwa Mana a ku Ngibeone

MBONGE jinji ja mu Kanana yijililulieka hanga jase jita ni Izalele. Ayo yanyonga ngwo te mahasa kukumba. Alioze atu waze te atunga mu mbonge ya Ngibeone kakanyongene chocho. Ayo yatayiza ngwo Zambi mwe unakwasa A-Izalele, kashika ayo yalituna kwasa jita ni Zambi. Yena unanyingika yize A-Ngibeone alingile?

Ayo yalionga kupwa ngwe amwe atu waze atwama kusuku chinji. Amwe a kuli malunga jacho yazala mazalo asuwika ni hako jize te hijafwa. Ayo yanda nawa jimwe njeke jikulu ni jimwe mbolo jikulu. Mba ayo yijiya kuli Yoshua, yijamba kuli iye ngwo: ‘Yetwe tunakatuka ku chifuchi chisuku chinji, mumu yetwe hitwevwa hakutwala kuli Zambi yenu munene, mwe Yehova. Yetwe twevwa yuma yeswe yize iye halinga hali yenwe mu Engitu. Kashika miata jetu yatwamba ngwo andenu kulia hanga nulinge wenyi, hanga tunulweze ngwo: “Yetwe tuli ngamba jenu. Tulakenyenu ngwo yenwe nuchi kasa jita ni yetwe.” Yenwe munuhasa kumona mazalo jetu chize afwa ha mukunda wa wenyi, ni mbolo jetu chize hijoma chau nawa chize hi jakwachika mbundu.

Yoshua ni makulwana akwo yatayiza maliji a A-Ngibeone. Chocho ayo yaalakenya ngwo kechi kuliasa noo jita. Mba muze kwapalikile matangwa atatu A-Izalele yanyingika ngwo A-Ngibeone te katwama hakamwihi.

Yoshua yaahula ngwenyi: ‘Mumu liaka nunakatwonga ngwo yenwe ku chifuchi chisuku nunakatuka?’

A-Ngibeone yakumbulula ngwo: ‘Yetwe tunakalinga chocho mumu yetwe tunanyingika ngwo Zambi yenu Yehova hananulakenya kunwaha chifuchi chino cheswe cha Kanana. Kashika yetwe yitwiva woma unji ngwo yenwe te munutushaha.’ Ha chino A-Izalele yalikwachilila ku chilakenyo cho, hi ayo kakashahile A-Ngibeone. Alioze ayo yaatenga ngwe ngamba jo.

Mwanangana wa Yerusaleme yevwa uli unji, ha mukunda wa usendo wa ukulungunga uze A-Ngibeone anakalinga ni Izalele. Kashika iye yamba kuli mianangana akwo awana ngwenyi: ‘Tweyenu hanga nungukwase kwasa jita ni A-Ngibeone.’ Chino che alingile mianangana wano atano. Mianangana wano yeza ni kwasa jita ni A-Ngibeone ha mukunda wa usendo wa ukulungunga uze ayo alingile ni Izalele. Shina A-Ngibeone kanakapwa ni mana ha kulinga usendo wacho? Tutalenu.