Tangwa Yilimana Ki

TALA kuli Yoshua. Iye kanambe ngwenyi: ‘Tangwa, mana ki!’ Ni lie tangwa yilimana lume ki. Yilimana hamuchima ki ha tangwa lieswe lia muwundu. Yehova mwe wachilingile! Mba alioze tutalenu mumu liaka Yoshua te anazange ngwo tangwa limane.

Muze mianangana api atano a mu chifuchi cha Kanana aputukile kwasa jita ni A-Ngibeone, A-Ngibeone yatuma umwe lunga kuli Yoshua hanga ete ukwaso. Iye yamba ngwenyi: ‘Tweya kawashi kuli yetwe! Hanga utulamwine! Mianangana eswe a mu chifuchi heza hanga ase jita ni ngamba je.’

Yoshua yaya lume ni maswalale jenyi eswe. Yenda ufuku weswe. Muze ayo ahetele ku Ngibeone, maswalale ja mianangana atano yevwa woma unji yachina. Mba hi Yehova yanokesa mawe anene-anene hali ayo, mawe jacho kanakashaha maswalale anji, kuhianyisa waze ashahile kuli maswalale ja Yoshua.

Hi Yoshua yamona ngwo tangwa te linayi ni kutoka. Mukupwa ufuku chocho te maswalale ja mianangana api atano mahasa te kuchina. Kashika Yoshua yalemba kuli Yehova ngwenyi: ‘Tangwa, limane ki!’ Muze tangwa liamanyine, mba A-Izalele yahasa kukumba jita yacho.

Alioze te kuli nawa mianangana akwo api anji waze te akwivwila atu ja Zambi kole. Yoshua ni chilombo chenyi kanakalinga unji wa miaka yisambano mba yakumba 31 a mianangana a mu chifuchi chacho. Muze jita yinakahwa, Yoshua yakaula kanawa maliji akutetela chifuchi cha Kanana kuli minyachi ya Izalele.

Kunakapalika miaka yinji, mba Yoshua yafwa ni 110 a miaka. Muze iye ni masepa jenyi te achili ni mwono, atu te kakwononokena kuli Yehova. Alioze muze malunga wano apema afwile, atu yaputuka kulinga yuma yipi ni kulinjisa mu kapalia. Ha mashimbu jacho ayo te kakufupa ukwaso wa Zambi.