Yika Ngulinga nyi Mangusosomba ku Shikola?

MUMU LIAKA CHINO CHILI CHILEMU

Kukumbulula che muchihasa kuwahisa yuma—hanji kuyipihisa.

**YIKA WATAMBA KULINGA?**

Achinyonga ha chino: Tomas kazangile kuya ku shikola musono. Chipwe hamene. Chekwamba, halitwamina kuya ku shikola. Yeswe ayi yaputukile tukweji atatu kunyima muze masepa jenyi a ku shikola amwangine sango jipi hakutwala kuli iye. Mba yaputuka kumwaha majina a kumwihia no. Ha mashimbu amwe, umwe malamba ha mikanda ya Tomas hanga yiholoke ni kulinga ngwe nichimwe kuchalingiwile, hanji umwe meza kunyima lienyi ni kumununguna, mba muze Tomas matala kunyima, kechi kuhasa kumona yoze wamununguna. Zau, Tomas kamusosombanga chinji muze atambulanga sango ja kumwihia mu telefone . . .

Nyi yena uli Tomas, kuchi te mulinga?

CHITANGU NYONGA!

Ni yena tachi uli najo! Kwamba pundu, muhasa kulimika ni mutu makusosomba chakuhona kulilamba nenyi. Kuchi muhasa kuchilinga?

KANDA UKUMBULULA. Mbimbiliya yinambe ngwo: “Chihepuke kakulusula utenu wenyi weswe; alioze mukwa mana maukokolola nikuuholesa.” (Yishima 29:11) Nyi mulihulika chinji chakuhona kusolola utenu we, yeswe akukwamba muyipwa yangwanza.
KANDA UFWETESA UPI HA UPI. Mbimbiliya yinambe ngwo: “Kanda nufwetesa niumwe yipi ha yipi.” (A-Roma 12:17) Kufwetesa yipi ha yipi kuchishi kuhwisa milonga alioze chakuwezela nawa milonga.
KANDA ULIKOKELA MILONGA. Mbimbiliya yinambe ngwo: “Chikanyame malangikiza ye yipi maswama.” (Yishima 22:3) Ehuka kulikata ni atu waze mahasa kukupinjisa, nawa ehuka yihela yize yili ni atu waze akuzanga kusosomba akwo.
ESEKA KUHANA KUMBULULO LIA VUMBI. Mbimbiliya yinambe ngwo: “Kumbululo lia vumbi kuliakuchinda ufwatulo.” (Yishima 15:1) Muhasa kuseha nyi muchilita. Chakutalilaho, nyi umwe mutu makwamba ngwenyi, uli munene chinji, muhasa kukumbulula ngwe, “munguzomboka hanga ngukehe ndambu!”
YAKO KWE. Nora wa miaka 19 yamba ngwenyi: “Kuhola muchisolola ngwo uli ni mana nawa hiwakola kuhiana mutu yoze unakusosomba. Chino chakusolola nawa ngwo wakulihumikiza kuhiana waze akukusosomba.”—2 Timoteu 2:24.
KANDA USOLOLA NGWE WOMA UNEVU. Akwa-kusosomba ha mashimbu amwe mahasa kunyingika mutu yoze wakwivwa woma, wakuhona kulisunga muze anamusosomba. Alioze, akwa-kusosomba anji akwivwa woma nyi amona ngwo yena kuushi kwapala.
LWEZA UMWE MUTU. Umwe mutu yoze wapwile longeshi yamba ngwenyi: “Te nakutoweza mutu yoze anasosomba hanga ambulule. Chino che chipema kulinga, hanga akwa-kusosomba ahone kusosomba nawa akwo.”

Umwe mukweze kanalimika ni waze anamusosomba ni hamu lieswe — Kulihumikiza muchikukwasa kupwa ni hamu lize akwa-kusosomba keshi nalio

**YIHULA HA KUTWALA KU KUSOSOMBA**
CHAMWENEMWENE NYI MAHUZA	KUMBULULO
1 Kusosomba chili chako cha ku miaka ya kunyima.	1 Umwenemwene. Chakutalilaho, Mbimbiliya yinahanjika hakutwala kuli Yindululu te alumbunuka ngwo “waze a kulimbula akwo.”—⁠Uputukilo 6:4.
2 Kusosomba chili wika kuheha. Hi chipiko.	2 Mahuza. Akwa-kusosomba kali ni tachi jinji kuhiana mutu yoze anasosomba, kashika, kweseka kufwetesa kuchishi ni ulemu.
3 Jila yipema yakuhwishilamo kusosomba yili kuhilwisa upi ku upi.	3 Mahuza. Akwa-kusosomba kali ni tachi jinji kuhiana mutu yoze anasosomba, kashika, kweseka kufwetesa kuchishi ni ulemu.
4 Nyi kanakusosomba chili chipema kulengulula.	4 Mahuza. Kukushi mutu niumwe yoze wakuhola kulu ha kumwihia. Nyi wahola kulu muze anakusosomba, muchihasa kupwa chashi kuli ayo anunge ni kukusosomba.
5 Kakwete wika kanwa, alioze kanji-kanji ayo keshi tachi.	5 Umwenemwene. Chipwe ngwe amwe kali yitatuke, alioze keshi ni tachi jinji, ayo kakuzanga kuzomba akwo hanga alivwise ene kuwaha.
6 Akwa-kusosomba mahasa kwalumuka.	6 Umwenemwene. Ni ukwaso, akwa-kusosomba mahasa kwalumuka.