Katalilo Wakulilongesa Mbimbiliya Ni Eswe

Yela ja Yehova kanyingika kanawa ha mukunda wa mulimo wo wa kwambujola sango lipema. Shina unanyingika ngwo tukwete katalilo wa kulongesa atu Mbimbiliya hashi heswe?

Ha mwaka 2014, unji wa 8,000,000 a Yela ja Yehova a mu yifuchi 240, kalongesanga Mbimbiliya kuli atu 9,500,000 hita kakweji.a Kwamba umwenemwene, atu waze alilongesanga Mbimbiliya, kahetanga mu unji wa yifuchi 140!

Mba ahase kulinga kanawa mulimo wo wa kulongesa, Yela ja Yehova kakufwambwisa Mbimbiliya, mikanda, tuposhi ni mikanda yikwo yinji ha miaka yeswe, mu unji wa 700 a malimi! Kufwambwisa chino cha mikanda chakukwasa atu kulilongesa Mbimbiliya mu malimi waze ayo ene anazange.

KUMBULULO LIA YIHULA YIZE ATU AKUHULA CHINJI HAKUTWALA KU KATALILO WETU WA LONGESO LIA MBIMBLIYA

Kuchi longeso lia Mbimbiliya akulilinga?

Twakusakula malongeso a Mbimbiliya ni kuhengula versu jize jinakwase yikuma yacho. Chakutaliloho, Mbimbiliya ya kumbulula yihula ngwe ai: Zambi iya? Kuchi iye apwa? Shina kakwete jina? Kuli iye atwama? Shina mutuhasa kukundama kuli iye? Ukalu uli hakunyingika haze hali kumbululo liacho mu Mbimbiliya.

Mba tukwase atu awane kumbululo, twakuzachisa mukanda wa mafwo 224, uze uli ni mutwe, Yika Chamwenemwene Mbimbiliya Yakulongesa?b Mukanda uno kaululiekele hanga ukwase atu kunyingika malongeso atangu amu Mbimbiliya. Muli malongeso hakutwala kuli Zambi, Yesu Kristu, lamba lia atu, uhindukilo, kulemba, ni malongeso akwo nawa anji.

Shimbu lika ni kulihi muhasa kulilongesela?

Longeso lia Mbimbiliya mulihasa kupwa ha shimbu ni chihela chize yena unazange.

Mashimbu angahi longeso lia kulinga?

Atu anji hanatesa kulilongesa Mbimbiliya ha ola yimuwika hanji hita poso jeswe. Alioze mashimbu akulilongesa mahasa kulita ni uhashi uze mutu alinawo. Yetu mutukulongesa nikulita ni katalilo we. Malongeso amwe mahasa kulinga minutu 10 hanji 15 ha poso jeswe.

Mbongo jingahi jakufwika longeso lia Mbimbiliya?

Longeso ni mikanda ya kulilongesa nayo yili yawana. Chino chinalita ni yize Yesu ambile ngwo: ‘Hinunatambula yawana, hanenu yawana.’​—Mateu 10:8.

Mashimbu angahi longeso lia Mbimbiliya liakulinga?

Mashimbu a longeso kakulita chinji ni katalilo yoze mutu alinenyi. Mukanda Yika Chamwenemwene Mbimbiliya Yakulongesa? Uli ni tupitulu 19. Yena muhasa kuhwisa hanji eswe nikulita ni katalilo we.

Shina natamba kupwa Chela cha Yehova?

Ka. Yetu tunanyingika ni vumbi lieswe ngwo mutu mweswe kali ni ulite wa kusakula mwene yize atamba kufuliela. Atu akupwa ni chinyingi ha malongeso atangu a Mbimbiliya, mahasa kusakula yize anazange.

Kulihi munguhasa kuwana nawa sango jikwo?

Site jw.org muli sango jipema hakutwala ku ufulielo ni milimo ya Yela ja Yehova.

Kuchi munguhasa kwita longeso lia Mbimbiliya?

• Eta ha internet mu www.jw.org.

• Soneka chihela watwama ha yize yinasoloka ha lifwo 2 lia kaposhi yono.

• Fupa Yela ja Yehova waze atwama hakamwihi ni yena. Muhasa kufupa “Yela ja Yehova” ha kuzachisa numeru ja telefone jize jili ha katalilo wa kuze watwama jili ha kaposhi yono.