YIYULO YA MANA YIZE MUYIHASA KUTUKWASA MUSONO
Kanda Nulipikala
SHIMBI YA MBIMBILIYA: “Kanda nulipikala ha mwono wenu.”—Mateu 6:25.
Yika shimbi yino yinalumbunuka? Yesu kahanjikile maliji wano ha Longeso lienyi lia ku Mulundu. Kulita ni umwe dicionário wa Mbimbiliya maliji “kanda nulipikala” mahasa kulumbunuka “chuma chize mutu mahasa kwivwa ha mukunda wa uswale, zala ni yuma yikwo yize yakulingiwa ha tangwa ni tangwa.” Kulipikala, kanji-kanji muchihasa kulumbunuka kulihulumba ni yuma yize muyihasa kulingiwa kulutwe lia matangwa. Alioze hi chipiko kulipikala ni yuma ya ku musunya hanji kuzanga hanga asoko jetu atwame kawape. (A-Fwilipu 2:20) Kashika muze Yesu ambile ngwenyi: “Kanda nulipikala” iye te kanalweze tumbaji twenyi hanga ehuke kulipikala chinji, hanji kwivwa woma unji wa yuma yize muyiza hamene, yize muyihasa kutuchiza chiseke cha kutwama ni mwono musono.—Mateu 6:31, 34.
Shina shimbi yacho yili ni ulemu musono? Mutupwa akwa-mana nyi twakaula chiyulo cha Yesu. Mumu liaka? Akwa-kuhengula amwe kanambe ngwo muze atu akulipikala chinji, manyonga jo kakupinda chinji, nawa “chino chakuneha yikola yinji ngwe yilonda ku lufu, yikola ya ku mbunge, ni asma.”
Yesu kasolwele chitela cha kwehuka kulipikala: Kulipikila chili chuma changwaza. Aye yahula ngwenyi: “Iya wa kuli yenu ha kulipikala mahasa kuweza mbandu yimuwika ku chizundamo chenyi?” (Mateu 6:27) Kulihulikila ha yipikalo yetu kuchichi kwokesa matangwa ku mwono wetu ni he hamwe. Alioze, kanji-kanji yuma kuyishi kwenda ngwe chize twakunyonga. Umwe mukwa-mana yamba ngwenyi: “Kulihulumba hakutwala ku matangwa a kulutwe chili kuhwisa tachi chakamokomoko, kanji-kanji yuma yakupema chinji ku akulutwe lia matangwa kuhiana chize twayikunyonga.”
Kuchi mutuhasa kwehuka kulipikala? Chitangu, kujikijila kuli Zambi. Nyi Zambi kakuhana kulia kuli tujila ni kuzalisa yitemo yipema, shina kechi kuhasa kuhana yize yakufupiwa kuli atu waze akusa uwayilo wenyi kulutwe ku mwono wo? (Mateu 6:25, 26, 28-30) Chamuchiali, twama hita tangwa. Yesu kambile ngwenyi: “Kanda nulipikala ha tangwa lia hamene. Mumu tangwa lia hamene ni yipikalo yalio.” Shina kuwatayijile kama ngwo “yipi ya tangwa lieswe muyilita ni lie tangwa?”—Mateu 6:34.
Nyi twakaula shimbi ya Yesu, mutulifunga ko yikola yinji yipi. Kuhiana yino, mutupwa ni uhuzululo mu mbunge uze Mbimbiliya yakuvuluka ngwo “sambukila ya Zambi.”—A-Fwilipu 4:6, 7.