MITWE YA KULILONGESA | MALONGESO A CHIFUKILO
Yipikalo Yili Kwe Kweswe!
“Nayile ni kulanda kulia, alioze yinguwana wika kulia cha utekwatekwa chize nawa chapwile ni ndando yinji. Tangwa lize liasuliloho, kulia cheswe yichihwa mu yitanda.”—Paulu, Zimbabwe.
Lunga liami yangusanyika ni kungulweka ngwenyi, kumatuhichika. Chanyingikine chize te mungulinga. Kuchi mba te munguhasa kulela ana?—Janete, Estados Unidos.
“Muze alarme te yinatete ami yinguputuka kuchina nawa yingufulamana hashi muze mbomba te jinatuwika. Ha maola amwe, moko jami yaputuka kuchikima.”—Alona, Israel.
Ha matangwa wano tuli, kali a yipikalo, chipwe ngwetu “miaka yikalu.” (2 Timoteu 3:1) Atu anji kanamono lamba hamukunda wa kuhona mbongo, kufwa cha usoko, jita, misongo yipi ni ponde jakulijila jene hanji jize akulikokela atu ene. Kuli nawa yuma yize atu akuzakalala nayo hakulihula yihula ngwe yino: ‘Shina musongo ngulinawo uli cancer nyi?’ ‘Ajikulu jami makakolela ha mashimbu amutapu uka?’
Kulipikala cheswe hi chipi ko. Kanji-kanji, twakuzakalala ku mbunge muze tunalinga yeseko ku shikola hanji hakufupa milimo. Nawa kulipikala ha chimwe chuma chipi muchihasa kutukwasa kwehuka ponde. Alioze chili chipi kulipikala chinji hanji matangwa eswe. Yuma ahengwojola kuli makulwana 68,000 yasolola ngwo kulipikala chakulingisa mutu afwe kawashi. Yeyize kuma Yesu wahulile ngwenyi: “Iya wa kuli yenu ha kulipikala mahasa kuweza mbandu yimuwika ku chizundamo chenyi?” Ewa, kulipikala kuchishi kwokesa matangwa a mutu. Mba Yesu yatoweza ngwenyi: “Kanda nulipikala ha mwono wenu.” (Mateu 6:25, 27) Kuchi mutuhasa kulinga chino?
Mutuhasa kulinga chino hakupwa ni mana, ni kufuliela muli Zambi, ni kupwa ni kutalatala chikolo ha yuma yipema yize muyiza kulutwe. Chipwe ngwe haliapwila kutushi ni kapinda niumwe, nihindu kulutwe mutuhasa kupwa nenyi. Kashika tutalenu yize yakwashile Paulu, Janete, ni Alona hanga alimike ni yipikalo yo.