Yehova Kakulemesa “Amene” We

YEHOVA kakulemesa uwayilo wetu. Iye ‘kakupanjika ni kwivwa’ tuvumbi twenyi, nawa kakulemesa hita chuma mutulinga hanga tumuwayile, chipwe ngwe muchipwa chikehe. (Mala. 3:16) Chakutalilaho, tutalenu limwe liji lize twakwamba ha yisuho yinji. Liji liacho lili “Amene.” Shina Yehova kakulemesa liji liacho chipwe ngwe liapwa likehe? Ewa, kakulilemesa! Mba tunyingike mumu liaka, tutalenu yize liji liacho linalumbunuka ni chize akulizachisa mu Mbimbiliya.

‘ATU ESWE ATAYIZE NGWO, AMENE’

Mu Chokwe liji “amene” linalumbunuka “ewa,” hanji “chochene.” Liji lino linakatuka ku limi lia Hepreu lize linalumbunuka ngwo “kushishika,” ni “ujikijilo.” Atu kapwile ni kulizachisa chinji mu usopeselo. Muze mutu malishinga kulinga chimwe, te kakwamba “amene” hanga asolole ngwo, yize amba yili yamwenemwene nawa ngwo, yeswayo muyilingiwako iye mayitayiza. (Kwa. 5:22) Muze iye mamba “amene” ha mbunga, chino muchimukolweza hanga afunge chilakenyo chenyi.—Nehe. 5:13.

Chilweza chimwe chize anazachisa chinji liji “amene” chili ha mukanda wa Shimbi Yamuchiali 27. Muze A-Izalele anjilile mu Chifuchi cha Chilakenyo, ayo eswe yalikungulwila ha Mulundu wa Epale ni ha Mulundu wa Ngerizime hanga apanjike Shimbi yize te anatange. Ayo kakapwileho wika hanga apanjike, alioze hanga asolole ngwo katayijile Shimbi yacho. Ayo kachisolwele ha kwamba ngwo, “Amene!” muze te anatange yuma yipi yize te A-Izalele akulinga. (Shimbi 27:15-26) Achinyonga zungo lia tununu a tununu a malunga, mapwo ni twanuke anakololoka hakuhana kumbululo lio! (Yoshu. 8:30-35) Kwamba pundu, ayo kakavulamine maliji waze ahanjikile ha tangwa liacho. Nawa A-Izalele jacho yafunga maliji jo ha kwasoneka ngwo: “A-Izalele alingilile Yehova matangwa eswe a Yoshua, ni matangwa eswe a makulwana aze atwamine ni mwono muze Yoshua hafwa, te waze anyingikine yitanga yize yeswe Yehova alingile hali A-Izalele.”—Yoshu. 24:31.

Yesu neye kazachishile liji “amene” hanga ashindakenye umwenemwene wa yize ambile, alioze iye kachilingile mu mutapu walipwila. Shimbu alizachise hanga akumbulule yimwe, iye kazachishile liji “amene” (analumbununa mu Chokwe ngwo “pundu”) hanga asolole umwenemwene wa yize iye te anambe. Ha mashimbu amwe, iye te kakufunyina liji, hakwamba ngwenyi “amene amene.” (Mateu 5:18; Yoa. 1:51) Acho te kakukwasa waze anamupanjika hanga afuliele ngwo maliji jenyi amwenemwene. Yesu te mahasa kuhanjika ni ushindakenyo weswe mumu iye wika mwe te ukwete ulite wa kumanununa yilakenyo yeswe ya Zambi.—2 Kori. 1:20; Uso. 3:14.

“ATU ESWE AMBILE NGWO AMENE, AHALISHILE YEHOVA”

A-Izalele nawa kazachishile liji “amene” muze te akulemba kuli Yehova ni kumuhalisa. (Nehe. 8:6; Samu 41:13) Ha kukumbulula ngwo “amene” hanyima lia kulemba, ayo te kakusolola ngwo katayiza yize amba yoze walemba. Atu eswe te che akukumbulula, nawa te kakuwahilila ha kuwayila Yehova mu mulali wacho. Yino ye yalingiwileko muze Mwanangana Ndawichi atwalile Mushete wa Usendo wa Yehova mu Yerusaleme. Ha mashimbu a chiwanyino chize chasulileho, iye yalemba ni mbunge yeswe kulemba chize chapwa ngwe mwaso chili ha 1 Sango ja Mianangana 16:8-36. Waze apwileho kevwile kuwaha ha maliji jenyi, chocho “atu eswe ambile ngwo, ‘Amene!’ ahalishile Yehova.” Chochene, ayo kawahililile chinji ha kuwayila Yehova hamuwika.

Chizechene nawa, akwa-Kristu ku sekulu yitangu te kakuzachisa liji “amene” muze te akuwayila Yehova. Waze asonekene Mbimbiliya kanji-kanji te kakuzachisa liji liacho ha mikanda yo. (Roma 1:25; 16:27; 1 Petu. 4:11) Mukanda wa Usolwelo unasolola yitangiwa ya spiritu mu malilu anahalisa Yehova, hakwamba ngwo, “Amene! Aleluya” hanji ngwetu Yehova afumane. (Uso. 19:1, 4) Akwa-Kristu te kakwete chako chakwamba ngwo “amene” hanyima lia yilemba yize te akulinga ha kukunguluka. (1 Kori. 14:16) Hachino, lino liakapwile wika liji lize akwamba chakuhona kunyonga.

MUMU LIAKA “AMENE” YE YIKWETE ULEMU?

Amu twahengola chize tuvumbi twa Yehova te akuzachisa liji “amene” mutuhasa kumona ulemu wa kuzachisa liji liacho ha kuhwisa yilemba. Muze mutwamba “amene” kusongo lia yilemba yetu, acho tunasolola ngwetu, twatayiza pundu yize twamba. Nawa muze mutuzanga kukumbulula ngwetu “amene,” chipwe mu mbunge, ha kulemba cha mbunga, tunasolola ngwetu, tunatayiza yilemba yacho. Tutalenu mumu liaka “amene” wetu akwete ulemu.

Twakupanjika kanawa muze akwetu analembe mumu chapwa chihanda cha uwayilo wetu. Twakuwayila Yehova ha mashimbu a yilemba hi wika ko ha yize mutwamba, alioze ni ha yize mutulinga. Amu twakuzanga kusolola umwenemwene wetu ha kwamba ngwetu “amene,” kashika chino chakutukwasa hanga tusolole ndako jipema ni kupanjika kanawa yilemba.

Twakulinunga mu uwayilo wetu kuli Zambi. Ha mashimbu akulemba cha ha mbunga mandumbu eswe mu chikungulwila kakulinunga hanga evwe sango jimuwika. (Yili. 1:14; 12:5) Muze twakukumbulula eswe hamuwika ni mandumbu jetu twakulinunga ni mbunge yeswe. Muze twakutayiza eswe hamuwika ngwetu “amene” mwilu chipwe mu mbunge, yilemba yetu muyihasa kutwala Yehova hanga atwehe yize twamwita.

Umwe pangi unapanjika kukunguluka ha fone kanahetamisa mutwe muze analembe — “Amene” wetu kali chihanda cha uwayilo wetu kuli Yehova

Twakuhalisa Yehova. Yehova kakumona hita chuma mutulinga mu uwayilo wetu. (Luka 21:2, 3) Iye kakumona yize tunanyongo ni yize yili mu mbunge yetu. Chipwe muze tunapanjika kukunguluka kupalikila ha fone, mutuhasa kupwa ni shindakenyo ngwetu, “amene” wetu wa ku mbunge Yehova kakumwivwa. Muze twakwamba “amene,” tunalichingi hamwe ni waze ali ha kukunguluka hanga tuhalise Yehova hamuwika.

“Amene” wetu mahasa kusoloka ngwe keshi ulemu, alioze chino kuchalumbunukine ngwo kali wangwaza. Umwe mukanda uze wakulumbununa Mbimbiliya unambe ngwo, “kupalikila mu liji lino limuwika” tuvumbi twa Zambi mahasa kusolola “ujikijilo, utayizo walita ni kutalatala chingunu cha ku mbunge yo.” Yehova mahasa kwivwa “amene” wetu mweswe.—Samu 19:14.

SHINA WATAMBA KWAMBA “AMENE” KUSONGO LIA HITA KULEMBA?

Liji “amene” likwete ulemu. Alioze mba kuchi mutwamba nyi umwe malemba ha kuzachisa maliji waze kalitele? Kutala kutwatambile kwamba ngwetu “amene”? Hi chocho ko, kutwatambile kunyonga ngwo kuchishi ni ulemu. Mumu, Yehova kananyingika ngwo, tulieswe twakuhanjika yuma yipi, alioze iye keshi kupala upi wacho. Kashika, muze akwetu analembe, twatamba kulihukilikila ha manyonga waze anatuhwisa hi ha maliji wika ko, chino muchitukwasa kwamba ngwetu, “amene” ha yize ahanjika.

Chikwo nawa, kutushi kwamba ngwetu, “amene” mwishi hanji mu mbunge ku yilemba ya mutu yoze hi Chela cha Yehova ko. Mba kuchi mutwamba nyi tuli haze mutu wacho analembela? Chakutalilaho, hanji mutuya ha chimwe kuliwana hanji chiwanyino haze meta umwe hanga alembe. Hanji twatwama ku zuwo lize amwe Yela ja Yehova, akwo ka, nawa mwata wa zuwo yoze hi Chela cha Yehova ko, mazanga hanga eswe tulembe hamuwika mu usoko. Yika mutulinga?

Nyi mutupwa mu chihela chacho, mutuhasa kuhola ni vumbi lieswe chakuhona kwamba “amene.” Yetu kutwatambile kwamba “amene”; hanji kulikwata ku moko muze ayo analembe, mumu chino muchisolola ngwo, twalichinga no mu yilemba yacho. Nyi muchilita, mutuhasa kulemba yetwene mu mbunge, alioze mutuhasa kwecha kwamba “amene” mwilu hanga tuhone kulingisa akwetu anyonge ngwo twatayiza yilemba yo. Nyi mbunga waze tuli no mamana, yetwene e mutusakula nyi mutumana nyi ka. Kumana hanji kuhetamisa mutwe yino wika kuyalumbunukine uwayilo. Hachino, ha chikuma cha kumana hanji kuhetamisa mutwe, hita mukwa-Kristu, katamba kukwata chiyulo chenyi mwene, nawa nyi machilinga kukushi niumwe yoze mamukumika ha chikuma chacho.

Ngwe chize twalumbununa helu, chili chilemu kuli Yehova kutayiza ngwo, “amene.”