MWONO WA AKWA-KRISTU
Chize Muhasa Kupwa Longi Mupema wa Mbimbiliya
Shina unazange kushishika ha yeseko ngwe Daniele? Daniele kapwile longi mupema wa Liji lia Zambi nawa te kakulilongesa uprofeto. (Da 9:2) Kulilongesa kanawa Mbimbiliya muchihasa kukukwasa kushishika. Kuchi muchikukwasa? Muhasa kwokesa ufulielo we ni kutayiza pundu ngwo yilakenyo yeswe ya Yehova kumuyikamanunuka. (Yos 23:14) Nawa muhasa kwokesa zango lie muli Zambi, lize mulikukolweza kulinga yuma yalita. (Sam 97:10) Alioze kuchi muputuka longeso lie? Tala yize muhasa kulinga.
Yika natamba kulilongesa? Ndako yipema yakulilongesa muyihasa kuputuka ha kululieka kanawa kukunguluka cha mu chikungulwila. Kutanga cha Mbimbiliya cha poso muchihasa kukukwasa nyi wachiza mashimbu hanga uhengwole yikuma yize kuushi kunyingika kanawa. Nawa, atu akwo kakusakula kulilongesa uprofeto wa mu Mbimbiliya, mihuko ya spiritu ya Zambi, wenyi wa mishionaliu wa postolo Paulu, ni yuma yize Yehova atangile twakumona. Nyi wanyonga ha chimwe chihula cha mu Mbimbiliya, chisoneko hanga chikapwe chikuma cha longeso lie lia Mbimbiliya.
Kulihi munguhasa kuwana sango? Nyi muchilita, muhasa kutala chinema chakwamba ngwo, Ukwaso wa Kuhengwola Nawo Yikuma Yilemu ya mu Mbimbiliya. Nawa muhasa kweseka utotombo we ha kuhengula kanawa hanga unyingike mianangana a ndundo ja hashi heswe, waze anasolola ngwe ngongo mu kapitulu 7 wa Daniele.
Ha maola angahi natamba kulilongesa? Kulilongesa mashimbu eswe chili chilemu mba utakame ku spiritu. Muhasa kuputuka ni mashimbu akehe, alioze hakupalika cha matangwa muhasa kuwezelaho maola akwo. Kulilongesa Liji lia Zambi chili ngwe kufula kamanga, muhasa kuwana kamanga munji nyi wasa tachi ha kumufupa! (Yis 2:3-6) Nyi walinga chino mwokesa zango lie ha Liji lia Zambi, nawa kulilongesa Mbimbiliya muchinunga ni kupwa ndako ku mwono we.—1Pe 2:2.
YIKA NGONGO A MU KAPITULU 7 WA DANIELE ANALUMBUNUKA?
Da 7:4
Da 7:5
Da 7:6
Da 7:7
CHIHULA CHIKWO:
Kuchi Daniele 7:8, 24 wamanunukine?
YIZE MUKALILONGESA:
Yika ngongo a mukanda wa Usolwelo kapitulu 13 analumbunuka?