Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
5-11 AGOSTO
YIKUMA YILEMU YA MU LIJI LIA ZAMBI | 2 TIMOTEU 1-4
“Zambi Kakatuhele Spiritu ya Mwongo”
(2 Timoteu 1:7) Mumu Zambi katuhele spiritu ya mwongo, alioze ya tachi, ni zango, ni mana.
w09 15/5 15 ¶9
Akweze—Likolwezenu Hanga Kusenya Chenu Kulutwe Chisoloke Kuli Eswe
9 Paulu kakwashile Timoteu ha kumwiwulula ngwenyi: “Zambi katuhele spiritu ya mwongo, alioze ya tachi, ni zango, ni mana.” (2 Timo. 1:7) Kupwa ni “mana” chinalumbunuka kunyonga kanawa ni kukwata yiyulo yipema. Mana nawa mahasa kutukwasa kumona yuma mu jila yalita. Akweze waze kanda achikola kanawa, kakusolola “spiritu ya mwongo.” Ayo kakupomba chinji, kutala chinji yinema, kunwa makanya asasu, walwa unji, kuya ha yiwanyino hanji kulinga utanji hanga eseke kuchina milonga. Alioze, akwa-Kristu katamba “kwenda ni mana ni ululi ni uwayilo, ni kulikala utanganyanyi ni usolo wa hano hashi ha mwaka uno haliapwila.”—Titu 2:12.
(2 Timoteu 1:8) Kashika kanda ukevwa sonyi mumu ha shindakenyo ya Mwene wetu, chipwe hali yami funge yenyi. Alioze nyongonona ni utunu ndusu mu yihungumiona yize yakutuwana mumu ha Sango Lipema, nikulita ni tachi ja Zambi;
w03 1/3 9 ¶7
“Takama, hamuka!”
7 Paulu kanakasonekena mukweze Timoteu ngwenyi: “Mumu Zambi katuhele spiritu ya mwongo, alioze ya tachi, . . . Kashika kanda ukevwa sonyi mumu ha shindakenyo ya Mwene wetu.” (2 Timoteu 1:7, 8; Marku 8:38) Muze mututanga maliji wano, mutuhasa kulihula ngwetu: ‘Shina nakwivwa sonyi ha ufulielo wami, nyi na kuhamuka? Nakulweza akwetu ku shikola ni ku mulimo ngwo nguli Chela cha Yehova, nyi woma nakwivwa? Nakwivwa sonyi ha kupwa Chela cha Yehova, nyi nakuwahilila ha kupwa ni usepa upema ni Yehova?’ Nyi mutu mapwa ni manyonga api hanji mevwa sonyi ja kwambujola sango jipema, katamba kwiwuluka chiyulo chize Yehova ahanyine kuli Yoshua chinambe ngwo: “Takama, hamuka.” Kanda uvulama ngwe, chuma chilemu chili utayizo wa Yehova ni Yesu Kristu, hi wa akwenu ko a ku shikola hanji waze wakalakala no.—A-Ngalashia 1:10.
Kuhengwola Yikuma Yilemu ya mu Mbimbiliya
(2 Timoteu 2:3, 4) Nyongonona ni utunu ndusu mu yipi, ngwe swalale mupema wa Yesu Kristu. 4 Niumwe swalale mu jita malilimba ni yuma ya mwono uno; hanga akapemene kuli yoze hanamusela ku uswalale.
Tufupenu Upite Wamwenemwene
13 Timoteu neye te lunga washishika. Muze te havuluka Timoteu ngwe “swalale mupema wa Yesu Kristu,” Paulu yamwamba ngwenyi: “Niumwe swalale mu jita malilimba ni yuma ya mwono uno; hanga akapemene kuli yoze hanamusela ku uswalale.” (2 Timoteu 2:3, 4) Tumbaji twa Yesu musono, kuchingako ni kanunu umuwika wa tununu twa waze ali mu mulimo wa shimbu lieswe, kakusa tachi hanga akaule chiyulo chino cha Paulu. Ayo keshi kukaula mitambi ya saki yize akutwa hano hashi ha kuzo. Kakwiwuluka shimbi yakwamba ngwo: “Mukwa kutambula mukuli kakupwa ndungo ya mwenya mukuli.” (Yishima 22:7) Satana kanazange hanga tupalikise mashimbu ni tachi jetu jeswe ha kufupa upite wa hano hashi. Amwe kakutambula mbwezo hanji mikuli hanga alande zuwo, mashinyi, afwete shikola hanji chipwe kulinga umbachiso. Nyi kutwakanyamine, mutuhasa kupwa ni mikuli yize muyitumbata miaka yinji kuyifweta. Twakusolola mana angunu muze twakupwisa mwono wetu washi, kwehuka mikuli, ni kuzachisa kanawa mbongo jetu. Nyi twalinga chocho, mutuwayila kanawa Zambi chakuhona kupwa ngamba a upite wa mwakono.—1 Timoteu 6:10.
(2 Timoteu 2:23) Alioze litune yihula ya uhepuke ni yize kuyishi kulumbunuka, se unanyingika ngwe kuyakuneha ndombo.
w14 15/7 14 ¶10
Atu ja Yehova ‘Kakukatuka ku Uhenge’
10 Musono, atu ja Yehova keshi kupinda chinji ni yitanguke mu chikungulwila. Chipwe chocho, muze mutuliwana ni malongeso a mahuza, chipwe ngwe kanakatuka kweswako, twatamba kulitunawo kawashi-washi. Hi chipema ko kuhanjeka ni yitanguke, kwatala ha internet, kwapanjika mu yisaji yeswayo hanji kutanga sango jo ha mikanda. Chipwe ngwe unazange kumukwasa, alioze kulinga chino, muchihasa kusolola ngwo unehuka chiyulo cha mu Mbimbiliya. Kashika, yetu atu ja Yehova, twatamba kwehuka utanguke.
Kutanga Mbimbiliya
(2 Timoteu 1:1-18) Yami Paulu, postolo wa Yesu Kristu ku upale wa Zambi, nikulita ni chilakenyo cha mwono uze uli muli Kristu Yesu, 2 Kuli Timoteu, mwanami wa zango: Vumbi kuli yena, ni keke, ni sambukila ya kuli Zambi Tata ni Kristu Yesu Mwene wetu. 3 Nakusakwila kuli Zambi, yoze nakumulingila chize kuli akaka ni mbunge yipema, se nakukuvulwoka mu yilemba yami, ufuku ni mwalwa, chishi kulitwamina nichimwe. 4 Ha kwiwuluka masoji je nakwivwa usona wa kukumona, ngukahase kuwahilila liakulu; 5 ha kwiwuluka ufulielo kuushi ulembekese uze uli muli yena; uzewene waliangile muli kakenu Loye, ni muli noko Unise mba ngunakunuka ngwami, Uli muli yena nawa. 6 Ha chikuma chino ngunakwiwulula ukawunge chawana cha Zambi, chize chili muli yena ku kusayika cha moko jami. 7 Mumu Zambi katuhele spiritu ya mwongo, alioze ya tachi, ni zango, ni mana. 8 Kashika kanda ukevwa sonyi mumu ha shindakenyo ya Mwene wetu, chipwe hali yami funge yenyi. Alioze nyongonona ni utunu ndusu mu yihungumiona yize yakutuwana mumu ha Sango Lipema, nikulita ni tachi ja Zambi; 9 Yoze hanatulamwina, hanatutambika ni kutambika chisandu, hi nikulita ni yitanga yetu ko, alioze nikulita ni upale wenyi mwene ni vumbi lienyi, lize atuhele shimbu te miaka kanda yiputuka. 10 Alioze haliapwila hanalisolola ku usolokelo wa Chilamwina chetu Yesu Kristu, yoze hanakumbu kufwa, hanasolola mu Sango Lipema mwono, ni kupola chakuhi. 11 Ku lino hanangusela mukwa kwambujola, ni postolo, ni longeshi ya akwa mavungu. 12 Ha chikuma chino nawa, nakumona lamba lia yino yuma; alioze chishi kwivwa sonyi; mumu ngunanyingika yoze hingunamufuliela; ngunakunuka ngwami, Kanahase kufunga chize hingunamukunjika ndo tangwa lize. 13 Lalaminya ku cheseko cha maliji angunu aze wevwile kuli yami, ni ufulielo ni zango, yize yili muli Kristu Yesu. 14 Chuma chipema chize akukunjikile, chifunge ku tachi ja Spiritu Musandu, yoze watwama muli yetu. 15 Unanyingika chino ngwami, Akwa Azia eswe hanangwehuka; hakachi ko Fwijelu ni Hemojene. 16 Mwene akavwile keke akwa zuwo lia Oneseforu: mumu wanguhuzulwile kanji kanji, kevwile sonyi ha lenge liami. 17 Alioze muze apwile mu Roma, wangufupile ni mbunge yeswe, ndo wanguwanyine. 18 (Mwene akamwehe kuwana keke kuli Mwene ha tangwa lize;) ni uvumbiko wunji upwa haha avumbikile nawo mu Efwesu, yena kuunanyingika kanawa.
12-18 AGOSTO
YIKUMA YILEMU YA MU LIJI LIA ZAMBI | TITU 1–FWILIMU
“Kutongola Makulwana a mu Chikungulwila”
(Titu 1:5-9) Ha chikuma chino nakuhichikile mu Kreta, hanga ukalulike yuma yize yinahono, hanga ukasele makulwana mu membo eswe, chizechene ngwe nakwambile; 6 nyi kachi umwe masamba ku kusuma cheswe, lunga wa pwo umuwika, kali ni ana akwa kufuliela, waze keshi kusumiwa ha kuhungumuka ni yipi, hanji kukolema. 7 Mumu chatamba kalayi, se iye kaselo ka Zambi, akapwe keshi kapalia; hi mukwa pami ko, hi chitenu ko, hi mukwa kuzengewa ni vinyu ko, hi mukwa kumbufula, yoze keshi chipululu cha upite wa sonyi; 8 alioze mukwa kuzumbula ngeji, mukwa kufwila yipema, mukwa mana, mukwa ululi, musandu, mukwa kusuula; 9 mukwa kukakaminya ku liji lia umwenemwene lize liakulita ni lie longeso, hanga akahase kushinjila mu longeso lingunu ni kukumika akwa kuhamika nawa.
w14 15/11 28-29
Yihula ya Waze Akutanga Mikanda Yetu
Chipwe ngwe Yisoneko kuyishi kusolola mu yimako chize apwile ni kutongola makulwana a mu yikungulwila, nihindu yinatukwasa kunyingika chize apwile ni kulinga mulimo wacho. Mbimbiliya yinambe ngwo, muze Paulu ni Mbarnabe te anafuna ku zuwo, hakuhwa cha wenyi wo utangu wa mishionaliu, yaputuka kutongola “makulwana mu yikungulwila yeswe, nikulemba, nikulitwamina kulia, yaakunjika kuli Mwene, yoze te hanamufuliela.” (Yili. 14:23) Kulutwe lia miaka, Paulu yasonekena sepa lienyi Titu ngwenyi: “Nakuhichikile mu Kreta, hanga ukalulike yuma yize yinahono, hanga ukasele makulwana mu membo eswe, chizechene ngwe nakwambile.” (Titu 1:5) Timoteu kalingile wenyi unji ni Paulu, kota neye kapwile ni chiteli cha kutongola makulwana a mu yikungulwila. (1 Timo. 5:22) Yino yinasolola pundu ngwo, mulimo uno wakutongola makulwana a mu yikungulwila te kakuulinga kuli tulayi a akwa-kwendangana, hi kuli apostolo ni makulwana ku Yerusaleme ko.
Kulita ni usongwelo uno wa mu Mbimbiliya, Chizavu cha Tusongo a Yela ja Yehova kanakalumuna nyonga lio hakutwala ku kutongola makulwana ni tuvumbi. Kuputuka ha tangwa 1 lia Setembro, 2014, kutongola makulwana ni tuvumbi yichiputuka kupwa mu mulali au: Hita kalayi wa mbonge kakuhengwola kanawa mandumbu waze anazange kutongola hanga apwe makulwana hanji tuvumbi. Ha mashimbu waze anameneka chikungulwila, mahasa kusa tachi hanga anyingike mandumbu waze anambe kutongola, nyi muchilita mahasa kukalakala no mu munda. Muze kalayi mashimutwina ni makulwana a mu chikungulwila hakutwala kuli mandumbu waze asakula, mba matongola makulwana ni tuvumbi a mu chikungulwila. Chino chinalite ni yize akwa-Kristu a ku sekulu yitangu apwile ni kulinga.
Chiteli chika hita umwe wa kuli ayo ali nacho ha chikuma chino? Ngwe chizechene tunanyingika, “ndungo wamwenemwene, wa kukanyama” kali ni chiteli chilemu cha kulisa “akwa zuwo.” (Mateu 24:45-47) Che kwamba, ayo kakuhengwola chinji Yisoneko. Spiritu yisandu yakwakwasa kunyingika shimbi ja mu Mbimbiliya jize jinasolola chize atamba kusongwela yikungulwila. Ndungo wamwenemwene mwe wakutongola tulayi a mambonge ni mandumbu a mu Chizavu cha Mutango. Hita mutango, wakuhana ukwaso kuli mandumbu mu yikungulwila hanga akaule usongwelo uze akwaha. Alioze, yizavu ya makulwana a mu yikungulwila kakuhengwola kanawa hanga amone nyi mandumbu waze asakula kanajame kutambula chiteli mu chikungulwila cha Zambi, kulita ni usongwelo wa Mbimbiliya. Hita kalayi wa mbonge kali ni chiteli chilemu cha kuhengwola kanawa ni kulemba hakutwala kuli mandumbu waze makulwana asakula, mba atongole waze anajame hanga apwe makulwana hanji tuvumbi mu chikungulwila.
Kuhengwola Yikuma Yilemu ya mu Mbimbiliya
(Titu 1:12) Umwe wa kuli ayo, profeta woene wambile ngwenyi, A-Kreta kanapu akwa mahuza matangwa eswe, ngongo api, yipulutu a kulelumioka.
w89 15/5 31 ¶5
Yihula ya Waze Akutanga Mikanda Yetu
Hano Paulu te kaso kutayiza maliji wano a katonde waze profeta wacho ambile hakutwala kuli A-Kreta eswe. Mutuhasa kutayiza chino, mumu Paulu te kanyingika ngwenyi, mu Kreta mwapwile akwa-Kristu apema waze Zambi atayijile ni kwawayisa ni spiritu yenyi yisandu. (Yilinga 2:5, 11, 33) Mu Kreta mwapwile akwa-Kristu anji waze alihanyine hanga akwase kwazulula yikungulwila “mu membo eswe.” Chipwe ngwe akwa-Kristu jacho te hi angunu ko, nihindu mutuhasa kupwa ni shindakenyo ngwetu, ayo te hi akwa mahuza ko hanji yipulutu a kulelumioka, mumu nyi te kapwile ni ndako jacho kachi kakapwile ni utayizo wa Yehova. (A-Fwilipu 3:18, 19; Usolwelo 21:8) Kota mu Kreta mwapwile atu apema waze te akwivwa yinyengo hamukunda wa yuma yipi yize yapwile ni kulingiwamo. Atu jacho te kakuzanga kwivwa sango jipema, ngwe chize atu a ku mavungu eswe anatayiza sango jipema musono.—Ezekiele 9:4; tesa Yilinga 13:48.
(Fwilimu 15, 16) Mumu hanji ha chikuma chino wahandunukine kuli yena ha kashimbu, hanga ukamuzuke ndo ku miaka ya mutolo; 16 hi ngwe ndungo ko nawa, alioze kuhiana ndungo, ndumbwetu wa zango, kuli yami kuhiana, alioze kuli yena kuhiana chikolo, ni mu musunya ni muli Mwene.
w08 15/10 31 ¶4
Sango Jilemu ja Mukanda wa Titu, Fwilimu ni A-Hepreu
15, 16—Mumu liaka Paulu Kaketele kuli Fwilimu Hanga Atusule Onesimu? Paulu te kanazange kulihulikila wika ha mulimo wenyi wa kwambujola “wanangana wa Zambi, nikulongesa ni hamu lieswe yuma ya kutwala kuli Mwene Yesu Kristu.” Kashika, kakazangile kulinjisa mu yuma ya mingoso, ngwe hakutwala ku undungo.—Yilinga 28:31.
Kutanga Mbimbiliya
(Titu 3:1-15) Ukaewulwise kuzeyela kuli mianangana, ni akwa kuyula, akononoke, akapwe ni mbunge ya kulinga yitanga yeswe yipema. 2 Kanda ahanjika yipi hali niumwe. Kanda apwa akwa ndombo, akapwe yimbovu, nikulweza kushimbika cheswe kuli atu eswe. 3 Mumu yetwene nawa ha miaka ya kunyima twapwile yihepuke, yihulia, nikupianguka, nikulingila usolo weka ni weka ni kuwaha cheka ni cheka, nikwenda mu uhuka ni lufwachinda, akwa kole, nikulifwila kole umwe kuli mukwo. 4 Alioze muze utu ni zango lia Zambi Chilamwina chetu yasolokele, 5 hi ku yitanga ya ululi ko, yize twalingile yetwene, alioze nikulita ni keke yenyi yinene watulamwinyine, ku kusanyisa cha kusema chaha, ni kupwa chaha cha Spiritu Musandu. 6 Yoze wamuzukwile wa kulumbama hali yetu kuli Yesu Kristu Chilamwina chetu, 7 hanga, tukapwe maswana nikulita ni kutalatala cha mwono wa mutolo, se hanatusambisa ku vumbi lienyi. 8 Liji lino liamwenemwene. Ha kutwala ku yino yuma ngunazange ukahanjike ni tachi, hanga waze hanafuliela kuli Zambi, akase mbunge kulalaminya ku yitanga yipema. Yino yuma yinapeme, yakufumbula atu. 9 Alioze china kulihangujola cha uhepuke, ni kujichika miya ni vunda, ni kulitachika cha kutwala ku shimbi, mumu kuyishi kufumbuka; yapwa yamokomoko. 10 Mukwa kuhandunwona atu a Zambi muze hiwamukanjisa kashi, kaali, lituneye, 11 Se unanyingika umwe ngwe yono kapianguka kanavulumuna, kalihisa mwene. 12 Muze mungutuma Aretena, hanji Techiku kuli yena, ukalipupwise kwiza kuli yami ku Nikopoli, mumu hinahala kutwamako mwaka wa chishika. 13 Ukashinjikile chikolo Zena mwe ngaji, ni Apolu ha wenyi wo, hanga kechi kahona nichimwe. 14 Atu jetu nawa, akalilongese kulalaminya ku yitanga yipema, akahase kukwasa ni yuma yize yinatambe, hanga kechi kahona mihuko. 15 Atu eswe ali hamwe ni yami kanakumeneka. Ukameneke waze akutuzanga mu ufulielo. Vumbi likapwe hamwe ni yenu eswe. Amene.
19-25 AGOSTO
YIKUMA YILEMU YA MU LIJI LIA ZAMBI | A-HEPREU 1–3
“Zanga Ululi, Vwila Lwaji Ungulungulu”
(A-Hepreu 1:8) Alioze ha kutwala kuli mwe Mwana kanambe ngwenyi, A Zambi, nguja ye, kuyili ndo ku miaka yeswe ya mutolo. Mwe lukanda wa wanangana we, lukanda wa ululi.
w14 15/2 5 ¶8
Hanenu Uhenya Kuli Kristu, Mwanangana Wetu!
8 Yehova kasele Mwanenyi ngwe Mwanangana mu Wanangana wa Mesaya mu malilu ha mwaka 1914. ‘Lukanda wa wanangana wenyi, kali lukanda wa ululi,’ kashika mutuhasa kupwa ni shindakenyo ngwetu, mu unguvulu wenyi mumukapwa ululi unji. Yesu kali ni ulite wa kuyula, mumu ‘Zambi, ye nguja yenyi.’ Che kwamba, Yehova mwe chishina cha chiyulu chenyi. Nawa ngunja ya Yesu, muyinunga “ndo ku miaka yeswe ya mutolo.” Twakwivwa chiseke chinji ha kukalakalila Yehova mushi lia chiyulo cha Mwanangana mukwa-ndundo, yoze Zambi asakwile.
(A-Hepreu 1:9) Hiunazange ululi, ungulungulu wakukupihila; kashika Zambi, iye Zambi ye, hanakuwayisa ni maji a kulikwiza kuhiana akwenu.
w14 15/2 4-5 ¶7
Hanenu Uhenya Kuli Kristu, Mwanangana Wetu!
7 Tanga Samu 45:6, 7. Yehova yawayisa Yesu ngwe Mwanangana mu Wanangana wa Mesaya, mumu Yesu kakuzanga chinji ululi ni kuvwila kole yuma yeswe yize kuyishi kulemesa Tato. Yesu kamuwayishile ‘ni maji a uwahililo kuhiana akwo,’ e mianangana ja Yunda a ku munyachi wa Ndawichi. Kuchi yino yalingiwile? Chitangu, Yehova mwe wa wayishile Yesu. Chamuchali, kamuwayishile ngwe Mwanangana nawa Sasendote wa Lutwe. (Samu 2:2; Hepre. 5:5, 6) Chamuchitatu, Yesu kakamuwayishile ni maji, alioze ni spiritu yisandu, chiyulo chenyi hi cha hano hashi ko, alioze cha mu malilu.
Kuhengwola Yikuma Yilemu ya mu Mbimbiliya
(A-Hepreu 1:3) Mwenawo che kupeyima cha uhenya wenyi; ni che kulifwa cha kupwa chenyi; iye mukwa kukolesa yuma yeswe ku liji lia tachi jenyi, muze te hamanununa kupemesa milonga, watwamine ku kwoko lia chindume lia Ulamba mwilu.
it-2 382 ¶1
Chifwa
Shina Yesu mashimbu eswe te kakwimbulula kanawa yitanga ya Tato mu yuma yeswe?
Mwana mutangu wa Zambi, yoze tunanyingika ngwetu Yesu, kali chifwa cha Tato. (2Ko 4:4) Mwana yono, mwe Zambi alwezele ha kwamba ngwenyi: “Tulingenu mutu mu chano chetu,” chino chinasolola ngwo, Mwana kapwile ni usepa ukolo ni Tato chize muze amutangile. (Upu 1:26; Yo 1:1-3; Kol 1:15, 16) Muze apwile hano hashi ngwe mutu mungunu, iye te kakwimbulula kanawa yitanga ni utu wa Tato, kashika, ambile ngwenyi: “Yoze wangumona, hamona mwe Tata.” (Yo 14:9; 5:17, 19, 30, 36; 8:28, 38, 42) Chino chasolokele pundu, muze amuhindwishile hanga aye mu malilu, ni muze amuhele “yiyulo yeswe mwilu ni hashi” kuli Tato, Yehova Zambi. (1Pe 3:18; Mat 28:18) Amu Yesu “hanamunangamisa chikolo” kuli Zambi, haliapwila kakwimbulula kanawa uhenya wa Tato, kuhiana muze apwile hano hashi. (Fwp 2:9; Hep 2:9) Haliapwila Iye kali pundu lume “kulifwa cha [Zambi].”—Hep 1:2-4.
(A-Hepreu 1:10-12) Chikwo ngwenyi, Yena, Mwene, ha uputukilo wasele fundamentu ya hashi, ni malilu kanapu ye yitanga ya moko je. 11 Ayo yeswe kumuyikahwa; alioze yena kuwalinduluka: ayo yeswe kumuyikapapujoka ngwe hina; 12 ngwe mazalo mukayivunga, ngwe hina, mba kumuyikalumuka; alioze yena kuwapwa chizechene, ni miaka ye kuyichi kahwa.
it-1 491 ¶2
Malilu
Maliji waze ali ha mukanda wa Samu 102:25, 26, kanatale hali Yehova Zambi, alioze postolo Paulu katongwele maliji wano hanga ahanjike hakutwala kuli Yesu Kristu. Mumu Yesu, mwe mwana wa wika wa Zambi, Kaputu yoze Zambi azachishile hanga atange yuma yeswe yatwama hano hashi ni mu malilu. Paulu kanasolola kalisa wa miaka ya mutolo ya Mwana wa Zambi, ni yitangiwa yikwo, yize Zambi te mahasa kuvunga ngwe “hina,” ni kuyisa ku mbango.—Hep 1:1, 2, 8, 10-12; tesa ni 1Pe 2:3.
Kutanga Mbimbiliya
(A-Hepreu 1:1-14) Zambi, se wahanjikile ha shakulu kuli tulamba ni makanwa ja aprofeta ku yihanda yeka ni yeka, ni ndako jeka ni jeka, 2 ha kusula songo lia matangwa ano, hanahanjika kuli yetu muli Mwanenyi, yoze hanamusela swana ya yuma yeswe, ku tachi jenyi nawa watangile miaka. 3 Mwenawo che kupeyima cha uhenya wenyi; ni che kulifwa cha kupwa chenyi; iye mukwa kukolesa yuma yeswe ku liji lia tachi jenyi, muze te hamanununa kupemesa milonga, watwamine ku kwoko lia chindume lia Ulamba mwilu. 4 Se hahiana chikolo angelo, chizechene ngwe hanahingi jina lia kuahiana. 5 Mumu kuli iya hakachi ka angelo wambile iye ha mwaka umwe ngwenyi, Yena uli mwanami, tangwa lino hingunakuseme? Cheka nawa ngwenyi, Mungukapwa kuli iye Tato, iye kumakapwa kuli yami mwanami? 6 Muze maneha Mwe Mutangu hano hashi cheka nawa mamba ngwenyi, Angelo eswe a Zambi amuwayile. 7 Alioze hakutwala kuli angelo kanambe ngwenyi, Yoze wakupwisa angelo jenyi maspiritu, ni tuvumbi twenyi mulengi wa kahia. 8 Alioze ha kutwala kuli mwe Mwana kanambe ngwenyi, A Zambi, nguja ye, kuyili ndo ku miaka yeswe ya mutolo. Mwe lukanda wa wanangana we, lukanda wa ululi. 9 Hiunazange ululi, ungulungulu wakukupihila; kashika Zambi, iye Zambi ye, hanakuwayisa ni maji a kulikwiza kuhiana akwenu. 10 Chikwo ngwenyi, Yena, Mwene, ha uputukilo wasele fundamentu ya hashi, ni malilu kanapu ye yitanga ya moko je. 11 Ayo yeswe kumuyikahwa; alioze yena kuwalinduluka: ayo yeswe kumuyikapapujoka ngwe hina; 12 ngwe mazalo mukayivunga, ngwe hina, mba kumuyikalumuka; alioze yena kuwapwa chizechene, ni miaka ye kuyichi kahwa. 13 Alioze ha kutwala kuli mungelo muka ambile ha mwaka umwe ngwenyi, Twama ku kwoko liami lia chindume, ndo mungusa akwa kole je chitwamo cha yiliato ye? 14 O eswe maspiritu a kuvumbika tuhu, a kutumiwa mukuvumbika waze makahinga ulamwino.
26 AGOSTO–1 SETEMBRO
YIKUMA YILEMU YA MU LIJI LIA ZAMBI | A-HEPREU 4–6
“Sako Tachi Hanga Unjile mu Uhwimino wa Zambi”
(A-Hepreu 4:1) Kashika twivwenu woma, se hanatuhichikila chilakenyo cha kunjila mu uhwimino wenyi, kuchina hanji umwe wa kuli yenu mamumona ngwe kanachihono.
(A-Hepreu 4:4) Mumu hanambe kumwe kuma ha kutwala ku tangwa liamuchishimbiali ngwe chino ngwenyi, Zambi wahwimine ha tangwa liamuchishimbiali ku yitanga yenyi yeswe.
w11 15/7 24-25 ¶3-5
Uhwimino wa Zambi Yika Unalumbunuka?
3 Kuli yuma yiali yize yinatwehe shindakenyo ngwo, ku sekulu yitangu M.J. tangwa liamuchishimbiali te kanda lichihwa. Chitangu, tutalenu chize Yesu akumbulwile A-Yunda muze te anamukumika ha kuwuka atu ha tangwa lia Sambata, chuma chize ayo te a kumona ngwe kulinga mulimo. Yesu yaakumbulula ngwenyi: “Tata kanalingi ndo haliapwila, ni yami ngunalingi.” (Yoano 5:16, 17) Mumu liaka Yesu akumbulwile chocho? Mumu kamusumine mulonga ha kukalakala ha Sambata. Kashika aakumbulwile ngwenyi: “Tata kanalingi ndo haliapwila.” Che kwamba, Yesu te kanalweze A-Yunda ngwenyi: ‘Tata ni yami tunalingi mulimo umuwika. Amu Tata machinunga ni kukalakala ha Sambata yenyi ya kanunu ka miaka, kashika ni yami natamba kukalakala chipwe ha Sambata.’ Ha chino, Yesu yasolola pundu ngwenyi, Sambata yinene ya uhwimino wa Zambi hakutwala hano hashi, te kanda yichihwa ha matangwa jenyi.
4 Chuma chamuchiali, chili ha maliji waze postolo Paulu atongwele ali ha Uputukilo 2:2 hakutwala ha uhwimino wa Zambi. Paulu yasoneka ngwenyi: “Yetu hitunafuliela, tunanjila mu uhwimino.” (Hepre. 4:3, 4, 6, 9) Kashika, chipwe ha matangwa ja Paulu tangwa liamuchishimbiali te kanda lichihwa. Tangwa lia uhwimino te mulinunga ndo ha mashimbu aka?
5 Twatamba kunyingika ulemu wa tangwa liamuchishimbiali, mba tukumbulule chihula chino. Mukanda wa Uputukilo 2:3 unasolola ulemu wa tangwa liacho, ha kwamba ngwo: “Zambi yawahisa tangwa liamuchishimbiali, yalisela lisandu.” Tangwa lino, ‘kalipwishile lisandu’—kaliwahishile, hanji kalisakwile kuli Yehova hanga amanunune upale wenyi. Upale wacho uli ngwo, hashi hazale too ni atu waze akwononokena Zambi ni kufunga kanawa yitangiwa yeswe ya hashi. (Uputu. 1:28) Yehova Zambi kanazange kumanununa upale uno, kashika, Iye ni Yesu Kristu, “Mwenya Sambata” ananungu ni ‘kulinga ndo haliapwila.’ (Mateu 12:8) Tangwa lia uhwimino wa Zambi mulinunga ndo muze upale wenyi weswe muumanunuka ku songo lia Kanunu ka Miaka ya Kuyula cha Kristu.
(A-Hepreu 4:6) Kashika, se chinasala kuli amwe anjilemo, ni waze aambulwilile Sango Lipema kushi, kanjilile mumu ha uhulia.
w11 15/7 25 ¶6
Uhwimino wa Zambi Yika Unalumbunuka?
6 Zambi kalwezele Alama ni Eva hakutwala ku upale wenyi, alioze ayo yehuka kukwasa umanunuko wa upale wacho. Alama ni Eva kali atu atangu waze alitunyine kwononokena Zambi. Chize ha mashimbu jacho, atu anji keshi kwononokena Zambi. Chipwe A-Izalele, vungu lize Zambi asakwile, ha mashimbu amwe te keshi kumwononokena. Kashika Paulu atowezele akwa-Kristu a ku sekulu yitangu ngwenyi, chipwe amwe a kuli ayo te mahasa kuholokela mu muheto ngwe chizechene aholokele A-Izalele a ha mashimbu a Mose. Iye yasoneka ngwenyi: “Kashika tulipupwisenu kunjila mu uhwimino uze, hanga niumwe kechi kalimbuka ni cheseko chimuwika cha uhulia.” (Hepre. 4:11) Hano Paulu katesele uhulia ni kuhona kunjila mu uhwimino wa Zambi. Yika yino yinalumbunuka kuli yetu? Nyi twalimika ni upale wa Zambi, shina mutuhasa kunjila mu uhwimino wenyi? Kwamba pundu, chili chilemu kuwana kumbululo lia chihula chino, alioze, mba mutuwana kumbululo liacho kulutwe. Haliapwila, tutalenu yize chilweza chipi cha A-Izalele muchihasa kutulongesa hakutwala ku kunjila mu uhwimino wa Zambi.
(A-Hepreu 4:9-11) Kashika kuunasala uhwimino wa Sambata hali atu a Zambi. 10 Mumu yoze hananjila mu uhwimino, hanahwimi nawa ku yitanga yenyi, chizechene ngwe Zambi wahwimine ku yitanga yenyi. 11 Kashika tulipupwisenu kunjila mu uhwimino uze, hanga niumwe kechi kalimbuka ni cheseko chimuwika cha uhulia.
w11 15/7 28 ¶16-17
Uhwimino wa Zambi Yika Unalumbunuka?
16 Musono, akwa-Kristu akehe waze akunyonga ngwo katamba kukaula jimwe ndako ja Shimbi ya Mose mba akazuke ulamwino. Maliji waze Paulu asonekenene A-Efwesu kali ndusu ngwo: “Mumu ku vumbi hananulamwina, ha kufuliela. Chino hi cha kuli yenwene ko, alioze chawana cha Zambi. Hi cha ku yitanga ko, kuchina umwe meseka kulisamba.” (Efwe. 2:8, 9) Kuchi mba akwa-Kristu mahasa kunjila mu uhwimino wa Zambi? Yehova kasele tangwa liamuchishimbiali ngwe tangwa lienyi lia uhwimino hanga amanunune upale wenyi hano hashi. Mutuhasa kunjila, hanji kulinga chihanda mu uhwimino wa Yehova ha kukalakala kulita ni upale wenyi, uze akutusolwela kupalikila mu ululikiso wenyi.
17 Chikwo nawa, nyi mutuzanga kulisongwela yetwene ha kulengulula yiyulo ya mu Mbimbiliya yize ndungo wamwenemwene, wa kukanyama akutwaha, mutusolola ngwetu tunalimika ni upale wa Zambi. Yino muyihasa kupihisa usepa wetu ni Yehova. Chikuma chize muchisulaho, mutushimutwina yuma yize muyihasa kupinjisa atu ja Zambi. Ni chize yiyulo yetu yize twakukwata hanga twononoke hanji tupwe ni yitanga yipi, muyihasa kusolola nyi mutukanjila mu uhwimino wa Zambi nyi ka.
Kuhengwola Yikuma Yilemu ya mu Mbimbiliya
(A-Hepreu 4:12) Mumu liji lia Zambi mwono lili nawo, kuliakulinga ni tachi, linambuka kuhiana mukwale, liakutuwa ndo ku kuhandununa hakachi ka alma ni spiritu, ni ku makonekeno ni usongosongo, kuliakusa chinyingi ha manyonga ni kuhala cha mu mbunge.
w16 15/9 13
Yihula ya Waze Akutanga Mikanda Yetu
“Liji lia Zambi” anambe mu A-Hepreu 4:12 ngwo “mwono lili nawo, kuliakulinga ni tachi” yika?
▪ Maliji wano kanasolola ngwo, postolo Paulu te kanahanjika hakutwala ku sango ja upale wa Zambi. Sango jacho mujihasa kupwa jize anasoneka mu Mbimbiliya, ni yuma yikwo yize Zambi ambile alioze kakayisonekene.
Mu mikanda ya ululikiso wetu, kanji-kanji kakutongolamo chisoneko cha A-Hepreu 4:12 hanga asolole chize Mbimbiliya yili ni ndundo ja kwalumuna mwono wa atu. Alioze chili chilemu kunyingika kanawa maliji atangu ni akasula waze Paulu ambile shimbu te kanda achisoneka maliji ali ha versu yino. Paulu te kanakolweza akwa-Kristu A-Hepreu hanga atwame kulita ni upale wa Zambi. Upale uno te uli wakusoneka mu yisoneko yisandu. Paulu kazachishile chilweza cha A-Izalele waze atuswile ku Engitu. Ayo te mahasa kunjila “ku chifuchi kuze kunokela yamwa ni wuchi,” mu chifuchi chacho mwe te mapwa ni uhwimino wamwenemwene.—Kutuhu. 3:8; Shimbi 12:9, 10.
Uno we te upale wa Zambi. Alioze a A-Izalele yapwa yihulia ni kuhona kusolola ufulielo, hachino anji a kuli ayo yahona kunjilila mu uhwimino wacho. (Kwa. 14:30; Yoshu. 14:6-10) Alioze Paulu kambile ngwenyi, te kuli “chilakenyo cha kunjila mu uhwimino [wa Zambi].” (Hepre. 3:16-19; 4:1) Paulu katongwele maliji waze ali ha mukanda wa Uputukilo 2:2 ni Samu 95:11 hanga asolole ngwo, chilakenyo chacho chakatukile mu Yisoneko. Chilakenyo chino chili chihanda cha sango ja Zambi hakutwala ku upale wenyi. Chizechene ngwe Akwa-Kristu A-Hepreu, mutuhasa kulilongesa ni kutwama kulita ni upale wacho.
Tunawahilila chinji ha kunyingika ngwetu, tuchili ni “chilakenyo cha kunjila mu uhwimino [wa Zambi].” Tunafuliela ha chilakenyo cha mu Mbimbiliya chinashindakenya ngwo, chili chashi kunjila mu uhwimino wacho. Yetu hi tunachilinga, hi ha kukaula Shimbi ya Mose ko ni kulinga wika yuma yipema, alioze ha kufuliela muli Zambi ni kutwama kulita ni upale wenyi. Kuchizako yetu, atu anji hano hashi kanalilongesa Mbimbiliya ni kunyingika yize Zambi hanasolola hakutwala ku upale wenyi. Chikwo nawa, atu anji kanalumuna yitanga yipi, nawa kakusolola ufulielo ni kwapapachisa. Yino yeswe yakusolola ngwo, “liji lia Zambi mwono lili nawo, kuliakulinga ni tachi.” Yuma yize Zambi anasolola mu Mbimbiliya hakutwala ku upale wenyi, yakwalumuna mwono wetu, nawa muyinunga ni kulinga ni tachi ku mwono wetu.
(A-Hepreu 6:17, 18) Muze mwene Zambi nikuzanga kulweza kuhiana chikolo kuli maswana a chilakenyo, ngwe upale wenyi kuushi kuhasa kwalumuka, wachikolesele ni shingo. 18 Hanga ku yuma yiali kuyishi kuhasa kwalumuka, mu yino Zambi kechi kuhasa kuhanjika mahuza, yetu tukapwe ni uhwimino wa ngolo, yetu hitunachinyina ni kukwata ku kutalatala chize chili kumeso jetu.
it-2 24 ¶5
Kutalatala
Kutalatala cha mwono wa mutolo uze ushi kupola chize alinacho waze ali ni “kutambika cha mwilu,” (Hep 3:1) chili chamwenemwene, kashika mutuhasa kuchijikijila. Kuli yuma yaali yize yinatwehe shindakenyo ngwetu, Zambi keshi kulionga. Chitangu, yilakenyo yenyi ni kulishinga chenyi. Chamuchiali, kutalatala chize chili muli Kristu, yoze uli mu malilu, nawa keshi kufwa. Kashika akuhanjika hakutwala ku kutalatala chacho ngwe, “ankora ya mbunge, kuyajikiza, kuyakola nawa, se yanjila muze muchima lia chikalakala cha hina; [ngwe chize apwile ni kulinga sasendote mukwa lutwe ha kunjila muma Musandu Mwahiana ha tangwa lia Kufuka Shili], muze Yesu, iye tetekeli, hanatunjilila, se iye kapwa sasendote mukwa lutwe ndo ku miaka ya mutolo nikulita ni ngango ya Melekizeteke.”—Hep 6:17-20.
Kutanga Mbimbiliya
(A-Hepreu 5:1-14) Mumu sasendote mukwa lutwe mweswe wa kusakula hakachi ka atu, mamuselacho hali atu mu yuma ya kutwala kuli Zambi, hanga akalambule yawana, ni yitapo ha milonga. 2 Mahasa kupwa ni uhumikizo hali akwa kwalajala ni akwa kupianguka, se iye mwene nawa mukwa kukokoloka. 3 Mba ha mukunda wa chuma chino chamutamba, chizechene ngwe hali atu, chocho nawa hali iye mwene, kulambula ha milonga. 4 Niumwe malianjila ulemu uno hali iye mwene, ndo mamutambika kuli Zambi, chizechene ngwe Arone nawa. 5 Chocho Kristu nawa kalichichimiekene mwene kupwa sasendote mukwa lutwe, alioze yoze wambile kuli iye ngwenyi, Mwanami yena, tangwa lino hingunakuseme: 6 chizechene ambile nawa mu chihanda chikwo ngwenyi, Yena uli sasendote ndo ku miaka ya mutolo, nikulita ni ngango ya Melekizeteke. 7 Mwenawo ha matangwa a musunya wenyi hashi, se walambwile yilemba ni kuliumba hamwe ni kuteta cha ngolo ni masoji kuli yoze wahasa kumulamwina ku kufwa. Mba wapanjikile kuli iye mumu ha upeme wenyi. 8 Chipwe wapwile Mwana, hindu walilongesele kwononoka mu yuma yize amwenene lamba. 9 Mba se hanamupwisa mungunu iye kapwa mwe Kaputu ka ulamwino wa mutolo kuli waze eswe akumwononokena. 10 Hanamutongola kuli Zambi ngwenyi, Uli sasendote mukwa lutwe nikulita ni ngango ya Melekizeteke. 11 Ha kutwala kuli Melekizeteke yikuma yinji tuli nayo ya kwamba, yikalu kuyilumbununa, se hinwalumuka akwa matwi a uleya. 12 Mumu muze te ha mukanda wa miaka chanutamba kupwa alongeshi, chinatambe umwe anulongese cheka nawa uputukilo wa maliji a Zambi; hinwalumuka waze chatamba kualisa ni yamwa hi kulia cha tachi ko. 13 Mumu mweswe matambula yamwa, kalongolokele mu liji lia ululi; se iye uchili mwana-kemba. 14 Alioze kulia cha tachi kuchapwa kulia cha waze hakola, waze mumu ha mukunda wa kulijilila, mana ali no a kulifumba, akase chinyingi hakachi ka chipema ni chipi.