Malongeso a Mukanda Wakuzachisa ha Kukunguluka cha Mwono ni Mulimo Wetu
© 2023 Watch Tower Bible and Tract Society of Pennsylvania
1-7 JANEIRO
YIKUMA YILEMU YA MU LIJI LIA ZAMBI | YOMBI 32-33
Lembejeka Waze Analipikala
(Yombi 33:1) Alioze mukwetu Yombi, ivwa haliapwila kuhanjika chami; panjika ku maliji jami eswe.
it-1 799
Elihu
Elihu kakapwile ni katonde. Iye te keshi kulemesa chinji mutu umwe kuhiana mukwo. Iye yatayiza ngwenyi, ngwe Yombi, iye kamutangile ni uma. Chikwo nawa Mukwa-Ndundo-Jeswe kapwile tangi yenyi. Elihu kakazangile kuvwisa woma Yombi. Kashika iye yahanjika nenyi ngwe sepa mupema.Yakundama kuli Yombi ha Kumusanyika ha jina lienyi, chuma chize Elifaze, Bilidade ni Zofare ahonene kulinga.—Yom 32:21, 22; 33:1, 6.
(Yombi 33:6, 7) Kumeso ja Zambi chimuwika ngunapu ni yena; ni yami nawa anguwunbile kumwaha wa uma. 7 Kashika kuchi kuchikima ni woma wa yami; chichi kukushata naye.
w14 15/6 25 ¶8-10
Shina Yena Wakumona Ulelu wa Atu Ngwe Chize Yehova Akuumona?
8 Muze twakwiwuluka ngwetu ulelu wa mandumbu jetu wakusoloka chinji mumu lia yuma yinji yize akupalika ngwe kuyiza chinji, kuhona zango mu usoko wo ni kuhonga chinji ku mbunge. Chino muchihasa kulingiwa nawa kuli yetu. Shimbu kanda achinjila mu chifuchi chaha, A-Izalele waze te apwile yiswale nawa alelu mu chifuchi cha Engitu, yewulula hanga achine ‘kukalisa mbunge jo’ kuli mandumbu jo yiswale ni waze anazeye. Yehova te kakushimbwila hali A-Izalele ngwenyi ayo makwasa yiswale.—Shi 15:7, 11; Lev 25:35-38
9 Shimbu tupatwile waze anazeye, mutuhasa kwatakamisa ha kuzachisa yisoneko. (Yom 33:6, 7; Mat 7:1) Chakutalilaho: Nyi umwe mukwa-kwendesa moto malimbuka, shina muchilita mandotolo waze mamukwasa chitangu kuputuka kuhengwola ha chize alimbuka? Ka, ayo kakuputuka ni kuwuka mutu wacho ni kawashi-washi. Chizechene nawa, nyi ngwe umwe mukwa-kristu ni mukwetu mazeya mumu lia mulonga umwe, chuma chitangu chilemu chize twatamba kulinga chili kumwaha ukwaso wa ku spiritu uze anafupiwa.—Tanga 1 A-Tesalonika 5:14.
10 Nyi twanyonga ha yipikalo yize mandumbu jetu akupalika, mutuhasa kumona ulelu wo mujila yalita. Achinyonga ha mapangi waze akunyongonona ha mashimbu anji mu yihungumiona ya mu usoko. Amwe mumu lia kulikehesa mahasa kusoloka ngwe kali alelu, alioze ayo kakusolola ufulielo ukolo uze twakumona. Muze wakumona umwe mama yoze unalela ana ukawenyi masa tachi hanga eze ku kunguluka ni anenyi, shina ushi kukomoka ha ufulielo wenyi? Chikwo nawa, shina kushi kukomoka muze wakumona akweze waze akulalaminya ku umwenemwene chipwe muze akupalika mu yeseko ku shikola? Nyi wahengwola kanawa muhasa kumona ngwo atu waze wakumona ngwe kanazeya kali “pichi ku ufulielo” kuhiana atu waze akusoloka ngwe kali kanawa.—Tia. 2:5.
(Yombi 33:8-12, 17) Kuwahanjika mwe mu matwi jami; hinevwa chinumo cha maliji je. 9 Unambe ngwe, Kunapema; chishi mulonga; kunasamba; uhenge wakuhi muli yami. 10 Zambi kakuwana haze malimikina ni yami; kakungutenga mukwa kole yenyi. 11 Kakuyikila molu jami mu kuuli; kakutala majila jami eswe. 12 Ha chikuma chino unahengesa. Mungukukumbulula. Zambi aye munene kuhiana atu. 17 hanga akatewulule mutu ku yitanga yenyi, nikusulisa kulengumuka cha mutu.
Shimbu Lika Twatamba Kuhanjika?
17 Lunga wamuchiwana yoze wayile ni kumeneka Yombi, kali Elihu, usoko wa Apalahama. Iye yapanjika wika muze Yombi ni malunga atatu te anahanjika. Elihu kapanjikile kanawa ha yuma yeswe yize te ayo anambe. Kashika ahashile kuhana yiyulo yipema kuli Yombi chakuhona kwivwa woma ni kumukwasa hanga apwe ni manyonga alita. (Yombi 33:1, 6, 17) Chuma chilemu kuli Elihu, te chili kulemesa Yehova hi iye mwene ko hanji mutu mweswawo. (Yombi 32:21, 22; 37:23, 24) Chilweza cha Elihu chinatulongesa ngwo, kuli mashimbu akuhanjika ni mashimbu akuhola hanga tupanjike. (Tia. 1:19) Chinasolola nawa ngwo, nyi tunafupu kuhana chimwe chiyulo, twatamba kulemesa Yehova.
18 Nyi mutukawula yiyulo ya mu Mbimbiliya ha chize twatamba kuhanjika ni ha mashimbu waze mutuhanjika, mutusolola ngwo twakulemesa chawana chakuhanjika. Mwanangana wa mana Solomone, kasonekene ngwenyi: “Liji lia kuhanjika haze hanalite liapwa ngwe mihuko ya oru mu mutonga wa prata.” (Yishi. 25:11) Muze mutupanjika kanawa ha yize akwetu matulweza ni kulianga kunyonga shimbu kanda tuchikumbulula, maliji jetu mahasa kupwa ngwe mihuko yino ya oru, yilemu nawa yipema. Ha chino, chipwe ngwe mutuhanjika chinji hanji hakehe, maliji jetu makwasa akwetu, nawa Yehova mawahilila chinji hali yetu. (Yishi. 23:15; Efwe. 4:29) Yino yili jila yakusolwelamo ngwo, tunasakwilila chinji ha chawana chino chilemu atuhele kuli Zambi!
Kuhengwola Yikuma Yilemu ya mu Mbimbiliya
(Yombi 33:25) Musunya wenyi upwe nawa musunya wa ukweze; akahiluke nawa ku tachi ja ukweze wenyi.
w13 15/1 19 ¶10
Nunga ni Kukundama kuli Yehova
10 Chizechene nawa, chili chilemu kufunga mujimba wetu. Alioze, kutwafupiwile kusa tachi jinji hanga tusweke yuma yize yakusolola ushinakaji wetu. Mumu yuma yacho yakusolola ulemu, upeme wa ku mbunge ya mutu ni mana jenyi. Ngwe chilweza, Mbimbiliya yakwamba ngwo: “Kambu jitoma japwa chipangula cha uhenya muze majiwana mu jila ya ululi.” (Yishi. 16:31) Chenacho Yehova akutumona, kashika twatamba kulimona ngwe chize iye akutumona. (Tanga 1 Petulu 3:3, 4) Shina chili chipema kulisa mu ponde hanga atupasule kumeso mba tusoloke kanawa? “Uwahililo wa Yehova” uze wakukatuka ku mbunge we wakupemesa mutu, chipwe ngwe kali ni miaka yeswayo hanji misongo yeswayo. (Nehe. 8:10) Mutuhasa wika kupwa ni mujimba upema mu chifuchi chaha. (Yom 33:25; Iza. 33:24) Ndo ha shimbu liacho, kusolola mana ni ufulielo muchitukwasa kununga ni kukundama kuli Yehova muze tunalingi yeswe yize mutuhasa kulita ni uhashi wetu.—1 Timo. 4:8.
(Yombi 32:1-22) Chocho wano malunga atatu yalitwamina kukumbulula Yombi mumu kanalimono mukwa ululi. 2 Mba Elihu mwana Mbarakele, Ka-Mbuze wa ku munyachi wa Rame yatenuka. Yatenuka ni Yombi mumu halisambisa mwene; kasambishile Zambi. 3 Yatenuka ni masepa ja Yombi atatu, mumu hahisa Yombi alioze kawanyine chize mamukumbulula nacho. 4 Elihu te kahanjikile hatangu mumu akwo makulwana jenyi. 5 Kashika muze Elihu hamona kumbululo liakuhi mu makanwa ja wano malunga atatu yatenuka. 6 Elihu mwana Mbarake Ka-Mbuze yamba ngwenyi, Ku miaka yami ami nguli kanuke, enu nuli makulwana; kashika nevwile sonyi ni woma kulumbununa chikuma chami kuli yenu. 7 Yingwamba ngwami, Matangwa ahanjike; miaka yinji muyilongesa mana. 8 Alioze kumanyi, ye spiritu ya mutu, mwiku wa Mukwa-Ndundo-Jeswe yakumwaha yinyingi. 9 Mana katwamine muli anene wika; kusa chinyingi chize chinalite hi cha makulwana wika ko. 10 Kashika ngwami, Ngwivwenu ngunulumbunune chikuma chami. 11 Natwaminyinyine maliji jenu; napanjikile yambo yenu ya mana shimbu nwafupile chize munwamba. 12 Nanupanjikile, kumanyi niumwe waholesele Yombi; niumwe hakachi kenu wakumbulwile maliji jenyi. 13 Kanyamenu kuchina munwamba ngwenu, Hitwawana mana; Zambi mamukumba, hi atu ko. 14 Katalikishile maliji jenyi kuli yami kashika ni yami chishi kumukumbulula ni maliji jenu. 15 Hahola, kakumbulwile nawa; keshi nilimwe liji. 16 Mba yami ngushimbule mumu o kahanjikile? Mumu kanamana lume, ni kuhanjika ka? 17 Chipwe yami mungukumbulula; mungulumbununa chikuma chami. 18 Mumu ngunazale too ni maliji; spiritu mu chima kanangushinjika. 19 Mbunge yami yapwa ngwe vinyu yize kuyishi ni kuze muyituhukila; yapwa ngwe tuku jaha ja malambu jize jinambe kupulika. 20 Changutamba kuhanjika hanga ngukahwime; changutamba kupakula kanwa liami ngukumbulule. 21 Chichi kupwa ni katonde kuli ni umwe; chichi kupepieka niumwe. 22 Chanyingikine kupepieka. Nyi munguchilinga Tangi yami nikawashi mangusulisa.
8-14 JANEIRO
YIKUMA YILEMU YA MU LIJI LIA ZAMBI | YOMBI 34-35
Muze Akutusolola Katonde
(Yom 34:10) Kashika ngwivwenu, enu akwa yinyingi, chipwe kusuku ni Zambi akalinge ungulungulu, chipwe kusuku ni Mukwa-Ndundo-Jeswe akalinge chize chahenga.
Zambi Kuchi Apwa?
Zambi mashimbu eswe kakuzanga ululi. Kwamba pundu, “chipwe kusuku ni Zambi akalinge ungulungulu, chipwe kusuku ni Mukwa-Ndundo-Jeswe akalinge chize chahenga.” (Yombi 34:10) Upatwilo wenyi uli wa ululi, ngwe chize mukwa-kwimba masamu ambile muze ahanjikile kuli Yehova ngwenyi: “Yena mupatwila atu ni ululi.” (Samu 67:4) Amu “Yehova kakutala ku mbunge,” kashika niumwe mahasa kumwonga ni ulembekese wakwihi, mumu iye mashimbu eswe kakunyingika umwenemwene nawa kakupatwila ni ululi. (1 Samuele 16:7) Kuhiana yeswe, Zambi nawa kananyingika yuma yeswe ya uhenge ni kalimbalimba yize ya kulingiwa hano hashi, chikwo nawa iye kanalakenya ngwenyi, kwasala hakehe “yingulungulu kumakaateta mu chifuchi.”—Yishima 2:22.
(Yombi 34:21-26) Mumu meso jenyi kanamono ndako ja mutu; kakumona ngano jenyi jeswe. 22 Kukushi kulaa, hanji milima pwi kuze akwa kulinga yipi mahasa kuswama. 23 Hanasela kuli mutu mweswe tangwa lize maya akamupatwile kumeso ja Zambi. 24 Kakupalwola akwa ndundo ni kusopa ka. Kakusalakanyisa akwo mu yitwamo yo. 25 Chocho, se kananyingika yitanga yo, kakwanunguna ha ufuku, kakwafwenyona. 26 Kakualamba mumu ha ungulungulu wo kumeso ja atu,
Yika Wanangana wa Zambi Mukalinga Muze Muwiza?
5 Yika Yehova makalinga? Haliapwila Yehova kanahane uhashi kuli yingulungulu hanga alumune yitanga yo. (Izaia 55:7) Chipwe ngwe yuma ya mwakono kwasala hakehe hanga ayonone, nihindu, yingulungulu mahasa kwalumuna yitanga yo. Mba yika muyikalingiwa kuli waze akulituna kwalumuna yitanga yo ni kukwasa yuma ya mwakono ndo ha mashimbu a luyinda munene? Yehova kanalakenya kwonona yingulungulu eswe hano hashi. (Tanga Samu 37:10.) Musono, atu anji kakulilongesa kusweka yuma yipi yize akulinga, nawa kanji-kanji keshi kwazangamisa. (Yombi 21:7, 9) Alioze Mbimbiliya yakutulweza ngwo: ‘Meso ja Zambi kanamono ndako ja mutu; kakumona ngano jenyi jeswe. Kukushi kulaa, hanji milima pwi kuze akwa kulinga yipi mahasa kuswama.’ (Yombi 34:21, 22) Kashika, kutuchi kuhasa kuswekela Yehova nichimwe. Iye mahasa kumona yuma yeswe yize yingulungulu akulinga. Muze Armagedone muyikapalika, mutukatala haze apwile, alioze kutuchikaamona nawa. Ayo keshi kapwako nawa ku miaka yeswe!—Samu 37:12-15.
(Yombi 35:9, 10) Atu kakulitetwola mumu ha kwoka yihungumiona; kakusanyika chikwashi mumu ha kwoko lia mukwa tachi. 10 Alioze ni umwe kakwamba ngwenyi, Zambi Tangi yami kulihi ali? Yoze wakutwaha miaso ha ufuku,
(Mateu 28:19, 20) Kashika, yeenu nulongese atu a ku mavungu eswe hanga apwe tumbaji, ni kwapapachisa mu jina lia Tata, ni lia Mwana, ni lia spiritu yisandu, ni kwalongesa hanga ononokene yuma yeswe yize nanutumine. Nyingikenu ngwenu nguli hamuwika ni yenu matangwa eswe, ndo ku songo lia miaka yino.
Shina kuli Chimwe Chize Muchihasa Kukutalingisa ha Kukaula Yesu?
19 Shina twakumona kapinda wacho musono? Ewa. Atu anji musono kakutalinga mumu yetu kutushi kulinga yuma ya mafwefwe. Ayo kakwamba ngwo, muze analingi voto mu chifuchi, twatamba kusakula umwe nguvulu. Alioze yetu tunanyingika ngwetu, nyi twasakula umwe mutu hanga apwe kasongo ketu, acho tunalituna Yehova. (1 Samue. 8:4-7) Atu mahasa kunyonga nawa ngwo, twatamba kutunga mashikola, mashipitali ni kulinga milimo ya kuhana-hana ukwaso kuli atu. Ayo kakwivwa kupiha muze akutumona mutulihana mu mulimo wa kwambujola, chakuhona kulinga yize muyihwisa lamba lia atu ha mashimbu wano.
20 Yika twatamba kulinga hanga tuchine kutalinga? (Tanga Mateu 7:21-23.) Chuma chilemu kuli yetu, chili kulinga mulimo uze Yesu atuhele. (Mateu 28:19, 20) Kutwatambile kulaluka ni yuma ya mafwefwe hanji ni yuma yikwo ya hano hashi. Twakuzanga atu, nawa twakulipikala ha milonga yo, alioze tunanyingika ngwetu jila yipema yakukwashilamo enyembo jetu, yili kwalongesa hakutwala ku Wanangana wa Zambi ni kwakwasa hanga apwe masepa ja Yehova.
Kuhengwola Yikuma Yilemu ya mu Mbimbiliya
(Yombi 35:7) Nyi uli mukwa ululi, yika unamwehe?
Kulihana Chenu ni Mbunge Yeswe Chikahalise Yehova!
3 Mukweze yoze te avuluka ngwo Elihu yapanjika kanawa lusango wa Yombi ni wa malunga atatu. Muze ahwishile kuhanjika, Elihu yahula Yombi hakutwala kuli Yehova ngwenyi: “Nyi uli mukwa ululi, yika unamwehe? Yika anatambula ku kwoko lie?” (Yombi 35:7) Shina Elihu neye kafupile kwamba ngwenyi tachi jize twakusa hanga tuwayile Zambi jili jangwaza? Ka. Yehova kakakumikine Elihu ngwe chize alingile kuli malunga jacho. Elihu kambile yuma yalisa. Iye kambile ngwenyi, Yehova keshi kufupa hanga tumuwayile. Yehova kafupile nichimwe, kanakumbana. Kukushi nichimwe chize mutuhasa kumulingila hanga chimupwise pichi chipwe kumutakamisa. Kwamba umwenemwene, utotombo weswawo tuli nawo Zambi mwe wakutwahawo, nawa kakumona chize twakuuzachisa.
(Yombi 35:1-16) Elihu yaweza ngwenyi, 2 Unamono chino ngwe chinalite? Unambe ngwe, Ululi wami wahiana uze wa Zambi. 3 Kashika unahula ngwe, Chika ngunafumbuka? Nyi kachi chavulumwine kachi chipema chimwe ngunamono te? 4 Mungukukumbulula ni masepa je hamuwika. 5 Tala ku malilu, umone; tala malelwa, chize hasuha kukuhiana yena. 6 Nyi hiwavulumuna, yika muhasa kulinga ha kulimika nenyi? Nyi hiwokesa utanguko we yika unamulingi? 7 Nyi uli mukwa ululi, yika unamwehe? 8 Ungulungulu we watwala kuli mutu ni mukwenu, ni ululi we unatwala kuli umwe mwana mutu. 9 Atu kakulitetwola mumu ha kwoka yihungumiona; kakusanyika chikwashi mumu ha kwoko lia mukwa tachi. 10 Alioze ni umwe kakwamba ngwenyi, Zambi Tangi yami kulihi ali? Yoze wakutwaha miaso ha ufuku, 11 yoze wakutulongesa kuhiana tushitu a mu yambu; kakutwaha mana kuhiana tujila a mwilu. 12 Kwenako kakuteta alioze iye kakumbulwile, mumu hakulengumuka cha atu api. 13 Zambi kechi kwivwa muteto wamo-komoko wate; Mukwa-Ndundo-Jeswe kechi kuchisa mbunge. 14 Mba chahiana muze muwamba ngwe, Chamumwene, chikuma chili kumeso jenyi, ngunamutwaminyina. 15 Ni haliapwila mumu kalambile ni utenu, mumu kasungile utanguko, 16 kashika Yombi kanapakula kanwa lienyi akahanjike maliji amoko-moko; kanokesa maliji, alioze chinyingi chakuhi.
15-21 JANEIRO
YIKUMA YILEMU YA MU LIJI LIA ZAMBI | YOMBI 36-37
Mumu Liaka Yena Muhasa Kufuliela Ha Chilakenyo Cha Zambi Cha Mwono Wa Mutolo?
(Yombi 36:26) Kuma, Zambi munene; kutwamunyingikine. Kutwahashile kunyingika kwalula cha miaka yenyi.
Shina Mutuhasa Lume Kunyingika Zambi?
ZAMBI KALI WA MUTOLO: Mbimbiliya yakwamba ngwo, Zambi katwamako “chize ku miaka ya mutolo ndo ku miaka ya mutolo.” (Samu 90:2) Mu maliji akwo, Zambi keshi uputukilo nawa keshi songo. Kashika atu keshi kuhasa “kunyingika kwalula cha miaka yenyi.”—Yombi 36:26.
Kuchi kunyingika chino muchikukwasa? Zambi kanalakenya kukwaha mwono wa mutolo nyi musa tachi hanga umunyingike kanawa. (Yoano 17:3) Te muchikaliwa kujikijila ha chilakenyo chino nyi te Zambi keshi wa mutolo. “Mwanangana wa Miaka yeswe” mwe wika mahasa kumanunuka chilakenyo cha mutapu au.—1 Timoteu 1:17.
(Yombi 36:27, 28) Kakukoka masoto a meya, kakwalumuna mbundu yikapwe vula 28 yoze wakupukumukina kwilu, nikunoka hali atu wa kulumbama.
Shina Wakuwahilila ha Yawana Yize Zambi Hanatwehe?
6 Meya, hano hashi hatwama meya mumu Zambi kasele tangwa ha chihela chalita. Nyi Zambi kasele tangwa hakamwihi, kachi meya eswe hano hashi hanomu ni mwalwa, kachi hanasasaminya chinji, nawa kachi hali hahululu. Chikwo nawa, nyi tangwa kalisele kusuku chinji ni hashi, kachi yuma yeswe hano hashi hiyinalikakaminya ni chishika. Chikwo nawa, hano hashi kachi hali wika chiwe. Mutapu uze Yehova atangilemo hashi, wakukwasa hanga meya ahone kuma, yino yakukwasa hanga yitangiwa yinunge ni mwono. Kuchi yino yakulingiwa? Mwalwa wakukoka meya mu kalunga-lwiji ni mu mangiji hanga apwe malelwa. Akwa-mana kakutayiza ngwo, hita mwaka mwalwa wakukoka meya anji, kuhiana waze ali mu yitende ni mu mangiji. Meya wano eswe, kakupwa ha matetela ha matangwa kumi. Hachino, meya jacho manoka ngwe vula hanji mbundu ni kufuna nawa mu kalunga-lwiji ni mu mangiji. Muze mwalwa wakusasaminya, meya jacho kakuhiluka cheka ha matetela. Yino yeswe yinasolola ngwo, Yehova kali Zambi wa ndundo ni mana.—Yombi 36:27, 28; Chilu. 1:7.
(Yombi 36:4, 22) mumu pundu, maliji jami hi amahuzako; umwe mukwa yinyingi yeswe kwali ni yena. 22 Zambi kananangama ni ndundo jenyi; longeshi muka alita nenyi?
(Yoano 17:3) Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.
Nunga ni Kukolesa Kutalatala Che
16 Kutalatala cha mwono wa mutolo chili chawana chilemu cha kuli Zambi. Tunashimbwila yuma yipema ya kulutwe lia matangwa yize tuli ni shindakenyo ngwetu, muyilingiwa pundu. Kutalatala chetu chapwa ngwe ankora, yize yakutukwasa kumana ngu, muze tunapalika mu yipikalo, yihungumiona ni muze akufupa kutushiha. Kutalatala chetu chapwa nawa ngwe tepa lize liakutukwasa kufunga manyonga jetu ku yuma yipi ni kulikwachilila ku yuma yalita. Kutalatala cha mu Mbimbiliya, chakutukwasa kunyingika kanawa Zambi ni kumona zango lize iye akwete hali yetu. Mutuzuka yiwape yinji ku mwono wetu nyi twakolesa kutalatala chetu.
Kuhengwola Yikuma Yilemu ya mu Mbimbiliya
(Yombi 37:20) Akamulweze yami ngunazange kuhanjika? Te mutu kakulizangisa akamujimise nyi?
it-1 522
Kulihanjikisa
Ha mashimbu akunyima, sango kapwile ni kujihanjika kuli mutu ni mutu mu majila eka ni eka. Mu yihela yinji, sango ja mu chifuchi hanji ja yilambala kapwile nikujimwanga kupalikila mu kuhanjika. (2Sa 3:17, 19; Yom 37:20) Atu waze apwile ni kuya wenyi, kapwile ni kutela sango ja yifuchi muze te akuhwima hanga atambule cha kulia, meya ni yuma yikwo mu mbonge yacho, hanji kuze yizavu yo apwile ni kusakula kuhwima. Muze apwile ni kwenda mu yizavu, ayo kapwile ni kuya ku yihela yisuku ha kupalika mu Ásia, África, Europa ni mu chifuchi cha Palestina. Ha chino, mumu lia wenyi uze apwile ni kuya, atu a mu mbonge yo, kahashile kwivwa sango ja mu yifuchi yeka ni yeka. Chikwo nawa, atu kahashile kwivwa sango ja mu chifuchi hanji ja yifuchi yikwo mu chitanda cha mbonge.
(Yom 36:1-21) Elihu yaweza nawa ngwenyi, 2 Lihumikize hakehe ni yami mba mungukulweza, mumu nguchili ni chimwe kuhanjikila Zambi. 3 Mungusaka mana jami kusuku, ni kutayiza ngwami, Tangi yami mukwa-ululi; 4 mumu pundu, maliji jami hi a mahuza ko; umwe mukwa yinyingi yeswe kwali ni yena. 5 Zambi aye mukwa ndundo alioze kalelesele niumwe; iye mulemu ni tachi ni yinyingi. 6 Keshi kulindulula yingulungulu ni mwono; kakuhana kuli akwa lamba chize chinalite. 7 Kachijile meso jenyi kuli akwa ululi, alioze chimuwika ni mianangana ha ngunja jo kakuakolesa ndo ku miaka, no kakunangama. 8 Nyi makashiwa ni malenge hanji maalimba mu mihupu ya luyinda, 9 maalumbunwina yitanga yo ni utanguko wo ngwenyi, Nunalingi ni kulilengela. 10 Kakujikula matwi jo akalilongese; kakuayula ahichike uhenge. 11 Nyi mapanjika ni akamulingile mba mamanununa matangwa jo nikuwaha, ni miaka yo ni yuma yipema. 12 Nyi kapanjikile makuwa ni katana; mafwa ni chinyingi chakuhi. 13 Waze ali ni mbunge ja yitanganyanyi kakufunga utenu; katelele aakwase muze maakasa. 14 Mafwa ni ukweze, ni mwono wo muusula ni sonyi. 15 Kakupulula akwa luyinda ni luyinda wo; ku lamba lio kakujikula matwi jo. 16 Ku huli lie nawa wakukokele ndo ku chihela chimwe chinene kuze kuhona chakuhi. Chize asele ha mesa ye cheswe cha maji wika. 17 Alioze yena hiwatambula liakulu lamba lize akuhana kuli yingulungulu. Upatwilo wa ululi hiwakukwata. 18 Kanyama kuchina ufwatulo muukukokela ku kulenya. Kanda utayiza unene wa upite kukupiangula. 19 Upite we muukupulula ku yikola nyi; hanji tachi jeswe ja ndundo je? 20 Kanda wivwa usona wa ufuku, muze akutusula atu kuma kwo. 21 Nyonga kanawa, kanda ukondolokela ku uhenge, mumu chenacho watongola hi luyinda ko.
22-28 JANEIRO
YIKUMA YILEMU YA MU LIJI LIA ZAMBI | YOMBI 38-39
Shina Wakuwana Mashimbu a Kuhengwola Yitangiwa?
(Uputukilo 1:10, 12) Zambi yaluka mavu omu ngwenyi, Hashi. Kuswila cha meya yachiluka ngwenyi, Kalunga-lwiji, mba Zambi yachimona ngwenyi, Chinapeme. 12 Mba ha mavu hasokele mwambu, ni yiputa yakwima mbuto nikulita ni milali yayo, ni mitondo yakwima mihuko yikwete mbuto yayo muchima nikulita ni milali yayo. Mba Zambi yachimona ngwenyi, Chinapeme.
(Yombi 38:5, 6) Iya wayulile cheseko chaho? Kwanyingikine? Iya watachikileho muhipu? 6 Akoleselele fundamentu hahi? Iya wasele liwe liaho lia mbango,
Shina Uli ni Mbunge ya Kutwaminyina Muli Yehova?
7 Ha kulumbununa chize Yehova atangile hashi, Mbimbiliya yinambe ngwo, iye wasele “cheseko chaho,” wakolesele “fundamentu” ni kusa “liwe liaho lia mbango.” (Yombi 38:5, 6) Iye nawa kasele mashimbu hanga ahengwole yuma yize atangile. (Uputu. 1:10, 12) Achinyonga chize angelo evwile muze amwene yuma yeswe yize Yehova atangile! Ayo kanakawahilila chinji. Kashika Mbimbiliya yinambe ngwo, “alikwijile ni chiseke.” (Yombi 38:7) Yika twalilongesa? Twalilongesa ngwetu, kwapalikile tununu a tununu twa miaka mba Yehova ahwise kutanga yuma, yuma yacho yapemene chinji mumu kayitangile hakehe-hakehe. Kashika, muze amanyine ni kuyitala, Yehova yamba ngwenyi “yinapeme chikolo.”—Uputu. 1:31.
(Yombi 38:7) muze matongonoshi a chimene embile hamuwika ni ana a Zambi eswe alikwijile ni chiseke?
Uhindukilo Unasolola Zango, Mana ni Uhomboloji wa Zambi
2 Chitangu, Yehova yatanga Mwanenyi, Yesu hanga akalakale hamwe nenyi. Kupalikila muli Yesu, “yuma yeswe yatangiwile” hakachi ka yuma yacho, hali ni angelo anji. (Kolo. 1:16) Yesu kanakawahilila chinji hakukalakala ni Tato. (Yishi. 8:30) Angelo no kanakawahilila chinji. Ayo kamwene chize Yehova ni Chilangaji wenyi mupema, Yesu, atangile malilu ni hashi. Kuchi angelo evwile? Ayo ‘kalikwijile ni chiseke’ ha mashimbu waze te anatange hashi. Kwamba umwenemwene, ayo kanungine ni kuwahilila ndo muze Yehova ahwishile kutanga yuma yeswe. Angelo kota kanakawahilila chinji muze Yehova ni Mwanenyi atangile mutu, chitangiwa chilemu hano hashi nawa chakasula. (Yombi 38:7; Yishi. 8:31) Yitangiwa yeswayi, yasolwele zango ni mana a Yehova.—Samu 104:24; Roma 1:20.
(Yombi 38:32-35) Muhasa kutemwisa matongonoshi a Nazarote ha tungonde two? Muhasa kusongwela matongonoshi a Ursa ni ana jo? 33 Unanyingika shimbi ja malilu? Muhasa kukolesa chiyulo cho hano hashi? 34 Muhasa kusanyika malelwa hanga sanga lia meya likufuke? 35 Muhasa kutumina njaji hanga ende, akatee kuli yena ngwo, Yetu uno?
Lilongese Hakutwala kuli Yehova Kupalikila mu Yitangiwa
8 Mutuhasa kujikijila hali Yehova. Yehova kakwashile Yombi hanga amone ngwo, mahasa kujikijila muli iye. (Yombi 32:2; 40:6-8) Ha lusango yoze ahanjikile ni Yombi, Yehova yatongola yuma yinji yize atangile ngwe tutongonoshi, malelwa ni mihenyo. Yehova kahanjikile nawa hali tushitu ngwe ngombe wa muyambu ni kavwalu. (Yombi 38:32-35; 39:9, 19, 20) Yuma yino yeswe yalongesele Yombi hi wika ko hakutwala ku ndundo ja Yehova, alioze hakutwala nawa ku zango ni mana jenyi. Hanyima lia lusango wacho, Yombi yaputuka kujikijila chinji hali Yehova kuhiana kunyima. (Yombi 42:1-6) Chizechene nawa, muze mutuhengwola yitangiwa, muchitukwasa kunyingika ngwetu, Yehova kakwete mana ni ndundo jinji kuhiana yetu. Chikwo nawa, mutupwa ni shindakenyo ngwetu, makahwisa lamba lieswe lize twakumona. Kunyingika chino muchitukwasa kujikijila chinji hali Yehova.
Kuhengwola Yikuma Yilemu ya mu Mbimbiliya
Yombi 38:8-10) Iya wayikile kalunga-lwiji ni yajilo muze apukukile ngwe ku jimo? 9 Muze natengele malelwa uzalo wenyi ni milima yapwile mahina jenyi, 10 muze namusele manjiza ngwe mapito ni njalo,
it-2 199
Mukwa-kusa shimbi
Yehova kali mukwa-kusa shimbi. Kwamba umwenemwene Yehova kali mwenya shimbi wa hashi heswe. Iye mwe wasele shimbi jize jakusongwela yitangiwa (Yom 38:4-38; Sam 104:5-19) kuchingako mwono wa tushitu (Yom 39:1-30), mutu neye ngwe chitangiwa cha Yehova, chize chili ni mana a kunyingika yuma ya ku spiritu, kali mwishi lia shimbi ja Zambi. (Ro 12:1; 1Co 2:14-16) Chikwo nawa, shimbi ja Yehova jakusongwela angelo mu malilu.—Sam 103:20; 2Pe 2:4, 11.
Kutushi kuhasa kwehuka shimbi ja Yehova jize jinatale ha yitangiwa yenyi. (Jer 33:20, 21) Ha yitangiwa yeswe, shimbi jenyi japwa jipema ni ja ujikijilo. Hashi heswe, shimbi ja Yehova jili jipema nawa mutuhasa kujijikijila. Chakutalilaho, mumu lia kunyingika shimbi jimwe hakutwala ku yitangiwa, akwa-mana, kakuhasa kwalula kulisunga cha kakweji, ma planeta ni yuma yikwo ya mu malilu. Atu waze akwehuka shimbi hakutwala ku yitangiwa, kakulisa mu ponde. Chizechene nawa, Shimbi ja mu Mbimbiliya keshi kujalumuna, chikwo nawa atu waze akwehuka shimbi jacho, kakumona lamba. Kutushi kuhasa kwehuka shimbi ja Zambi jize jinatale hali atu chakuhona kumona lamba. “Zambi keshi kuheha nenyi. Mumu cheswacho mutu makuwa, chenacho nawa makacha.”—Nga 6:7; 1Ti 5:24.
(Yombi 39:1-22) Yena unanyingika mwaka wakusema cha pembe ja mu yambu? Kuwakutala kusema cha kai? 2 Wakwalula tukweji two twa ufumba ni kunyingika tangwa lize masema, 3 muze mautama ni kusema ana jo hanga misongo yo yikasule? 4 Ana jo makolakola, matatuka ha yana. Kakukatuka kuli yisemi jo kahilukile nawa. 5 Yoze watuswile chimbulu wa muyambu iya? Iya wakasulwile chimbulu wa tambu 6 yoze namuselele mahio mu puya akatwame mu yana ya mungwa? 7 Kakulelesa zungo lia chihunda; kevwile kukololoka cha mukwa kwendesa. 8 Kakwenda hakachi ka milundu kwe kukelo jenyi; kakufupafupa cheswacho muchipwa cha wisu. 9 Mbau mazanga kukulingila? Malihumikiza ha ufuku ku chililo che? 10 Muhasa kumukashila ni mihupu ku mihanga? Makukaula akakuchipile yikulo? 11 Mumufuliela mumu kali ni tachi? Mumukunjika milimo ye? 12 Unamufuliela te mahiluka ni kukunehena mbuto ye ku chizungwilo? 13 Mapulwa ja avestruja kakuapupula ni kulilengela, alioze te mapulwa ni mangona ja zango? 14 Iye kakuhichika monda jenyi hashi akavume ha mavu. 15 Kanavulama hanji kulu limwe muliashiha hanji kashitu umwe maaliata. 16 Kakulinga ni uswi kuli ana jenyi ngwe hi ninyenyi ko. Chipwe milimo yenyi muyitoka hindu keshi woma, 17 mumu Zambi hanamuvulamisa mana; kamuhele yinyingi. 18 Nyi mapwa ni mbunge ya kuchina, kakuseha kavalu ni mukwa kumwendesa. 19 Yena wakuhana ndundo kuli kavwalu? Yena wakusa tachi ku kota yenyi? 20 Yena wakumutumbwisa ngwe pasu? kulihembula chenyi cha wanangana kole ni woma. 21 Kakulihalila mu chikulo nikulikumbukila ni tachi jenyi. Kakutuhuka akatakane ni yitwa ya jita. 22 Woma kakuuseha; kevwile mwongo. Keshi kuchina katana.
29 JANEIRO–4 FEVEREIRO
YIKUMA YILEMU YA MU LIJI LIA ZAMBI | YOMBI 40-42
Yize Mutuhasa Kulilongesa Ha Chilweza Cha Yombi
(Yombi 42:1-3) Henaho Yombi yakumbulula kuli Yehova ngwenyi, 2 Ngunanyingika nunahase kulinga yuma yeswe, nichimwe chuma muchifuwa chize munupala kulinga. 3 Iya yono wakujimbalisa mana ni maliji keshi yinyingi? Kuma, hinamba chize kuchangulumbunukine; yuma yanguhiana ya kukomwesa, te chayinyingikine.
w10 15/10 3-4 ¶4-6
“Iya Yoze Unanyingika Mana Ja Yehova?”
4 Muze mutupukuna ha yize Yehova akulinga kutwatambile kumupatwila ni kulita ni shimbi ja atu. Chikuma chino chakusoloka muze Yehova ambile ha Mukanda wa Samu 50:21 ngwenyi: “Wangumwene ngwe nguli mukwenu.” Ngwe chize asonekene umwe mukwa mana ha miaka 175 kunyima, “Atu kakupatwila Zambi kulita ni shimbi jo ene jize ayo akunyonga ngwo jinalite.”
5 Twatamba kukeya tuchine kupatwila Yehova kulita ni nyonga lietu hanji ni chize twakwivwa. Mumu liaka? Mumu ha kutanga Mbimbiliya, mutuhasa kumona yuma yize Yehova alingile ngwe kuyalitele kulita ni manyonga jetu. A-Izalele a ku shakulu, kaholokele mu muheto uno ni kunyonga yize kuyalitele ha chize Yehova apwile ni kwalingila yuma. Tala yize Yehova aalwezele: “Hindu nwakwamba ngwenu, ndako ja Mwene hi ja ululi ko. Ivwenu haliapwila enu akwa munyiachi wa Izalele. Kumanyi ndako jami hi ja ululi ko nyi? Ngwami ja yenu je kujalulamine?—Eze. 18:25.
6 Chuma chize muchitukwasa kwehuka kuholokela mu muheto wa kupatwila Yehova kulita ni manyonga jetu, chili kutayiza ngwetu tuli yihenge, chikwo nawa, manyonga jetu kali ni haze akusulila. Yombi kafupiwile kulilongesa chikuma chino. Ha mashimbu waze Yombi te anamono lamba, iye kasele tachi hanga akumbe kusakalala, chocho yalihulikila chinji hali iye mwene. Iye kechele kulihulikila ha chikuma chilemu. Chipwe chocho Yehova kamukwashile kumona yuma mu jila yalita, ha kumuhula yihula kuhiana 70 yize Yombi kakahashile kukumbulula. Yehova yasolola ngwenyi, yinyingi ya Yombi yapwile ni haze te yakusulila. Yombi yalikehesa ni kutayiza nyonga lia Yehova.—Tanga Yombi 42:1-6.
(Yombi 42:5, 6) Nevwile ni matwi jami lufuma wenu, alioze haliapwila ngunanumono zwalala; 6 Kashika ngunalilelesa, ngunalikonyeka mu fufuta ni uto.
Nunga ni Kulihulikila ha Chikuma Chilemu
12 Shina chapwile kuhona zango ha yize Yehova ahanjikile ni Yombi chipwe ngwe te kanamono lamba linji? Ka, mumu chipwe Yombi mwene kakanyongene chocho. Yombi kapanjikile Yehova ni kulemesa chiyulo chenyi. Kashika ambile ngwenyi: “Ngunalilelesa, ngunalikonyeka mu fufuta ni uto.” (Yombi 42:1-6) Chitangu, mukweze yoze te avuluka ngwo Elihu kakwashile nawa Yombi hanga alumune nyonga lienyi. (Yombi 32:5-10) Muze Yombi hapanjika chiyulo cha zango cha Yehova, chocho yalumuna nyonga lienyi, Yehova yasolola kuli akwo ngwenyi iye kevwile kuwaha chinji ha kushishika cha Yombi.—Yombi 42:7, 8.
(Yombi 42:10-12) Mba Yehova yahilwisa kuwaha cha Yombi muze iye halembela akwo. Yehova yamwaha yisuho yiali ya chize apwile nacho kushi. 11 Henaho kwejile kuli iye ana-akwo ni ayayo ni mandumbu jenyi eswe ni waze amunyingikine kushi. Yatambula kulia hamwe nenyi mu zuwo lienyi ni kumunangamisa ni kumulembejeka ha yikalu yeswe yize Yehova anehene hali iye. Mutu ni mutu yamunehena mbongo ni kazeya ka oru. 12 Yehova aye yawahisa matangwa a Yombi a kusula kuhiana a uputukilo. Wapwile ni kumi ni tununu awana (14,000) a mapanga, ni tununu asambano (6,000) a tumelu, ni kanunu (1,000) ka makanga a ngombe, ni kanunu (1,000) ka yihwo ja yimbulu.
(Tiangu 5:11) Twakuavuluka ngwetu, Akwa kuwaha, waze anyongonwene. Hinunevu ha kunyongonona cha Yombi. Hinunamono songo lia mwe Mwene, iye wa too ni vumbi ni keke.
“Twaminyina Yehova”
17 Yombi kali umwe wa kuli tuvumbi twa Yehova yoze wanungine ni kusolola hamu ni tachi muze apalikile mu yipikalo yinji. Mu mukanda uze asonekenene A-Hepreu, postolo Paulu yatongola tuvumbi akwo anji, ha kwavuluka ngwo, “mbunga yinene ya yela.” (Hepre. 12:1) Ayo eswe kapalikile mu yipikalo yinji, chipwe chocho, yanunga ni kushishika kuli Yehova. (Hepre. 11:36-40) Shina kunyongonona cho ni tachi jize asele yayile mu meya? Ka, kuyakayile mu meya! Chipwe ngwe ha mashimbu jacho o kakamwene kumanunuka cha yilakenyo yeswe ya Zambi, nihindu kanungine ni kutwaminyina muli Yehova. Chikwo nawa, mumu lia kunyingika ngwo kapwile ni utayizo wa Yehova, yino yaehele shindakenyo ngwo, te mamona umanunuko wa yilakenyo yenyi yeswe. (Hepre. 11:4, 5) Yilweza yo muyihasa kutwaha tachi hanga tununge ni kutwaminyina muli Yehova.
18 Musono, tuli mu chifuchi chize chinayi ni kupihia hita shimbu. (2 Timo. 3:13) Satana kananungu ni kusa tuvumbi twa Zambi mu cheseko. Chipwe ngwe mutupalika mu yipikalo yeswayo, nihindu twatamba kusa tachi hanga tulingile Yehova ni mbunge yetu yeswe ni kutwaminyina “muli Zambi ya mwono.” (1 Timo. 4:10) Twiwulukenu ngwetu, mutapu uze Yehova awahishilemo Yombi, unasolola pundu ngwo Zambi kapwa “wa too ni vumbi ni keke.” (Tia. 5:11) Ni yetu mutuhasa kununga ni kushishika kuli Yehova ni kupwa ni shindakenyo ngwetu, iye makawahisa eswe “waze akumufupa.”—Tanga A-Hepreu 11:6.
Kuhengwola Yikuma Yilemu ya mu Mbimbiliya
(Yombi 42:7) Muze Yehova hanahajika maliji ano ni Yombi, yamba kuli Elifaze Ka-Tamane ngwenyi, Ufwatulo wami unavunduka hali yena ni hali masepa je aali mumu kunwahanjikile kanawa ha kutwala kuli yami ngwe kavumbi kami Yombi walingile.
it-1 831
Kukekuna
Yombi kanungine ni kushishika chipwe muze akwo te akumukekuna. Alioze iye yapwa ni nyonga lipi ni kuhengesa, chocho yamukwasa. Elihu kambile kuli iye ngwenyi: “Iya walifwa ni Yombi? Kakunwa lenyo ngwe meya.” (Yom 34:7) Yombi yalihulumba ha mutapu uze te makumbulula, alioze kakalihulikilile ha mutapu uze Zambi akunyonga. (Yom 35:2; 36:24) Muze masepa jenyi atatu te anamukekuna, Yombi yanyonga ngwenyi kanakekuna iye, chakuhona kunyonga ngwo kanakekuna Zambi. Ha kunyonga chino, Yombi kapwile ngwe mutu yoze wakutayiza kukekuna ni kuwahilila nacho ngwe kananu meya. Kulutwe, Zambi yalweza Yombi ngwenyi, atu waze anamukekuna kanakekuna Zambi hi Yombi ko. (Yom 42:7) Chizechene nawa, Yehova kalwezele profeta Samuele muze A-Izalele alitunyine Mwanangana wo ngwenyi: “Kalitunyine yena, alioze yami analitunu. Kazangile ngupwe mwanangana wo.” (1Sa 8:7) Yesu neye kalwezele tumbaji twenyi ngwenyi: “Makanuvwila kole kuli akwa-mavungu eswe mumu lia jina liami.” (Mat 24:9) Kunyonga ha chino muchikwasa mukwa-Kristu kunyongonona mukukekuna ni nyonga lialita ni kuyuka kulutwe mumu lia kunyongonona chenyi.—Lu 6:22, 23.
(Yombi 42:1-17) Henaho Yombi yakumbulula kuli Yehova ngwenyi, 2 Ngunanyingika nunahase kulinga yuma yeswe, nichimwe chuma muchifuwa chize munupala kulinga. 3 Iya yono wakujimbalisa mana ni maliji keshi yinyingi? Kuma, hinamba chize kuchangulumbunukine; yuma yanguhiana ya kukomwesa, te chayinyingikine. 4 Panjika mba munguhanjika. Mungunuhula mba yenu munukumbulula. 5 Nevwile ni matwi jami lufuma wenu, alioze haliapwila ngunanumono zwalala; 6 Kashika ngunalilelesa, ngunalikonyeka mu fufuta ni uto. 7 Muze Yehova hanahajika maliji ano ni Yombi, yamba kuli Elifaze Ka-Tamane ngwenyi, Ufwatulo wami unavunduka hali yena ni hali masepa je aali mumu kunwahanjikile kanawa ha kutwala kuli yami ngwe kavumbi kami Yombi walingile. 8 Kashika andenu kuji a ngombe shimbiali ni kuji a panga shimbiali nuye kuli kavumbi kami Yombi. Munulambula hali yenwene mulambu wa kulumba mba kavumbi kami Yombi manulembela mumu mungupanjika ku kulemba chenyi, chichi kunulinga nikulita ni uhepuke wenu mumu kunwahanjikile kanawa ha kutwala kuli yami ngwe kavumbi kami Yombi walingile. 9 Chocho Elifaze Ka-Temane, ni Bilidade Ka-Shuha, ni Zofare Ka-Nama yaya yalinga chize Yehova haatuma mba Yehova yatambula kulemba cha Yombi. 10 Mba Yehova yahilwisa kuwaha cha Yombi muze iye halembela akwo. Yehova yamwaha yisuho yiali ya chize apwile nacho kushi. 11 Henaho kwejile kuli iye ana-akwo ni ayayo ni mandumbu jenyi eswe ni waze amunyingikine kushi. Yatambula kulia hamwe nenyi mu zuwo lienyi ni kumunangamisa ni kumulembejeka ha yikalu yeswe yize Yehova anehene hali iye. Mutu ni mutu yamunehena mbongo ni kazeya ka oru. 12 Yehova aye yawahisa matangwa a Yombi a kusula kuhiana a uputukilo. Wapwile ni kumi ni tununu awana (14,000) a mapanga, ni tununu asambano (6,000) a tumelu, ni kanunu (1,000) ka makanga a ngombe, ni kanunu (1,000) ka yihwo ja yimbulu. 13 Yasema nawa ana a malunga shimbiali ni mapwo atatu. 14 Yaluka mukulwana Jemima ni wamuchiali aye Kezia, ni wamuchitatu Kerene-hapuku. 15 Muchifuchi cheswe kumwakapwile niamwe mapwo apema ngwe ana ja Yombi a mapwo. Tato yaha chihinga hamwe ni mandumbu jo. 16 Kulutwe lia chino Yombi watwamine ni mwono kulakaji ni makumi awana a miaka. Yamona ana jenyi ni ajikulu jenyi ndo chisemukwa cha muchiwana. 17 Mba Yombi yafwa, kanshinakaji wa matangwa anji.
5-11 FEVEREIRO
YIKUMA YILEMU YA MU LIJI LIA ZAMBI | MASAMU 1-4
Pwako Sali lia Wanangana wa Zambi
(Samu 2:2) Mianangana a hashi kakulilonga; akwa kuyula kakutwama punga ya kulimika ni Yehova ni yoze iye hanamuwahisa ni maji ngwo,
“Mungunyika Mavungu Eswe”
8 Kuchi atu akwivwa ha sango jacho? Atu anji kakulitunajo. (Tanga Samu 2:1-3.) Mavungu kali ni ufwatulo unji. Ayo kanalitunu Mwanangana yoze Yehova asakwile. Kuli ayo, sango ja Wanangana jize twakwambujola hi “sango jipema” ko. Manguvulu amwe kanakanjisa mulimo wa kwambujola! Chipwe ngwe manguvulu anji kakuliamba ngwo kakuwayila Zambi, nihindu ayo keshi kuzanga kwecha wata ni ndundo jize ali najo. Kashika, chizechene ngwe manguvulu ha matangwa ja Yesu, kulimika ni tumbaji twa Yesu ashishika, chili kulimika ni yoze Yehova awahishile.—Yili. 4:25-28.
(Sam 2:10-12) Kashika, enu mianangana, kanyamenu. Yenu ngaji a hashi, lilongesenu mana. 11 Vumbikenu Yehova ni woma. Wahililenu nikuchikima. 12 Mbejenu mwe Mwana, kuchina matenuka mba munukuwa mu jila, mumu utenu wenyi muusasaminya washi. Kawaha waze eswe akuswama muli iye.
Ehukenu Yuma ya Mafwefwe ya Hano Hashi Halihandununa
11 Kufupa kupwa ni upite unji. Nyi mbongo ni yuma yikwo yize tukwete yapwa ni ulemu unji ku mwono wetu, muchihasa kupwa chikalu kwehuka yuma ya mafwefwe. Kunyima lia mwaka 1970 Yela ja Yehova anji mu Malawi kahichikile hanji kwecha yuma yeswe yize apwile nayo, mumu kakazangile kulichinga mu chizavu cha mafwefwe. Alioze amwe kakazangile kwehuka yuma ya mafwefwe ha mukunda wa kuzanga mwono upema hanji upite. Pangi Ruth kanewuluka ngwenyi, “mandumbu amwe twayile no hamuwika mu zuwo lia ususu, alioze kulutwe lia matangwa yalinjisa mu yizavu ya mafwefwe ni kufuna ku mazuwo jo, mumu kakazangile kwecha yikumba ni kumona lamba mu zuwo lia ususu.” Alioze tuvumbi twa Zambi anji kalisa ni wano twavuluka. Ayo kakwehuka yuma ya mafwefwe, chipwe ngwe muyaahonesa mbongo hanji kutokesa yuma yeswe yize akwete.—A-Hepreu 10:34.
Kuhengwola Yikuma Yilemu ya mu Mbimbiliya
(Samu 1:4) Yingulungulu keshi kupwa chocho. O kapwa ngwe yizungu yize yakuhehuka ni fuji.
it-2 689
Yula
Yula yili chihanda chilemu chize chakufunga mbuto ngwe, cevada ni tiliku. Chipwe ngwe mu Mbimbiliya yula kakuyihanjika ngwe chilweza, yakusolola yitanga ya kusakula mbuto ngwe chize te akulinga ku shakulu. Muze akucha mbuto, yula te kakuyimbila, kashika chapwile chilayi chalita ha Yuma yize kuyishi ulemu, ha kuhandununa chuma chipema ni chipi.
Chitangu, musalo wakukwasa hanga yula yikatuke ku mbuto. Hachino, yula yapwile ni kuhehuka ni fuji ngwe fufuta. (Tala JOEIRAR) Chino chakusolola zwalala chize Yehova akuchiza atu jenyi mukachi ka yitanguke, atu api ni waze akulimika ni ululikiso wenyi. (Yom 21:18; Sam 1:4; 35:5; Iza 17:13; 29:5; 41:15; Hoz 13:3) Wanangana wa Zambi muukafwenya akwa-kole ja Zambi, chikwo nawa ayo makahehuka ngwe yula.—Da 2:35.
Yula kapwile ni kuyikunga ni kuyocha hanga yichine kuhiluka cheka ni fuji ni kupihisa mbuto. Chizechene nawa, Yoano Chipapachiso kambile hakutwala ku kunongesa cha akwa-mayingeleja a mahuza—mukwa-kusakula Yesu Kristu makakunga tiliku, “alioze mwambu makawocha mu kahia kaze kechi kahasa ku kajima”—Mat 3:7-12; Lu 3:17; tala DEBULHA; PALHA.
(Samu 3:1–4:8) Yehova, akwa kole jami hoka naye! Anji anangukatukila. 2 Anji kakwamba ha kutwala kuli yami ngwo, Ulamwino wakuhi hali iye muli Zambi. (Litulike.) 3 Alioze yena Yehova, uli lukepwe wa kungujingilika, uli ulemu wami, uli mukwa kuhetula mutwe wami. 4 Nakuteta kuli Yehova ni liji liami, iye kumangukumbulula ku mulundu wenyi usandu. (Litulike.) 5 Nakupomba, nakuya tulo, nakulaula mumu Yehova kakungufunga. 6 Chichi kwivwa woma wa kumi lia tununu twa atu aze akunguseleka. 7 Katuka Yehova. Ngulamwine Zambi yami. Mumu hiunalambe akwa kole jami eswe ha mbangachi, hiunapukula mazo ja yingulungulu. 8 Ulamwino wapwa wa kuli Yehova. Uwape we upwe hali atuje. (Litulike.) 4 Zambi ya ululi wami ungwivwe kama muze mungutambika. Muze napwile mu luyinda wanguselele muhela unene. Nguvwile kama vumbi, wivwe kulemba chami. 2 Enu ana ja atu ndo mwiji muka munwalumuna ulemu wami ukapwe sonyi? Ndo mwiji muka munuzanga kulenga chamokomoko nikufupa mahuza? (Litulike.) 3 Alioze nyingikenu ngwenu, Yehova hanalisela kuli iye mwene mukwa kumuwayila. Yehova kumevwa muze mungulemba kuli iye. 4 Ivwenu woma, kanda nuvulumuna. Lishimwinyenu ni mbunge ja yenwene ha mihela yenu nukahole. (Litulike.) 5 Lambulenu yitapo ya ululi, fulielenu muli Yehova. 6 Anji kakwamba ngwo, Iye matulweza chuma chipema? Yehova hetula pangu lia meso je hali yetu. 7 Hiunase chiseke mu mbunge yami, kuhiana chize mapwa nacho muze mbuto yo ni vinyu yo hiyoka. 8 Mungupomba, munguya tulo ni sambukila, mumu yena Yehova wika kuwakungutwamisa kawape.
12-18 FEVEREIRO
YIKUMA YILEMU YA MU LIJI LIA ZAMBI | MASAMU 5-7
Nunga ni Kushishika Chipwe Ngwe Mumona Yitanga Yipi ya Akwenu
(Samu 6:6,7) Yikatalo ngunevu ya mikuma yami. Ufuku weswe nakuulisa muhela wami ni masoji. Nakuhinjila muu wami ni masoji jami. 7 Meso jami hanalaa ni chinyengo; hanakukwoka ha mukunda wa akwa kole jami.
(Samu 6:2,9) Nguvwile kama vumbi Yehova, mumu nguli mulelu. Yehova nguwuke kama mumu yifwaha yami yinachikima. 9 Yehova hanevu kuliumbu chami; Yehova kumatambula kulemba chami.
Kutanga Mbimbiliya Muchihasa Kutukwasa Kunyongonona mu Yipikalo
7 Shina kuli umwe sepa hanji usoko we, yoze wakulingile yuma yize yakulemekene ku mbunge? Nyi chino hichinalingiwa kuli yena, chuma muchihasa kukukwasa chili kwiwuluka yize Mwanangana Ndawichi alingile muze mwanenyi Absalome, afupile kumutambula wanangana.—2 Sa 15:5-14, 31; 18:6-14.
8 (1) Kulemba. Muze unanyongo ha lusango yono, lweza Yehova chize unevu ha yize umwe akulingile mba yikulemeke ku mbunge. (Samu 6:6-9) Hanyima, mwite hanga akukwase kuwana shimbi jize mujihasa kukukwasa kunyingika chize mukumba kapinda wacho.
(Sam 6:10) Akwa kole jami eswe kumavwa sonyi; kumachikima chikolo; kumachinduluka akevwe sonyi nikawashi.
Pwako ni Shindakenyo Ngwo Uli ni Umwenemwene
3 Ufulielo wetu kuwatambile kukola wika ha mukunda wa zango lize lili hakachi ka atu ja Zambi. Mumu liaka? Achinyonga nyi ndumbu yoze uli mukulwana wa mu chikungulwila hanji pionelu malinga shili yinene. Nyi hanji ndumbwe makulemeka ku mbunge, hanji mapwa chitanganyanyi ni kwamba ngwenyi, kutushi ni umwenemwene. Yika mulinga? Shina mutalinga, nyi mununga ni kuwayila Yehova? Chili chilemu kwiwuluka ngwetu: Twatamba kukolesa ufulielo wetu hamukunda wa usepa wetu ni Yehova, mumu nyi twakolesa ufulielo wetu hamukunda wa yitanga ya akwetu kuuchi kukola. “Zuwo” lietu lia ufulielo, nelio kutwatambile kulitunga ni yikwata yilelu, chekwamba, ha chize twakwivwa ni chize twakunyonga. Alioze, twatamba kulitunga ni yikwata yilemu ngwe, shindakenyo ya yuma ni yinyingi. Yetwene, twatamba kupwa ni shindakenyo ngwetu, mu Mbimbiliya muli umwenemwene wa Yehova.—Ro 12:2
4 Yesu kahanjikile hakutwala kuli atu waze te matayiza umwenemwene “ni uwahililo,” alioze makokoloka muze ufulielo wo maweseka. (Tanga Mateu 13:3-6, 20, 21.) Kota atu jacho kakanyingike ngwo, mapalika mu yihungumiona ha kukaula Yesu. (Mateu 16:24) Hanji kanyongene ngwo, mwono wa akwa-Kristu kuushi yipikalo, uli upema wika. Alioze, yetu eswe twakupinda mumu tuli hano hashi hapi. Kashika, ha mashimbu amwe, uwahililo wetu muhasa kutoka ha mukunda wa yuma yize yakulingiwa ku mwono wetu.—Sam 6:6; Chi 9:11
Kuhengwola Yikuma Yilemu ya mu Mbimbiliya
(Samu 5:9) Mumu umwenemwene wakuhi mu makanwa jo; muchima lio munapu kupiya wika; miliwu yo yinapu ngwe mafuka awashi; kakupepieka ni malimi jo.
it-2 1004
Fuka
Ha A-Roma 3:13, postolo Paulu kanatongola maliji ali ha Samu 5:9. Iye kanatesa miliwu ya atu api ni “fuka lia washi.” Chizechene ngwe fuka lize lili lia washi akulizachisa hanga afunde afu, miliwu ya atu api yakuhanjika yuma yize muyihasa kushiha ni kalimbalimba.—Tesa ni Mat 15:18-20.
(Samu 7:1-11) Yehova Zambi yami, muli yena naswama; ngulamwine kama kuli waze eswe akunguhungumiona, ungupulule. 2 Kuchina mapapulula mwono wami ngwe ndumba, ni kuusonya tuyipinji shimbu kukushi niumwe wa kungupulula. 3 Yehova Zambi yami, nyi hinalinga chino chuma; nyi nguli ni uhenge mu moko jami; 4 Nyi hinalinga chipi kuli yoze watwama ni sambukila kuli yami, (pundu hinapulula yoze halipwisa mukwa kole yami ni chitela chakuhi) 5 Nyi chocho, tayiza mwe mukwa kole ahungumione mbunge yami ayimbate, ewa umutayize kuliachila mwono wami hashi, ambile ulemu wami mu fufuta. (Litulike.) 6 Katuka kama Yehova ni utenu we; katuka mumu ha ufwatulo wa akwa kole jami: ulaule kama hali yami; yena hiwasela upatwilo. 7 Chocho chikungulwila cha atu muchikujingilika. Hali ayo uhiluke mwilu. 8 Yehova kumakapatwila e atu. Ngupatwile kama Yehova nikulita ni ululi wami, ni kutuwika chami chize chili muli yami. 9 We ungulungulu wa atu api ukahwe kama, alioze jikijisa mwe mukwa ululi; mumu mwe Zambi ya ululi kakweseka kunyonga cheswe cha mbunge. 10 Lukepwe wami wa kuli Zambi, yoze wakulamwina waze analulama mu mbunge. 11 Zambi iye ngaji ya ululi; kakutenuka ni atu api tangwa ha tangwa.
19-25 FEVEREIRO
YIKUMA YILEMU YA MU LIJI LIA ZAMBI | MASAMU 8-10
“Mungukuhalisa Yehova Ni Mbunge Yami Yeswe”!
(Samu 8:3-6) Shimbu mungutala malilu, che chitanga cha minwe ye; kakweji ni matongonoshi aze wakolesele; 4 Mutu kuchi apwa mba ukamunyonge yena? Hanji mwana mutu, kuchi apwa ukamunangise? 5 Mumu hiwamupwisa kushi lia angelo hakepe wika. Hiwamwaha chipangula cha uhenya ni ulemu. 6 Hiwamwaha chiyulo ha yitanga ya moko je; hiwasa yuma yeswe kushi lia yiliato enyi.
Lemesa Chihela che mu Usoko wa Yehova
6 Yehova kanakatululiekela chihela chipema. Shimbu te kanda achitanga lunga mutangu, Yehova yaluliekela atu hashi. (Yombi 38:4-6; Jer 10:12) Mumu lia zango ni kupwa chihanyi, Yehova yasa yuma yinji yipema hano hashi hanga yituvwise kuwaha. (Samu 104:14, 15, 24) Ha yisuho yeswe yize Zambi ahwimine hanga atale yitangiwa yenyi, ‘kayimwene ngwenyi yinapeme.’ (Upu 1:10, 12, 31) Mba asolole ngwenyi atu kali alemu chinji, Yehova yaaha “chiyulo” helu lia yuma yeswe yipema yize atangile hano hashi. (Sam 8:6) Upale wa Zambi uli ngwo, atu angunu akawahilile ku miaka ya mutolo ha kufunga yuma yeswe yipema yize atangile hano hashi. Shina wakusakwilila Yehova mashimbu eswe ha chilakenyo chino chipema?
(Samu 9:1) Mungusakwilila Yehova ni mbunge yami yeswe. Mungwambujola yitanga ye yeswe ya kukomwesa.
Shina Wakuwahilila ha Yawana Yize Zambi Hanatwehe?
10 Kuli majila anji akusolwelamo ngwo, twakulemesa chawana chino, kuhanjika. Jila yimwe, yili kwambujola kuli atu waze akutayiza ngwo, Zambi katwamineko. (Sam 9:1; 1Pe 3:15) Atu waze akukalila longeso liakwamba ngwo, yuma yalitangile yene, kakuzanga kutupiangula hanga ni yetu tutayize ngwo, hashi ni yuma yeswe yize yatwamaho yalitangile yene. Nyi ayo mazanga kutupanjika, mutuhasa kwatangila mu Mbimbiliya ni yimwe yikuma ya Kaposhi yono tunalilongesa, hanga tukalile Tata yetu wa mu malilu ni kwakwasa hanga anyingike mumu liaka yetu twakufuliela ngwetu, Yehova mwe watangile malilu ni hashi.—Sam 102:25; Iza 40:25, 26.
(Samu 9:2) Munguwahilila, mungulikwiza muli yena. Mungwimba uhaliso ku jina lie, yena mwe Chitunda.
“Shina Uli Chilweza Chipema . . . ha Kuhanjika?”
13 Imba miaso ni mbunge yeswe. Muze tunembi ha kukunguluka, nyonga lietu liatamba kupwa lia kuhalisa Yehova. Pangi Sara kakunyonga ngwe kanyingikine kwimba kanawa. Alioze, kakuzanga kuhalisa Yehova ni miaso. Mba achilinge, iye kakululieka miaso ku zuwo muze analulieka yihanda yikwo ya kukunguluka. Kakulianga kwimba miaso ni kutala chize maliji a miaso yacho analite ni yikuma yikwo ya kukunguluka. Mwene yamba ngwenyi: “Yino yakungukwasa kulihulikila ha maliji a mwaso hi ha chize ko ngunembi.”
Kuhengwola Yikuma Yilemu ya mu Mbimbiliya
(Samu 8:3) Shimbu mungutala malilu, che chitanga cha minwe ye; kakweji ni matongonoshi aze wakolesele;
it-1 664
Minwe
Kanji-kanji, Mbimbiliya yakwamba ngwo, Zambi kalingile yuma yimwe ni minwe yenyi ngwe kusoneka kumi lia shimbi ha mawe (Kut 31:18; Shi 9:10), kulinga yikomokeso (Kut 8:18, 19) ni kutanga malilu (Sam 8:3). Muze Mbimbiliya yakutongola minwe ya Zambi hakutwala ku yuma yize iye atangile, yakuhanjika hakutwala ku spiritu yenyi yisandu (ruʹach “spiritu”) ngwo yapwile ni “kujingajinga helu lia meya.” (Upu 1:2) Chipwe chocho, yisoneko ya Ngreku yakutukwasa kupwa ni ulumbunwiso upema ha liji lino mumu mukanda wa Mateu wakwamba ngwo, Yesu kapwile ni kutuhwisa andemoniu “ni ukwaso wa spiritu ya Zambi.” Chikwo nawa, Luka kanatulweza ngwenyi Yesu kapwile ni kulinga chino ni ukwaso wa “munwe wa Zambi.”—Mat 12:28; Lu 11:20.
(Samu 10:1-18) Yehova, kuchi te wakumana kusuku? Kuchi te wakuswama ha tangwa lia lamba? 2 Chingulungulu mu kulengumuka chenyi kakuhungumiona mukwa luyinda: akakwachike mu kutala chenyi mwene. 3 Mumu chingulungulu kakulifwimba ha yize mbunge yakuzanga; kakuwahisa mukwa kuzo; kakulelesa Yehova. 4 Chingulugulu mu kelengumuka cha meso jenyi keshi kufupa Zambi. Mu kutaka chenyi cheswe Zambi keshiko. 5 Maliji jenyi a pami wika; upatwilo we uli kusuku nenyi mwilu chikolo; nyi akwa kulimika nenyi, kakualelesa. 6 Hanambe mu mbunge yenyi ngwenyi, chichi kukokoloka, nilimwe tangwa mungwiza kuyindama. 7 Kanwa lienyi lia too ni matuka, ni kwonga, ni kuhungumiona; kushi lia limi lienyi kwatwama uhuka ni uhenge. 8 Kakutwama ni kujikinyina hakachi ka yihunda. Kuma tenga kakushiha waze keshi mulonga. Meso jenyi kakutalatala akwa luyinda. 9 Kakutwama ku tenga ngwe ndumba mu chivwenge chenyi. Kakujikinyina mukwa luyinda. Kakukwata mukwa luyinda muze mamutanjilikila wanda wenyi. 10 Kakupunda; kakulihetamina hanga akwa luyinda akafwe ku utakame wenyi. 11 Kakwamba mu mbunge yenyi ngwenyi, Zambi hanavulama; kanaswame; keshi kumona. 12 Yehova! Katuka kama! Zambi! Olola kwoko lie; kanda uvulama akwa luyinda. 13 Kuchi te chingulungulu akulelesa Zambi? Mu mbunge yenyi kanambe ngwenyi, Kuchi kuchifwetesa. 14 Alioze yena hiwachimona, mumu kuwakumona uhuka ni kuhungumiona cha atu. Kumukachifwetesa ni kwoko lie. Mwe mukwa luyinda kakulikunjika kuli yena. Yena uli chikwashi cha ana-ashiwa. 15 Makuna kwoko lia chingulungulu. Fupa ungulungulu wa mupi ndo kushi kuwana niumwe. 16 Yehova iye mwanangana ndo ku miaka ya mutolo. Mavungu hanakuwu muchifuchi chenyi. 17 Yehova yena hiwevwa chize yimbuvu akuzanga, hiwajikijisa munge jo. Hiwasela twitwi lie kuapanjika. 18 Hanga ukalinge ululi kuli mwana-shiwa ni mukwa luyinda, hanga mukwa hashi kanda akavwisa mwongo nawa.
26 FEVEREIRO–3 MARÇO
YIKUMA YILEMU YA MU LIJI LIA ZAMBI | MASAMU 11-15
Nyonga Ngwe Uli Mu Chifuchi Chaha Cha Sambukila Ya Zambi
(Samu 11:2, 3) Mumu yingulungulu kakunana mata jo, mu milima kakupachika mwivu mu lukusa hanga akase mukwa kululama mu mbunge. 3 Muze mupuzula manguji, mukwa ululi kuchi malinga?
w06 15/5 18 ¶3
Yikuma Yilemu ya Mukanda wa Masamu
11:3—Manguji aka mapuzula? Wano kali manguji a atu a hano hashi ngwe shimbi, ululikiso ni ululi. Muze yino yuma akuyinongesa, kwakusoloka mbwanja ni kuhona ululi. Nyi mupalika mu yuma yino, iwuluka ngwe ‘mukwa-ululi,’ katamba kujikijila muli Yehva.—Samu 11:4-7.
(Samu 11:5) Yehova kakweseka akwa ululi, alioze kavwila kole yingulungulu ni waze akuzanga upupilo.
Shina Mutuhasa Kutwama mu Chifuchi Chize Kuchishi Upupilo?
Mbimbiliya yakutulakenya ngwo, kwasala hakehe hanga Zambi ahwise upupilo. Chifuchi chino chaupupilo chinashimbwila “tangwa lia upatwilo ni lia unongeso wa atu api.” (2 Petulu 3:5-7) Akwa-upupilo kechi keza kamwesa lamba atu akwo. Yika yinatwehe shindakenyo ngwetu Yehova kanazange kuhwisa upupilo?
Mbimbiliya yakwamba ngwo, Yehova keshi kuzanga atu “waze akuzanga upupilo” (Samu 11:5) Sakatanga wetu kakuzanga sambukila ni ululi. (Samu 33:5; 37:28) Kashika, iye kechi kwecha hanga atu waze akuzanga upupilo anunge ku miaka yeswe.
(Samu 13:5, 6) Alioze kunafuliela mu utu wa zango lie. Mbunge yami muyiwahilila mu ulamwino we. 6 Kumungwimbila Yehova, mumu hanalingi ni yami cha kulikomonona.
Shina Uli ni Mbunge ya Kushimbwila ni Uhumikizo Weswe?
15 Mumu liaka Ndawichi ashimbwile ni uhumikizo weswe? Iye kanatwehe kumbululo ha Samu yoyene, haze ahulile yisuho yiwana ngwenyi: “Ndo mwiji muka?” Iye yamba ngwenyi: ‘Kunafuliela mu utu wa zango lie; mbunge yami muyiwahilila mu ulamwino we. Kumungwimbila Yehova, mumu lia yiwape yize hanangwehe.’ (Samu 13:5, 6) Ndawichi kanyingikine ngwenyi, Yehova te kakumuzanga chinji kashika te manunga ni kushishika kuli iye. Iye kanyongene mashimbu waze Yehova amukwashile, chikwo nawa, kanyongene mashimbu a kulutwe muze Yehova mahwisa lamba lienyi lieswe. Ndawichi kanyingikine ngwenyi, katamba kushimbwila yiwape ya Yehova mumu yikwete ulemu nawa yafumbuka.
Wanangana Unalingi Upale wa Zambi Hano Hashi
16 Kutwama chipema. Maliji waze tunawane ha mukanda wa Izaia 11:6-9 makamanunuka pundu. Malunga, mapwo ni twanuke makatwama kanawa kwesweko maya hano hashi. Kukushi nichimwe muchikaavwisa woma. Nyonga ha mashimbu waze hashi heswe muhakapema chinji, muhasa kusana mu mangiji, mu kalunga lwiji, kunyina ha mulundu ni kwenda mu kashinde chakuhona kwivwa woma. Chipwe ha ufuku, kuuchi kevwa woma. Maliji ali ha mukanda wa Ezekiele 34:25 makamanunuka, hanga chikapwe chashi atu ja Zambi kuhasa “kutwama mu puya ni kupomba mu musenge ni chipi chakuhi.”
Kuhengwola Yikuma Yilemu ya mu Mbimbiliya
(Samu 14:1) Chihepuke kakwamba mu mbunge yenyi ngenyi, Kukushi Zambi niumwe. Hanapiha; kakulinga yitanga ya kuzelwokesa. Kukushi niumwe yoze unalingi chipema.
w13 15/9 19 ¶12
Shina Hiwalumuka?
12 Chaluyinda, musono atu anji kali ni yitanga yize-yene postolo Paulo asokene. Ayo kakunyonga ngwo kafupile kukaula shimbi ja Zambi, chikwo nawa niumwe katambile kushinjila mukwo kujikaula. Yisemi amwe ni alongeshi, kakwecha hanga twanuke alinge yize anazange kulinga. O kakwamba ngwo, kutushi kuhasa kunyingika yize yinalite ni yize kuyalitele. Kashika ayo akulongesa ngwo mutu ni mutu kali ni utuswilo wakulinga yize yinamupemena. Chipwe atu waze akwamba ngwo kakufuliela Zambi kakwamba ngwo katambile kwashinjila kukaula shimbi ja Zambi. (Sam 14:1) Kunyonga chino chapwa ponde yinene kuli Akwa-Kristu. Nyi kutwakeyele, mutuhasa kwecha kukaula usongwelo uze twakutambula mu ululikiso wa Zambi ni kuputuka kulinyenyeta ha yuma yize kayilingile chize yetu tunazange. Mutuhasa nawa kuputuka kwehuka yiyulo ya mu Mbimbiliya yize akutwaha hakutwala ku yiheho, ku zachisa internet ni hakutwala ku shikola yinene.
(Masamu 13:1–14:7) Yehova! Ndo mwiji muka mukanguvulama, ndo ku miaka ya mutolo, nyi? Ndo mwiji muka mukanguswekela meso je? 2 Ndo mwiji muka mungupukuna mu mbunge yami ya too ni chinyengo tangwa ha tangwa. Ndo mwiji muka mukwa kole yami malinangamisa helu lia yami? 3 Zewula ungwivwe Yehova Zambi yami. Pangulwisa meso jami kuchina munguya tulo twa kufwa. 4 Kuchina mukwa kole yami mamba ngwenyi, Hinamukumba, ni waze akulimika ni yami mawahilila muze mungukokoloka. 5 Alioze kunafuliela mu utu wa zango lie. Mbunge yami muyiwahilila mu ulamwino we. 6 Kumungwimbila Yehova, mumu hanalingi ni yami cha kulikomonona. 14 Chihepuke kakwamba mu mbunge yenyi ngenyi, Kukushi Zambi niumwe. Hanapiha; kakulinga yitanga ya kuzelwokesa. Kukushi niumwe yoze unalingi chipema. 2 Zambi mwilu kakutala hali ana ja atu, akamone nyi kachi kwali amwe akulinga ni mana, hanji amwe akufupa Zambi. 3 Eswe hanapianguka; hanapiha. Kukushi niumwe yoze wakulinga chipema, chipwe umuwika ka. 4 Te kanyingikine, wano eswe akulinga uhenge, nyi? Kakulia atu jami ngwe mbolo. Keshi kusanyika ha jina lia Yehova. 5 Henaho apwile ni mongwo wunji! Mumu Zambi kwali hamwe ni chisemuko cha ululi. 6 Nwakolesele sonyi yiyulo ya akwa luyinda, alioze Yehova iye chiswamo cho. 7 Nyi kachi ulamwino wa Izalele muutuhuka mu Zaione te! Muze Zambi mahilwisa ufunge wa atu jenyi, mba A-Yakomba mawahilila; mba A-Izalele mevwa chiseke.