Shina Unewuluka?

Shina watanga mitwe ya Tuposhi eswe a mwaka uno? Tala nyi muhasa kukumbulula yihula yino:

Yika chinalumbunuka “kupwisa chaha cha kunyonga” che? (Roma 12:2)

Chinalumbunuka yuma yinji hi wika ko kulinga yimwe yuma yipema. Chinalumbununa kuhengwola utu wetu wa muchima ni kwalumuna haze mutufupiwa hanga tuvwise Yehova kuwaha.—w23.01, mafwo 8-9.

Kuchi mutuhasa kupwa ni nyonga lialita muze tunamono yuma yize yinalingiwa hashi?

Hi chipi ko kulihulikila ha yuma yinalingiwa hano hashi yize yinamanununa uprofeto. Alioze, shimbu tutake yuma yize muyituhandununa, twakusa tachi hanga tuhanjike yuma yize yinakatuka mu mikanda ya mu ululikiso wa Yehova. (1 Kori. 1:10)—w23.02, lifwo 16.

Kuchi upapachiso wa Yesu walisele ni wa tumbaji twenyi?

Amu asemukinyine mu vungu lize te hilinalihane kulu kuli Zambi, Yesu kakafupiwile kulihana kuli Yehova. Iye kapwile mungunu, keshi shili. Kakafupiwile kulikonyeka ku shili.—w23.03, lifwo 5.

Yika mutuhasa kulinga hanga mandumbu anji ahane makumbululo?

Twakuhana makumbululo ehi hanga mandumbu akwo no ahane makumbululo. Chikwo nawa, tushi kulumbununa yikuma yeswe yize yili mu paragrafu ha chisuho chimuwika. Kulinga chino, ha paragrafu kusala yikuma yize akwetu makumbulula.—w23.04, lifwo 23.

“Tapalo Lisandu” lize lili ha Izaia 35:​8, hali linatale?

Tapalo lino lia chilayi, chitangu liatalile hali A-Yunda waze akatukile ku Babilonia ni kufuna ku chifuchi cho. Mba ha mashimbu jetu? Ha yimwe miaka muze te kanda tuheta ha 1919, kwalingiwile mulimo wa kulumbununa mikanda, kutuhwisa Mbimbiliya ni yikwata yikwo nawa. Atu ja Zambi kaputukile kwendela mu “Tapalo Lisandu” ni kuya mu paraisu ya ku spiritu yize yinatwale ku yiwape ya Zambi.—w23.05, mafwo 15-19.

Kapitulu 9 wa Yishima kanahanjika hali mapwo a mutapu uka?

Yishima yino yinahanjika hali “pwo chihepuke” yoze kukamba chenyi chinatwale “ku ufwa,” ni “mana amwenemwene” waze anatale hali pwo yoze kukamba chenyi chakutwala ‘mu jila ya malinjekela’ ni ku mwono. (Yishi. 9:​1, 6, 13, 18)—w23.06, lifwo 22-24.

Kuchi kulikehesa cha Yehova chasolokele muze ahanjikile ni Lote?

Yehova yalweza Lote hanga atuhuke mu Sondome ni kuchinyina ku milundu. Muze Lote etele hanga achinyine ku Zoare, Yehova yatayiza kwita chenyi.—w23.07, lifwo 21.

Yika pwo malinga nyi mukwo-lunga matala pornografia?

Iye katambile kulilamikiza. Katamba kulihulikila ha usepa wenyi ni Zambi ni kupukuna ha sango ja mu Mbimbiliya ja mapwo waze amwene lamba, mba yawana utakamiso. Iye mahasa kukwasa mukwo-lunga hanga ehuke yuma yize muyimutwala ku ponde.—w23.08, mafwo 14-17.

Muze amwe mahamika ufulielo wetu, kuchi malinjekela mahasa kutukwasa kushimbika?

Mutuhasa kumona chihula hanji kulimika chacho ngwe jila yize muyitukwasa kunyingika yize mutu wacho ananyingika ni yize akunyonga. Chino muchitukwasa kushimbika ha kukumbulula.—w23.09, lifwo 17.

Yika mutuhasa kulilongesa kuli Maria hakutwala ku kufupa utakamiso?

Muze anyingikine ngwenyi mapwa naye ya Mesaya, Maria yafupa utakamiso kuli akwo. Mungelo Gabriele ni Izabele katakamishine Maria ni Yisoneko. Ni yetu mutuhasa kuwana utakamiso kuli mandumbu jetu.—w23.10, lifwo 15.

Kuchi Yehova mahasa kukumbulula yilemba yetu?

Iye kanalakenya kupanjika yilemba yetu ni kutala nyi yinalite ni upale wenyi. (Jere. 29:12) Iye mahasa kukumbulula yilemba yalifwa mu majila alisa, chipwe chocho, nihindu manunga ni kutukwasa.—w23.11, mafwo 21-22.

A-Roma 5:2 unatongola “kutalatala,” mba mumu liaka anachitongola nawa ha versu 4?

Mutu nyi mevwa sango jipema, mahasa kupwa ni kutalatala cha kutwama mu paraisu hano hashi. Alioze, muze mapalika mu yihungumiona, manyongonona, acho kutalatala chenyi muchihasa kukola chinji ni kuchitalikisa hali mwene.—w23.12, mafwo 12-13.