Yize Muyikukwasa Kwijilila mu Chikungulwila Cheka

Nicolas ni Céline kapalikile mu kapinda mweka. Ayo katayijile chimwe chiteli chaha ku mutango wa França hanga alukile mu chikungulwila cheka. Ayo yamba ngwo: “Muze mashimbu a chiseke apalikile chapwile chikalu mumu te twakwivwa usona wa masepa jetu. Te kanda tuchipwa ni usepa ukolo ni mandumbu a mu chikungulwila chize twayile.”a Chipwe ngwe kwakupwa kapinda ha kwalukila mu chikungulwila cheka, yika muhasa kulinga hanga wijilile mu chikungulwila chacho? Yika mandumbu akwo mahasa kulinga hanga akukwase? Yiwape yika ya ku spiritu yize muhasa kutambula ni yize muhasa kuhana mu chikungulwila chize walukila?

YIKUMA YIWANA YIZE MUYIKUKWASA MUZE MWALUKILA KU CHIKUNGULWILA CHEKA

1. Fuliela muli Yehova. (Samu 37:5) Kazumi, umwe ndumbu wa pwo mu Japão, muze te halinga miaka 20 mu chimwe chikungulwila, mukwo-lunga yamutuma hanga akalakalile mu mbonge yeka, chocho iye yalukila mu chikungulwila cheka. Kuchi akunjikile “jila [yenyi] kuli Yehova”? Iye yamba ngwenyi: “Nalembele chinji kuli Yehova ni kumulweza chize te ngunevu. Napwile ni kwivwa woma, kulivwa ukawami ni kusakalala. Alioze, ha yisuho yeswe napwile ni kulemba kuli Yehova, iye kapwile ni kungwaha tachi jize te nakufupa.”

Kuchi muhasa kwokesa ujikijilo we muli Yehova? Chizechene ngwe mutondo wakufupiwa meya mba ukole, ni ufulielo wetu newo wakufupiwa utakamiso mba ukole. Ndumbu Nicolas yoze hitwatongola helu, yamba ngwenyi, nanyingika ngwami kupukuna ha yilweza ya Apalahama, Yesu ni Paulu malunga waze asele tachi jinji hanga alinge upale wa Yehova, chakolesele ujikijilo wami ha ukwaso wa Yehova. Katalilo wa longeso lia wika, kechi kukukwasa wika muze mukulingiwa chimwe kwalumuka ku mwono we, alioze kakukwasa nawa kupwa ni yitanga ya ku spiritu yize muhasa kulianyina ni akwenu mu chikungulwila chize walukila.

2. Kanda utesa chikungulwila chize wapwile ni chikungulwila chize walukila. (Chilu. 7:10) Jules kamwene kalisa munene muze akatukile ku Benim ni kwalukila ku Estados Unidos. Iye yamba ngwenyi: “Napwile ni kunyonga ngwami te mungulweza hita mutu yoze nanyingika lusango wami wa ku mwono.” Kanewuluka ngwenyi, hapwile kalisa munene ni yuma yize te hanejilila nayo, iye yaputuka kutwama ukawenyi. Hanyima lia kunyingika kanawa mandumbu, iye yalumuna nyonga lienyi. Mba yamba ngwenyi: “Ngunatayiza ngwami, kweswako mutuya hano hashi atu eswe kali amuwika. Ayo kakulinga wika yuma mu jila yalisa. Kutayiza atu ngwe chize ayo apwa chili chilemu.” Kashika, kanda utesa chikungulwila chize wapwile ni chikungulwila walukila. Anne-Lise umwe ndumbu wa pwo pionelu, yamba ngwenyi: “Chakalukile hanga nguwane yize nahichikile kunyima, alioze nalukile hanga ngunyingike yuma yaha.”

Makulwana no katamba kwecha kutesa chikungulwila cho chikulu ni chaha. Nyi mandumbu kakulinga yuma mu jila yalisa, chino kuchalumbunukine ngwo keshi kulinga yuma kanawa. Chili chilemu kunyingika chize yuma yinalingiwa mu chikungulwila chize wakukila. (Chilu. 3:1, 7b) Pwako chilweza chipema, kanda ushimbwila ngwe yuma yilingiwe kulita ni manyonga je.—2 Kori. 1:24.

3. Lihane ukwase chikungulwila chize walukila. (Fwili. 1:27) Kulihana hanga ukwase chikungulwila chakufupiwa tachi ni mashimbu, alioze chili chipema kulikungulula hamuwika ni mandumbu mu chikungulwila meso ni meso ni muchilita chize ku uputukilo. Mumu nyi ngwe mandumbu a mu chikungulwila che chaha keshi kukumona yisuho yinji, kuchi mahasa kukukwasa? Lucinda, yoze walukilile mu mbonge yinene ya África do Sul ni anenyi aali, kanewuluka ngwenyi: Kanguhele chiyulo cha kulihulikila mu chikungulwila ni kukalakala ni mandumbu mu mulimo wa kwambujola ni kuya ku kukunguluka. Chikwo nawa, twechele hanga zuwo lietu lipwe chihela cha kulingila kukunguluka cha kuya mu munda.”

Kusa tachi hanga ulinge milimo ya mu ululikiso hamwe ni mandumbu a mu chikungulwila chaha, yili jila yipema ya kukoleselamo ufulielo we ni wa akwenu. Anne-Lise yoze twatongola helu, kamukolwezele kuli makulwana a mu chikungulwila hanga eseke kwambujola hamwe ni mandumbu eswe. Mba yika yalingiwileko? Yamba ngwenyi: “Namwene ni kawashi-washi ngwami, yino yili jila yipema ya kulinunga ni akwetu.” Chikwo nawa, kulihana hanga ulinge milimo ya kukomba ni kululieka Zuwo lia Wanangana muchisolola ngwo, yena haliapwila unatayiza ngwe chino chili chikungulwila che. Muze mulihana chinji mu yuma ya mu chikungulwila, ha shimbu likehe mwopwa ni utayizo wa mandumbu ni kulivwa ngwe chihanda cha usoko waha wa ku spiritu.

4. Pwako ni masepa aha. (2 Kori. 6:11-13) Kulihulumba hali akwenu yili jila yipema ya kulikata no, kashika sako mashimbu muze kukunguluka kanda chiputuka ni muze muchihwa hanga uhanjike ni akwenu ni kwanyingika kanawa. Likolweze unyingike majina jo. Muze mwiwuluka majina jo ni kuhanjika no muchipwa chashi ayo kuzanga kukunyingika, nawa hanji muhasa kupwa sepa mupema.

Shimbu usweke utu we wamwenemwene hanga upwe ni utayizo wa mandumbu a mu chikungwila chaha, echa hanga mandumbu ene anyingike chize wapwa. Muhasa kwimbulula Lucinda yoze wambile ngwenyi: “Tuli ni masepa apema musono mumu lia kwasanyika hanga eze ku zuwo lietu.”

“LITAMBULENU UMWE NI MUKWO”

Kunjila mu Zuwo lia Wanangana muze muli atu waze kuwanyingikine muchihasa kuneha mwongo kuli amwe. Kuchi mutuhasa kukwasa waze akwiza ku kukunguluka ha chisuho chitangu? Postolo Paulu katukolwezele ngwenyi: “Litambulenu umwe ni mukwo ngwe chize Kristu anutambwile.” (Roma 15:7) Ha kwimbulula Kristu, makulwana a mu chikungulwila mahasa kukwasa waze achili aha alivwe kanawa. (Tala mushete, “Yize Muyikukwasa Kulivwa Kanawa Muze Mwaluka?”) Alioze yetu eswe mu chikungulwila, kuchingako twanuke, mutuhasa kukwasa mandumbu waze alukila mu chikungulwila chetu hanga alivwe kanawa.

Kutambula akwetu chinachingi kwazumbula, ni kwakwasa ha yize mafupa. Ngwe chilweza, umwe ndumbu wa pwo, kasele mashimbu hanga aye ni kusolwela mukwo mbonge ni kumulweza kuze akukwachila mashinyi. Yize ndumbu wacho alingile yakwashile chinji mukwo kulivwa kanawa.

UHASHI WA KUKOLA

Muze mapasu anayi ni kukola, kakulizununa ha yisuho yinji shimbu kanda azulula malumbi jo hanga ahumuke. Chizechene nawa, muze mwalukila ku chikungulwila chaha yena mufupiwa kumbila chuma cheswacho chize muchikukwika kwazulula malumbi je hanga uhumuke mu mulimo wa Yehova. Nicolas ni Céline yamba ngwo, “kwaluka chili fumbo linene.” “Kwijilila ni atu eka ni yuma yalisa chatukwashile kupwa ni yitanga yalita.” Ndumbu Jean-Charles, yoze twatongolanga ku uputukilo kanalumbununa chize usoko wenyi wayukile: “Kwalukila mu chikungulwila cheka chakwashile ana jetu kukola ku ufulielo. Hanyima lia tukweji akehe wika, mwanetu wa pwo yatayiza kulinga yihanda ha kukunguluka cha hakachi ka poso, mwanetu wa lunga yapwa mukwa-kwambujola yoze kanda amupapachisa.”

Mba yika mulinga nyi ngwe kushi ni uhashi wa kwalukila kuze kunafupiwa ukwaso? Shina muhasa kuputuka kukwasa kuze uli ha kukaula majila waze twatongola helu? Jikijila muli Yehova, lihulikile ha milimo ya mu chikungulwila, lihane hanga ukalakale ni mandumbu akwo mu mulimo wa kwambujola ni kulikata ni masepa aha hanji kukolesa usepa ukulu. Muhasa nawa kukwasa mandumbu aha waze anafupiwa ukwaso. Zango liakusolola Akwa-Kristu amwenemwene, kashika kulinga chino, muchikukwasa kukola ku ufulielo. (Yoa. 13:35) Muhasa kupwa ni shindakenyo ngwe Yehova kanawahilila ha tachi jize wakusa.—Hepre. 13:16.

Chipwe ngwe hi chashi ko kwaluka, nihindu Akwa-Kristu anji kakuhasa kuchilinga, kashika ni yena muhasa kuchilinga! Anne-Lise yamba ngwenyi: “Kwalukila ku chikungulwila cheka changukwasa kupwa ni masepa anji.” Haliapwila, Kazumi katayiza ngwenyi: “Kwaluka muchihasa kukukwasa kumona ukwaso wa Yehova mu jila yize te kanda uchimona kama.” Mba Jules yamba ngwenyi: “Masepa waze nguli no haliapwila, kakungukwasa nguhone kulivwa ukawami. Haliapwila ngunalivu ngwami nguli chihanda cha chikungulwila chami chaha, muchipwa chikalu kututuluka cheka.”